5 ترشيحات : ( مسلسل , 3 قنوات يوتيوب ,

5 ترشيحات : ( مسلسل , 3 قنوات يوتيوب , قناة تيكتوك ) . … مقدمة طويلة الأول مالهاش لازمة إعمل لها سكرول و روح علي الترشيحات علطول 🤣🤣🤣🤣 … طيب .. بقالي فترة مشغول زيادة و بسافر كتير … و أقل في الرد علي الرسائل و التعليقات حتي من المُعدل الطبيعي بالنسبة لكائن عجوز زيي .. . و أحد تلك الرسائل كانت من : Musab Mohamed و أشكره علي ده .. لأنه فضل يفكرني بأكثر من رسالة ( و دي أمثل طريقة للتعامل مع ذاكرتي المتطايرة بالمناسبة 🤣🤣 ) .. يفكرني بإني أكتب بوست عن قنوات اليوتيوب المفيدة زي ما كنت قلت إني عايز أعمل كده في بوست من فترة . و كنت إديته كلمة إني حاكتب البوست ده النهاردة فعلاً … فها هو ذا .. … و لكن … هنا كان في سؤال مهم لازم يتسأل الأول .. و هو : أنا ليه مش باشير ( أسامي كتب , أفلام , مسلسلات , قنوات يوتيوب , صٌنّاع محتوي , … ) أو ما شابه .. إلا نادراً ؟!! .. و لما باعمل ده .. بيكون مش مُجرد شير .. و لكن بوست طويل في المعتاد 😅 . … أفضل تشبيه أقدر أشرح بيه الإجابة هو : إن عقلي عامل زي التُربة .. الأرض الزراعية .. و علي مدار سنين عمري .. في كم ضخم من البذور إترمي في التربة دي .. من أيام مجلات ماجد و روايات مصرية للجيب اللي كنت مدمن ليها من أيام إبتدائي .. لحد مثلاً آخر فيلم دخلته سينيما من يومين (FI بتاع براد بيت 😅) . . و في بذور كتير من ملايين البذور دي .. نمي و كبر .. و إتحول في عقلي لأشجار ضخمة متفرعة و متشابكة .. و كل فترة بتطرح ثمر فكري معين .. خاص بيا أنا .. إتروي من خبراتي أنا .. متشابك مع كل فكرة تانية في عقلي أنا . .. و بذور تانية كتير .. يادوب لسة بتزرّع و لكن بدون ثمار .. أو لسة أساساً مابدأتش تتحول لنبتة صغيرة .. ده هو الفرق بين أنواع المحتوي ( كتب , أفلام , مسلسلات , قنوات , … ) في عقلي .. .. و لما باكتب بوستات هنا .. أغلب الوقت باكتب عن شيء إكتمل نموه في عقلي .. لدرجة إنه يكون طرح ثمار فكرية معينة أحس بيها إني باكتب شيء جديد .. مش مجرد إني بانقل أى فكرة أو معلومة نزلت في تربة عقلي .. بدون حتي ما تكون زرّعت أو مدّت جذور .. … … طبعاً مع كل إحترامي للي بيعمل كده .. يعني اللي بيستخدم منصته أو بروفايله كوسيلة للتجارة .. يعني ( زي التاجر ) .. بيسافر ياخد محتوي من مكان ما .. و يبيعه لك في بروفايله أو صفحته زي ما هو .. و لو غيّر فيه يكون تغيير بسيط جداً ( زي إنه يترجمه أو يبسّطه … ) . .. أنا حاولت مراراً و تكراراً علي مدار السنين إني أعمل كده بإنتظام ( أتاجر في المحتوي ) يعني .. علي صفحتي الشخصية دي . و لكن .. بافشل فشل ذريع دائماً .. و السبب : إن ده ممل ملل السنين بالنسبة ليا .. إني أكون مُجرد ناقل .. أو حتي ناقل بتصرف بسيط . و طبعاً عقلي بعد فترة بسيطة من النقل ده .. بيتوه بين آلاف و آلاف التشعبات الفكرية اللي بتسوحني وراها .. و أنسي ألتزم بجدول زمني معين . … طيب .. هل يأست ؟! .. مش ححاول أعمل ده تاني ؟! .. أبداً .. أبسولوتلي 🤣 .. حافضل أحاول إن شاء الله إني ألتزم بجدول زمني حقيقي .. أنشر فيه محتوي .. حتي لو مجرد نقل أو نقل بتصرف بسيط .. .. طيب .. ليه باكتب المقدمة دي دلوقتي ؟! .. عشان أوضح طبيعة كل شيء ححاول أنشره من ( كتب , أفلام , مسلسلات , قنوات يوتيوب , .. و غيرهم ) .. بعد كده .. .. يعني .. كتاب معين مثلاً .. ( و علي سبيل المثال : Man’s Search for Meaning بتاع فيكتور إي فرانكل ) .. ده كتاب قرأته من 7 سنين تقريباً .. و لكنه مد جذور ضخمة جداً في عقلي .. و أصبح متصل بأغلب مناطق تفكيري و آرائي في الحياة مثلاً . و دائم ل طرح الثمار المختلفة الأشكال و الألوان في عقلي . .. و لكن .. رواية زي ( seven eves - ل نيل ستيفنسون ) .. ف دي مثلاً بدأتها فنفس الوقت من سبع سنين .. و لسة حتي النهاردة ماخلصتهاش 🤣🤣 . ف لو كتبت عنها هنا بوست .. حيبقي كإني باقدّم لك ثمرة خضراء غير مكتملة النضج .. .. فاهم الفرق ؟! و لأني باخاف إن حد لا يعلم الفرق .. يقطم قطمة من ثمرة خضراء غير مكتملة النضج .. و يكره الثمرة دي أو مايعرفش يهضمها .. او ( و ده الأخطر .. يفهمها غلط ) .. دايماً كنت باستسهل إني أكتب عن الثمار المُكتملة النضج في عقلي .. و اللي أعرف أتحمل جزء من مسئولية كتابتي عنها . … المهم .. كل اللي فات ده مقدمة طويلة لما هو آت ( حالياً و مُستقبلاً إن شاء الله ) .. و ححاول إني ألتزم بجدول زمني ثابت أكتب فيه 5 ترشيحات يومياً إن شاء الله . يعني .. بدل ما أكتب ليستة ضخمة يتوه فيها القاصي و الداني … لا .. حاكتب 5 ترشيحات يومياً .. لقنوات يوتيوب و أفلام و مسلسلات و كتب و … غيرهم . … الترشيحات : … أولاً : مسلسل ( numb3rs ) … إنتاج سنة 2005 : . المسلسل ده بارشحه لأى حد عايز يحب الرياضة .. أو بيحب الرياضة و عايز يعشقها .. أو بيعشقها و عايز يبدأ ياخد خطوات جادة في علاقته بيها 🤣 . من أول حلقة شفتها صدفة سنة 2008 .. و أنا حسيت إني لقيت حاجة كنت بادور عليها طول عمري .. جزء ضخم جداً من حبي للرياضة و الخوارزميات و المنطق .. جاي من المسلسل ده . و آه .. أول مرة في حياتي أسمع عن (game theory) .. و اللي إشتغلت بيها و فيها سنين بعد كده … كان من المسلسل ده 😅 . … ثانياً : قناة يوتيوب ( eli the computer guy ) : . أنا أعرف قنوات يوتيوب كتيييييييييييييييير لتعليم كمية ضخمة من المهارات .. و لكني دايماً كنت بانجذب أكتر للناس اللي شبهي .. اللي هو مش بالضرورة أفضل متخصص حد في المهارة .. و لكنه ( generalist = يعني بتاع حاجات كتير ) .. و اللي في المعتاد أغلب معلوماته و مهاراته مرتبطة بحكمته و خبرته في الحياة عموماً .. مش مجرد مهارة بيستخدمها عشان شغلانة و خلاص . . إيلاي .. واحد من الناس اللي عرفتهم سنة 2012 .. و جزء ضخم بعد كده من خبرتي العملية التقنية .. و الحياتية .. كان هو اللي إتعلمتها منه بفضل الله . . و لحد النهاردة .. بعض النصائح الحياتية و العملية الأيقونية اللي ما زلت باستخدمها حتي يومنا هذا .. عرفتها منه من أكتر من 10 سنين . … ثالثاً : قناة يوتيوب ( athleanX ) : لو حاختار مرجع وحيد فيما له علاقة بالجيم و التمرين .. ف هو ” جيف كافاليير ” .. الراجل ده أنا متابعه من زيادة عن 10 سنين .. و شفت غيره عشرات و عشرات من اللي بيتكلموا في المجال ده .. بالعربي و الإنجليزي .. إحترامي لهم كلهم .. و لكن ” جيف ” .. ( فوجهة نظري ) .. يكفي لوحده عنهم جميعاً . … رابعاً : قناة يوتيوب ( How to ADHD ) :
أنا أدين ل ( جيسيكا ماكابي ) بإني إكتشفت إني عندي (adhd ) .. من ال ted talk بتاعها ( failing at normal = الفشل في الحاجات العادية ) . الكلام ده كان من أكتر من 7 سنين .. و علي مدار ال7 سنين دول .. تابعت قناتها دي .. و إتعلمت كم ضخم من الحاجات اللي ساعدتني فعلاً في إني أفهم نفسي أكتر .. و الأهم .. أفهم إزاي أقدر أساعد غيري . جيسيكا تعبت كتير … كتير جداً .. في حياتها .. و فعلاً باتمني لها كل الخير من كل قلبي . … خامساً : قناة تيكتوك ( @nate.b.jones ) : الراجل ده برنس .. كبير .. أوي .. عايز تفضل متابع أغلب الجديد في أى شيء له علاقة بالذكاء الإصطناعي و أدواته و تطوراته و سلطاته و بابا غنوجه .. الراجل ده هو اللي إنت محتاجه .. خصوصاً إنه مش مجرد حد بيهري و خلاص عشان يجمّع فولورز .. لا .. ده بيتعب نفسه في إنه ياخد الغطس المتين في أغلب المواضيع دي ( بتخصص ) .. و يشاور لك علي الحتت اللي إنت كمان تغطس فيها .. .. لو حاعمل لقاء مع أى حد … و حنهري في أى شيء له علاقة بالذكاء الإصطناعي .. حاتمني إنه يكون مع البرنس ده . … و الله أعلم .