6 نقط ... و فرحان جداً إن ( لام شمسية

6 نقط … و فرحان جداً إن ( لام شمسية ) حالياً تريند بسببهم .. … 1- لما العربية بتعطل .. كل ما كانت غالية .. كل ما بندور علي ميكانيكي محترم يفتي فيها .. و لو كانت جديدة و غالية أوي .. مابنروحش غير للتوكيل . لما اللاب بيعطل برضو .. و كل ما كان غالي .. بنروح لأكتر مكان في ناس بتفهم و نثق في خبراتهم و إمكانياتهم . .. دماغك و نفسك ( أفكارك و مشاعرك يعني ) .. أهم من أغلي عربية أو لابتوب أو أى جهاز عندك في بيتك بتطلب له صيانة من التوكيل .. فبالتالي .. مش بنكلم إنفلونسر بيكتب كلمتين حلوين عالسوشيال ميديا و يبان إنه فاهم أو متدين ( زيي كده ) .. مش بنكلم صاحبنا الخبرة المجرب المدقدق اللي بيفتي في كل شيء و أى شيء .. مش بنكلم شات جي بي تي .. مش بنكلم دييب سييك .. مش بنكلم أى بلح فأى بتنجان غير المتخصص جداً أوي خالص .. و ده اللي إسمه ( طبيب نفسي ) . … 2- الطبيب النفسي مش ساحر حيشوفك من أول جلسة حيحل كل مشاكلك و عقدك .. و مش أى طبيب نفسي ينفع لأى حد .. يعني .. ممكن جداً صديقك أو صديقتك يقول لك إنه راح يتعامل مع طبيب نفسي رائع .. و يحكي لك عنه صولات و جولات .. و إزاي إنه شايف إنه أحسن حاجة في الحياة بعد البستاشيو . لكن إنت لما تروح له .. و من أول كام دقيقة تحس إنك مش مرتاح .. مش مظبوط .. و مش طايقه . ده طبيعي .. و منطقي جداً جداً جداً .. ببساطة .. الطبيب النفسي .. زيه زي الطبيب الجسدي بالظبط .. شخص إنت بتتعري قدامه .. بس مش بتتعري من هدومك عشان يكشف علي جسمك .. لا بتتعري من أى أقنعة بتلبسها في الحياة عن قصد أو عن غير قصد .. و المستوي ده من الثقة .. بيتطلب حاجات كتير .. فبالتالي .. الصح و المنطقي و الطبيعي .. هو إن رحلتك في العلاج ( ثيرابي ) بتبتدي برحلة بحث عن الطبيب النفسي المناسب لك .. أنا شخصياً جربت 5 مختلفين .. قبل ما أستقر علي حد معين و أكمل معاه فترة محترمة . … 3- الطبيب النفسي وضعه مختلف عن وضع أى طبيب آخر .. يعني .. الطبيب النفسي ماينفعش يعتمد علي ال ( سُمعة ) في شغلانته زي معظم المجالات الأخري للطب .. ليه ؟! .. لأن زي ما شرحت في النقطة اللي فاتت .. اللي ينفع معاك و يريحك … مش بالضرورة ينفع مع غيرك و يريحه .. و الأهم هو : دي بتبقي حاجة و معلومة شخصية جداً جداً ماينفعش تشاركها غير مع أقرب الناس لك ( زوجة / أب / أم ) .. و لو الموضوع اللي إنت رايح عشانه له علاقة بحد من التلاتة دول .. يبقي إما بيكون في تنسيق مع الطرف ده .. أو مابتقولش للطرف ده .

فبالتالي .. إنت ماينفعش تسأل حد ( إنت بتروح لمين طبيب نفسي عشان أروح له أنا كمان ؟! ) .. و أنا شخصياً أغلب اللي سألوني عن طبيب نفسي أرشحه لما إتكلمت بإستفاضة عن خبرتي مع ال ( ADHD ) .. كان ردي عليهم هو نفس الرد اللي فوق ده .. و هو : روح و دور .. و أسهل طريقة ممكن تبتدي بيها الرحلة دي .. هي أبليكيشن ( شيزلونج - Shezlong ) .. و لا .. ماعنديش أى علاقة تجارية بيهم أو باعمل دعاية لهم إطلاقاً .. … 4- زي ما قلت في الكام نقطة اللي فاتوا .. ال ( ثيرابي ) .. رحلة .. رحلة بمعناها الحرفي و المجازي .. و زي أى رحلة في الدنيا .. ليها محطة بداية .. و ليها محطة نهاية .. و علي حسب مشكلتك إيه .. علي حسب المحطات دي عندك بتكون فين .. . أنا مثلاً .. عايش و متعايش مع ال ( ADHD ) .. بكل مشاكله و تفاصيله و سلطاته و بابا غنوجه .. فمثلاً : ذاكرتي كل ما أتقدم في السن و الشغل و الخبرات الحياتية .. كل ما بتبوظ أكتر .. فبالتالي .. رحلتي محطة النهاية فيها هي : قبري .. أو لو إكتشفوا علاج كيميائي يتعامل مع المشاكل دي قبل ما أنتهي لقبري .. . حد تاني مشكلته ممكن تكون متعلقة بعرض جسدي مبني علي مرض أو مشكلة نفسية .. في الحالة دي أحد محطات نهايته ممكن تكون تغلبه علي العرض الجسدي اللي عنده ده .. … 5- العلاج النفسي .. أو الوقاية النفسية .. مش شيء أخجل منه إطلاقاً .. بالعكس .. دي حاجة باكون فخور و أنا باتكلم فيها و عنها .. … إن المجتمع اللي حواليك مليان مرضي أو ناس مش فاهمة ده .. ده مايمنعكش من إنك تفهم الصح فين . … مثلاً .. أوروبا بالكامل قبل عصر الثورة الصناعية .. كان فيها الإستحمام ( إنك تاخد دش و شاور ) شيء غريب و عجيب و كل فين و فين لما بتحتاج إنك تعمله .. المجتمع الأوروبي بالكامل عاش لفترة طويلة جداً جداً جداً .. طبيعي إنك تعيش حياتك بالكامل بكل تفاصيلها لمدة شهر أو أكتر .. بدون ما تاخد دش أو شاور .. تنضيف الجسد بالنسبة لهم في الوقت ده كان شيء المجتمع بالكامل غافل عنه و متجاهله . … كمية الأوبئة و الأمراض اللي تفشت فيهم في الوقت ده .. إتكتب عنها ملاحم و قصص و روايات كتير جداً .. … بنفس الطريقة .. مجتمعات كتير جداً .. جداً جداً .. عايشة حالياً بدون ما تسعي لأى نوع من أنواع العلاج النفسي أو الثيرابي .. و بالنسبة لهم اللي بيسعي لل( تنضيف النفسي ) ده .. شخص غريب و عجيب .. مالكش دعوة بيهم .. روح إستحمي إنت و خد دش و إنتعش .. و بعدين إبقي كلمهم عن الإستحمام و النضافة و إنت ريحتك حلوة و نضيف . … 6- العلاج النفسي حاجة … و الدين ( حالياً في أغلب المجتمعات الحالية ) حاجة تانية خاااااااااااالص . . أنا مسلم و أشهد أن لا إله إلا الله .. و أن محمد رسول الله .. . الدين جزئين مهمين .. دين الفرد .. دين المجتمع .. . دين الفرد .. اللي هو شرائعه و تفاصيله كلها بتخاطب الفرد لوحده .. و بينه و بين نفسه و ربه .. دين المجتمع .. اللي هو شرائع المجتمع و دستوره و قوانينه .. . دين الفرد .. دين رحمة بالفرد قبل أى شيء .. دين المجتمع .. دين عدل و إستقامة للمجتمع قبل أى شيء . . و بدون الدخول فتفاصيل عشان البوست مايبقاش أسطوري في طوله .. مش كل المجتمعات حالياً فيها تحقق للدين بشكله الصحيح .. . يعني في خلل كبير جداً في مجتمعات كتير جداً .. . فبالتالي .. حتي و إن إستقام دين الفرد و صلح .. بيكون إبتلائه الأضخم هو في حياته وسط مجتمع صعب إنه يطلع منه .. . فلو إجتمع علي الإنسان ده كمان .. جهل بوجود أو أهمية العلاج النفسي .. للأسف بينتهي بيه الأمر ليأس أو ضعف بيوصله لنهاية مش كويسة .. إما بيخسر دينه .. أو بيخسر حياته بنفسه للأسف .. ( و سبب تذكري للنقطة دي هنا بالذات .. هي حادثة عرفت عنها من فترة لإنت7ار شاب مسلم حافظ للقرآن و سمته كان الإلتزام .. و لكن نفسه إتهزمت قدام المجتمع اللي هو كان عايش فيه ) … فبالتالي … رجااااااااااااااااااااااااااااااااااء … إفهم إن ( شيخ الجامع , صاحبك المتدين , الإنفلونسر المتدين , عمو اللي ماسك سبحة , و غيرهم من الأمثلة دي .. ) كلهم مش متخصصين … إطلااااااااااااااقاً … . الدين ( زي ما شرحت في بوست سابق ) .. زي الماء بالظبط .. الماء بيتكون من ( أكسجين و هيدروجين ) .. الأكسجين لوحده أو الهيدروجين لوحده .. كل واحد منهم بيفجر و يولع في الدنيا .. لكن مع بعض و بالشكل المناسب .. بيكونوا الماء اللي منه كل شيء حي . . الدين برضو .. كامل .. به بينصلح كل شيء و أى شيء .. . لكن ( و للأسف ) مجتمعات كتيييييييييييير جداً حالياً .. مختلط فيها الدين بالتقاليد و التراث .. بالفولكلور الشعبي .. بالأساطير و الحكايات المبنية علي جهل مركب . . فبتكون النتيجة هي : إن لو حد فعلاً تعبان و عنده مشكلة .. و راح سأل شيخ جامع ( غير دارس بشكل حقيقي و متخصص ) .. و شيخ الجامع قال له بحسن نية ( روح يابني إقرا قرآن ) .. ده ممكن يتسبب في مصيبة .. و مصيبة ضخمة .. . لأن القرآن زي ما هو علاج فعلاً .. و لكنه رسالة .. الرسالة نفسها و كلها .. العقل العليل أو النفس العليلة .. بيكون غير قادر علي حملها .. أو بيسيء فهمها .. . و أخطر شيء بعد كده .. هو دوامة الذنب اللي بيدخل فيها الشخص ده .. . اللي هي : أنا مش عارف أستريح بقراءة القرآن .. إذن المشكلة فيا .. او أنا شخص سيء … فبدل ما كان عنده عقدة .. بقي عنده عقدة بشنيطة ولامؤاخذة . … كفاية كده دلوقتي النقط دي .. البوست كالمعتاد طوّل .. و الله أعلم .