إجابة علي السؤال المتكرر : ( إنت بتكتب كده إزاي

إجابة علي السؤال المتكرر : ( إنت بتكتب كده إزاي ؟! 🤨🧐🤔 ) . … السؤال هنا مش بيكون المقصود بيه في المعتاد مدح قدرتي الخزعبلية في إستخدام اللغة مثلاً .. إطلاقاً .. أنا أساساً متبني اللغة ال” حلمنتيشية = العربية المصرية العامية أوي يعني 🤣 ” بشكل شبه كامل خلال آخر 10 سنين تقريباً فكل ما أكتبه . … و برضو ماعتقدش إن السؤال له علاقة بإني ( جامد زوحليقة ) في كتابة القصص مثلاً .. بالعكس برضو .. ك إنسان عايش و متعايش مع دماغي ال( ADHD ) .. فأنا فاهم إن أحد أبعد المجالات عن قدراتي الطبيعية .. هي ( حكاية و كتابة القصص ) .. و ده لأن كاتب القصص الماهر .. المفروض يكون زي المرشد السياحي الجامد أوي .. اللي ياخدك من إيدك .. و يمشيك فرحلة داخل عالم كامل .. بحيث إن في الآخر ماتحسش إنك تهت مكانياً أو زمانياً … أو بين أحداث و عوالم و شخصيات كتير إنت مش فاهم علاقتهم ببعضهم إيه . . لكن .. في دماغي أنا .. كل حاجة و أى حاجة موجودة طول الوقت و كل الوقت و بينهم علاقات ببعض . فبالتالي .. أى محاولة مني إني ( أحكي ) قصة .. لازم تبقي محدودة جداً .. و مختصرة جداً .. و قصيرة جداً .. لأني بابذل مجهود ضخم و جبار فإني ماتكلمش عن كل شيء فدماغي له علاقة بالقصة دي . و دي مش حاجة سهلة إطلاقاً .. و تقدر تسمع لأى إنسان ( دماغه شبه دماغي ) و هو بيحكي قصة ما .. بدون ما يكون إتدرب زيي علي إزاي يعمل ( Masking = يلبس قناع إنه إنسان طبيعي يعني 🤣 ) .. و حتلاقيه بياخدك في رحلة مكوكية بين 14 قصة مختلفين في دقيقة واحدة .. و يتوهك .. و يتوه معاك .. و في الآخر ينسي هو كان بيحكي ليه أساساً 🤣🤣 . … السؤال بتاع ( إنت بتكتب كده إزاي ؟! ) .. علي حسب فهمي … أعتقد دايماً بيسأل عن : قدرتي علي ترتيب بعض الحاجات اللي مش مترتبة . . و في الأغلب الحاجات دي ترتيبها بيكون في سياق ( فطري , ديني , عقلي , منطقي , عاطفي , واقعي ) . … يعني : ( العالم كل ما بيتقدم الزمن .. كل ما التوهان فيه بيزيد . ) . . الجملة اللي فاتت دي .. جملة حقيقية جداً جداً جداً .. علي كل الأصعدة اللي ممكن تتخيلها .. 1- يعني .. فيزيائياً .. في حاجة إسمها ( إنتروبي ) .. و دي بتعني بالحلمنتيشي المختصر .. حالة النشاط العشوائي لكل جزيئات النظام . .. و فيزيائياً .. الكون بالكامل .. منذ لحظة ولادته .. و هو في حالة دائمة من إزدياد ال( إنتروبي ) ده .. يعني العشوائية دايماً بتزيد . … 2- و برضو علي النطاق ال ( عقلي ) .. زمااااااان .. من 15 سنة يعني 🤣 .. الناس أيام 2010 و 2011 كانت مفكرّة إنها جابت آخر العبط و العشوائية … و بعدين دلوقتي بنقول فين زمان و أيام زمان .. لأن دلوقتي العبط و العشوائية في الأفكار غير مسبوقة .. و دي حقيقة فعلاً .. و بكرة حتبقي أعبط و أكثر عشوائية من النهاردة .. و هكذا . … 3- و علي النطاق الإقتصادي .. قمة العبط و العشوائية و التوهان .. و بيزداد. 4- و علي كل النطاقات بالكامل .. و ده اللي بيتوافق بالكامل مع النصوص الدينية ( الأحاديث و القرآن الكريم ) . .. إن كل ما مر الزمااااان .. زاد التوهان .. في كل شيء . … أنا بقي .. مهندس .. 🤣 .. معلش .. أنا عارف إن الجملة دي مستفزة شوية .. و لكن أى حد درس هندسة بشكل كافي ( يعني رياضة + فيزياء + إنتاج ) خصوصاً .. حيفهم كويس جداً العلاقة بين كل اللي قلته .. و بين دراسة الهندسة . … في الهندسة .. مافيش حاجة بتتساب للصدفة .. ماينفعش .. و حتي إحتمال ال ( صدفة ) ده .. بيتحط له رقم إعتباطي مثلاً .. و نسميه ( Risk factor ) 🤣 .. و بيتم تدريبك من أول محاضرة في الكلية .. علي إنك ماتخافش من ( أسباب توهان و تعقيد ) أى منظومة .. و ماتتخضش منها .. و تفهم تدرسها إزاي . … علي سبيل المثال مثلاً : و ده والله العظيم مثال من أول محاضرة هندسة ليا في أول يوم في الكلية علي الإطلاق في إعدادي هندسة 🤣 كانت محاضرة ميكانيكا . . و الدكتور وقف علي السبورة في المدرج الضخم و قال : لو حتدرس حركة عربية مثلاً .. إنت مش حتبدي بإنك تشوف كل تفاصيل العربية الكتيييييييييير جداً .. من مسامير و صواميل و عفشة و كوينز واقعة بين الكراسي و ماتوطيش تجيبهم و إلا حتعمل حادثة 🤣 . لا .. إنت بتبدي تدرس حركة العربية .. بإنك تتخيلها ك مربع .. له سرعة ثابتة ( مش متغيرة كمان ) .. و بيتحرك في خط مستقيم . . و بعدين تفضل ماشي تدريجياً في الرحلة دي .. تزود عوامل تعقّد المسئلة تدريجياً .. تبتدي مثلاً بإنك تخلي السرعة مش ثابتة .. و بعدين تخلي العربية مش مربع .. و لكن جسم له أبعاد معقدة شوية .. و هكذا و هكذا .. . لحد ما توصل لأقصي درجة تعقيد و عشوائية ممكنة .. و اللي بيعاني معاها فعلاً أحدث أنظمة الكمبيوتر المزودة بالذكاء الإصطناعي .. و هو إنك تفترض إن اللي سايق العربية واحدة ست 🤣🤣🤣 . … علي مدار دراستي في الكلية .. عدد ضخم جداً جداً من الأنظمة المعقدة للغاية درسناها . و بحكم تخصصي طبعاً ( هندسة الإتصالات ) .. درست كم ضخم من أنظمة الإتصالات اللي بتصل القوانين و الإثباتات اللي بتشرح أبسطها .. ل أربع صفحات من المعادلات الرياضية علي الأقل 🤣 … و ف كل الأنظمة دي .. بلا إستثناء .. كان كل و أى إثبات منهم بيبتدي ب : هات صورة المنظومة فأبسط صورة ممكنة لها … و إدرسها الأول . … … يعني علي سبيل المثال .. الفيسبوك اللي إنت بتقرأ عليه كلامي ده حالياً .. آخر حلقة في سلسلة ضخمة من خوارزميات التشفير و الإتصالات المعقدة جداً جداً جداً .. و لكن .. لو فتحت كتاب ل ( كلود شانون = أحد أهم رواد عوالم التشفير و الإتصالات ) .. حتلاقي شوية أمثلة غاية في البساطة .. و تقدر تشرحها ل طفل في حضانة . .. و ما ينطبق علي الأمثلة البسيطة جداً دي . هو برضو ما ينطبق بالكاااااااااااااامل .. علي أعقد أنظمة الإتصالات و التشفير الحالية . … في عالم الرياضيات … القواعد الأصلية الأولي خاااااااااااااااالص دي .. إسمها ( Axioms ) .. و عشان تفهم يعني إيه ( قاعدة أصلية ) .. أشرح لك إن ( 1+ 1 = 2 ) دي مش قاعدة أصلية 🤣 .. لا .. إطلاقاً .. دي نتيجة فرعية جداً .. و بيتم إثباتها في صفحة كاملة علي الأقل فأى كتاب بيشرح مبادئ الرياضيات الحقيقية . .. لأن قبل ما توصل للمرحلة دي .. لازم أساساً تثبت ال ( 1 ) .. و تثبت ال ( 2 ) .. و تثبت ال ( جمع ) . . و الحقائق الأولي اللي لا تقبل أى جدل من أى نوع دي .. هي دي اللي إسمها ( Axioms ) . … فبالتالي .. في عالمنا الحالي الظريف اللطيف اللي كل يوم بينزل فيه تريند جديد و فضيحة جديدة . فأى مكان في العالم .. من أول شبرا و فيصل … لحد المعادي و سان فرانسيسكو و حوراي النرويج … وقّف أى إنسان ناضج عاقل يُحاسب عنده 17 سنة في الشارع مثلاً .. و إبدأ إسأله فأى شيء .. أى شيء علي الإطلاق . .. تتوقع كمية التوهان و العشوائية في الإجابات حتكون قد إيه ؟! . … هو غالباً ( الإنسان الناضج العاقل النرويجي ده ) .. مش عارف المفروض يمشي ورا مصلحته و يبقي شرير .. ولا يمشي ورا عواطفه و يبقي أهطل .. ولا يمشي ورا فطرته و يبقي ضحية .. ولا يمشي ورا صاحبته و يبقي سيمب .. ولا يمشي ورا صاحبه المشهور عالفيسبوك اللي بيقول له ماتكتبش قايمة 🤣.. … المدرسة بتقول له كلام .. البيت بيقولوا له كلام تاني .. و الجامع بيقول له كلام تالت خالص .. و التيليفزيون بيقول له كلام رابع جداً .. و أصحابه و الإنترنت بيقولوا له فكك و شد نفس من الجوينت ده 🤣.. … فالعالم اللي مليان توهان ده بقي .. أنا واقف .. بالظبط زي نفس وقفتي فأول محاضرة فأول يوم في كلية الهندسة .. عرقان و متبهدل بعد ساعتين مواصلات .. رحت المحاضرة متأخّر .. و واقف فآخر مكان في المدرّج جنب الباب اللي دخلت منه بالعافية للمدرّج الزحمة جداً ده . … و لكن … بعد وقفتي ب شوية .. و سمعت شرح الدكتور .. فهمت و عرفت إن التعقيد و التوهان ده كله طبيعي جداً .. و إن اللي مش طبيعي هو إن كل حاجة تبان سهلة و منطقية .. و إلا ماكنش الحياة إتبني فيها أى حاجة إطلاقاً .. … فهدأت .. و بدأت أركز في الشرح .. و بعدين .. دخل ورايا ناس تانيين .. لسة جايين جديد برضو .. و تايهين نفس التوهان .. بس مش بالضرورة عرقانين و متبهدلين من المواصلات زيي 🤣 . .. ف زي ما الدكتور كان شرح ليا البداية و فهمت .. ف بصوت واطي كده علي بروفايلي .. و علي إستحياء من غير ما حد ياخد باله 🤣 .. باشرح اللي أنا فهمته .. لعل و عسي .. حد كان تايه زيي .. يفهم .. و يشرح للي بعده … و هكذا . … لما بافكّر في الحياة .. و أشوفها بكل عشوائيتها و توهانها الحالي .. بارجع دايماً و أفكر في أبسط صور الحياة .. بدل ملايين البشر .. ب أتخيل 100 إنسان .. 100 إنسان .. لهم عقلهم .. و إحتياجاتهم .. و مخاوفهم و آلامهم و طموحاتهم .. و باسأل نفسي : أنا فائدتي إيه فوسطهم ؟! . و أطلع بشوية ( Axioms ) . .. و بعدين باتخيل حياة ال100 إنسان دول .. و لكن بشكل متكرر ( Iterations يعني ) .. عشان أتخيل حياة أقوام و أقوام عاشوا علي الأرض .. .. و بافضل ماشي بالشكل ده .. باهتدي بما أعلم من القرآن .. و أصل لما أعلم من السُنّة النبوية .. و أتخيل الحياة في أيام النبي محمد صلي الله عليه و سلم بكل تفاصيلها الممكنة .. و أطلع بشوية ( قواعد أساسية بناءاً علي ال Axioms دي ) . .. و بعد ما أعمل ده .. بارجع لزمننا الحالي .. و ألاقي إن كل ما يبدو إنه عشوائية و توهان مٌعقدين بلا أمل في الحل .. إنها كلها مجرد إكسسوارات .. كماليات .. لحظة ما العربية تعطل .. ماتركزش فيهم و معاهم .. .. و تقريباً .. أغلب الحاجات اللي باكتبها .. بتكون عن ( تعمل ده إزاي ) .. … و الله أعلم .