لو إنت زيي .. و جرّبت أغلب الطرق و الأساليب

لو إنت زيي .. و جرّبت أغلب الطرق و الأساليب المشهورة و المغمورة في عوالم إدارة الوقت و المهام و التاسكات و الحاجات و المحتاجات .. و كلهم أثبتوا فشل ذريع معاك 😅 … و بعد ما بتبدأ كل واحد من الطرق دي لمدة يومين تلاتة ( ده لو حصل يعني و إستمرّيت فيهم يومين ) .. بينتهي بيك الأمر إنك بتنسي كل حاجة .. و تفقد الشغف 😁.. و تفقد الإستمرارية 😁😁.. و تفقد أى أمل إن حاجة تتغير أساساً 😁😁😁 .. .. فبالتالي .. إنت مش خسران حاجة إنك تجرّب النظام ده كمان .. من منطلق المبدأ الخالد ( ضربوا الأعور علي عينه 😂 ) . … أنا حاشرح النظام تفصيلياً الأول إن شاء الله ( عشان الناس اللي خٌلقها ضيّق و قدرتها علي القراءة بتضمحل بعد 4 سطور بالكتير ) .. و بعد ما أخلّص شرحه .. حاشرح بقي قصة بناءه .. و العلم المبني عليه .. … النظام ( زي ما واضح من إسمه .. 6 صناديق ) .. … 1- الصندوق الأول : إسمه ( Dump = يعني كٌب و عبّي يا باشا ) .. و من إسمه .. وظيفة الصندوق ده .. إنك حرفياً تكّب كل شيء جوة دماغك مرة واحدة زي ما هو .. بدون فلترة .. بدون توضيح .. بدون تفصيل .. تكتب كل شيء و أى شيء جوة دماغك بأسرع شكل ممكن علي الإطلاق .. كل شيء زي : إحتياجات البقالة بتاعتك , أحلامك و طموحاتك البعيدة , مهام الشغل العاجلة , علاقاتك و إرتباطاتك العائلية و الإجتماعية , … . الهدف من الصندوق ده هو : إنك لو لقيت خاتم سليمان فدعكته فمصباح علاء الدين و ال سوبر ( جنّي ) اللي حيطلع نتيجة كدة شاف محتوي الصندوق الأول ده .. و حقق كل اللي فيه .. خلاص كده .. شكراً .. إنت مافيش أى إحتياجات أو أماني أو طلبات تانية فحياتك . … 2- الصندوق التاني : إسمه ( الحاجات اللي بتتعمل في دقيقتين = two minuets actions ) . و من إسمه .. وظيفة الصندوق ده هي : إن بعد ما تخلّص كتابة في الصندوق الأول .. ترجع تقرأ كل ما فيه .. و أى حاجة ينفع تخلص في دقيقتين .. يبقي تترمي في الصندوق التاني ده . . حاجات زي : الرسالة اللي ينفع يترد عليها سريعاً بآه أو لا , المواعين الكتير اللي في الحوض .. أى طبق فيهم حياخد أقل من دقيقتين عشان يتغسل , الهدوم المغسولة المتكومة علي الكرسي أو الكنبة .. كل قطعة فيهم حتاخد أقل من دقيقتين عشان تتطبّق و تتحط في الدولاب , … . الهدف من الصندوق ده هو : إنك لما تلاقي خاتم سليمان و تدعكه فمصحباح علاء الدين و السوبر جنّي يطلع .. مايبصش لك من فوق لتحت و يفكّر إنك جايبه تهزّقه و تخليه يطبّق لك هدومك و يغسل المواعين 🤣 . … 3- الصندوق التالت : أهم صندوق في ال 6 صناديق علي الإطلاق بالنسبة ليا شخصياً .. و هو ( المزبلة = Trash ) . . و من إسمه .. وظيفة الصندوق ده هي : إنك ترمي فيه أى شيء مش حيتعمل خلال الشهر ده إطلاقاً .. . حاجات زي : أحلام و طموحات مستقبلية بعيدة زي إنك ناوي تتسلق جبل إيفيرست مثلاً . ناوي تتقن اللغة السنسكريتية و تألف بيها شعر .. تعمل قناة يوتيوب تعلّم الناس إزاي يغنوا بالسنسكريتية أثناء تسلّق جبل إيفيرست . . ترمي فيه برضو كل ما هو في ( مقبرة السكرين شوتس ) اللي علي موبايلك .. حرفياً .. كل السكرين شوتس لل ( بوستات عن أفلام ناوي تتفرج عليها , بوستات عن مسلسلات ناوي تتفرج عليها , بوستات عن كورسات ناوي تاخدها , كل بوستاتي اللي إنت عامل لها حفظ علي أساس تقرأها لما تكون فاضي 🤣 … ) كل السكرين شوتس دي .. إمسحها .. بلا رجعة . . ببساطة .. إنت مش حتبطّل تحلم و تتمني و تتطلّع لآمال جديدة .. و فأى لحظة حتحب تتفرج علي فيلم .. حتلاقي آلاف المقترحات قٌدام عينك .. و برضو حتنطشهم و حتروح تتفرج علي مسلسل إنت حافظه للمرة الألف 🤣 . . و صدقني .. أنا غالباً إن شاء الله حافضل أكتب بوستات طويلة 🤣 . . لكن .. كل المحتوي الضخم اللي مكانه الطبيعي هو مزبلة أفكارك .. طول ما إنت مش راميه في مزبلة أفكارك .. بيفضل مكركب أفكارك و عقلك و آمالك و دماغك كلها . … 4- الصندوق الرابع : تعالي لي في الجد بقي .. ده صندوق ال ( مشاريع ) . و اللي فيه .. بنحط أى شيء في الحياة ( مهم و عايزين نعمله ) لكنه مايتعملش في دقيقتين .. . زي :

• بناء قناة يوتيوب نوثق فيها رحلتنا في تعلم كيفية تسلق جبل إيفيرست .
• بناء موقع أو تطبيق متخصص لعاشقي اللغة السنسكريتية .
• عمل بيزنس و بيع منتجات ( Merch يعني ) لعاشقي اللغة السنسكريتية الراغبين في تسلق قمة جبل إيفيرست 🤣 . . و الصندوق ده .. هو الصندوق الوحيد اللي له مفتاح .. و المفتاح إسمه ( OKR = Objectives and Key Results ) . و ده عبارة عن الأسلوب الوحيد في إدارة مشاريع اللي ينفع مع أى حد ( ADHD ) .. لأنه مٌضاد للغموض . و الغموض هو ألد و أسوء و ألعن أعداء الناس ال (ADHD ) .. . يعني إيه ؟! يعني إتخيل إنك إتعينت مدير في شركة .. و الشركة دي فيها موظف كفء جداً جداً .. نشييييييييييط لأقصي درجة .. سرييييييييع أوي .. لكن عنده عيب وحيد و خطير جداً .. و هو : إنه لو لقي أى وسيلة إنه يهرب من الشغل .. بيهرب و مش بتلاقيه بسهولة إطلاقاً .. .. طيب إزاي هو بيلاقي وسيلة إنه يهرب ؟! .. الإجابة : إنت اللي بتدّي له الوسيلة دي .. بإنك تدّي له مساحة يهرب فيها . . مثلاً ( حنفترض إن الموظف إسمه حمادة 😅) . تقول له : حمادة .. أستأذنك هات لي سندوتش جبنة . . و بس كده .. إنت كده إدّيت حمادة ألف طريقة عشان يهرب بيها من الشغل 🤣.. . إزاي ؟! . ببساطة .. حمادة مش عارف يجيب لك سندوتش حجمه قد إيه ! حمادة مش عارف يجيب لك أنهي نوع جبنة ! حمادة مش عارف يجيب لك سندوتش جبنة ساقعة ولا سخن ! حمادة مش عارف يجيب لك سندوتش نوع العيش فيه إيه ! . فهمت ؟! . يعني .. ما لم تكون قبل كده قعدت مع حمادة ده في إجتماع مغلق .. و شرحت له و إتفقت معاه .. نوع العيش و الجبنة و حجم السندوتش و كل التفاصيل الممكنة فيه .. حمادة .. حيهرب .. و حتبقي إنت اللي غلطان . … حمادة ده يبقي : عقلك ال ( ADHD ) . . أى ( تاسك , مهمة , حلم , مشروع , هدف , … ) فيه أى نوع من أنواع الغموض علي الإطلاق .. بيكون بالنسبة لعقلك فرصة إنه ( يهرب ) .. يسرح .. يفكر في أى حاجة تانية في الحياة ( هي الفراشات متلونة ليه ؟! ) يفكر في أحلام جديدة , مشاريع جديدة , … .. و الطريقة إنك ( تدير حمادة ) ده .. هي بإنك : ماتسيبش له فرصة يفلفص .. . يعني .. مشروع زي :
• بناء قناة يوتيوب تجيب دخل إضافي . . ده بيبقي إسمه ( Objective ) .. حلو و وهمي و هلامي و مافيش مسطرة نعرف نقيسه بيها إطلاقاً .. . ف بنحوله ل ( Key results = Krs ) .. كل واحد فيهم .. لازم يكون بيتقاس .. . مثلاً : النتيجة المٌفتاحية الأولي = تحديد إسم القناة خلال 5 دقائق . النتيجة المٌفتاحية التانية = عمل لوجو للقناة خلال 5 دقائق . النتيجة المٌفتاحية التالتة = عمل القناة علي يوتيوب . النتيجة المٌفتاحية الرابعة = إعداد محتوي أول فيديو خلال ساعة . النتيجة المفتاحية الخامسة = تسجيل أول فيديو مدته 10 دقائق . . لو لاحظت .. حتلاقي إن الحاجات اللي مالهاش وحدة قياس واضحة .. بيتم وضعها داخل إطار قياس زمني مٌحدد .. . يعني عمل لوجو للقناة مثلاً ( ودي تاسكاية تافهة بإستخدام الذكاء الإصطناعي حالياً ) .. ف بيتم تحديده ب 5 دقائق .. و أياً كان الهري اللي حيطلع .. هو ده اللي حيتم إستخدامه .. مهما كان شكل البظرميط .. . ليه ؟! لأن عقلك ( الحمادة ) رائع إنه يخليك تهرب لمدة 6 شهور متوهم إنك بتقضيهم عشان تختار اللوجو الموناليزا التحفة الفنية الخارقة اللي القناة واقفة عليها . … … ملحوظة رقم : 1 : البوست طوّل أوي .. ف حاكمّل باقي الصناديق لاحقاً إن شاء الله .. . ملحوظة رقم : 2 : كل الكلام ده في المٌعتاد بيتشرح في خلال مكالمتين تقريباً في ( ASP ) .. لأن بيتشرح أساسه العلمي و النفسي . . ملحوظة رقم : 3 : لو في تشابه بين ما قرأت حتي الآن .. و بين أنظمة مشهورة زي ( GTD و OKR و حمادة 🤣 ) .. ف ده لأني فعلاً ضارب عدد كبير من الأنظمة في الخلاط لحد ما عملت الكوكتيل ده من سنين . و في الشرح ( اللي حاكتبه لاحقاً إن شاء الله ) .. حاوضح ليه أخدت حاجات معينة و ليه حاجات تانية ماتنفعش مع ال ADHD . . و الله أعلم .