سنة 2009 .. كنت في تالتة كلية ( هندسة إسكندرية

سنة 2009 .. كنت في تالتة كلية ( هندسة إسكندرية قسم إتصالات و إلكترونيات ) .. لأول مرة 😅.. و زي كل سنة .. كنت باقرأ أسامي المواد اللي علينا و عقلي يتملي بأحلام و أماني و آمال ( و جيهان كانت بتيجي متأخّر 🤣 ) .. عن العلوم اللي حادرسها في المواد دي . حصل موقف معين .. غيّر كتييييييييييييير في حياتي بعد كده . .. أنا يمكن ماحكيتش كتير عن ليه أساساً إخترت التخصص ده بالذات ( كهرباء و إتصالات و إلكترونيات ) .. الإجابة ببساطة : قصص ملف المستقبل .. و ريموت التيليفزيون 🤣 . آه والله العظيم . .. ببساطة .. أنا طول عمري عارف إني عايز أدخل هندسة .. و أدرس هندسة بكل ما فيها من علوم عموماً ( مش تخصص واحد يعني ) .. لكن بعد سنة إعدادي هندسة .. اللي بتدرس فيها معلومات كتير أوي عن كل التخصصات تقريباً .. و اللي قضّيت أغلب السنة دي في مكتبات الكلية ( الكلية كان فيها مكتبات مختلفة .. مكتبة ل كل قسم تقريباً ) . . بعد ما خلصت سنة إعدادي هندسة .. و أصبح لازم إني أختار تخصص معين .. لقيت إني أكتر حاجة مافهمش فيها في الحياة .. و ماعرفش عنها حاجة .. هي : عوالم الإلكترونيات و الموجات الكهرومغناطيسية اللي كان د. نبيل فاروق الله يرحمه .. بيكتب عنها في قصص ملف المستقبل تقريباً بمعدل 4 مرّات في كل صفحة 🤣 . .. في قصص ملف المستقبل .. سلوي .. كانت هي مهندسة الإتصالات و الإلكترونيات .. و كنت دايماً باحس إنها أهم حد في الليلة كلها .. أهم من ( نور و أكرم و رمزي و باقي الشلّة دي … و أكيد أهم من مشيرة 🤣 اللي كل شوية يصيبها نوبة هلع و رمزي يضربها بالقلم ) . .. و كل ما كنت أتفرج علي التيليفزيون .. بطبعي ال (adhd ) كانت إيدي بتفضل تلعب في ريموت التيليفزيون لحد ما أفكه .. و أفضل أشوف البوردة الخضرا ( ال PCB ) اللي فيها الآيسيهات السودا دي .. و أحس بجهل و غباء شديد أوي .. لأني مش فاهم أى حاجة . .. ف لما خلصت إعدادي هندسة .. و لقيت إن مجموعي يأهلني أدخل أى قسم أختاره ( ما عدا كمبيوتر .. ماجبتش درجة قسم كمبيوتر 🥲😭 ) . ف قلت لأصدقائي وقتها : ” أنا كل الأقسام تقريباً عندي معلومات عنها و فاهمها .. ما عدا إتصالات !! .. أنا حادخل إتصالات عشان أتعلّم كل اللي أنا عايزه فيها .. و فوقت فراغي حابقي أحضر فباقي الأقسام معاكوا 🤣🤣🤣🤣🤣🤣🤣🤣🤣 ” .. أى مهندس قرأ الجملة اللي فاتت دي .. أنا عارف كويس جداً إنه ضحك بصوت عالي .. و قال كلمة مش كويسة .. و أصدر صوت إعتراض من أحد فجوات راسه .. غير بٌقّه 🤣🤣 . .. و ده .. لأني كنت حمااااااااااااااار .. و ماكنتش لسة عارف إن كلية هندسة مافيش فيها مصطلح ( وقت فراغ ) .. أو مصطلح ( وقت عموماً ) .. … لكن .. كان عندي أحلام و أماني كتير فعلاً .. إني أتعلّم .. … المهم .. بعد ما تخصصت في القسم .. و إتمخمضت المخمضة اللي شرحتها في بوستات كتير قبل كده ( و المفروض إن في بودكاست حيتذاع قريب شارح فيه عن المرحلة دي بالتفصيل .. و ال ADHD ) .. و درجاتي علي مدار أول 3 سنين كانت كلها ( ضعيف و راسب و مقبول بالعافية ) .. و مع ذلك كان لسة حب العلوم اللي بادرسها جوة قلبي حي . .. ف فسنة تالتة ترم تاني .. كان علينا : مايكروبروسيسور 😮😮😮 . الكلمة لوحدها أول ما قرأتها في جدول المواد اللي بنصوره في المكتبة اللي قدام الكلية فأول الترم .. حسستني بنشوة و إنتعاش بشكل عجيب .. اللي هو أخيييييييييراً … أنا كنت مستني اللحظة دي من زمان عشان أفهم بقي .. الكمبيوتر اللي في البيت عندي .. و بقالي 6 سنين عايش عليه و فيه و بنام جنبه حرفياً حصل إزاي ؟! .. .. يعني .. مين صحي من النوم الصبح .. و قرر و قال ” أنا حابني النهاردة كمبيوتر ” ؟!!!! و ليه ؟! .. .. أنا فاهم إن الكمبيوتر كان ( آلة حاسبة ) و راحت الجيم و إتمرنت لحد ما أصبحت كمبيوتر ماشي 🤣 .. بس التسلسل ده حصل إزاي ؟! … و مين اللي خطط للكلام ده كله ؟! … أول محاضرة في المايكروبروسيسور .. الدكتور دخلت .. و كتبت علي السبورة : 8086 و بدأت تشرح : حانبتدي بال ( ريجيسترز ) للبروسيسور ال 8086 .. و بدأت تكتب و تشرح . .. و الناس تكتب وراها في السكيتشات .. و أنا حاسس إن في حاجة غلط !! .. الدكتور بتشرح المداخل و المخارج .. و البيانات .. و بتكتب عن ال ( subroutines ) .. و ال( addressing modes ) .. و … !!!! . هو في إيه ؟! هو أنا دخلت الفيلم فنصّه ؟! .. هو مش دي أول محاضرة يا جدعان ؟! أنا آه ماشي درجاتي علي مدار السنين اللي فاتت كلها مقبول و ضعيف و راسب .. بس مش لدرجة إني أنسي إني عمري ما أخدت أى حاجة في المايكروبروسيسور قبل كده !!! .. . هي الناس مش مستغربة زيي ليه ؟! … بعد ما المحاضرة الأولي العجيبة دي خلصت .. طلعت للدكتور .. و سألتها : دكتور .. معلش .. خديني علي قد عقلي .. بس هو إحنا كان في حاجة المفروض نذاكرها قبل ما نحضر النهاردة ؟! .. يعني أنا في حلقة ناقصة عندي ؟! ردت عليا إن : لا .. دي أول محاضرة . . قلت لها : طيب .. معلش .. أنا مش فاهم حاجة .. قالت لي : تحب أشرح لك إيه في ال ( addressing modes أو الريجيسترز أو الصاب روتينز ) مش فاهمه . . رديت إن : لا لا .. أنا مش فاهم أساساً مين عمل إيه فين ليه و إزاي عشان يبقي في الكلام ده كله !! يعني .. معلش .. هو إزاي أساساً ناس قرروا فجأة يبنوا البروسيسور ال ( 8086 ) ؟!! . . ردت و قالت : لا .. الناس مابنوش البروسيسور ال ( 8086 ) ده فجأة .. دول طوروا علي البروسيسور ال ( 8080 ) … بس ده مش عليكم في المنهج . . قلت لها : معلش .. أنا بحب القصص .. أنا عايز أعرف بس هما فكروا فيه إزاي لو هو ده أول واحد . قالت لي : ده مش أول واحد .. كان في قبله ال 4040 … بس الكلام ده كله مش عليكم في المنهج . . قالت كل ده و هي بتلم ورقها و بتحاول تطلع من المدرج .. و أنا لسان حالي ك سعاد حسني و هي بتجري ورا حزنبل و تقول له شوية كمان يا حزنبل 🤣 . قلت لها : أول واحد خالص … الناس فكروا فيه إزاي ؟!.. أو بالأصح .. ليه ؟! .. ردت عليا : إنت كده محتاج تروح تقرا عن ال 4004 .. . و خدت ورقها و كتبها .. و سابتني و مشت 🥹🥲 … … دي ماكنتش أول مرة في حياتي أحس بخنقة كلابشات الجملة دي ( مش عليكوا في المنهج ) .. علي مدار حياتي .. كنت دايماً باسأل المدرسين في حاجات .. و أسمع الجملة دي .. بس قبل مرحلة الكلية .. كان المُدرسين بيكملوا الجملة دي ب جملة تانية .. و هي : و أنا فإبتدائي إتقال ليا .. لما تكبر و تدخل إعدادي و بعدين لما تكبر و تدخل ثانوي . و بعدين لما تدخل هندسة .. حتعرف . . لكن .. لما سمعتها من الدكتور في اليوم ده .. حسيت إني خلاص مش قادر أستحمل . . و فعلاً سبت المدرج .. و الكلية بالكامل في اليوم ده .. و خدتها مشي كالمعتاد لحد البحر .. . ماكنتش باروح مكان معين لما باسيب الكلية ( و ده كان نادر الحدوث ) .. و لكن كنت باروح أقعد عالبحر و أحط السماعات في وداني و أعيش في عالم أفكاري لوحدي . … اللي ماكنتش عرفته لسة أيامها .. إن يمكن فنفس الأماكن اللي قعدت فيها عالبحر دي .. كان في يوم من الأيام عايش : إقليدس . … في البوست اللي فات .. و اللي شرحت فيه سبب إن إسم إقليدس له ذكريات خاصة معايا من مرحلة إعدادي .. ماشرحتش كتير عن الشخصية نفسها . .. إقليدس كان إسكندراني .. و إحتمال كبير أوي يكون كان بيقول ( أحيه .. و أيووه .. و جني بدل جنيه كمان 🤣 ) . .. هو أينعم كان من اليونان أساساً .. و لكن جه إسكندرية .. و عاش و درس فيها .. و درّس فيها .. … ليه بقي كتبت الهري اللي فوق و ذكرياتي دي كلها ؟! .. لأن : علي مدار حياتي .. دايماً كنت بابقي شايف إن الشخص .. و أسبابه .. و حياته .. مهم جداً جداً جداً .. عشان أفهم إنتاجه .. . يعني إيه ؟! . يعني .. بكل تأكيد أنا مش أول حد في الحياة بيحاول يشرح الحاجات اللي باحاول أشرحها .. و بكل تأكيد تقدر بكل سهولة تفتح صفحة ويكيبيديا .. او تفتح شات جي بي تي .. و تسأله عن إقليدس و فيثاغورس و بدايات الرياضيات و العلوم و غيرها .. أو أى شيء تاني شرحته علي مدار السنين ( كريبتو , جرافيكس , بيزنس , … ) . و لكن .. الطريقة دي في التعلّم .. بالنسبة لناس كتير جداً .. مش بتؤدي ل ( تعليم ) .. و لكن ل ( تأهيل ) … و بين الإتنين دول فرق عظيييييييييم جداً . … كليات القمة في مصر ( هندسة و طب و علوم ) .. بيطلعوا آلاف الخريجين سنوياً .. كلهم مؤهلين لإستخدام أدق العلوم في مجالاتهم . . لكن معلش ( إقرا الجملة اللي فاتت دي تاني ببطء ) ( مؤهلين لإستخدام أدق العلوم ) .. . لكن .. لو وقفّت أى حد فيهم .. و طلبت منه ( يبدع ) فأى علم من العلوم دي .. غالباً حتلاقيه بدأ يهنج .. و يتهته .. و يرد الرد اللي إتحفر في عقله علي مدار سنين طويلة .. و هو : ماخدناهاش في المنهج . … … سنة 2009 .. بعد ما طلعت من الكلية و قعدت أتمشي علي البحر في إتجاه أحد أكثر الأماكن المحببة ليا في الحياة ( مكتبة إسكندرية ) .. لقيت إن كان في إيفنت ل د إسماعيل سراج الدين .. و اللي كان في الوقت ده مدير مكتبة الإسكندرية . خدت ميعاد الإيفنت .. و رحت له في يوم مخصوص بعد كده .. فاكر كويس إنه كان يوم ( إثنين ) .. الإيفنت كان محاضرة مدتها 8 ساعات .. آه والله .. ب إستراحات في النص .. و في ال 8 ساعات دول .. د إسماعيل ربنا يبارك له .. شرح تفصيلياً الكمبيوتر الحديث حالياً تواجد إزاي .. و البداية كانت : إزاي الإنسان البدائي إبتدي بإنه يعد علي صوابع إيديه .. و بعدين العدادات الصينية ( اللي هي بتاعت الأطفال = appacus ) و بعدين علوم الأرقام .. و علوم التشفير .. و آلان تيورنج .. . و رحلة طويييييييييييييييييلة .. إنتهت ب :
البروسيسور ال 8086 . … سنة 300 قبل الميلاد … في إسكندرية .. إقليدس خد قرار إنه يجمع الرياضيات بالكامل في مجموعة كتبه ( العناصر ) .. و البداية كانت زي أي بداية .. طلع من مكتبة إسكندرية .. قعد علي سيلانترو .. فتح اللاب و فتح صفحة وورد فاضية .. و بدأ يكتب .. .. ال ( مٌسلمات = Postulates ) الأولي .. 1- تعريف النقطة . 2- تعريف القطعة المستقيمة . 3- تعريف الدائرة . 4- تعريف الزاوية القائمة . … و بعدين .. خد نفس عميق .. و شد كام شفطة فرابتشينو .. و بعدين كتب : 5- مٌسلمة الخطوط المتوازية ( مش حاشرحها هنا دلوقتي ) .. لكن يكفي إنك تعرف إن المُسلمة الخامسة دي بالذات .. خدت 2000 سنة محيرة علماء الرياضة بعد كده . … سنة 2009 .. إتعلمت إن بروسيسور الكمبيوتر المُعقد جداً جداً جداً ده .. إبتدي بإنسان بيعد علي صوابع إيديه . . سنة 300 قبل الميلاد .. إقليدس إبتدي أعظم كتاب في عالم الرياضيات .. بتعريف النقطة . … سنة 2018 .. لما عرفت لأول مرة يعني إيه (adhd ) … عرفت إن عقلي مابيحتفظش بأى معلومة إطلااااااااااااقاً .. إلا لو كانت متصلة بباقي شجرة المعلومات اللي ف عقلي .. .. يعني .. أى شيء علي الإطلاق في عقلي .. لو ماقدرش أثبته أو أتتبع أصله و قصته من البدااااااااااااااية خالص .. يبقي كأنه مش موجود .. و بعد دقائق .. بيتنسي بالكامل . … و لكن .. وقت الإمتحان في كلية هندسة .. كان 3 ساعات بس … إطلاقاً ماكنش بيبقي كافي إني كل مرة .. أستنتج أعقد الإثباتات عشان أطلّع القوانين اللي كنا بنحتاجها عشان نحل المسئلة .. .. و بالتالي .. عمري ما كنت ( مؤهل ) إني أكون مهندس أكاديمي .. .. الله أعلم إن كنت ( إتعلمت ) .. الله أعلم .