في حاجة حصلت إمبارح .. أنا ماكنتش ناوي أتكلم عنها
ميلا جوجوفيتش .. 🙂🤣
في حاجة حصلت إمبارح .. أنا ماكنتش ناوي أتكلم عنها إطلاقاً لسة ..
و لكن صحيت النهاردة .. و لقيت الموضوع إنتشر .. أوي ..
خصوصاً إن الموضوع فيه أسامي مشهورة جداً ( بالنسبة ليا ) ..
و بما إن الموضوع ده له علاقة بحاجات كتير أنا باعملها و مٌهتم بيها ..
ف خليني أدردش فيه هنا بقي علي العام .
…
ميلا جوجوفيتش .. 🙂🤣
الممثلة المشهورة بتاعت ( the 5th element ) و ( resident evil ) .
عملت دويتو ( تقني ) مع واحد إسمه ( بين سيجمان ) اللي هو : أحد التنانين المٌجنحة المشهورين في عوالم السوفتوير ( و خصوصاً الكريبتو و البيتكوين ) .
.
و بما إني كنت أعرف عن عمو ( بين سيجمان ) ده قبل كده ..
و بما إني ماشفتش أفلام ريزيدينت إيفل ( مابحبش النوعية دي من الأفلام اللي فيها Gore عموماً : يعني دم و أحشاء و حاجات بتطرطش 🤣 ) .
.
لكني باحب جداً جداً جداً الأغنية (the diva dance ) .. الأوبرالية الميكس مع أكشن في فيلم ( the 5th element ) ..
و كانت رنّة موبايلي لفترة طويلة جداً ( أيام ما كنت باغير رنة موبايلي ) .. هي الحتة المٌستحيل إن بشري يغنيها دي ( اللي بتطلع و بتنزل بصوتها بين طبقات صوتية بسرعة جداً و بشكل مباشر ) . 🤣
.
المهم .. ده هو الفيلم الوحيد اللي شفت فيه ( ميلا جوجوفيتش ) دي .
…
عملوا إيه بقي في الدويتو ده ؟!
..
حاجة إسمها ( ميم بالاس = قصر الذكريات ) ..
آداة وظيفتها هي إن موديل الذكاء الإصطناعي يقدر يفتكر كل حاجة إنت بتقولها له مهما كانت التفاصيل كتير .. أو بوستات طويلة فحت زي اللي باكتبها .
..
ده مهم ليه بالنسبة ليا ؟! .
لأن زمااااااااااااااااااااااااااااان سنة 2008 و 2009 .. قبل ما أعرف يعني إيه ( adhd ) و إني عضوياً و كيميائياً مستحيل أوصل إن ذاكرتي تبقي حتي ذاكرة طبيعية ..
قضيت سنة كاملة غطسان في كل ما له علاقة بأبحاث و تمارين الذاكرة ..
و إزاي إن في ناس قدرت تمرّن نفسها إنها تحفظ كل شيء و أي شيء ..
.
أنا طبعاً كان أمنية حياتي إني أقدر بس أفتكر أبسط القوانين اللي بنمتحن عليها في الكلية ..
و لكن كانت طموحاتي إني أقدر أحفظ القرآن الكريم بالكامل ..
و أقدر أحفظ أفكاري أثناء ما بافكر فيها ( خصوصاً في الشطرنج ) ..
و أقدر أحفظ الكم الضخم اللي كنت بدأت أستهلكه من الكتب العلمية و التقنية ..
…
ف أحد التقنيات اللي فضلت شهور بامارسها و أمرّن عقلي عليها .. هو موضوع ال ( ميم بالاس ) ده ..
الفكرة بتاعته ببساطة و تلخيص :
إنت تبتدي بإنك تتخيل شقّة صغننة خالص ..
يادوب أوضة و صالة و مطبخ و حمام مثلاً .. و يٌفضل جداً إنها تكون مكان حقيقي إنت شفته و عشت فيه فعلاً .. و ليك ذكريات فيه .. مع ريحته .. مع الإضاءة فيه .. مع كل تفاصيله .
…
و بعدين تبدأ تتخيل أى حاجة بتحاول تفتكرها و تحتفظ بيها فعقلك .. كإنها حاجات مادية بتتحط في أماكن ثابتة و واضحة جوة الشقة دي .
.
مثلاً : قانون حل المٌعادلة التربيعية العام اللي عٌمري في حياتي ما عرفت أحفظه .. ف ده أنا كنت متخيل إنه :
ترابيزة سٌفرة كبيرة ( مكان علامة القسمة ) .. تحتها في ال ( 2a ) .. توأم بيلعبوا و هما حاضنين بعض 🤣
و فوقها .. في ال ( b- ) قاعدة زعلانة لوحدها لأنها بالسالب ( مشاعر سلبية يعني ) ..
و مترددة تقرب أو تبعد ( +- ) من الحفلة اللي حاصلة تحت علامة الجذر التربيعي ..
إيه بقي اللي بيحصل تحت علامة الجذر التربيعي ؟! 🤣
ال ( b ) متربعة فوق نفسها ( تربيع يعني ) ..
و بتتخانق مع ال ( 4ac- ) اللي مشاعرهم سلبية بسبب قرب ال ( C ) من ال (a ) 🤣 .
…
المشهد ده قسماً بالله … كنت باشوفه بوضوح ..
و ساعدني فعلاً إني أحفظ المٌعادلة التربيعية اللي كانت و ما زالت عايشة بالمنظر ده في أوضة سٌفرة ( قصر ذكريات عقلي ) الخاص .
.
لكن ..
..
لكن اللي إكتشفته بعد كده إن المشكلة عندي عمرها ما كانت في تخيل و بناء القصر الضخم ده ..
أنا فعلاً وصل بيا الأمر إني كنت باقضّي ساعات عايش جوة قصر مشيب مهيب ضخخخخخخخخخخخم بنيته جوة عقلي .. و لسة فاكر تفاصيل كل حاجة فيه حتي اليوم ..
…
المشكلة عندي ( و عند أى حد زيي = adhd ) .. هما حاجتين أساسيين :
التسكين ..
و الإختيار ..
…
يعني إيه ؟! .
..
يعني .. أنا ماباختارش إيه بقي اللي يدخل و يسكن و يعيش و يفرش في القصر ده ..
أنا عقلي عامل زي كومساري الأوتوبيس اللي عمال يزعق في أى حد واقف متردد و يقول له :
أدخل يا فندي .. أدخلي يا أبلة .. العربية ورا فاضية يا خوانا .. ساعوا بعض 🤣🤣🤣 .
و كل المعلومات مهما كانت تافهة أو مالهاش أهمية أو قيمة .. بتدخل و تعيش و تعشش جوة .
.
و الحاجة التانية هي :
إني مش باختار مين ينزل إمتي 🤣 .
.
يعني أبقي قاعد باتكلم في محاضرة مهمة .. و ألاقي نفسي فجأة و بدون أسباب إفتكرت أغنية ( هم النم يا روحي يلا جايبالك مم ) ..
كل و إكبرلي يا روحي .. يلا هم النم ..
.
مرة سألت الأستاذ أرنب .. ليه مانتش لابس نضارة ..
قال طول عمري ظريف و مؤدب .. و آكل من غير ماعمل غارة 🤣🤣🤣
…
ما علينا ..
كده الأغنية دي حتفضل عايشة فنافوخي النهاردة بالكامل ..
بالمناسبة .. أنا يومياً لما باصحي من النوم بالاقي في أغنية شغالة في عقلي قسماً بالله بدون أى إختيار مني ..
و ممكن أكون ماسمعتهاش من 18 سنة مثلاً .. لكنها بتطلع فجأة لوحدها .
…
المهم :
الآداة اللي عملتها باشمهندسة ميلا و عمو بين سيجمان ..
بتعتمد علي :
( تصميم ذكي لل قصر ده ) .. و لكن الأهم و اللي عامل دوشة أكتر هي :
اللغة الجديدة ..
..
حاجة إسمها : ( AAAK (Abbreviated Agent-Accessible Knowledge) ) .
اللي هي بأبسط شرح ممكن :
زي لما تتكلم مع صاحبك بالسيم 🤣
إنت تفهمه و هو يفهمك .. لكن عمو اللي قاعد علي ترابيزة جنبكوا و شنبه واضح إنه شنب مخبرين .. و لابس نضارة شمس بالليل جوة القهوة ..
مش حيفهمكم .. 🤣
…
اللغة دي المفروض إنها بتضغط الداتا بنسبة 30 مرة ..
و دي هي الحتة المٌثيرة في الموضوع ..
لأنك لو قدرت تضغط كل إستهلاكك من كلود حالياً 30 مرة .. و كمان تضمن إنه يفتكر كل حاجة إنت إتكلمت معاه فيها من أحلامك و طموحاتك و مخاوفك و مشاعرك تجاه بوستاتي الطويلة ..
ف مش حتواجه مشكلة التوكينز اللي بتخلص طول الوقت دي ..
ده غير كل الإمكانيات الضخمة اللي ممكن تبنيها ب ذاكرة كاملة .
…
سبب بقي إني باكتب عن ده مخصوص هو :
إني في برمجة و تصميم ( زالفول - zalfol ) الأساسية .. باني شيء مشابه ..
الهدف بتاعه إن كل معلومة تدخل زالفول .. إنت تقدر تسترجعها و تستخدمها .
لأني زي ما شرحت .. بنيت زالفول في الأساس لدماغي أنا .. و إحتياجاتي أنا .
…
ف دلوقتي .. أنا متابع جداً جداً عن قرب ..
لسة في دوشة كتير إن الموضوع كله دوشة ناس مشهورة .. و إن الإختبارات اللي بيقولوا إنهم إجتازوها بعلامات قياسية .. كلها ملعوب في أساساتها .
.
لكن .. حتي لو ..
ف أنا ممكن جداً أفك الآداة اللي عملوها دي ( لأنها أوبن سورس ) ..
و أستخدم بس موضوع اللغة لوحده جوة زالفول .
.
و لكن .. ده بيفكرني ب سؤال مختلف تماااااااماً .. و هو :
هل إنت مدرك مدي المعاناة و الألم اللي ممكن ينتجوا عن إنك تفتكر كل شيء ؟!
ماتنساش شيء ؟! ..
إطلاقاً ؟ ..
…
ذاكرتي المٌتطايرة دي .. أحد الحاجات اللي إتعلمت أحمد الله عليها ..
…
و الله أعلم .