عارف لما تبقي صاحي من النوم الصبح

عارف لما تبقي صاحي من النوم الصبح .. فايق ما شاء الله لا قوة إلا بالله .. بتقوم تعيش روتينك الصباحي المٌعتاد .. تعمل القهوة بتاعتك .. حاسس إن الدنيا بتاعتك النهاردة .. متفائل ليومك أوي .. مزاجك رايق .. مٌتطلّع للحياة .. و فجأة .. فجأة كده من حيث لا تدري بدون أى سبب منطقي إطلاقاً .. تلاقي نفسك إتخنقت !! .. خفت !! .. إتوترت !! .. إتضايقت !! .. . ماحصلش أى حاجة .. ماحدش كلمّك .. مافيش أى حاجة إنت فاكرها إختلفت .. و لكن فجأة كده حصل التغيّر ده .. فجأة بتلاقي نفسك كاره الشغل و الناس و الحياة … و كاره نفسك إنت كمان . و بتلاقي نفسك إتسحلت في دوامة بتاخدك لحد قعر القاع تحت خاااااااالص . . ليه ؟! ليه بيحصل الكلام ده ؟! .. و هل في أمل ؟! … التقلبات المزاجية و العاطفية دي .. أحد أشهر و أكبر مشاكل الناس اللي عندها ( adhd ) خصوصاً .. . الناس العادية ممكن يكون بيحصل معاهم الكلام اللي فوق ده مرة كل كام يوم .. و شوية كده و الموضوع بيخلص لوحده .. و حدته و شدّته بتكون بسيطة نسبياً .. اللي هو ممكن يتعامل مع الموضوع ب شوية قهوة أو بعد شوية الدنيا تظبط لوحدها . . لكن .. الناس أمثالي أنا بقي .. الموضوع ده عندنا يومياً .. و طول الوقت .. طوووووووووول الوقت .. من أقصي اليسار ل أقصي اليمين .. و من أعمق قعر في القاع .. ل أعلي قمة في سماء السعادة و اليوفوريا و الهايبرة .. 10 مرّات في الساعة الواحدة .. و أكتر كمان .. . و قبل ما تتسائل .. لا .. اللي باتكلم عليه ده مش ال ( Bipolar disorder = إضطراب التقلبات الحدّية ) . . الناس ال ( بايبولار ) .. الموضوع عندهم مش بيكون مراجيح زينا كده .. لا .. ده بيكون أيام فوووووووووق .. و أيام تحححححححححححححححت .. أيام كاملة .. . لكن إحنا ؟! .. معشر المهايبرين .. إحنا بنكون مراجيح حرفياً .. طول الوقت . … طيب .. ليه الكلام ده بيحصل ؟! لأن : أولاً : ماعندناش أى قدرة إطلاقاً علي التحكّم في إنتباهنا و تركيزنا .. و ثانياً : ماعندناش ذاكرة قصيرة مدي ( working memory ) تساعدنا نفتكر هو إحنا كنا مركزين علي إيه من دقيقة فاتت . . فالنتيجة ؟! . النتيجة إنك بتبقي زي اللي ماشي في الشارع .. ماعندوش القدرة إنه يسد مناخيره .. و فجأة شم ريحة وحشة جداً جداً من كوم زبالة جنبه مثلاً .. و بعدين مشي كام ثانية .. نسي إن كان في كوم زبالة .. و نسي إنه شم أى حاجة أساساً .. لكنه أصبح متضايق .. و مكشّر .. و نفسه مخنوق .. و ذكري الريحة الوحشة معلّقه فمناخيره .. لكنه هو شخصياً مش شايف أى حاجة حواليه منطقية تسبب ده .. ف يبدأ يشك فنفسه .. و يشك إن هو شخصياً سبب الريحة الوحشة دي .. أو إنه محكوم عليه طول حياته إنه يفضل شامم ريحة وحشة كده طول الوقت .. و إن … و فجأة .. تلاقيه سعيد و مبتسم و فرحان و سرحان .. و إنه حاسس إن الحياة كلها ريحتها ورود و برفانات حلوة و بوية و بنزين ( لو إنت من الناس اللي بتحب ريحة البوية و البنزين 🤣 ) .. و برضو نفس الشيء .. هو مش فاكر إنه عدّي جنب أى مصدر للريحة الحلوة دي .. و مش فاكر إنه شم حاجة مختلفة أساساً .. لكن دلوقتي أصبح مقتنع تماماً إنه مختلف عن الناس كلها .. و إنه محظوظ إنه عبقري و فاهم الحياة صح و مستمتع تماماً بالحياة اللي كلها روايح حلوة طول الوقت بالمنظر ده .. و إن … و العكس و العكس و العكس. .. و هكذا و هكذا و هكذا . … ده بالظبط هو اللي بيحصل في عقلنا طول الوقت .. إنتباهنا و تركيزنا .. بشكل شبه عشوائي جداً جداً .. بيختار أى حاجة من الحاجات اللي حوالينا في الحياة .. أو في ذاكرتنا … و يركّز عليها .. و يفتكرها .. و لو هي موقف وحش .. بيأثّر علي عاطفتنا و مشاعرنا بالسلب . و لو هو موقف حلو .. بيأثر علي عاطفتنا و مشاعرنا بالإيجاب . . بدون أى تحكّم مننا إطلاقاً .. و بدون أى قدرة حقيقية إننا نفتكر هو عقلنا لاحظ إيه أو ركّز علي إيه أو إفتكر إيه . … ده بالظبط اللي أنا صممت زٌرار ال ( Heart = قلب ) .. بناءاً عليه في ( زالفول = Zalfol ) . . الكلام اللي شرحته فوق ده مش إختراعي .. في أبحاث و دراسات كتير شارحه الكلام ده بكل تفاصيله .. مش محتاج مني إني أكتبهم لك هنا .. و لكن رجاءاً تقدر بكل سهولة تاخد كلامي ده و تدّيه لأى ذكاء إصطناعي .. و تطلب إنه ي ( Steelman ) و ي ( Validate ) .. ** و أنصحك عموماً تعمل ده مع أى حاجة تقراها .. مش بوستاتي أنا بس .. . المهم .. لمّا إتعلمت عن الحاجات دي كلها في رحلتي الخاصة مع الثيرابي و البحث في كل ما له علاقة بتركيبي العصبي و ال ( AuDHD ) . إتعلّمت إني لازم أتعلم أستخدم نضّارة . . زي ما في إنسان بيتولد عنده ( قصر نظر أو طول نظر ) أو أى سبب آخر يخليه محتاج يلبس نظارة طول الوقت . . أنا كمان .. طول الوقت لازم أكون لابس نضارة تساعدني أشوف الحياة بشكلها الحقيقي .. بألوانها الحقيقية .. و إلا .. حافضل طول الوقت أعاني و أخبّط في اللي حواليا .. و أكون شايفهم هما اللي غلطانين .. في حين إني أنا اللي : محتاج نضارة . … النضارة اللي كنت باستخدمها ( قبل بنائي ل زالفول ) .. كانت الورقة و القلم. علي مدار ال8 سنين اللي فاتوا تقريباً .. و أنا باكتب يومياً و طول الوقت و كل ساعة تقريباً : ( أنا حاسس بإيه ؟! .. و دلوقتي الساعة كام ؟! .. و إيه اللي أنا بافكّر فيه دلوقتي و إفتكرته ؟! .. و إيه اللي حصل دلوقتي ؟! .. ) . . جداول و جداول و جداول .. الهدف منها ؟! الهدف منها إني كنت باحل تاني مشكلة من المشكلتين الأساسيين اللي عندي .. و هي مشكلة الذاكرة . . أنا مش حاعتمد علي ذاكرة لا يٌعتمد عليها إطلاقاً .. لا .. أنا حاكتب كل شيء . … و بعد ما باكتب .. لأسابيع .. و شهور .. جه بقي وقت ال ( Data science = علوم البيانات ) . . إني كنت كل فترة .. باقعد أحلل الجداول دي .. و أشوف .. أكتر شعور أنا باسجله و أكتبه هو إيه ؟! تنقلاتي الشعورية و العاطفية .. متكررة ولا مختلفة ؟! يعني هل دايماً باتحرك من التوتر للغضب و العصبية ؟! .. ولا ممكن مرة ألاقي نفسي إتحركت من التوتر للحزن و الإكتئاب ؟! … . و ذكرياتي ؟ .. هل في ذكريات متكررة لحاجات عدّي عليها سنييييييييين .. و مع ذلك عقلي بيفضل يكرر تذكرها ؟! . . تفاصيل كتيييييييييييير جداً .. جداً .. و بعد شهور من أول مرة عملت الكلام ده من سنين .. إكتشفت إن في خريطة .. خريطة واضحة جداً .. جداً .. بيتكرر فيها دايماً تنقلات عاطفية و شعورية أساسية .. و ذكريات أساسية .. و أصبحت واعي جداً ب ده .. … التغيير اللي ده ساعدني أشوفه في حياتي .. أكبر من إني أوصفه في بوست واحد .. مهما طوّل .. . لأن .. أنا فعلاً كنت باعاني .. و لكن مش لوحدي .. اللي حواليا و المٌحيطين بيا كلهم كانوا بيعانوا معايا .. و بسببي .. عصبيتي , تقلباتي المزاجية .. و الأخطر .. هي القرارات .. إني يكون في قرار محتاج شجاعة مثلاً .. مٌخاطرة .. و لكني أتراجع عنه لأني مٌرجيحة عقلي حادفاني في القاع .. . أو العكس .. إن يكون في قرار محتاج تروّي و صبر و هدووووء .. لكني أستعجل و آخده .. لأن مٌرجيحة عقلي حادفاني فأعلي قمة في السما . . أنا بكل تأكيد مش رائع و تنين مٌجنح مثلاً حالياً .. و لكن .. أصبحت بشكل كبير بفضل الله أقدر أتحرّك في خريطة عقلي و مشاعري بنفسي .. و ماتوهش فيها .. و فمراجيحها .. زي زمان .. و دي نعمة ضخمة .. من أضخم النعم بفضل الله . … لمّا كنت باشرح بقي الموضوع ده للناس في ( ASP ) .. كان بيواجههم مشاكل كتير : 1- مش عارفين نكتب إيه ؟! .. مش بنعرف نوصف مشاعرنا !! 2- نكتب إزاي ؟! .. مش عارفين نكتب جداول !! إزاي ؟! 3- بننسي نكتب .. بنكسّل نكتب .. بنزهق من الكتابة . . و دي كلها مشاكل حقيقية .. عشتها أنا بنفسي و خدت فترة علي ما إتعلمت أتعامل معاها . . ف لما قدرت بفضل الله إني أبني حل لها جوة زالفول .. إعتمدت علي إن الموضوع ده يحصل بأبسط و أسهل طريقة ممكنة جداً . … كل اللي بتحتاجه إنك لما بتفتح التطبيق بتضغط علي زرار ( Heart ) .. و بتختار .. إنت أكتر حاجة حاسس بيها دلوقتي إيه هي ؟! . مش لازم تكون بتعرف توصف شعورك بنفسك .. تقسيمة المشاعر اللي موجودة دي .. تقسيمة مٌعترف بيها نفسياً و علمياً .. بتختار الشعور الأساسي .. و بعدين تختار الشعور المٌنبثق منه .. و بعدين تختار حدّته .. و علي حسب إختيارك .. حتشوف لون زرار القلب بيتغير علي حسب اللون ده .. و بينبض .. علي حسب حدة الإختيار .. و بيتلون .. علي حسب ألوان إختياراتك يعني أصفر ( سعيد ) + أزرق ( حزين ) = حيديلك أخضر ( متلخبط ) . … و كل شعور بتضغط عليه .. تقدر تكتب أى ذكري أو ملاحظة معاه .. و بيتسجل تلقائياً بالزمن و الساعة و التاريخ .. و يتحفظ .. … و لما تفتح الصندوق الخامس ( صندوق الجودة = Quality Control ) في نظام ال 6 صناديق من القايمة اللي فوق .. حتشوف بقي .. حتشوف كل ال إحصائيات و التفاصيل اللي توريلك بكل دقة .. خريطة مشاعرك و أحاسيسك . .. خريطة كل ما حتملاها .. كل ما حتعرف تتحرك جواها بدون ما تتوه . … خلال النهاردة إن شاء الله .. كل المشتركين في الخطة المدفوعة .. حيكون مٌتاح لهم كمان إنهم يشوفوا تحليلات ذكاء إصطناعي كاملة للإحصائيات دي .. بحيث إنك تقدر تسأل .. هو المراجيح اللي أنا باتمرجحها طول الوقت دي … معناها إيه 🤣 . … لكن .. حتي لو إنت مش علي الخطة المدفوعة .. البيانات بتكون واضحة لك .. تقدر تشوفها بنفسك و تقراها بنفسك و تفتكر أخيراً .. هو أنهي شارع كان فيه كوم زبالة خلّاك متضايق ؟! .. و أنهي شارع كان فيه جنينه فيها ورد خلّاك فرحان ؟! .. … و الله أعلم .