علي مدار فترة إعدادي و ثانوي

علي مدار فترة إعدادي و ثانوي .. كتبت كمية ضخمة من مواضيع التعبير .. و كنت باستمتع فعلاً بكتابة مواضيع التعبير .. و إني أفكر في كل الطرق الممكنة اللي ممكن أعبر بيها عن الأفكار المطلوبة بشكل جديد و من وجهة نظر جديدة .. و كان معتاد جداً بالنسبة ليا إني دايماً باجيب 9.5 من 10 علي الأقل في كل مواضيع التعبير اللي كتبتها في الفترة دي . و خلال الفترة دي .. كان جمهوري بالكامل عبارة عن ( واحدة ) فقط 😅 أختي الصغننة اللي أصغر مني ب 5 سنين .. أول فولور في حياتي أهتم بآراءها في اللي باكتبه .. أول متابع أستني تعليقاتها علي أفكاري 😆😆.. و أول واحدة كانت بتعمل شير لمواضيع التعبير بتاعتي و أفكاري و كلامي .. في مواضيع التعبير بتاعتها هي 🤣🤣 .. و كانت بتجمع مواضيع التعبير بتاعتي و تقتبس منها فكتاباتها .. و فحياتي كلها .. حاجات بسيطةجداً إدتني إحساس بالسعادة و الفخر زي كده 😆.. .. لكن اللي كان واضح جداً أيامها .. و ماكتشفتش معناه و تفاصيله غير لما كبرت .. إني كنت دايماً بانسي أنا كتبت إيه !! .. كانت تيجي فرحانة و تقول ليا إنها جابت 9.5 من 10 فموضوع تعبير .. و لما أقراه .. أُعجب جداً بيه .. و أبقي مبهور بالكلام و أسلوبها .. و هي تحلف ليا إني أنا اللي كاتب الكلام ده من سنة مثلاً .. و أنا قسماً بالله بابقي ناسي إني أساساً فكرت في حاجة زي كده !! .. .. كنا بنضحك علي ده زمااااااان .. و ماكنتش أعرف ساعتها يعني إيه ( ADHD ) .. و تأثيره علي الذاكرة .. … من دقائق .. صديق أرسل ليا بيفكرني إنه بيسألني علي بوست كتبته من فترة عن طريقة تفكير معينة بتخليني ( سوبر مان ) فنفسي .. و إن البوست إتمسح من عنده و بيدور عليه .. .. طبعاً أنا مش فاكر إطلاقاً هو كان بيتكلم علي إيه … و عملت سيرش .. و ظهر ليا البوست ده .. .. قرأته و كأني باقرأه لأول مرة .. و عجبني جداً جداً 🤣🤣 .. و قسماً بالله أنا مش فاكر إطلاقاً إني كتبته من الأساس . .. الأفكار و القناعات اللي فيه عندي بالكامل فعلاً شرحتها مراراً و تكراراً بأساليب مختلفة كتير .. و لكن التفاصيل .. قصة ( ريوكان ) دي نفسها .. موضوع المسلسل نفسه .. كل دي حاجات مش فاكرها إطلاقاً .. أو مش ( مش فاكرها ) .. الأدق إني أقول إني ( عشان أفتكرها ) .. محتاج أبذل مجهود حقيقي عشان أسترجع الجزء ده من الذكريات .. و دي حاجة إكتشفتها من فترة .. إن في فرق ضخم بين إني أكون ( ناسي ) …و بين إني مش عارف أسترجع ذكريات معينة .. و إكتشفت إني أقدر أسترجع ذكريات و تفاصيل كتييييييير .. كنت مفكر إني ناسيها .. … و لكن طريقة إسترجاع الذكريات بالنسبة للي عندهم ( adhd ) .. لها قصص أخري .. ححاول أكتب عنها تفصيلياً لاحقاً إن شاء الله .. .. لو إفتكرت 🤣