زمااااااااااااااااااااااااااااااااان .. و أنا طفل صغنن .. تم إتهامي بحاجة

زمااااااااااااااااااااااااااااااااان .. و أنا طفل صغنن .. تم إتهامي بحاجة معينة .. و عشت مصدقها فترة طويلة جداً .. لحد ما فهمت إنه كان إتهام باطل .. و إني صدقته .. فقط لأني ماكنتش فاهم كويس .. .. تم إتهامي ب ( إني باحب أكسّر لعبي , و ماستريحش غير لو كسرت أى لعبة عشان أشوف جواها إيه ) .🤣 و علي مدار سنين طويلة .. أهلي كانوا بيتذكروا الموضوع ده بشكل مستمر .. و إزاي إن ده كان دليل علي إني ( مهندس من صغري ) .. .. في حين إن الحقيقة .. مختلفة جداً .. جداً .. و مهمة .. جداً جداً جداً . … سبب التهمة دي .. هو إن علي مدار سنين طفولتي ( لحد 10 سنين تقريباً ) .. كان أهم ممتلكاتي في الحياة كلها هي ( شنطة اللعب 😅) .. دي كانت عبارة عن شنطة سفر ضخمة قديمة .. و فيها .. كنت باجمّع كل شيء و أى شيء بيتم الإستغناء عنه في البيت .. ( أشلاء جهاز قديم مكسور , غطيان علب زبادي , غطيان أزايز كولا , أقلام جاف فاضية , … و غيرها ) . و طبيعي جداً .. إن الشنطة دي كانت بتضم أى لعب مكسورة في البيت .. و لما كنت في أولي إبتدائي ( 7 سنين تقريباً ) .. بابا و ماما إشتروا ليا و لأخويا أول ( ميكانو ) .. اللي هي عدة مسامير و مفك و مفاتيح و صواميل .. و بيتبني بيها حاجات دي .. و بعد أقل من شهر .. كنت فرضت سطوتي بالكامل علي الميكانو ده .. و تقريباً احمد أخويا مامسكش مفك في حياته من يومها 🤣 . المهم .. تم إضافة قطع الميكانو لشنطة اللعب بتاعتي .. و أصبح روتين يومي مقدس في حياتي .. هو إني يومياً أروح أشد شنطة اللعب من تحت البوفيه .. و أفتحها و أقعد قدامها في الأرض .. و أعيش لمدة ساعتين أو 3 ساعات بافك و أركب أى حاجة فأى حاجة 😅 . . و قسماً بالله العلي العظيم .. ما زلت فاكر أغلب محتويات الشنطة دي و ريحتها و شكلها و تفاصيلها بكل وضوح حتي الآن . … لما وصلت ( أولي إعدادي - 11 سنة ) .. كنا نقلنا لشقة جديدة .. و تم قسراً نزع ملكية شنطة اللعب دي مني .. و إقناعي إني ( كبرت ) عالكلام ده خلاص … و إترمت مع ما تم الإستغناء عنه🥹🥲😭 و رحنا شقة جديدة .. و هناك .. بدأت ألاقي نفسي باجمع مقتنيات جديدة .. ( كالمعتاد أشلاء أى جهاز بيتم الإستغناء عنه , أى قلم فاضي , أى قطعة بلاستيكية مالهاش معالم , … و غيرهم ) .. و لكن المرة دي ماكنتش باجمعهم في ( شنطة لعب ) .. و لكن في أدراج مختلفة في أنحاء الشقة .. .. لحد ما إستقليت بغرفة منفصلة بيا ( في سن أولي ثانوي ) . .. و علي مدار السنين من أولي ثانوي ل تانية كلية تقريباً .. تحولت غرفتي ل محراب خاص .. أبويا و أمي كانوا بيتحاشوا الإقتراب منه 🤣🤣 . .. و عشت أسير إتهامات من نوع جديد ( إني فوضوي , عشوائي , بوهيمي , أعشق الحياة في كوم الزبالة اللي إسمه أوضتي 🤣 ) . و أبويا لحد النهاردة دايماً بيفتكر إزاي إنه كان بيخاف يدخل أوضتي لأن كان دايماً بيبقي في أسلاك كتير نازلة من السقف هو مش فاهم مين فيهم بيوصل كهربا و حي .. و مين لا 🤣🤣🤣🤣🤣🤣 … قبل تالتة كلية .. كنت قررت إني أروح أسكن في أسكندرية جنب الكلية .. و بالتالي .. كان مرحلة النقل من ( أوضتي = محرابي الخاص ) .. و ما زلت فاكر كويس جداً جداً جداً .. إزاي إني فضلت أجمع كل قشاية في الأوضة حرفياً .. في أكياس و أرتبهم و أعنونهم . .. لاحظ إني في الوقت ده كنت في تالتة كلية .. يعني 20 سنة تقريباً .. و إكتشفت إني محتفظ بالعديد و العديد من ( مقتنياتي ) من سن 11 سنة .. من أول ما نقلنا الشقة الجديدة .. .. حاجات فضلت مركونة فأماكنها لمدة 9 سنين .. ماتمش إستخدامها إطلاقاً .. أقلام فاضية .. أشلاء أجهزة مكسورة .. أسلاك مقطوعة .. عبوات بلاستيكية فارغة .. مسامير من كل شكل تتخيله و غيرها من ال ( زبالة ) .. .. و مع ذلك .. كل قطعة منهم .. كنت فاكر هي إيه .. و فاكر في عقلي ال ( مبرر ) إني أحتفظ بيها ليه .. و إزاي إني كنت شايف إن ممكن يكون لها إستخدام معين .. و إني لو رميتها دلوقتي .. حاندم في المستقبل . … و علي مدار يوم كامل .. لميت كل ال ( زبالة ) دي فأكياس .. و حطيتهم في دُرف دولاب قديم في شقتنا .. … و رُحت عشت في إسكندرية سنة كاملة .. و عملت محراب جديد ليا هناك .. كنت ساكن في ( الواي ) في الأزاريطة في أوضة لوحدي . ** كنت باجري إمبارح في إسكندرية .. و رحت وقفت تحت أوضتي هناك إمبارح .. و ده اللي فكرني بالكلام ده 😅 … و رجعت بعد السنة دي لشقتي .. لأوضة جديدة .. و محراب جديد .. و تعدي السنين و السنين .. و أسكن بعدها في شقق كتير .. و أمتلك أكثر من مكتب .. فأكثر من مدينة .. فأكثر من دولة .. و … و فكل مرة .. و لحد النهاردة .. ألاقي إن نفس ال ( روتين ) بيتكرر بحذافيره .. و أى مكان ( أعشش ) فيه فترة من الزمن .. ألاقي إني باجمّع أى شيء و كل شيء .. و صعب جداً جداً إني أرمي أى حاجة أو أستغني عنها .. … ده إسمه ( Hoarding = يعني متلازمة تجميع كل شيء بشكل مرضي و عدم القدرة علي الإستغناء عنها ) . … ال ( Hoarding ) أحد أشهر أعراض ال ( ADHD) .. و زيه زي أى أعراض إختلاف عصبي تاني ( Neurodivergence ) .. بيكون ( درجات = Spectrum ) .. يعني في اللي زيي .. و في اللي أقل مني .. و في اللي أعلي مني بكتير لدرجة إنه مابيعرفش يرمي المناديل اللي بيستخدمها لما بيعطس و ينف 🤣 . … سبب ال ( Hoarding ) الأساسي .. هو نفس سبب معظم مشاكل الناس اللي عندهم ( ADHD ) .. و هو ال ( ذاكرة ) .. .. زي ما شرحت فبوستات كتيييييير قبل كده .. الناس اللي عندهم ( ADHD) ذاكرتهم بتشتغل بشكل مختلف عن الإنسان العادي .. .. الإنسان العادي عنده ذاكرة قصيرة المدي بيقدر يعتمد عليها معظم الوقت .. و ذاكرة طويلة المدي بيلجأ لها لتخزين الحاجات المهمة فقط .. .. في حين إن الإنسان ال (adhd ) ماعندوش تقريباً ذاكرة قصيرة المدي .. فبالتالي .. كل إعتماده طول الوقت .. بيكون علي الذاكرة الطويلة المدي .. اللي هي صعب جداً إنك تخزن حاجة فيها .. و لكن لما بتخزن حاجة فيها .. صعب جداً جداً جداً تنساها . .. و بدون فهم أو وعي لأبعاد و تفاصيل ال ( ADHD ) .. الطفل ال ( ADHD ) بيبدأ من صُغره يعتاد إنه دايماً ( خايف ) .. خايف ينسي .. لأنه طول الوقت بيكون مُتهم من كل اللي حواليه بإنه ( مهمل , مٌقصر , شقي , لعبي , … ) .. فبيبدأ يتكوّن جواه خوف فطري إنه ( ينسي ) .. و نتيجة لكده .. بيبقي عايز يحتفظ بأى شيء و كل شيء يقدر عليه .. بنفس الطريقة اللي هو عايز طول الوقت يحتفظ بكل حاجة في ذاكرته طويلة المدي ( لأنه ماعندوش ذاكرة قصيرة المدي ) .. فبيبدأ يعتاد إنه ( يجمّع = Hoard ) أى حاجة مادية قدامه بنفس الطريقة .. لأنه خايف ييجي وقت يحتاجها .. و مايلاقيهاش .. … يعني بيعامل أوضته .. بالظبط زي ما بيعامل عقله .. أى حاجة بيجمعها و يحتفظ بيها .. لأن عقله برضو .. ماعندوش القدرة علي إختيار أنهي تفاصيل يركز عليها أو يحتفظ بيها في ذاكرته طويلة المدي . .. و كتيييييييير بيعيشوا حياتهم و يموتوا بدون ما يفهموا أسباب تصرفاتهم دي .. ليه محتفظ بكل الزبالة دي ؟! ليه محتفظ بكل الحُطام و الأشلاء دي ؟! .. و طبعاً .. و لأن كل قطعة من ال ( زبالة ) دي .. موجودة بشكل واضح في ذاكرتنا طويلة المدي .. أى ظرف بيحصل .. و تحتاج ( مسمار , صامولة , حتة بلاستيكة علي شكل مربع معضوض من الزاوية مثلاً 🤣 , .. ) لأى سبب مهما كان في حياتك .. حتلاقيني فاكر كويس جداً القطعة دي فين .. و حالاقيها .. و حيتم إستخدامها .. و حاستمتع بنظرات الإعجاب و الإنبهار من كل اللي حواليا إزاي إني ( عبقري , مهندس بالفطرة , … ) و كل الكلام ده 🤣 . . في حين إني ( لا عبقري , ولا مهندس بالفطرة , .. و لا أى بلح ) .. كل ما في الأمر .. إني عقلي مابيقدرش يميز إطلاقاً بين الزبالة و بين الحاجات المهمة .. و بيحتفظ بكل حاجة في الذاكرة طويلة المدي .. و بيخليني أحتفظ بكل حاجة في صناديق و دولايب أوضتي .. و لما بتصدف ( زي ما طبيعي إنها تصدف ) .. و يحصل ظرف و نحتاج حاجة من الحاجات دي .. بالاقيها بسهولة .. . و رد الفعل الإيجابي الناتج عن ده ( Positive feedback ) بيخلي الموضوع أصعب إنك تشوفه ك ( مشكلة ) .. أو ( عرض لإختلال ) حقيقي محتاج تفهمه بعد كده . … … البوست كالمعتاد طوّل جداً .. و الحقيقة إني كل ما سبق المفروض إنه كان حيبقي مجرد ( مقدمة ) 🤣 . عشان أشرح بعد كده إزاي إننا ( الناس اللي عندهم ADHD ) كمان بنجمّع ( أفكار و مشاعر ) .. و إننا زي ما إحنا محتاجين دايماً نكون أكثر وعي من الإنسان العادي .. و ننضف أوضنا و مكاتبنا أكتر .. و نتعلم نستغني عن ال ( زبالة ) .. حتي لو عقولنا كانت بتحاول تقنعنا إنها مهمة . . نفس الموضوع بالنسبة لل (أفكار و المشاعر ) .. . و كنت بعد كده حاشرح إن ده بيخلينا أكثر قدرة بعد كده علي التمييز بين المهم أوي .. و العادي .. أكثر من الإنسان العادي . . و لكن ححاول أفتكر أكتب عن ده تفصيلياً في المستقبل ( إن تذكرت 🤣) . … … أنا بريء من تهمة إني ( كنت دايماً باحب أكسر لعبي ) 🤣 . أنا كنت مجرد طفل .. عنده ( ADHD ) . … و الله أعلم .