حصلت حاجات كتير أوي و تفاصيل كتير جداً .. مش

حصلت حاجات كتير أوي و تفاصيل كتير جداً .. مش مهم دلوقتي هي إيه .. لكن المهم إن النتيجة هي : مٌستقبل العالم بالكامل حيتحدد عن طريق ( أحرف لعّيب دومينو ) 🙂 .. معلش إتخيل معايا السيناريو العبثي ده .. حاجة كدة زي في الأنيمي لما البطل بيقرر إنه حيتحكم في العالم عن طريق قوة البلا%@$ .. إحم… عربيات السباق 🤣😅 . .. ف دلوقتي بقي .. في حد شرير أسطوري .. سيطر علي العالم بالكامل .. و آخر خطوة في خطته الشريرة .. هي إنه حيعلّم علي البشرية في فورة دومينو 🤣.. .. و من بعييييييييييييييييييد … من أعماق حواري و عشوائيات مصر .. بيطلع من وسط سحابة دخّان القهاوي البلدي و السجاير الكيلوباتر الفرط و حجر المعسّل التفاحة .. شاب في نهايات التلاتينيات و بدايات الأربعينيات و لكن عينيه تحسسك إنه عايش بقاله كتير أوي .. .. و بخطوات واثقة جداً بيمشيها و هو بيطرقع بشبشب بلاستيك ماركة تقليد .. بيتقدم من وسط كل البشرية .. و بحركة مباغتة بيشد كرسي بلاستيك ضهره و إيده مكسورين بس الضهر متدبّس بمسامير ! . و بيرزع الكرسي عالأرض .. و بصوت جهوري بيقول : ” نزّل واحد شاي نعناع هنا علي حساب الأوستاذ يابني ” .. و بعدين بيظهر علي وشّه إبتسامة خبيثة تبيّن سنانه الصفرا من القهوة و الشاي و السجاير .. و يستطرد و هو باصص في عينين الشرير الأسطوري اللي قاعد قدامه .. و يقول : تلعب عالمشاريب ؟! .. أصل محسوبك مادفعش مليم فقهوة من سنيييييييييييييييييييييييييييين .
( كناية عن إنه بيغلب دايماً يعني 😅 ) . … المشهد اللي فات ده .. بيحضر فذهني تقريباً كل مرة باتعرّف علي مجال جديد في الحياة .. يعني … أول مرة فحياتي عرفت عن ال ( برمجة , تصميم , مجالات بيزنس فرعية مختلفة , .. أو حتي عن عوالم تني البروتين ولامؤاخذة 🤣 = Protein folding algorithms games … و مجالات تانية كتييييييييير ) . كل مرة .. بابتدي بإني أعرف شوية أسامي ل ( تنانين ) في المجال الجديد اللي باتعرّف عليه ده .. و أتعرف علي قصص حياتهم .. و إزاي إن كل ( تنّين ) منهم .. وصل لمرحلة الثقة السابق وصفها ( بتاعت حرّيف الدومينو ) فوق .. و إنه جاهز يلاعب الشرير بتاع العالم .. علي المشاريب 🤣. … أنا ماعنديش أى ثقة فنفسي إطلاقاً بالمناسبة في مجال ال ( دومينو ) 😅 أنا باعرف ألعب اللعبة أكيد .. و إتعلمتها في طفولتي في إبتدائي .. و لكن .. ربنا رزقني بإني عرفت ناس معينين عندهم ذاكرة أرقام رائعة .. الناس دي بتمارس ب روقان أحد أشهر مهارات ألعاب الكوتشينة و الدومينو .. مهارة إسمها ( Card Counting = عد الورق ) .. اللي هي إنه بيتذكر كل ورقة ( كوتشينة أو دومينو ) إتلعبت حتي الآن .. و عن طريق عملية طرح بسيطة .. و شوية إحتمالات .. بيقدر يحسب أفضل خطوة بكل سهولة .. و بينفذها . .. لعب معظم ألعاب الكوتشينة أو الدومينو ضد الناس اللي عندها القدرة دي .. هو نوع من أنواع المازوخية 🤣 ( اللي هو حب إيلام النفس ) .. و أنا إتألمت كتير بسببهم الصراحة 🤣🤣 … لكن .. أنا بكل تأكيد عندي بعض الثقة فنفسي فمجالات أخري .. و أحد الأمثلة دي مثلاً حالياً في حياتي .. لعبة إلكترونية مٌعقدة فعلاً إسمها : ( تيم فايت تاكتكس = Teamfight Tactics) .. … من سنتين تقريباً .. ماكنتش أعرف إطلاقاً أى شيء عن اللعبة دي .. جهلي باللعبة دي .. كان جهل كامل .. مش نصف جهل .. يعني إيه ؟! .. . يعني .. أنا ماكنتش أعرف .. إني ماكنتش أعرف حاجة عن اللعبة . i didn’t know that i didn’t know . . و بعدين .. فتحت الصندوق السادس .. من نظام الصناديق الستة 😎 … لو متابع حتي الآن .. ف ده هو البوست التالت في سلسلة شرح نظام الصناديق الستة . النظام اللي شخصياً ماشي عليه بقالي فترة طويلة .. و طورته عن طريق ضرب عدد محترم من المعلومات و الأنظمة المشهورة في الخلاط .. و عمل كوكتيل ملائم ل حد adhd زيي 😁 . .. في البوستات السابقة حتي الآن .. شرحت ال5 صناديق الأولي .. و ده بوست الصندوق السادس .. صندوق : ( إنت مانتش عارف إنت مانتش عارف إيه = You don’t know what you don’t know ) . … الصندوق ده .. بفضل الله .. ساعدني في حاجات كتير جداً جداً جداً في حياتي .. ساعدني إني أعرف عن عوالم الكريبتو و البيتكوين .. من أيام ما كان لسة ب 10 دولار .. ساعدني إني أعرف عن عوالم الذكاء الإصطناعي .. سنين و شهور قبل ما يكون تريند .. ساعدني إني أشتغل في مجالات كانت أبعد ما يكون عن خيالي .. . و برضو ساعدني إني أتعلم لعب مختلفة ممكن ألاعب أخطر شرير في العالم فيها .. و أبقي واثق إني ممكن أخليه يحاسب عالمشاريب 🤣 … كل مجال من المجالات اللي ذكرت أمثلة منها دي .. قبل ما أدخلها .. كان بينطبق عليها نفس الجملة .. أنا ماكنتش عارف إني ماكنتش عارف عنهم .. . و لكن .. بعد فترة معينة من الزمن .. باكون وصلت لمرحلة ( الثقة بالنفس فيهم ) .. . طيب .. ده حصل إزاي ؟! .. الإجابة مش صعبة .. بل سهلة .. جداً .. لأن غالباً إنت نفسك عشت تسلسل الخطوات التالي ده .. كتير .. و كذا مرة .. … مثلاً .. صديقنا التنين محترف الدومينو اللي فأول البوست .. بدأ رحلته في العالم ده إزاي ؟! . هو تقريباً مثلاً و هو لسة طفل في إعدادي .. هرب من المدرسة .. و راح قعد علي قهوة بلدي يحاول يمثل إنه بقي شاب كبير .. و شاف ناس بتلعب .. مافهمش أى حاجة خاااااااااااااااااالص .. لكن .. إتشد .. جو الإثارة و الزعيق و هبد البلاطات علي الترابيزة و الضحك .. شدّه .. ف تاني مرة .. راح عشان يتفرج علي الجو ده ( مش عشان اللعبة إطلاقاً ) .. و تالت مرة … و رابع مرة .. لحد ما إعتاد سماع بعض الكلمات .. حاجات زي ( دوسة , شيش , سيه , دو , يك , دوبارة , … ) و طبعاً الجملة الأيقونية ( خٌد دي و إمسح بيها #!#% 🤣 ) . . الكلمات دي كلها .. ال ( لغة , Lingo , … ) هو مافهمش معناها إطلاقاً من أول مرة .. ولا حتي عاشر مرة .. بل يمكن فضل يكررهم كتير بينه و بين نفسه … و قٌدّام صحابه .. و هو فاهم معانيهم غلط .. و قد يكون خاض نقاشات و معارك ضد أصحابه .. و هو بيدافع عن معني غلط .. و هما بيصححوا له مثلاً . . و بعدين ؟! و بعدين بيبدأ يقلّد .. يحاول كده علي إستحياء إنه يعمل زي ما شاف الناس الكبيرة بتعمل .. و بعدين يزهق و يروح يلعب بلي مع إصحابه .. . و بعدين .. يقلّد تاني .. و تالت .. و عاشر .. و كل مرة بيقلّد فيها .. بيكون بيعصر علي نفسه لمونة .. و زهقان .. و بيحاول بصعوبة إنه يعمل حاجة هو مش فاهمها إطلاقاً .. و لكن .. رغبته في إنه ( يعمل زي اللي شافهم ) .. بتخليه يطارد إحساس الإثارة ده . .. و بعدين .. عند مرحلة معينة .. بيكون إكتسب كم كافي من ( علم الجهل ) .. بحيث إنه يقدر يسأل . . يعني إيه ( علم الجهل ) ده ؟! . يعني إنه أصبح يقدر يسأل و يقول : ” عمو عمو … هو يعني إيه شيش جهار ؟! ” . . قبل كده .. هو ماكنش يعرف أساساً إن في حاجة إسمها ( شيش جهار ) عشان يسأل عنها . . لكن .. طالما وصل إنه عرف إنه يسأل عنها .. معني كده إنه وصل لمرحلة إنه : يعلم أنه يجهل .. . و المرحلة دي .. بمجرد ما بتوصل لها .. بتلاقي ألف واحد بيطبطب عليك .. و يعلمك .. … و دي .. هي أول مرحلة بتسعي إنك توصل لها في الصندوق السادس … إنك ( تعلم ب جهلك في مجال معين ) . … طيب إزاي أساساً توصل للمرحلة دي ؟! .. بالظبط زي ما الطفل اللي كبر و بقي تنين عمل .. بإنك تتواجد في وسط ناس بتلعب .. … فقط تتواجد .. أوفلاين ( مؤتمرات و إيفنتات و محاضرات و كل الكلام الحلو اللي بيتوزع فيه باتيهات ده 😅 ) .. أو أونلاين .. … إزاي أونلاين ؟! … أكمل البوست القادم إن شاء الله .. عشان دلوقتي جه معاد ماتش في أحد المجالات اللي أنا فيها 🤣 .. … و الله أعلم .