( آه و أنا كمان 🤣🤣 )

( آه و أنا كمان 🤣🤣 ) … تقريباً الجملة دي ( آه و أنا كمان ) هي أكتر جملة تم تكرارها علي مدار جميع المكالمات اللي عملتها حتي الآن مع المشتركين في برنامج ال ( ASP - Accountability Sponsorship Program ) لل ( ADHD ) . البرنامج ده اللي أعلنت عنه من أسبوعين تقريباً .. و اللي فيه بيكون في مكالمات يومية و أسبوعية هدفها متابعة الإلتزام بتنفيذ الخطط و الأهداف .. و مناقشة تفاصيل ( إحنا بنفكر في شغلنا إزاي أساساً ) . … و علي مدار الأيام اللي فاتت .. أغلب النقاط اللي كنت باشرحها أثناء المكالمات .. و باضرب المثال ب نفسي و عقلي .. كانت الأطراف الأخري بترد بكل بساطة : (آه فعلاً .. و أنا كمان 🤣 .. بالظبط كده 🤣🤣 ) .. . حاجات زي :

• أنا باكره الروتين جداً .. بس برضو ماقدرش أعيش من غيره .. و باكره لو مافيش روتين 🤣🤣
• أنا باكره القعدة في البيت و بازهق جداً و أتخنق .. بس بمجرد ما باخرج لأي سبب .. بابقي عايز أرجع بأسرع وقت ممكن و ألف فكرة فدماغي عايز أرجع أعملها .
• أنا إنطوائي جداً بس مش باعرف أكمل أى حاجة لوحدي .. و إنتاجيتي بتزيد جداً جداً جداً لما باشتغل في فريق .
• و أمثلة تانية كتير جداً .. . و يمكن أشهرهم هي :
• أنا سيء جداً في كل ما له علاقة ب ( حساب الأجرة في الميكروباصات , حساب الكاشير في الماركت , الحساب عموماً , و الوقت , و التواريخ , … و كل ما له علاقة بالفلوس ) 🤣🤣 . … و فالمكالمة المُجمعة بتاعت إمبارح الثلاثاء .. شرحت آخر نقطة دي خصوصاً ببعض التفصيل .. و ححاول أعيد ترتيب الكلام ده هنا إن شاء الله . … بدون الدخول فتفاصيل كتير من ال ( Neuroscience = علوم أعصاب العقل ) .. تقدر للتبسيط ( المُخل جداً جداً لتسهيل الشرح ) تتخيل عقلك ك :
• معالج مركزي = processor
• ذاكرة قصيرة المدي = Short term memory
• ذاكرة طويلة المدي = long term memory .. الإنسان العادي ال ( neurotypical ) .. عنده الذاكرة قصيرة المدي حجمها طبيعي نسبياً .. و تقدر تستوعب كم محترم من التفاصيل .. أحياناً يصل ل أيام مثلاً .. و عند نسب قليلة .. بتوصل لأسابيع . مش حفظ كامل بكل تأكيد .. و لكن علي حسب رغبتهم في التركيز علي شيء ما .. يقدروا يحتفظوا ب كم معين من تفاصيل الشيء ده . .. الذاكرة قصيرة المدي دي .. عشان تحتفظ فيها ب أى معلومات .. مش بتحتاج تستخدم ال ( معالج المركزي ) بتاع عقلك .. يعني مش بتحتاج تبني علاقات بين المعلومات دي .. و بين معلومات قديمة موجودة فعقلك . يعني مش بتحتاج ( تفهمها ) . و لكن تقدر تحتفظ بيها ك معلومات مٌجردة (abstract ) .. زي أرقام التيليفون مثلاً , أسامي الأشخاص اللي لسة مقابلهم لأول مرة , أسماء أماكن في مدينة لسة ماروحتهاش مثلاً , … . لاحظ هنا معني كلمة ( مُجردة ) دي .. مثلاً .. لو رحت مكان في مدينة ما .. إسم المكان ده في عقلك بيرتبط ب كم ضخم من المعلومات الثانوية ( الرائحة , درجة الحرارة , الإحاسيس , … ) و غيرها من المعلومات .. اللي بتحول إسم المكان ده في عقلك من ( معلومة مٌجردة ) ل ( معلومة مرتبطة ) . . و كل المعلومات المٌرتبطة بتعيش بشكل تلقائي في ( الذاكرة طويلة المدي ) . … أما الإنسان اللي زي حالاتي 😅 .. ال ( ADHD ) .. أو بالأخص ( AuDHD = Autistic with ADHD ) .. فإحنا ذاكرتنا قصيرة المدي .. صغيييييييييييييييييييرة جداً جداً جداً .. و ضعيييييييييييييييييفة جداً جداً جداً . .. بتوصل عند بعض الأشخاص ( زيي مثلاً ) .. إنها يادوب تحتفظ ب بعض ثواني .. و بعدين تتمسح بالكامل . .. ف مثلاً .. قابلت شخص لأول مرة .. و عرفك بنفسه .. و كررت إنت إسمه بنفسك للتأكيد بصوت عالي … و مع ذلك .. و خلال نفس المٌحادثة .. بعد 20 ثانية .. إنت نسيت إسمه بالكامل 🤣🤣 .. و غالباً نسيت شكله كمان ( ما لم يكون شكله فيه ميزة شدت إنتباه ذكري قديمة عندك ) . . أو أرقام التيليفونات مثلاً .. من رابع المستحيلات تقدر تحفظ رقم تيليفون . . بل إن أرقام ال (otp ) اللي هي ( رسالة تأكيد من 6 أرقام دي 🤣 ) .. بتحتاج إنك تفتح الرسالة علي الأقل مرتين تلاتة عشان تفتكر الرقم أثناء كتابته 🤣🤣 .. و في أحيان كتير برضو بتنسي و تكتبه غلط 🤣🤣🤣 . … … النتائج اللي مبنية علي موضوع ضعف الذاكرة قصيرة المدي بالنسبة لنا دي .. كتير جداً جداً جداً .. و ممكن أشرح أمثلة كتييييييييييييييير أوي لها علاقة ب ده . .. و لكن .. الأهم هو إني أشرح نتيجتين أساسيين جداً للموضوع ده .. هما :
• خلل حساب الوقت .
• خلل حساب الفلوس . … لأن إحنا من طفولتنا في الأغلب مافهمناش كل اللي شرحته فوق ده عن التركيب العصبي للعقل .. ف بنتعلم إننا ( نتأقلم ) .. نحاول نعمل أى حاجة عشان ن ( Fit in = نبقي زي اللي حوالينا ) .. . فبنتعلم إننا نستخدم الذاكرة طويلة المدي .. عشان نحتفظ ب كل المعلومات الحياتية اليومية اللي غيرنا بيستخدم ذاكرته قصيرة المدي فيها . . و لكن .. زي ما شرحت .. الذاكرة طويلة المدي دي .. مابتخزنش غير المعلومات اللي تم ( معالجتها ) ب عقلك .. يعني عشان تحفظ شيء ما فيها .. لازم تربطه بمعلومات تانية بعلاقات كتير . . ف تلاقي نفسك مثلاً مش بتفتكر شخص ما .. إلا ( ب ريحته , ب لازمة معينة في كلامه أو صوته , ب موقف معين ربطك بيه أو شفته و علّق معاك , … ) . تلاقي نفسك مش بتفتكر مكان .. إلا ب شعور معين بيولده جواك المكان ده ( و ب ريحة معينة برضو , و ذكري معينة ) . . تلاقي نفسك مش بتفتكر حتي تفاصيل يومك العادي ( مواصلات , طلبات بقالة , … حتي غسيلك ل سنانك ) .. إلا ب كم ضخم من الروابط و العلاقات اللي له علاقة بالتفصيلة الصغننة دي . . و ده .. مرهق جداً جداً جداً جداً جداً .. و لكن ربنا برضو أنعم علينا بال ( هايبرة = Hyper activity ) .. اللي بتخلينا نقدر ننفذ كل المهام دي و أكتر ( فبعض الأحيان ) في جزء قليل جداً جداً من الوقت اللي غيرنا بينفذها فيه . . و لكن بعد ما بننفذهم .. بنبقي مقتولين من التعب و الإرهاق حرفياً .. في حين إن غيرنا مش شايف إننا عملنا غير حاجات بسيطة خالص .. ( لأنه هو بيعملها ب شكل تلقائي .. بدون مجهود ذهني زينا ) . … و بالنسبة لل ( فلوس و الوقت ) .. الحاجتين دول بالذات .. فيهم مشكلة ضخمة جداً .. لأنهم بالنسبة للناس العاديين … بيتم التعبير عنهم رقمياً .. و الأرقام .. بالنسبة لأغلب الناس .. بتعيش في ( الذاكرة قصيرة المدي ) .. مُجرد مسطرة موجودة في عقلهم بيستخدموها بكل سهولة … مسطرة بيتدربوا من طفولتهم إنهم يبنوها فعقلهم .. و كل ما يكبروا .. كل ما بيقدروا علي إستخدامها بشكل أسرع و أفضل . .. لكن .. بالنسبة لنا إحنا .. المسطرة دي مش موجودة .. مافيش مكان لها أصلاً .. . ف فأى تعامل بالأرقام .. بنضطر ( كالمعتاد ) نلجأ للذاكرة طويلة المدي .. . و الذاكرة طويلة المدي .. بطييييييييييييييييييييييييييييئة جداً جداً جداً مقارنة بالذاكرة قصيرة المدي .. خصوصاً فيما له علاقة بالأرقام .. . يعني مثلاً : فاكر زمان في إبتدائي لما إتعلمت إزاي تجمع رقمين علي رقمين ؟! بالظبط كده .. عقلنا ( ال adhd ) .. هو بالظبط نفس الطفل اللي في حضانة اللي لسة بيعد علي صوابعه .. و مافيش معاه ورقة يكتب عليها .. و كل مرة ( آه والله العظيم كل مرة ) .. بيضطر يكتشف العد من أول و جديد 🤣😅 . … … فبالتالي .. كل ما له علاقة بالأرقام .. بالنسبة لنا .. معانااااااااااااااااااااااااااااااااة . … لاحظ هنا إني مهندس .. و درست لحد رياضة 12 ( رياضيات مٌتقدمة جداً ) .. بل و باحب الرياضيات جداً .. لكن أى حد درس رياضيات مٌتقدمة يقدر يؤكد لك .. إننا مش بنستخدم في الرياضيات أرقام خالص 🤣🤣🤣 .. و لكن حروف و منطق بس 🤣🤣 . … ف بتكون بقي نتيجة كل الهري اللي فوق ده إيه ؟! .. إنك كل ما له علاقة ب : الإستثمار , طلب فلوس من ناس مقابل خدمة بتقدمها , حساب أٌجرة أى شيء , … و غيرها من المعاملات الرقمية .. بيكون بالنسبة لك شيء من طفولتك إتعلمت إنه مؤلم جداً جداً .. و إتبني جواك حواجز نفسية كتييييييييييييييييييير .. تحاول تخليك ماتقربش للمعاملات دي إطلاقاً .. عشان تحمي نفسك من الألم ده . … و بالنسبة للتواريخ و الوقت .. نفس الكلام .. ال 5 دقائق بالنسبة لك .. مش هما ال 5 دقائق بالنسبة ل غيرك .. إنت مش شايفهم زيه .. هو ( ك إنسان عادي ) .. شايفهم ك 5 دقائق .. جزء من الساعة بيساوي ( واحد علي 12 ) . لكن إنت .. بتكون شايفهم ك ( الحياة كلها ) .. عقلك مش محتفظ بمسطرة أو معيار يقدر يشوف بيه ال 5 دقائق بالنسبة للساعة .. و بالتالي .. إنت مش قادر تقيس .. مش قادر تعرف هل هما كتييييير أوي .. ولا قليل أوي .. ولا إيه أساساً ؟! . .. ف بتحاول تقيسهم ب مقاييس أخري .. زي ( مسافة مشيتها قبل كده , أغنية عارف مدتها و حافظها , … أو أى مقياس آخر ) . … فما بالك بقي .. ب باقي المواقيت و التواريخ ؟! .. بالنسبة لك هما أساساً مش موجودين .. . فبالتالي .. أى مشروع أو مهمة عليك مثلاً .. و قدامك 5 أيام عشان تنجزها .. إنت مش بتبدأ فيها غير فآخر يوم دايماً .. و غالباً في آخر كام ساعة .. .. مش لأنك كسول .. أو مهمل .. أو مش فارق معاك أهمية المهمة . . و لكن … لأنك ( والله العظيم ) مش شايفها من عندك أساساً 🤣🤣 .. عقلك مش قادر يتصور يعني إيه ( 5 أيام قٌدام ) أساساً .. المسطرة دي مش عندك . … البوست طوّل أوي .. ححاول إن شاء الله أكتب بوست بكرة أو بعده عن : مزايا الموضوع ده بقي ( إننا بنعتمد طول الوقت علي ذاكرتنا طويلة المدي ) . . و له مزايا كتير والله .. … و الله أعلم .