إدفع ل صديقك مُرتب ... أو بمعني آخر ( اللي

إدفع ل صديقك مُرتب … أو بمعني آخر ( اللي مالوش مدير .. يشتريله مدير ) . … حلقة البودكاست اللي تم إذاعتها من يومين دي .. و تقدر تلاقيها قبل البوست ده علي البروفايل هنا .. تم تسجيلها من أكثر من شهرين علي ما أتذكر 😅 .. و كالمعتاد .. كنت مرتب إني أشرح نقاط معينة .. و نقاط أخري كنت المفروض أتكلم فيها بتفصيل أكثر .. و نسيت كل ده 🤣🤣 .. و مع ذلك .. أنا سعيد جداً بإني نسيت ده .. لأن في المقابل إتكلمت في حاجات ماكنتش محضّر إني أتكلم فيها إطلاقاً .. فوجهة نظري كانت أهم آلاف المرات بفضل الله .. زي مواضيع ( القيمة و النتيجة , قيمة حياة الإنسان و هدفه , إحنا بنشتغل ليه أساساً .. و قصة سيدنا إبراهيم عليه السلام ) .. … من أكثر الحاجات اللي كنت المفروض أشرحها في البودكاست ( و نسيت 🤣 ) .. هو موضوع : لو إنت فعلاً بتعاني من الإختلاف العصبي ( ADHD ) .. إزاي تقدر تحقق إستمرارية في أى مجال من اللي بتعاني فيهم حالياً ؟! . … و الإجابة في الحقيقة بسيطة جداً .. و هي : اللي مالوش مُدير .. يشتريله مدير . … يعني إيه ؟! … يعني .. الناس بتنقسم ل قسمين أساسيين ..

• ناس عندهم مٌدير داخلي جوة عقلهم ( Built in 🤣) .
• ناس ماعندهمش مٌدير داخلي زي حالاتي كده .. و بيحتاجوا مدير خارجي ( Stand alone 🤣 ) . … إيه هو بقي ال ( مُدير الداخلي ) ده ؟! . ده ( ميكانيزم = مجموعة من العمليات الحيوية ) .. اللي بيوصّل مخّك ل حالة إتزان تساعده إنه ينفذ المهام المطلوبة منه كما ينبغي . بالظبط زي المدير في الحياة العادية .. هو مش شخص وظيفته إنه يشرح لك تعمل شغلك إزاي .. إطلاقاً ..

و لكنه مسئول عن زي :

• ترتيب الأولويات .
• ترتيب إستهلاك الموارد .
• وضع خطة زمنية للإدارة و التنفيذ .
• و أهم شيء علي الإطلاق .. و هو : العواقب و نظام الثواب و العقاب ( Accountability ) . … الناس العاديين .. ال ( Neurotypical يعني ) .. عندهم ميكانيزم عضوي و كيميائي كامل جوة عقلهم يساعدهم علي عمل المسئوليات الإدارية دي بشكل طبيعي .. .. ف تلاقيه قادر إنه : يذاكر لوحده , يشتغل لوحده , يفتكر مواعيد لوحده , يقوم بتسلسل خطوات تؤدي لتنفيذ مهمة معقدة لوحده … و هكذا . … الناس ال( ADHD ) .. مستحيل يقدر يعمل أى حاجة من الحاجات دي لوحده . بالظبط زي أى شركة .. فيها موظفين أكفّااااااااااء جداً .. ماهرين جداً .. أجمد خُبراء في مجالاتهم .. و لكن مافيش مدير .. فالنتيجة ؟! كل موظف حيروح يعمل الحاجة اللي علي مزاجه في الوقت و بالشكل اللي علي مزاجه .. و كمان فأى وقت و كل وقت حتلاقي أى موظف منهم ( أو كلهم ) .. قاعدين يعاكسوا في السكرتيرة 🤣 .. و بيصيعوا في الكافيتيريا و البوفيه 🤣🤣 . … و لكن .. بمجرد تواجد المدير الخارجي ده .. كل موظف ( جوة عقلك ) فجأة بيتواجد علي مكتبه .. و يبقي صاحي و منتبه و مركز .. لدرجة إن لو السكرتيرة نفسها جات تعاكسه و هي ماسكة ساندوتش شاورما مش حياخد باله منها 🤣 . … التشبيه ده .. حقيقي جداً جدااً جداً .. .. أنا مثلاً .. علي مدار فترة شغلي ك ( فريلانسر ) .. و مئات الشغلانات بفضل الله .. مافيش شغلانة قبضت فيها فلوس من عميل .. إلا و كان التقييم فيها ( خمس نجوم ) بفضل الله .. و علي مدار فترة شغلنا ك ( شركة ) .. مافيش عقد إلتزمنا بيه .. إلا و كان آدائنا فيه إستثنائي فعلاً بفضل الله .. بس ده ماكانش فيما له علاقة بالشغل بس .. .. أغلب حياتي الدراسية نفسها .. كل المراحل اللي كان فيها علاقة مباشرة بيني و بين المدرّس ( حتي مشروع التخرّج مثلاً ) .. كان آدائي فيها ممتاز بفضل الله . .. و العكس تماماً .. كل المشاريع اللي ماكنش فيها إلتزام مادي عليا ( فلوس قبضتها من عميل مثلاً ) .. أو مدير له سٌلطة تنفيذية و إدارية عليا .. كانت نتيجتها بلا إستثناء هو : إستمتاااااااااااااااع تام منّي بعمل كل شيء و أى شيء يشد إنتباهي .. إلا إني أكمّل الشغل 🤣🤣 . .. و في الكلية طبعاً .. لأن مافيش علاقة مباشرة بيني و بين الدكاترة .. أو مراقبة و تقييم دوري مستمر ( زي دروس ثانوي عام مثلاً ) .. بتكون النتيجة هي برضو : إستمتاع تام بكل شيء في الحياة .. إلا المذاكرة للإمتحانات . … طبعاً أنا مش الدليل الوحيد علي حاجة زي كده .. في دراسات و إحصائيات كتير جداً بتوضّح كل ده بتفاصيل أكتر . و لكن زي أغلب الحاجات اللي باكتبها و باتكلّم فيها .. باتكلّم من خلال تجربتي الشخصية أولاً .. قبل ما أذكر الإحصائيات المختلفة . … … فبالتالي .. لو إنت زي حالاتي .. و ماعندكش ال ( مدير ) الداخلي ده جوّة عقلك .. حقاً أنصحك تجرّب : إشتري لك مدير 😆. … في البودكاست .. شرحت إن اللي بيقوم بالدور ده بكفاءة بالنسبة ليا بفضل الله .. هي زوجتي ربنا يحفظها و يبارك فيها . في بداية تعارفنا للزواج .. شرحت لها تفصيلياً ما تعلمت عن عقلي .. و فتحت أمامها ملفات جميع مشاريعي و أفكاري في الوقت ده .. مشاريع و أفكار كتير جداً منهم .. كنت بدأتهم من سنوات .. و إهتمّيت بيهم لمدة أيام أو أسابيع كالمعتاد .. و بعدين تركتهم لما نضب الإهتمام ده .. أو إنشغلت بأمور أخري . .. و أعطيتها سُلطة كاملة علي ( تشتتي ) .. شرحت لها قدرتي الرائعة إني ( أبرر تشتتي ) ل نفسي .. و لغيري أيضاً .. و إزاي إني حالاقي ألف وسيلة و وسيلة عشان ماعملش المهام التكرارية الرتيبة اللي بيتطلبها بناء أى فكرة بحيث تري النور ك كيان حقيقي . .. أمثلة لل ( سُلطة ) دي بالمناسبة زي :
• ماتسأذنش مني إنها تشيل فيشة البلايستيشن حرفياً أثناء ما أنا بالعب لو ماخلصتش اللي مطلوب مني 🤣 ..
• تذكير دائم طول الوقت بال ( Stakes = تسلسل العواقب ) اللي بيترتب عليه تأخيري ل مهمة معينة . .. النقطة السابقة دي مهمة جداً بالمناسبة : لأن ذاكرتي القصيرة محدودة جداً جداً .. إدراكي للوقت دايماً بيكون ( Skewed = مشوه ) .. فبالتالي .. الحالة الطبيعية دايماً بالنسبة ل عقلي هي : لسة بدري أوي و في وقت كتير و مش محتاج أبدأ في عمل المهمة المطلوبة دلوقتي ( اللي هو بأخّر كل شيء لآخر لحظة علي الإطلاق ) .. .. ده مش خلل نفسي أو سلوكي .. ده إختلاف عضوي حرفياً في الكيفية اللي عقلي بيحسب بيها الوقت عن الإنسان اللي مش ( ADHD ) . .. نتيجة ل كده .. لازم دايماً يكون في تذكير خارجي ب كل شيء آخر ذاكرتي قصيرة المدي مش بتكون قادرة علي الإحتفاظ بيه .. عشان عقلي يفهم أهمية و أولوية المهام .. و يقوم بيها قبل فوات الأوان . … … طيب .. لو إنت لسة مش متزوج .. أو شريك حياتك مشغول جداً بالفعل .. أو غير قادر علي متابعة تفاصيل شغلك التقنية مثلاً .. تعمل إيه ؟! .. عيّن صديق .. .. آه والله .. دور علي صديق .. و إشرح له إنك عايز تعينه مقابل مرتب ثابت .. عشان يقوم بالدور ده : إنه يكون مدير عليك . … و إدفع له مُرتب .. مُرتب حقيقي .. مش إعزمه علي غدوة أو كٌباية شاي .. لا .. فعلاً إقتطع له مٌرتب حقيقي .. و إلا عقلك مش حيشوف أى قيمة حقيقية أو سٌلطة حقيقية له . … الموضوع بالظبط زي إشتراك الجيم .. جزء ضخم من قيمة الإشتراك اللي إنت بتدفعها .. بتكون عشان تجبر نفسك ( تحلل ) قيمة الفلوس اللي دفعتها دي . … و لازم تدي له سٌلطة ( ثواب و عقاب = Accountability ) .. أسهل طريقة عشان تنفّذ ده .. بيكون ب ( Escrow ) .. يعني كإنك بتحط فلوس معينة ( غير مٌرتبه ) في صندوق مقفول .. لو ماعملتش الأهداف المطلوبة خلال الشهر : الفلوس دي بتبقي غرامة هو بياخدها . لو عملت الأهداف المطلوبة : الفلوس دي بتكون جائزة تصرفها في شيء ممتع بالنسبة لك ( سينيما مثلاً , هات لك لعبة 🤣 , .. أى نوع ترفيه ) . … … حتي لو ماعندكش صديق مثلاً ممكن يقوم بالدور ده لك .. في خدمات كتير موجودة بتقوم ب نفس الدور ده .. من أشهرهم : Boss as a service .. تقدر تعمل عنها سيرش مثلاً و تفهم أكتر . … … أحد الحاجات اللي كان المفروض إني أعلن عنها و أشرحها في البودكاست .. كانت هي برنامج ال ( ASP = Accountability Sponsorship Program ) . للناس اللي زي حالاتي .. ال ( ADHD ) يعني .. .. هو بالظبط نفس اللي شرحته فوق ده .. بس أنا اللي حاكون باقوم بدور ال (Sponsor ) .. الكلمة دي .. مصطلح مشهور في عوالم ال( AA = Addicts Anonymous = مجتمعات العلاج من الإدمان يعني ) .. و معناها هو : شخص دوره هو إنك قبل ما تضرب 😅 .. تتصل بيه و تناقش معاه حالتك العقلية و النفسية .. و هو يحاول يساعدك تتزّن و يٌثنيك عن الضرب . … أنا حاقدّم الموضوع ده ل 10 أفراد بس حالياً إن شاء الله .. ماقدرش أزود العدد عن كده دلوقتي .. لأني حالتزم ل كل فرد من ال10 دول .. بمكالمة إجبارية لمدة 30 دقيقة يومياً .. علي مدار شهر . فبالتالي .. لو تواجد ال10 فعلاً .. ده معناه علي الإقل 6 ساعاات ( 5 + ساعة Buffer ) من يومي .. و ماقدرش فعلاً ألتزم بأكتر من كده دلوقتي . .. عشان ينفع تكون واحد من ال10 دول .. لازم نتفّق قبل الشهر علي : نقطة بداية : إنت حالياً عندها . نقطة نهاية : ( هدف ) منطقي إنت عايز توصل له خلال شهر . خطة منطقية لتحقيق الهدف ده خلال شهر . … خلال الشهر .. حيكون في مكالمة يومية 30 دقيقة في ميعاد ثابت .. 10 دقايق بنصحح و نراجع فيها واجب إمبارح 🤣 ( مهام إمبارح يعني ) 10 دقايق بنتفّق علي خطة تنفيذ واجب بكرة 🤣 ( مهام بكرة ) 10 دقايق ( Optimization = تظبيط و نقاش ) . … أنا مش باقوم ب دور الإنستراكتور في الموضوع ده .. مش باشرح مادة علمية أو منهج معين .. بل .. إن لو مجال شغلك بعيد عن مجالات علمي أو شغلي بالكامل .. إنت اللي بيكون دورك هو الشرح ليا . … أى مشاركة ل معلومات مني خلال العملية دي .. بيكون علي هيئة مشاركة زمالة مهنية .. يعني إني أقول لك علي العنوان .. و إنت بتروح تبحث بنفسك .. بشرط إن الموضوع يكون بيخدم تحقيق الهدف اللي مُتفّق عليه في الأول . … و علي مدار الشهر .. بيكون في ( Bi weekly = مرتين في الأسبوع ) .. لقاءات مٌجمّعة لل 10 أفراد بالكامل .. الهدف منها هو : 1- تحقيق ال ( Peer Pressure ) .. يعني جو المنافسة و إحساس إنك بتنافس ناس حواليك .. أو خايف من إنك تطلع المٌقصّر فوسطهم 🤣 2- النقاش العام اللي منه ممكن تسمع إزاي غيرك بيتعامل مع معاناته .. ف ده ممكن يساعدك تفهم حاجة أكتر عن نفسك . … تفاصيل الموضوع ده .. و ال (Google form ) اللي تملاها عشان تقدّم .. حتلاقيها في التعليقات علي البوست المٌثبّت في بروفايلي . .. السعر مش إنبوكس بالمناسبة 🤣🤣 . الموضوع ده حيكون ب ( 100 دولار شهرياً ) . … للتأكيد مرة أخري .. إنت مش محتاجني أنا إطلاقاً عشان أكون الشخص اللي يقوم بالدور ده بالنسبة لك . أى حد في بيئتك المٌحيطة .. ممكن يكون أنسب مني بمراحل .. .. و بكل تأكيد .. لو إنت عندك مدير داخلي جوة عقلك .. ف إنت مش محتاج حاجة زي كده إطلاقاً . .. و لو إنت شخص ال ( 100 دولار ) بالنسبة لك ممكن تدفعهم في وجبة عادي و ترجع بيتكم تكمّل لعب ( زي كتير من اللي عارفين نفسهم و كلموني 🤣 ) .. حايبقي الإتفاق علي 1000 دولار 😅 .. أو 5000 دولار .. أو المبلغ الكافي إنك يخليك تحس بالخوف من فقدانه بدون تحقيق عائد منه . … و الله أعلم