السؤال الأول

السؤال الأول : لو تم تحويل 10 مليون دولار مثلاً في حسابك في البنك حالاً .. و لكن تصرفهم فقط ك إستثمار .. يعني ماتشتريش بيهم لب و شوكولاتة لنفسك 😅.. لكن تقدر تشتري بيهم لب و شوكولاتة ل شركتك . حتصرفهم إزاي ؟! . … السؤال التاني : لو أصبح ليك بقي مطلق الحرية تتصرف بشكل شخصي في ال 10 مليون دولار دول .. حتصرفهم إزاي ؟! . .. السؤال التالت : ضمن القيود المنطقية الطبيعية .. و بفرض ضمان النجاح .. و إنك حتقدر تشتغل بكفاءتك الكاملة اللي بتتخيلها في أحلامك لمدة شهر .. حتكون نتيجة الشهر ده إيه ؟! . … السؤال الرابع : بفرض إنك تحررت من كل القيود المنطقية .. حتتمني إيه ؟! ( يعني لو عايز تتمني جناحات و تطير و تطلع نار من بٌقّك مثلاً .. تقدر ) . … السؤال الخامس : ال 24 ساعة في يومك .. في المعتاد .. بيتم إستهلاكهم إزاي ؟! . … السؤال السادس : إيه هي الموارد المٌتاحة ليك حالياً ( مادياً , علمياً , إجتماعياً , لوجيستياً , … ) ؟! . … السؤال السابع : لو طلبت منّك تحكي لي أحد أفضل قصص نجاحك .. حتحكي إيه ؟! و لو طلبت منّك تحكي لي أحد أصعب قصص فشلك .. حتحكي إيه ؟! . … ال 7 أسئلة اللي فاتوا دول .. هما ال7 أسئلة اللي بابني عليهم المكالمة الأولي المجانية في موضوع ال ( ASP - Accountability Sponsorship Program ) .. .. و شرحهم .. و الهدف منهم كالتالي : .. الأسئلة دي بنيتها بنفس الأسلوب اللي ك مهندس خوارزميات زمان كنت بابني عملية مشهورة في الهندسة عموماً إسمها ( troubleshooting ) .. . اللي هو لمّا بتروح لميكانيكي مثلاً بعربيتك عطلانة … هو إزاي بيشخصّها ؟! بيبدأ يمشي علي تسلسل معين مشهور من الخطوات علي حسب موديل و نوع كل عربية .. و بيبدأ يشوف رد فعل العربية علي كل خطوة من الخطوات دي . . نفس المبدأ ده هو اللي بنستخدمه في عوالم البرمجيات لما ييجي أى جهاز بايظ مثلاً أو برنامج مش شغّال .. و أكيد لو بتستخدم ويندوز شفت الكلمة كتير . … المهم .. إزاي بقي عملية ال ( troubleshooting ) دي بتتم : .. أولاً : و أهم شيء .. هو عن طريق تحديد الحدود اللي إحنا فيها .. يعني : الشخص اللي غالباً شايف إن موضوع ال (ASP ) ده ممكن يكون مناسب له .. مشاكله هي التشتت و التسويف و التأجيل و فشل متكرر و عدم إلتزام أو إكمال أى مشاريع و … . لكن .. بعد فترة طويلة و حياة كاملة مع حاجة زي ال ( ADHD ) .. عقل الإنسان بيبدأ يبني نظام دفاعي ضد تحمّل المسئولية .. و إلا لو إنت فعلاً طول الوقت مصدّق بشكل حقيقي إنك مسئول عن كل فشل في حياتك .. حتعيش في كآبة و سواد قاسيين جداً . . ف أسهل شيء الإنسان بيبدأ يستخدمه ك مٌخدّر مؤقت .. هو إن مشكلته هي : ماعنديش موارد كفاية .. و لو أنا بس عندي موارد كفاية .. حافرتك الفراتيك و أدغدغ الدغاديغ و حيطبعوا صورتي عالجنيه الجديد . . ف أول ما بيتعرض الإنسان لسؤال : طيب .. خٌد موارد 😆 .. و أصبح معاك دلوقتي 10 مليون دولار مثلاً في البنك .. حتصرفهم إزاي بقي ؟! . عقله بيبدأ يطلّع إيرور 404 !! .. يتلجلج … يتلخبط .. يتهته .. أو يدّي كم كبير جداً من الإجابات الناقصة السريعة اللي عقله لسّة مفكّر فيها حالاً و طازة .. .. لكن .. و علي مدار عشرات المٌكالمات اللي سألت فيها السؤال ده .. نسبة قليلة جداً جداً اللي جاوبوا بشكل واضح إنه كان متحضّر و مترتب .. . القصّة المشهورة جداً اللي بافتكرها بخصوص السؤال ده كل مرة .. هي : إتنين فلاحين لهم أراضي جنب بعض .. الإتنين بيعانوا من موسم جفاف شديد مسبب لهم مجاعة .. الإتنين في الآخر وصلوا إن مافيش ملجأ غير لله سبحانه و تعالي .. و بدأوا يدعوا الله إن المطر ينزل . . الأول وقف فوسط الأرض .. و فضل يدعي و يصلي و يبتهل و يعيط .. التاني .. صلّي ركعتين .. و بعدين بدأ يدعي و يبتهل برضو .. و لكن أثناء ده كان بيحرت الأرض .. و يبذر البذور .. . بعد فترة .. المطر هطل بغزارة شديدة جداً .. الأول بدأ يجري بشكل هستيري .. مش عارف يعمل إيه ولّا إيه .. و يتكعبل .. و يشوف المطر بيدمّر سقف بيته .. و يطيّن أرضه .. . التاني .. قعد في بيتهم جنب الشباك يحتسي مشروبه المٌفضّل .. بيتدفّي تحت سقف تم ترميمه بشكل قوي إستعداد لمطر غزير زي ده … و حقل مٌعد و متجهز بشكل كامل .. و بيستفيد من كل قطرة مطر علي أرضه . . الإتنين دعوا الله .. مين اللي كان مٌستعد للإجابة ؟! … ثانياً : لو حتتصرّف بقي في الفلوس دي بشكل شخصي .. و تقدر تشتري لنفسك كل الشوكولاتة و البرينجلز اللي نفسك فيهم … حتشتري إيه ؟! . ده بيكون سؤال عياري مباشر .. الهدف منه كشف للشخص بشكل مباشر و واضح و رقمي .. هو هدفه ( مادياً ) فين بالظبط . . لأن .. فأحيان كتير جداً .. بيكون الهدف ده مزغلل جداً جداً بالنسبة للناس .. لدرجة إن ناس كتير بتكون وصلت للهدف .. و لكنها مش شايفة .. و قاعدين بيدوروا عليه برضو . . و ناس تانيين بيكونوا مفكّرين إنه بعييييييييييييييييد … في حين إنه قريب جداً .. و ساهل جداً .. . أو العكس طبعاً . … فبالتالي .. السؤال الأول و التاني .. بيكون كإني حددت حدود الأرض اللي بنلعب و نتحرك فيها .. و نشوف .. هل هي أرض فعلاً متجهزّة ؟! .. ولا إحنا واقفين بندعي و أول ما حييجي المطر .. حنجري و نتكعبل ؟! . .. السؤال التالت و الرابع و الخامس و السادس .. دول ل دراسة الشخص نفسه .. هل الشخص ده شايف نفسه في حياته ك ( فاعل ولّا مفعول به ) .. . و هل مدرك إمكانياته إيه ؟! .. و حدودها إيه ؟! .. و هل عقله اللا واعي ( اللي هو لو إنسان adhd .. فغالباً ده اللي هو شغّال بيه طول الوقت ) .. بيعيشه في فانتازيا ممكنة .. ولا مستحيلة ؟! . . يعني إيه ( فانتازيا ممكنة ) دي ؟! .. هو في ( فانتازيا ) ممكنة ؟! . … في ناس كتير .. بتكون الفانتازيا بتاعتهم مثلاً هي أحلام إنتقام من كل اللي ظلموهم و آذوهم .. بغض النظر هل هما فعلاً مظلومين أو لا .. و بالتالي .. جزء ضخم جداً من يومهم و وقتهم بيكون أسير لأحلام يقظة بيتخيلوا فيهم لحظة الإنتقام دي .. بيتخيلوا مشاعر .. مش بالضرورة سيناريوهات واقعية لرد أذي أو إنتقام .. و لكن بيتخيلوا لحظة خلاص .. . و في الحقيقة إن ( لحظة الخلاص ) دي .. هي في أغلب الوقت بتكون .. وهم كامل .. و بيفضل الشخص عايش بيتمنّي فانتازيا .. غير منطقية تماماً .. … لكن .. في فانتازيا ممكنة فعلاً .. لما تكون أحلامك مثلاً هي ثراء , مٌتع , تقدير , نجاح , … ففي الحالة دي .. في وسائل كتير ممكنة تحقق لك ال ” طعم ” ده .. حتي لو مش عن طريق نفس الصورة الخيالية .. . يعني .. ناس كتير بتحلم إنها تكون بطل أسطوري زي أفلام مارفيل مثلاً .. دي فانتازيا ممكنة جداً .. لأن .. بمجرد ما بيدرك الإنسان معني البطولة الحقيقية و معاييرها .. بيبدأ يكتشف إنه يقدر يكون فعلاً بطل أسطوري بسهولة للغاية .. حتي لو عن طريق إنه يغسل المواعين في بيتهم .. أو يطبّق غسيل متنشّر مثلاً 🤣🤣 .. ( كنت كتبت عن ده من زمااااااااااااااااااان ) .. … أمّا السؤال السابع .. .. ف ده شرحه حيخلي البوست يطول أكتر بكتير .. خصوصاً إن لسة في كلام كمان يتقال .. . إذن البوست ده حيكون له جزء قادم إن شاء الله . .. و الله أعلم … ** الصورة من أغنية ( واه يا غزالي ) .. أحد أغانيا المٌفضلة في طفولتي 🤣😅.. و هما الإتنين بيقولوا ل بعض بعد ما لقوا كنز في الأرض : طبجها .. ماتطبجهاش .. طبجها .. ماتطبجهاش .. 🤣🤣