( كل واحد بيبقي عنده خطة .. لحد ما ياخد

( كل واحد بيبقي عنده خطة .. لحد ما ياخد بوكس في سنانه ) .. ( Everyone Has a Plan Until They Get Punched in the Mouth ) .. … الجملة العبقرية دي .. طلعت من أحد أكتر الشخصيات المثيرة للإهتمام بالنسبة ليا ( الملاكم الأسطورة .. مايك تايسون ) .. لما إتسأل قبل ماتش معين عن إذا كان قلقان من خصمه ولا لا . … أحد المشاكل اللي بيعاني منها أمثالي من اللي عايشين بال ( ADHD ) .. هي ال سيطرة و التحكم . مش سيطرة و تحكم في غيرنا .. لا … و لكن فنفسنا إحنا .. يعني إيه ؟! . … يعني إحنا من طفولتنا بنبدأ نلاحظ إن كل الناس بتعمل حاجات معينة بشكل عادي خالص .. و إحنا دايماً بيتزعق لنا بسببها .. ( إنت ليه مابتغسلش سنانك قبل ما بتنام زي إخواتك ؟! ) ( إنت ليه أوضتك دايماً مبهدلة مش زي إخواتك ؟! ) . ( إنت ليه هدومك دايماً مبهدلة كإنك شغّال في الفاعل ؟! ) ( إنت ليه كراساتك دايماً ضايعة و ناسي الواجب ؟! ) ( إنت ليه سرحان طول الوقت و مش بتركز في الحصص و المحاضرات ؟! ) ( إنت ليه مهما تذاكر برضو درجاتك وحشة ؟! ) .. كل حاجة من الحاجات اللي فوق دي .. و عشرات و مئات و آلاف التفاصيل الحياتية غيرهم .. كلهم حاجات مابنعملهاش بشكل ( أوتوماتيك , تلقائي ) .. .. يعني .. كل الحاجات دي .. بتحتاج مننا مجهود و تركيز و نية و تخطيط .. .. غسيل الأسنان مثلاً .. بالنسبة للإنسان العادي .. ده نشاط طبيعي بسيط بياخد منه 3 دقايق بالكتير مثلاً بيعمله بعد الأكل أو قبل النوم .. . بالنسبة ليا .. أنا لازم أفكّر نفسي ( و دايماً بانسي ) .. و بعدين أبدأ أتخيل في ذهني تسلسل الخطوات اللي محتاج أعمله .. و آخد فٌرشة سناني من مكانها .. و أروح لحد الحمام ( بالمناسبة .. يُفضل إنك ماتسيبش فرشة سنانك في الحمام ) .. و بعدين أحسب الوقت اللي حتاخده عملية غسيل أسناني .. و أثناء ما باعمل كل ده .. لازم أحاول أحفظ أى أفكار تانية كانت في دماغي قبل الموضوع ده .. لأن الأكيد إن أثناء غسيل أسناني حاكون نسيت أنا أساساً كنت مشغول فإيه .. أو بافكر فإيه .. … شرح الكلام اللي فوق ده بالنسبة لإنسان طبيعي ممكن يخليه يظن إني ( ببالغ ) .. أو بازود تفاصيل .. . و لكن بالنسبة لإنسان عايش بال ( ADHD) .. حيبقي عارف إني كمان باختصر .. جداً .. لأن في تفاصيل أكتر بكتير عقله كل مرة بيفكر فيها و يركز عليها كتفاصيل غاية في الأهمية ( حاضغط علي نور الحمام .. حالبس الشبشب .. حاتوضي عشان أصلي ولا صليت ؟! .. الفوطة بتاعتي جاهزة ؟! .. محتاج أغسل الفوطة ؟ .. الغسيل متنشر ولا متطبق ولا محتاج أعمل فيه إيه ؟! .. ) .. قسماً بالله أنا مش ببالغ هنا . … … نتيجة لحياة كاملة بالمنظر ده .. أنا و أمثالي بنتعلم من طفولتنا إن حياتنا مش حتنفع بدون ( خطط و روتين ) .. فبيبقي أماكن الحاجات الخاصة اللي بنستخدمها مقدسة و ممنوع المساس بيها إطلاقاً .. مثلاً ( فرشة أسنان , فوطة , شبشب , أقلام , … و أى شيء آخر زي ده ) .. و أى شيء ممكن يكون عُرضة لإستخدام مشترك … بشكل كبير .. بنستغني عنه خالص .. مش بإرادتنا إننا نستغني عنه دي .. و لكن ده بيحصل لوحده .. لأن عقلنا عند مرحلة معينة بيعتبر مجهود البحث عن الشيء ده .. مجهود أضخم من اللي يقدر أو يحب يبذله . … و بعدين تبدأ تتسع الدايرة لتشمل الحياة العامة كمان .. و في الشغل مثلاً .. مافيش عندنا حاجة إسمها ( شغلانة و بتتعمل عادي ) .. العادي ده مش موجود .. أى إنسان ( عنده adhd ) .. و وصل لمكان متقدم في شغله … كل شيء لازم يكون له خطة .. و توثيق .. و خطوات مدروسة .. و دراسة جدوي .. و مراجعات .. و مراجعات للمراجعات .. .. هو مش بيعمل كده عشان يغتت عاللي حواليه والله .. هو بيعمل كده لأنه مش ضامن نفسه هو شخصياً .. و بيحاول طول الوقت يحمي نفسه من ( الزعيق ) اللي كان بيتوجه له و هو صغير .. و من ال ( فشل ) اللي عاش فيه أغلب سنين حياته .. بإنه يحتمي بالأنظمة و الروتين . … … أول مرة حد وجّه ليا مديح علي حاجة بالمنظر ده .. كان فأول شغل جرّبت أشتغله و انا في تانية كلية .. شغلانة عادية خالص لها علاقة ببيع برمجيات محاسبية في نطاق محافظتي ( أيام ما كان الناس بتكتب برامج بالمايكروسوفت أكسس و تبيعها ) .. و خلال يومين تلاتة .. أرسلت إيميل تفصيلي للشركة أشرح فيه أنا حاعمل إيه بشكل شخصي عشان أبيع الأنظمة دي .. ردوا عليا بعدها إنهم إستخدموا ال ( منظومة ) اللي أرسلتها لهم .. و حيطبقوها ك منظومة عامة للشركة فكل المحافظات 🤣🤣 .. أيامها .. ماكنتش لسة أعرف إني اللي عندي ده إسمه ADHD .. ولا كنت حتي درست منظومات (Sales ) .. و لا كنت لسة ذاكرت خوارزميات حل لمشاكل زي ( travelling sales man ) و إزاي إن دي من أكبر المشاكل اللي لسة موجودة لحد النهاردة .. … أنا ماكنتش أعرف أى حاجة غير : أنا خايف من نفسي .. و عارف إني لو نزلت بكرة الصبح بشوية سيديهات و بدون خطة .. غالباً علي العصر حاكون قاعد في محل بلايستيشن بالعب فيفا و ناسي أى شيء عن الشغل .🤣 … … السبب إني إفتكرت بقي كل الكلام اللي فوق ده .. هو بعض الردود علي البوست اللي نزلته إمبارح أو أول إمبارح تقريباً ( عن ليه باكره الأفلام الحماسية زي النمر الأسود , و روكي , و غيرهم .. ) . ناس كتير في التعليقات تقريباً فهموا إني كاتب دعوة ( للفشل ) .. أو ( لليأس ) .. . في حين إن كلامي كله هو : ك واحد عاش أغلب حياته شايف خططه بتبوظ .. و مايقدرش يعيش بدون خطط .. و بيضطر إنه يبني كل يوم خطط جديدة .. لو كنت يأست .. كان زماني إنتهيت من زمااااااااااااااااان .. و لكن اللي إتعلمته هو : إن الغلط إني خططي نفسها تكون غير واقعية .. و مايكونش فيها إحتمالية إني بكل تأكيد حاكل بوكس محترم .. في سناني .. .. لازم أفهم ده .. أتوقعه .. أعتاده .. أحبّه .. و بعدين أكمّل بعده .. … … جملة عبقرية من كتاب من أروع الكتب اللي قرأتها .. إسمه ( war of art ) ل ستيفين بريسفيلد .. هي : ( في الحرب .. أول حاجة بتختفي .. هي الوضوح .. الخريطة بتتغير .. و الحاجة الوحيدة اللي بتبقي مهمة ساعتها .. هي إن القائد يفضل واضح مع نفسه و جوة دماغه ) بالإنجليزي : (“In real war, the first thing that disappears is clarity. The map stops making sense. The only thing that matters then is the commander’s inner clarity — the ability to trust strategy through fog.”

.. و الله أعلم .