أواخر سنة 2008 .. إقتنيت تاني موبايل في حياتي ..

أواخر سنة 2008 .. إقتنيت تاني موبايل في حياتي .. ( Nokia N95 8GB) … أول موبايل إقتنيته في حياتي أساساً كان ( Sony Erricson K300i) بعد دخولي الكلية بشهر واحد .. سنة 2006 . .. مهما أوصف من مشاعري تجاه الموبايل ده وقتها ( النوكيا ) .. مش حيوصل لجزء من الحقيقة .. .. زمااااااااان .. قبل عصر الأندرويد و الآيفون .. عالم الموبايلات كان مختلف بالكامل عن دلوقتي .. أنا من الجيل اللي تزامن فيه إنتشار الموبايلات مع دخوله الكليات ( فترة بداية الشباب ) .. .. كل فترة بيبقي في جيل بيتزامن بداية شبابه مع علامة فارقة في الحضارة .. . و أنا طفل مثلاً .. كنت باشوف جيل الشباب التسعيناتي ( أحمد عبد العزيز , وائل نور , شريف منير , .. ) و غيرهم .. إنهم الشباب اللي عاصروا إنتشار شرايط الكاسيت في عزها .. . و لكن والدي مثلاً ربنا يبارك له .. كان دايماً بيكلمنا بحنين عن الفترة اللي قبل دي .. الفترة اللي أنا ماعيشتهاش .. و ذكرياتي كلها عنها ذكريات ( أبيض و أسود ) !! .. اللي هي فترة الشباب في أواخر السبعينات بدايات التمانينات .. اللي علاماتها كانت عبد الحليم حافظ و نهايات الأفلام الأبيض و الأسود .. . و منين ما كنا بنركب العربية مثلاً مع بابا رايحين أى رحلة أو مشوار .. و كان يشغل الراديو علي إذاعة الأغاني .. و يستمع بكل حنين و إنفعال ل ( أم كلثوم , عبد الحليم , كارم محمود , … ) .. كنت أنا بابقي عايز أطلع دماغي برة الشباك من إستيائي و تأففي من الأغاني دي 🤣 . . دلوقتي .. و فأى مشوار طويل باحتاج إني أكون أنا اللي سايق فيه .. البلاي ليست بتاعت الأغاني و الموسيقي بتاعتي .. 90% منها محتواه تم إنتاجه بين ( 1995 ل 2010 ) 😅 . . كل أغنية أو موسيقي من البلاي ليست دي .. و لها ذكريات في عقلي .. و شعور ضخم بالحنين للفترة دي من عمري ( نهاية الطفولة - بداية الشباب ) . . بالاقي نفسي باستمع للأغاني دي .. و أدندن معاها .. و حافظ منهم كتييييييير جداً .. بنفس الإستمتاع و الإنفعال و الحنين اللي والدي ربنا يحفظه بيظهره .. لأغاني ( أم كلثوم و عبد الحليم ) ! . . في حين إن أى حد راكب معايا العربية .. و لكنه ماعندوش الذكريات مع الأغاني و الموسيقي دي .. بيكون علي وشه نفس مظاهر الإستياء و التأفف اللي كانت بتبقي علي وشي لما باسمع الأغاني اللي علي ذوق والدي 😅. … ذكرياتي بالنسبة لفترة ( 2005 ل 2009 ) .. جزء ضخم منها مرتبط بالموبايلات في بداية إنتشارها .. و إزاي قضيت شهور و شهور أدرس كل تفصيلة صغيرة في برمجيات الموبايلات النوكيا وقتها ( كان نظام تشغيل إسمه symbian ) .. و شهور قضيتها بين المنتديات في بدايات عصر الإنترنت .. أدور علي كل آداة تمكنني من عمل شيء جديد في الموبايل . . و كل خميس .. أقابل أصدقائي .. و بكل فخر أعلن :

• أنا نزلت ويندوز 95 علي الموبايل 🥳 .
• أنا حولت الموبايل من زراير لتاتش عن طريق الكاميرا ( gestures ) قبل ما تبقي ( cool ) .. الكلام ده كان سنة 2009 😎😎😎 .
• أنا عملت أمبليفاير ( مكبر صوت ) يكبر صوت السماعات بنسبة 250% عشان أغطي علي صوت دوشة القطر 🤣🥳🥳🥳🥳 ( سنة 2009 برضو ) … و كنت بامشي بأسلاك طالعة من جيوبي والله العظيم . . قبل الموبايل النوكيا ده أساساً .. فاكر والله إني فضلت منتظر شهرين في إجراءات مفاوضات عشان أشتري ( كابل إنفرا - آشعة تحت حمراء ) .. لأن موبايلي الأولاني ( السوني إريكسون ) .. ماكنش فيه بلوتوث .. و كانت وسيلة النقل الوحيدة منه و إليه .. هي عن طريق تقنية الآشعة تحت الحمراء ( إنفرا ريد ) . . و إزاي فضلت لمدة شهرين أتفاوض و أبحث .. لحد ما وصلت لشخص بيبيع الكابل ده في مدينتي مستعمل .. و يوم ما إمتلكته .. رجعت و قضيت ليلة كاملة بدون نوم أبحث عن كل وسائل و إمكانيات الكابل ده مع جهاز الكمبيوتر الخاص بيا وقتها .. . و قضيت 3 أيام بعد كده أدرس برامج ضغط الصوت و الأغاني و إمكانياتها .. لأن ذاكرة موبايلي ده كانت ( 12 ميجا فقط ) .. و بالتالي .. كان لازم أعرف إزاي ممكن أضغط الأغنية اللي مساحتها 4 ميجا .. عشان تكون أقل من 500 كيلو .. من غير ما أبوظ الجودة قدر الإمكان . . و ده عرّفني علي كمية معلومات عن عالم هندسة الصوت , و الترددات و الفلاتر .. إستخدمتها بعد كده بسنيييييين .. أثناء ما بقيت شغال علي مشاريع كبيرة في المونتاج و الميكساج 🤣 . … كمية الذكريات اللي عقلي إسترجعها مباشرة خلال الدقائق اللي شفت فيها الفيديو اللي في الكومنت الأول ده .. مهما كتبت عنها بوستات .. مش حيكون كفاية .. . ذكريات سنين كاملة .. حاحتاج سنين قدها فقط عشان أحكيها .. و سنين أكتر .. عشان أتكلم عنها … أنا عارف إن الجنة فيها ما لا عين رأت ولا أذن سمعت ولا خطر علي قلب بشر .. و لكن من أمنياتي في الجنة ربنا يرزقنا إياها .. إني أقدر أشوف الذكريات دي تاني بكل تفاصيلها … . . الفيديو اللي أثار ذكرياتي و مشاعري دي كلها فأول كومنت .