عن شلل الإختيارات المتعددة , و عدم القدرة علي إتخاذ

فاكر إني شفت فيلم ( مطاردة غرامية ) أكتر من مرة أثناء طفولتي كل ما كان بيتعاد علي التيليفزيون علي القناة الأولي الساعة 1 ظهراً ميعاد رجوعي من المدرسة .

AR 7 د

عن شلل الإختيارات المتعددة , و عدم القدرة علي إتخاذ قرارات , و التسرع في إتخاذ القرارات .

فاكر إني شفت فيلم ( مطاردة غرامية ) أكتر من مرة أثناء طفولتي كل ما كان بيتعاد علي التيليفزيون علي القناة الأولي الساعة 1 ظهراً ميعاد رجوعي من المدرسة . و الجزء ده من الأغنية : ( إعقل .. إعقل .. إعقل .. و إرسيلك علي قارة ) … ما زال بيتردد في عقلي كل فترة .. … … أنا من محبي الشطرنج .. لا .. خليني أكون أوضح .. أنا من عشاق الشطرنج .. يعني مثلاً : أفضل 20 لاعب في العالم دلوقتي تقريباً أنا عارف أساميهم بالكامل , عارف طرق اللعب اللي بيفضلوها .. عارف تفاصيل تانية عن حياتهم مالهاش علاقة بالشطرنج .. و بطولات كتير بتتلعب سنوياً باكون متابع مباشر ليها علي القنوات اللي بتعرضها علي يوتيوب .. بل و باجدد إشتراكي ال ( مدفوع ب 10$ شهرياً ) أحياناً .. ( هو حالياً أصبخ ب 75 جنيه مصري ) . .. و مع ذلك .. أعتقد إني عمري ما حاقدر أكون علي مستوي كافي إني أغلب أى حد بيلعب بشكل محترف .. أنا عارف .. و متفهم .. و راضي إن مستوايا حيفضل دايماً من أفضل المستويات في عالم الهواة .. و لكني مستحيل أقدر أصمد قُصاد أى مستوي إحتراف حقيقي .. حتي لو كان مركز شباب طرشوخ الليف . … السبب : multiple options paralysis = الشلل قدام الإختيارات المتعددة . .. زماااااااااااان .. أيام ثانوي و بدايات الكلية .. أيام ما كنت بالعب شطرنج أنا و أصدقائي بمعدل يومي تقريباً .. بدأت أحس بالموضوع ده بشكل قوي جداً .. و ماكنتش ساعتها أعرف أى شيء عن ADHD .. أو تكوين عقلي .. . كنت في بدايات الماتش .. و بعد لعب بعض خطوات سريعة في إفتتاحية الماتش .. و يبقي في عدد مختلف للإحتمالات اللي ممكن أتحرك فيها .. عقلي كان بيشوف كل الإختيارات المتاحة ليه علي رقعة الشطرنج .. و مجرد ما باحاول أتتبع أحد الإختيارات لخطوتين قدام علي الأقل .. ألاقي إني نسيت باقي الإختيارات .. أحاول أتتبع إختيار تاني .. ألاقيني نسيت تفاصيل الإختيار الأول .. و هكذا و هكذا .. .. بالظبط كإنك بتحاول تشيل عدد كبير من الكور في وقت واحد من علي الأرض … بس إيديك تقدر تشيل فيها كورة واحدة بس فأى وقت .. .. ماكنتش في الوقت ده أعرف إني ك ( ADHD) ذاكرتي القصيرة أصغر بكتير جداً من إنها تجاري كمية المعلومات اللي عقلي بيقدر يشوفها علي الرقعة . .. يعني : رامات عقلي صغيرة جداً جداً … و لكن البروسيسور سريع جداً جداً . .. و كانت بتبقي النتيجة إني باختار أى شيء و خلاص .. لأن مش حينفع إني أفضل أدرس الرقعة أربع ساعات لحد ما كل الإحتمالات بتاعت الدور ده توصل لذاكرتي طويلة المدي . .. و لكن .. حتي بعد ما باختار أى شيء و خلاص .. عقلي كان بيفضل في حالة تساؤل مابقدرش أهرب منها .. يا تري يا هل تري .. إخترت صح ولا غلط ؟ و بعدين يبقي في عدد تاني من الإحتمالات بعده .. و بعده .. و … للأسف .. أنا بالنسبة لأى حد هاوي شطرنج .. أبدو رائع .. و لكن بالنسبة لأى حد محترف .. أنا آخري إني أسقف له 🥹🥲 . … … الكابوس اللي باحكي عنه فوق ده .. بيتكرر فحاجات كتير تانية في حياتي اليومية :

1- مجرد إدراك الإنسان القصير نسبياً إنه مهما حاول .. مستحيل يقدر يعمل (Slam dunk = يهبد كرة السلة في السلة بإيديه ) بنفس السهولة اللي بيعملها بيها إنسان ربنا خلقه طويل .. الإدراك ده بيساعدك إنك حتي لو لسة عايز تفضل تلعب كرة سلة .. تقدر تركز علي حاجات تانية .. إنت ممكن تكون مؤهل ليها بشكل أفضل .

2- حاجات كتير جداً في الحياة .. مستحيل تحققها لوحدك .. لازم تفهم إن ربنا ليه حكمة في إننا إتخلقنا حوالين بعض .. و بنقدر نتكلم و نتواصل … و نتزاوج .. و نبني مجتمعات . النقص اللي عندك .. بيكمله حد غيرك .. عدم قدرتك علي إتخاذ القرارات بشكل سريع .. و الإختيار من متعدد بسرعة .. معناها إنك محتاج تدور علي حد عنده المهارة دي .. و تثق فيه بشكل كامل .. و غالباً حتلاقي عنده هو كمان نقص .. إنت بتعوضه له .

3- من أشهر الحاجات المعروفة عن ال (ADHD) إنه بيسبب ( Impulsivity = تسرع غير مدروس في إتخاذ القرارات ) . أعتقد دلوقتي بعد البوست ده بقي مفهوم نسبياً جزء من السب .. الإنسان اللي ماعندوش ذاكرة كافية إنه يحتفظ بالمعلومات المصاحبة لكل إختيار .. فبالتالي مابيبقاش عنده القدرة إنه يدرس الإختيارات دي بسرعة .. بتكون النتيجة هو ال (panic = هلع ) لما بيحس إن اللي حواليه بيستعجلوه .. و بياخد أى قرار تحت ضغط .. و ده بيظهر ك (impulsivity ) .

و الله أعلم .