الصورة دي ( إنك راكب جنب السواق .. و ماسك
يعني إيه ؟! ..
الصورة دي ( إنك راكب جنب السواق .. و ماسك دركسيون لعبة مش بيتحكم فأى شيء تقريباً .. و عمال تعمل ب بقك فوووو .. فووووو .. و بييييب بييييب 🤣🤣 و مقتنع إنك إنت اللي سايق .. و مش عارف العربية بتتحرك بيك فين .. و ليه .. ) .. دي صورة مشتركة بين كل اللي إتكلمت معاهم و هما :
- متشخصين فعلاً ب ( ADHD ) .
- شاكين إنهم ( ADHD ) و لكن لسة ماتشخصوش . … أحد التمرينات اللي كلفت بيها كل اللي مشتركين في ( ASP - Accountability Sponsorship Program ) حتي الآن .. هي :
- تسجيل المشاعر (Feelings Logging ) . .. يعني إيه ؟! .. يعني .. في نهاية كل يوم بالليل .. مطلوب و بشكل إجباري إنهم يجيبوا صفحتين قٌدام بعض .. في الصفحة الأولي يكتبوا : دي المشاعر اللي حسيت بيها النهاردة .. و يكتبوا علي الأقل 10 مشاعر .. 10 كلمات .. من المشاعر اللي فاكرين إنهم عدوا بيها خلال اليوم .. حاجات زي : ( فرح , حزن , غضب , إحباط , إثارة , كره , حماس , نشاط , … ) أى كلمات بتوصف مشاعرهم ( بقدرتهم الحالية علي التوصيف ده ) . . و في الصفحة اللي قدامها يكتبوا : دي المشاعر اللي عايز أحس بيها بكرة .. و يكتبوا برضو علي الأقل 10 مشاعر .. حتي لو حيكرروا نفس الكلمة .. زي مثلاً : ( فرح , فخر , راحة , إستقرار , أمان , … ) . … و بعد كام يوم من الإلتزام بالدرجة الأولي دي من التمرين ( اللي هي علي الأقل 10 كلمات ل 10 مشاعر ) .. بابدأ أكلفهم ب كتابة تفاصيل أكتر .. يعني : جنب كل شعور .. يتكتب شرح ل سبب الشعور يعني : أنا النهاردة حسيت بالفرحة لأني لقيت علي كافيه بالجنسنج من غير سكر في فتح الله 😅 . و في الصفحة اللي قدامها .. و بدل ما كانوا بيجربوا طول عمرهم يكتبوا الحاجات اللي المفروض يعملوها ك ( to do list ) .. و بعدين ينسوا إنهم عندهم ( to do list ) أساساً 🤣 .. بيكتبوا : أنا بكرة عايز أحس بالراحة النفسية لما أنضف و أرتب الأوضة اللي بقالي 3 أسابيع بأجل في تنضيفها و ترتيبها 🤣 . .. و بالتالي .. اليوم اللي بعده .. لما باكتب : أنا النهاردة حسيت ب خنقة لأن الأوضة متكركبة و مليانة تراب و فوضي .. بابدأ أشوف بوضوح جداً … جداً .. مسئوليتي في إحساسي بال ( خنقة ) دي . … الموضوع ده مش بسيط ولا تافه إطلاقاً .. . الأمثلة اللي كتبتها قد تبدو مباشرة .. و لكن في أسباب أعمق بكتيييييييير جداً .. جداً .. للتمرين ده بالذات .. . خليني أشرح بتلخيص مٌخل جداً : … ال تقلبات العاطفية ( emotional dysregulation ) أحد أشهر المشاكل اللي عند الناس ال (ADHD ) .. اللي هو مثلاً فجأة و بدون أى أسباب مباشرة إطلاقاً .. إنت حسيت بالخنقة .. بالزعل .. بالفرحة .. بالإحباط .. بالإثارة و الإنتعاش .. بإنعدام كامل للثقة بالنفس … ب غرور ضخم و إنتفاخ فإعجابك بنفسك 🤣 . . و ده بشكل مباشر .. بيؤثر بالكامل علي ( إنتاجيتك , علاقتك باللي حواليك , قراراتك بشكل عام ) . . أشهر الحاجات اللي بتسبب التقلبات العاطفية المفاجأة دي هي ال ( Triggers = مُحفزات يعني ) .. . زي إيه مثلاً ؟! .. إنت ماشي لا بيك ولا عليك في الشارع .. و فجأة كشك سجاير علي رصيف الناحية التانية شغّل أغنية معينة .. فيها نغمة موسيقية ( طبلة) مدتها جزء من الثانية مشابهة لأغنية ( تعالالي يا ) بتاعت خالد عجاج .. اللي سمعت إتنين بيغنوها سنة 2001 و هما نازلين عالسلم في المدرسة للفسحة و إنت فأولي إعدادي 🤣 . ف عقلك ب سرعة البرق .. بياخد رحلة بين عدد من الذكريات المترابطة فذهنك .. لحد ما يوصل عند شعور معين .. .. و تلاقي نفسك و إنت لسة ماشي لا بيك ولا عليك .. أصبحت حالتك النفسية و العاطفية .. مليانة ب إنعدام الثقة بالنفس و الخوف و التوتر .. . و بعدين تدخل في دايرة مغلقة ( دوامة ) .. كل ما تحاول تهرب من المشاعر دي و تركز علي مشاعر تانية أو تفتكر إنت المفروض كنت نازل تعمل إيه أساساً .. تلاقي نفسك بتغرق أكتر في ذكريات و تفاصيل أعجب من العجب . … اللي حصل فوق ده كله .. بيحصل بسرعة جداً .. جداً .. و بشكل متكرر جداً علي مدار اليوم .. .. و بالظبط زي لما تكون راكب في عربية جنب سواق محترف بيسوق بسرعة جداً .. و إنت ساند دماغك عالشباك و مش باصص عالطريق قدامك .. عينيك بتتنقل بين يفط المحلات .. و الناس اللي ماشيين .. و تسرح .. و كل شوية كده تبص قدامك و تتساءل … ( هو إحنا جينا هنا إمتي و إزاي ؟! ) . 🤣🤣 … بعد سنيييييييييييين و سنييييييييييييين من الحياة بالمنظر ده .. بداية من طفولة عجيبة لحد ما تكبر و الحياة تشيلك و تحطك .. . بتوصل تبقي إنسان كبير ماشي في الحياة .. عندك كمية ضخمة من الإجابات الغلط علي الأسئلة الغلط .. . يعني إيه ؟! . يعني .. تبقي عصبي جداً في الشغل و اللي حواليك يسألوك : ( إنت إيه اللي معصبك كده ؟! .. ما تهدي يا حاج ) .. . ترد إنت بكل عنف و إنفعال .. ( أنا طبعي كده يا عم .. خٌلقي ضيق .. سيبني شوية بس حاشربلي سجارة كده و أهدي لوحدي ) !!! . … إنت فعلاً مصدق الإجابة دي .. و مقتنع بيها 100% … بالظبط زي الطفل اللي في الصورة ده .. هو مقتنع 100% إنه هو اللي سايق العربية .. … لكن في الحقيقة .. إنت راكب جنب السواق .. السواق هنا هو : مزاجك .. كيفك .. هواك .. و العربية هي : عقلك . … لحد ما تجرب .. لأول مرة فحياتك ( لو حد زيي شرح لك التمرين ده مثلاً ) .. إنك كل يوم بالليل كده .. تفتكر .. هو أنا النهاردة حسّيت بإيه ؟! .. ده بالظبط كإنك بتسأل : هو أنا النهاردة عربيتي مشت فأنهي شوارع ؟! .. … ف تاني يوم .. لأنك عارف إنك بالليل حتحتاج تجاوب علي السؤال ده .. بتبدأ تركّز .. تركز عينيك علي الطريق قدامك .. كل شوية تشوف أنهي شوارع عقلك بيتحرك فيها .. كل شوية تسأل : هو أنا دلوقتي حاسس بإيه ؟! .. و ليه ؟! … و بالظبط .. زي لما تعمل ده جنب سواق في مدينة إنت لسة جديد فيها .. تدريجياً بتبدأ تعرف السكة لوحدك .. لأن مزاجك و عقلك ( زي كل البشر ) .. بيكرروا نفس ال ( Patterns ) .. . ف بتبقي مركز إن : أنا دلوقتي حاسس ب كذا .. و زي كل مرة علي مدار الأيام اللي فاتت .. غالباً كمان شوية حاحس ب كذا .. و بعدين كذا .. و بعدين … و هكذا 😅 … بعد فترة … بتبقي خلاص إعتدت ( و إحترفت ) إزاي تلاحظ مشاعرك .. تفتكرها .. تسجلها … و تتوقعها … . لكن .. عشان تفهم إزاي تستخدمها .. و تغيرها ب نفسك .. لازم تفهم الأول هي الخريطة اللي مزاجك و عقلك بيستخدموها دي .. .إترسمت إزاي .. . يعني .. إنت ليه ذكري اليوم ده ف أولي إعدادي اللي حصل من 24 سنة .. بيسبب لك دلوقتي إنك تحس بإحباط أو خوف أو خذلان ؟! .. … … أو نفس السؤال ب شكل آخر : لو عقلك زي الرسّام .. و المشاعر زي الألوان .. عقلك بيسجل و يرسم ذكرياتك بإستخدام أنهي ألوان ؟! .. و ليه ؟! .. … و السؤال الأهم اللي ناقشت إجابته فأحد مكالمات إمبارح : ليه أكتر حاجة بتعصّب واحدة متضايقة .. هو كلمة ( إهدي ) ؟! 🤣🤣🤣 .. الأسئلة دي كلها لها إجابات مباشرة جداً في ال (Neuroscience ) بالمناسبة .. . و لكن بما إن البوست ده طوّل .. ف الإجابات دي حاوضحها في البوست اللي بعده مباشرة إن شاء الله .. … و الله أعلم .