إصابة جيم جديدة .. في الحتة الظريفة المزعجة المؤلمة دي

إصابة جيم جديدة .. في الحتة الظريفة المزعجة المؤلمة دي .. تمزق صغنن في العضلة دي .. بحيث إن مجرد إني أتنفس بعمق .. يحسسني إن حد بيغرز سكّينة في ضهري في الجزء ده 😅. الإصابة دي مش أول مرة تحصل ليا ( اللي هي شد أو تمزق في الجزء ده من عضلات الضهر ) .. و لكن كان بقالي كذا سنة من آخر مرة حصلت . … علاقتي بال جيم عموماً .. علاقة توكسيك بالشكل ده 🤣. ( شرحت الجزء ده قبل كده بإختصار في بوستات لها علاقة بالإدمان ) .. و للأسف و كالمعتاد .. فشلت تاني فإني أتحكم في نفسي قبل ما تحصل إصابة . … خليني أشرح : في إحساس إسمه ال ( High = نشوة ) .. ده بيحصل لما تفضل تبذل مجهود ضخم لمدة طويلة .. لدرجة إن جسمك يفرز كمية محترمة من الإندروفينات ( هورمونات مسكنة ) .. تخليك ماتحسش بالألم . و بعدين يتفرز حاجة تانية إسمها ( أناندامايد = نفس تأثير الحشيش بالظبط ) .. تدي لك نفس إحساس السلطنة و النشوة و ( إنك جسمك خفيف و طاير ) و شبه متخدر . و بعدين عقلك حرفياً يزود الطين بلّة .. و يفرز ( دوبامين و سيروتونين ) .. اللي هي هورمونات السعادة و التحفيز و النشاط .. و اللي هما أكتر حاجات عقل أمثالي ( اللي عندهم ADHD ) بيدوروا عليها طول الوقت . … فبالتالي .. و علي مدار حياتي .. علاقتي بالتمرين كانت دايماً علاقة مؤذية جداً بالنسبة ليا .. لأن بعد ساعة و نص تمرين مثلاً .. و عند اللحظة اللي غيري ( أيام ما كنت باتمرن مع ناس ) كانوا بيبدأوا يشحّروا أو يجيبوا جاز 🤣.. و خلاص مش قادرين يقفوا .. أنا بقي كنت بالاقي نفسي بيترسم علي وشّي إبتسامة بلهاء كبيييرة أوي 🤣🤣 .. و ألاقي نفسي مش عايز أبطّل جري .. مش عايز أبطّل تنطيط .. مش عايز أبطّل تمرين .. … و نتيجة كده .. إني لما بقيت باتمرن لوحدي كتير .. كنت باكمّل فعلاً .. و ألاقي ساعة و نص عدت .. و ساعتين .. و عند مرحلة معينة .. ألاقي إيديا بتجيب دم مكان مسكة الحديد .. أو عضم رجليا أو إيديا نفسه يوصل لمرحلة الشرخ .. … و علي مدار عمري .. كمية إصابات ضخمة حصلت بالسبب ده .. إني لحظة التمرين نفسها .. مابحسش بألم .. بل بالعكس .. كل ما زاد ألم التمرين .. كل ما سخنت أنا زيادة .. و عقلي أفرز هورمونات زيادة .. و أفورت أنا زيادة . … ف بقيت مؤخراً باعتمد علي الساعة ف إيدي .. و بقيت باظبط تمرينتي علي جدول زمني معين .. و لكن .. … للأسف برضو سخنت زيادة .. و أفورت … و زودت وزن زيادة في تمرينة ( Core ) .. اللي هو بتثبت البار الطويل في ركن من ناحية .. و تحط وزن فيه من الناحية اللي إنت ماسكها .. و تحركه في نص دايرة فوق دماغك من أقصي اليمين لأقصي اليسار .. و إنت قافل كل عضلات بطنك . . ف عند مرحلة معينة .. حسيت لأول مرة بالألم .. و مع ذلك إتغابيت و كمّلت . لحد ما وصل لدرجة إني حرفياً مش عارف أتنفس .. لأن العضلة دي بالذات المفروض بتتمدد مع تمدد الرئتين .. ف لما إتصابت بالتمزق ده .. و مابقيتش حتي قادر أتنفس بالكامل .. كل جسمي سلم راية .. لأن مافيش أكسجين كفاية داخل خلاص 😅. … أسكت ؟! .. أغير هدومي و أروح ؟! .. لاااااااا .. إزاي .. أنا لازم أتغابي بالكامل .. و أحاول أتمرن شوية كارديو .. ظناً مني إنه مجرد شد عضلي و حيروح .. و بالفعل أتمرن شوية كارديو سريع بدون ما أضطر إني أستخدم كل سعة الرئتين … و أروح آخد حباية ديمرا ( مسكن و باسط للعضل ) .. و أنام . … الكلام ده كله كان يوم الخميس .. خدت الجمعة أجازة من الجيم .. صحيت السبت بفضل الله مش حاسس بألم .. . فأعمل إيه ؟! 🤣🤣🤣 أروح الجيم .. و أنا ناوي ألعب رجلين اليوم ده .. و أقرر أبتدي بال (Loaded Front squat ) … يعني باشيل بار متحمّل بأوزان قدامي .. و أنزل بيه سكوات . .. و أول مجموعة تمت زي الفل .. و فتاني مجموعة .. العضلة دي تقريباً قالت لي كلمة أبيحة 🤣🤣.. لأني حسيت إني مش قادر حتي أفرد ضهري .. … … لبست و رجعت بقي مباشرة ( من غير ما ألعب كارديو المرة دي 🤣) .. و بعد شوية سيرش .. عرفت إني لو كنت باحاول أختار أسوء تمرين أعمله عشان أصيب العضلة المُصابة دي نفسها .. ماكنتش حاختار بالبراعة دي .. ال (Front squat ) .. 🤣🤣🤣🤣 … المهم .. خدت أجازة النهاردة من الجيم .. و غالباً حأجّز كام يوم كمان إن شاء الله . و الحمد لله طبعاً أولاً و أخيراً علي كل شيء . .. و ماعتقدش إني حاتعلّم .. أو حاقدر ألاقي طريقة ماقعش فنفس الغلطة تاني .. .. إحساس ( نشوة التمرين = Runners High ) .. كان و ما زال .. و سيظل .. أحد أكتر الأحاسيس اللي صعب جداً الإقلاع عنها .. … … في واحد مشهور فحت إسمه ( ديفيد جوجينز ) .. ممكن أكتب عنه بوست كامل تفصيلياً مُستقبلاً .. حياته كلها عبارة عن مُطاردة اللحظة دي 🤣 .. لحظة نشوة التمرين .. و كسر أرقام قياسية كتير .. و لكن في المقابل .. قصص أعضاءه و رجليه و عضلاته .. عبارة عن قصص رعب و +18 🤣🤣🤣 … و الله أعلم .