1- كل إنسان فيه الصفات التالية بدرجات .. زي

1- كل إنسان فيه الصفات التالية بدرجات .. زي :

• ( إدمان التجميع و عدم القدرة علي التخلي عن أى شيء حتي الزبالة = Hoarding ) .
• ( الفرشحة 🤣= adapting to the space they’re allowed = يعني لو عندك شقة 60 متر .. حتعيش فكل حتة فيها و تحط حاجات في كل أدراجها .. و لو عندك فيلا 500 متر .. برضو حتعيش فكل حتة فيها و تحط حاجات في كل أدراجها و ضرفها ) . … 2- في ناس .. بيزيد عندها الصفات دي أوي .. لدرجة إنها بتوصل لمرحلة مرض .. و مابيقدروش يستغنوا عن أى شيء فعلاً .. حتي ضوافرهم المقصوصة .. و المناديل اللي إستخدموها … ( ده إسمه Hoarding Disorder ) . . و في ناس الناحية التانية خالص .. حرفياً ماعندهاش مشكلة تعيش شهور من خلال شنطة ضهر صغننة فيها تيشيرت و بوكسر و لابتوب و فرشة سنان 🤣 … دول حالياً لهم إسم جذاب جميل جديد إسمه ( Digital Nomad = رحالة رقمي ) .. لأنهم زي البدو الرحالة زمان … مابيعششوش فمكان . … 3- أنا شخصياً ( زي معظم الناس ال ADHD ) .. جربت الخط ده ( ال Spectrum ده ) من أوله لآخره … . يعني .. عشت سنين كتير hoarder درجة أولي .. مافيش مسمار بيترمي .. مافيش لبيسة قلم جاف مكسور بقالها سنين بتترمي .. حتي كل كراساتي و سكيتشاتي و كتبي من سنين طويلة .. فضلت محتفظ بيها .. و كل مرة كنت بانقل من شقة ل شقة جديدة .. كنت بالاقي نفسي باعبي كراتين كتير جداً بحاجات ولا فتحتها أو لمستها من سنين .. لكنها كلها فعقلي .. فاكرها بتفاصيلها .. فاكر حتي محتفظ بيها ليه .. . و فكل مكان جديد كنت باروح فيه .. كنت بافرشح 🤣 .. اللي هو بعد كام يوم .. يبقي كل الأدراج مليانة حاجات عجيبة .. و كل الضرف .. و أكياس كتير متعبية حاجات قمة في العشوائية .. . بعد ما فهمت أكتر عن ال( إختلاف العصبي = Neurodivergence ) اللي عندي ( اللي هو ال ADHD ) .. فهمت إن ده له علاقة وثيقة بذاكرتي .. و إن لأن من طفولتي و انا دايماً بانسي كل شيء و أى شيء .. و مش فاهم ليه ..

و مش فاهم ليه غيري مش بينسي حاجته زيي .. مش عشوائي زيي .. ليه أنا هدومي مرمية في كل مكان بشكل عشوائي جداً .. لكن أخويا دايماً هدومه مترتبة و مكوية و نضيفة !!
ليه كل كتبي و كراساتي بلا إستثناء كان كإنها طالعة من مزبلة … لكن أخويا كل كتبه و كراساته كانت بتفضل كإنها جديدة لحد ما بيخلص إمتحانات 🤣 .

ف ده تطور تدريجياً ل ( خوف و رعب ) من ال فقدان .. فقدان الأشياء … و الأفكار ..

اللي هو إنت طول الوقت بتقول لنفسك : ” أنا عارف إني لو القلم ده إختفي من قدامي .. غالباً مش حاشوفه تاني .. زي الفكرة اللي فدماغي اللي كنت لسة بافكر فيها و نسيتها فجأة .. إذن أنا مش حاخلّي القلم ده يختفي من قدامي … ولا الورقة دي .. ولا أى حاجة تانية .. لأني مش عارف أنا كنت عايزهم إمتي .. و الأهم .. أنا مش عارف إحتمال أعوزهم أو أحتاجهم إمتي ” … 4- و علي مدار حياتي .. حاولت كتير أعالج الموضوع ده فيا ( قبل ما أفهم عن ال ADHD .. و بعد ما فهمت عنه ) .. و لكن اللي فهمته .. إن العلاج مستحيل يكون داخلي .. لأني ( Hard wired = خلاص عقلي متشكل كده ) .. .. و لكن اللي إكتشفته .. إن العلاج .. كان خارجي .. … في الجيش .. أكتر من مرة كنت حاخد جزاءات لأني كنت بامشي ب شنطة كروس 🤣 .. آه والله العظيم .. العميد أكتر من مرة وقف بعربيته مخصوص و نزل يزعق ليا .. لأني العسكري الوحيد اللي ماشي ب شنطة 🤣 .. . ماكنتش فاهم إزاي ماحدش تاني شايل شنطة غيري !! إزاي ماحدش محتاج يشيل كتب و شاحن و مفاتيح و ورنيش و مكن حلاقة و معلقة و شبشب 🤣 و حاجات تانية كتير .. طول الوقت .. . ف عقلي .. كنت دايماً باسيب الكتيبة و أنا متخيل إني لازم أكون مستعد لأى حاجة و كل حاجة طول الوقت . . بعد ما فهمت إن الموضوع ده ممكن يسبب ليا إني أتسجن ( لأني مُخالف للمنظر الميري ) .. إتعلمت … الإستغناء . … خلال آخر كام سنة .. سافرت كتير .. .أوي .. و إتنقلت بين عدد ضخم من الفنادق و ال air bnb و ال شقق … بين دول كتير .. . أول سفرية خالص .. بعد ما رجعت إفتكرت موضوع الجيش ده .. و ضحكت .. لأني لقيت إني 80% من الحاجات اللي خدتها معايا .. لمدة أسبوعين كاملين .. ماستخدمتش منهم حاجة .. . تاني سفرية .. قلت حاخد بالي .. و مش حاكرر غلطتي .. و برضو .. نفس الغلطة . . تالت سفرية .. رابع سفرية .. عاشر سفرية .. . مش فاكر إمتي بالظبط .. بس عند مرحلة معينة .. لقيت إن فمرة و أنا بافضي شُنطي بعد الرجوع من السفر .. إن كل شيء أخدته معايا .. إستخدمته . و ده بعد ما كنت قررت قرار معين قبل السفرية دي .. و هو إني حسامح نفسي .. و مش زعلان من نفسي .. و إني لو إحتجت أى شيء هناك … حاشتري .. بدون ما أشعر بالذنب . … 5- ك طفل صغير .. لما أهلك بيبدأوا يحاولوا يعلموك المسئولية .. لو هما مش عارفين يعني إيه (ADHD ) .. و كل مرة يلاقوك بتفشل في مهام بسيطة جداً .. و غيرك بيعمل المهام دي بكل سهولة .. عند مرحلة معينة .. حيبطلوا يلتمسوا لك الأعذار .. و يبدأوا يلوموك .. كتير .. أوي .. و لو هما بيستخدموا العنف .. حيعنفوك .. و يضربوك ( ده ماحصلش معايا بفضل الله 🤣 ) .. لكن اللوم كان جزء أساسي من حياتي طول الوقت .. .. حتكون النتيجة دايماً حاجة من إتنين .. لا غير .. . إما إنك حتطلع رافض و متمرد لكل شيء و أى شيء .. و عدواني جداً .. ( ده لو كانوا بيستخدموا معاك العنف ) .. . أو .. حتطلع زيي .. عندك عقدة ذنب ضخمة .. بشنيطة 🤣🤣 … 6- عقدة الذنب دي .. بيتولد منها تصرفات كتيييييير أوي .. بتظن إنها طبيعتك .. حقيقتك .. جزء منك .. لكن في الحقيقة هي مش إنت .. في الحقيقة هي كلها تصرفات إنت بقيت بتعملها بشكل أوتوماتيك و تلقائي .. فقط بهدف إنك ( ماحدش يلومك ) . … …

• أنا حاخد معايا في السفرية كل حاجة ممكن أحتاجها .. ليه ؟! عشان ماحدش يلومني لو فجأة إحتجت شيء كان ممكن آخده معايا من الأول 🤣 . … مع إنك لوحدك .. مسافر لوحدك .. ماحدش تاني عارف إن الحاجة اللي إنت مأخدتهاش دي .. إنها عندك أساساً .. و لكن خلاص .. الصوت اللي فضل يلومك طول سنين طفولتك .. أصبح جزء من تكوينك الداخلي .. و إنت .. أصبحت أكبر حد بيلوم نفسك .. طول الوقت . … 7- لما فهمت أكتر عن نفسي .. و فهمت إني عمري ما كنت ( كسول , مهمل , غير متحمل للمسئولية , مركز علي حاجات تافهة , … ) و غيرها من الحاجات الجميلة اللي عشت سنين مصدقها .. . و فهمت إني تكوين عقلي العصبي مختلف .. شيء خارج عن إرادتي .. . بدأت أسامح .. أسامح نفسي لو نسيت آخد فرشة سناني .. و إضطريت أشتري واحدة تانية بمجرد وصولي الفندق مثلاً .. . و بعدين بدأت أسامح نفسي أكتر .. لما في بيتي بقيت باشوف كل شيء ماستخدمتوش خلال آخر شهر مثلاً .. و أقرر إني إما أستغني عنه لحد محتاجه أكتر مني .. أو أخفيه خالص من مكتبي و أوضتي و أوديه لمكان مخصص للتخزين . . و لو جه يوم و إحتجت الشيء ده .. و كالمعتاد كنت نسيت إنه عندي ( لأنه مش قدام عيني ) .. و بعد ما إشتريت منه قطعة تانية .. أو تالتة .. و إكتشفت بعد كده إني أساساً في مخزني في 4 قطع منه قبل كده 🤣🤣 . قررت إن ده تمن أنا قابل أدفعه .. مقابل شيء أهم مليون مرة .. و هو سلامي النفسي .. . و من بعد ما فهمت ده .. كمية ال ( حاجات ) اللي كانت دايماً محيطة بيا في أوضتي و مكتبي طول حياتي .. قلت بدرجة كبيرة جداً . . لأني مابقتش قلقان و خايف و مرعوب من عواقب ( عدم وجودها ) . … 8- الزلازل مافيش فيها هزار .. ربنا يعافينا و يلطف بينا من فواجع الأقدار .. و لكنها .. هزة .. و بعض الهزّات مفيدة .. بتصحي و تفوق .. . إنك تسأل نفسك ( يا تري .. لو لا قدر الله إضطريت آخد أهم حاجات في حياتي كلها خلال 5 دقايق و أطلع أجري في الشارع .. حاخد إيه ؟! ) .. ده سؤال مفيد بكل تأكيد .. . و لكننا بشر .. مهما حاولت .. دايماً بنفرشح .. دايماً بنتأقلم و نمد جذور تاني فأى مكان إحنا فيه . . فبالتالي .. السؤال الأهم .. مش : حتاخد إيه من ال” حاجات” و تجري لو لا قدر الله إضطريت ل ده .. . و لكن : يا تري .. إنت عايش معبي ” مشاعر و أفكار عن نفسك ” إيه .. و مالي بيها نفسك و دماغك طول الوقت .. و مش بس إنت مش محتاجها .. و لكن وجودها في دماغك .. بيضرك . … و الله أعلم .