بمناسبة ال " برمجة " و ال " بزنس "

بمناسبة ال ” برمجة ” و ال ” بزنس ” .. و غيرهم .. شوية كلام عن اللعب .. و اللي مش لعب .

أنا بالعب جيمز كتير .. فحت .. أوي .. من أول مرة شفت فيها سوبر ماريو و أنا عندي 10 سنين .. و قفلتها ال36 مستوي و أنا في خامسة إبتدائي ( بدون شورت كاتس ) .. لحد النهاردة ..

الجيمز مش سهلة .. إطلااااقاً .. في لعب كتير بتحتاج كمية معلومات ضخمة .. فقط عشان تقدر تكون فاهم إنت بتغلب ليه و إمتي و إزاي ؟ .. و علي سبيل المثال و ليس الحصر : Command and Conquer Generals League of Legends TeamFight tactics و غيرهم كتير .. الأمثلة التلاتة دول .. من جيمز مستوايا فيهم ( بلاتينوم ) فما فوق .. يعني يُعتبر مستوي محترم نسبياً .

و بالنسبة لعقل زي عقلي .. بيكره التفاصيل فحت .. و مشتت طول الوقت .. و ذاكرة مضروبة بالنار .. إني أتعلم و أوصل لمستوي محترم في اللعب دي .. ده شيء كان بيخليني أنا نفسي أتسائل … ليه ؟! . و ده اللي خلاني درست ( Gamification + Game Design ) .. فترة طويلة .

تفاصيل كتير جداً ممكن إني أكتبها عن إزاي بتتحول حاجة صعبة و معقدة زي اللعب دي .. لإدمان نشاط أحس إني محتاج أعمله يومياً ..

و لكن خلاصة التفاصيل دي هي ال : إستمرارية .

لعبة زي فالورانت اللي الفيديو ده منها .. ضمن فئة ألعاب إسمها ( fps = first person shooter ) . و دي أكتر فئة ألعاب أنا ضعيف فيها و مابحبهاش .. لأنها بتعتمد علي سرعة رد الفعل ( الضعيفة جداً عندي ) .. و القرارات السريعة ( اللي أنا و أى حد عنده ADHD سيء جداً فيها ) .

لما بدأتها من أربع شهور .. كنت عايز أثبت إن بالإستمرارية .. ممكن علي الأقل أوصل لمستوي متوسط . و بالفعل قدرت أحقق ده بفضل الله .

بس الأهم من إني قدرت أوصل لمستوي متوسط نسبياً .. هو إني ” حبيتها ” .. و بقيت باستمتع بيها و باختارها علي ألعاب تانية من فئات أقرب لمهاراتي الطبيعية . … … زمااااااااااااااااااان في سنة أولي هندسة قسم كهرباء .. اول مرة ندرس برمجة .. دخل الدكتور و قال لنا .. إن علشان تبتدي تبقي مبرمج ضعيف علي الأقل .. محتاج تكتب كود 8 ساعات يومياً .. علي الأقل . .. ضحكنا كلنا و إتريقنا .. و لكن بعد 18 سنة تقريباً علي الكلام ده .. أؤكد إنه صح 100% .. و مش في البرمجة و بس . .. ال ( Deliberate Practice = يعني التمرين المستمر المتطور ) ده أحد الأدوات الأساسية و اللي لا غني عنها في إنك تكتسب أى مهارة بشكل يخليك أفضل من أغلبية المبتدئين . .. مهما كنت بتكره النشاط ده أو حاسس إنك ضعيف فيه . .. أى حد شاف معاناتي علي تويتش و علي مدار الأربع شهور اللي فاتوا في لعبتين معينين عمري ما كنت لعبتهم قبل كده .. زي : Valorant و Teamfight Tactics
شاف إزاي إني حرفياً كنت زي اللي بيخبط دماغه في الحيط كل يوم .. .. و لكن .. أنا جربت نفس الطريقة دي في كل شيء تاني في حياتي أنا سيء فيه و مش موهوب فيه .. و نفعت . .. و المرة دي .. كنت باسجل التجربة بالكامل ( Documenting ) كدليل و إثبات علي إن حاجات زي : ( أصلي مابعرفش , أصلي مش موهوب فيها زيك , أصلي بازهق , أصلي ” و حط أى عذر تاني ” ) .. كلها حاجات طبيعية .. و لكن لما بتتخطاها .. بتوصل لمرحلة إن المبتدئين لما يشوفوك يقولوا : ” يابن اللذينا .. عملتها إزاي دي ؟! ” … .. أنا مش ( Hard worker ) بطبعي .. و كسول جداً .. و مشتت جداً جداً .. و لكني فهمت إن لو عايز تبان و تبقي ( Hard worker ) يبقي لازم تتصالح مع إن الفشل حيصاحبك في رحلة طويلة .. أوي .. جداً .. و لكن فقط لما تصاحبه و تعتاد عليه .. و ماتتكسفش منه .. حتلاقي نجاح في الآخر .. في آى نشاط أو مجال .. .. و الله أعلم .