و إنت عندك 20 سنة .. التسلسل التالي ده ممكن

و إنت عندك 20 سنة .. التسلسل التالي ده ممكن يكون طبيعي جداً بالنسبة لك .. و هو : السلام عليكم .. إيه الأخبار .. أنا شٌفتك إمبارح لأول مرة في حياتي صدفة في ( الكلية , الشركة , المسجد , أو حتي عند عمو البقال اللي تحت البيت ) .. و علي مدار ال كام ساعة اللي فاتوا .. درست شخصيتك و حللت أفكارك و فكرت في كل الإحتمالات الممكنة و الغير ممكنة و صليت إستخارة .. و قررت .. إنتي أهم حاجة في حياتي .. و أهم من عمو البقال اللي تحت البيت .. و عمو البقال حيشهد علي قصة حبنا المُلتهبة دي🤣 .. يلا نتجوز النهاردة .. يلا نجيب عيال علطول .. يلا نفكر في مدارسهم من دلوقتي .. يلا بينا 🤣😅 … و إنت عندك 30 سنة فما فوق .. غالباً التسلسل التالي هو اللي حيبقي طبيعي بالنسبة لك … و هو :

• أنا مش عارف أقرر آكل إيه النهاردة ..
• أنا مش عارف أقرر أروح أقابل إصحابي النهاردة ولا أكنسل ..
• أنا مش عارف أحدد الميعاد المهم أوي اللي لازم أحدده ده .. النهاردة ولا بكرة ولا بعده … ولا ألغي الميعاد كله أحسن ..
• أنا مش عارف أقرر ألبس إيه ..
• أنا مش عارف أقرر أكمل في شغلي ولا أغيره .. أكمل في دراستي ولا أغيرها ..
• أنا مش عارف أقرر أتفرج علي الفيلم ده .. ولا الفيلم التاني .. ولا أقرا .. ولا أسيب كل ده و أقعد باصص في السقف ..
• أنا بقالي 4 ساعات باصص في السقف .. و مش عارف أقرر أبطل فُرجة عالسقف .. ولا أقوم من السرير .. … الفرق بين المرحلتين دول في الحياة .. غالباً بيعدي بيه كل البشر بدرجات متفاوتة .. لكن لو ربنا إبتلاك ب إنك عندك ( ADHD ) .. فإنت بتشوف الفرق بين المرحلتين دول بوضوح جداً .. بوضوح أوي … بوضوح خالص .. .. بين إنك و إنت صغير في السن .. كان عندك أعلي درجات الثقة الممكنة في الحياة .. و كنت فأى قرار مهما كان صغير أو كبير .. كنت بتدوس بنزين لحد الآخر من أول لحظة .. . لحد المرحلة اللي بتوصل لها لما تكبر شوية .. و يبقي أى قرار بالنسبة لك مهما كان صغير .. مهما كان تافه .. قرار صعب و مش عارف تاخده .. و متردد .. و طول الوقت بتبص ورا ضهرك .. و مش قادر تشيل رجلك من علي الفرامل .. … و السبب .. بسيط و واضح طبعاً .. و هو كمية الخوازيق اللي لبستها في حياتك .. و كمية الحيطان اللي لبست فيها لما دوست بنزين لحد الآخر .. .. و الخوف اللي أصبح بيألمك ( عضوياً ) .. لما تحتاج تاخد أى قرار مهما كان تافه فحياتك .. لأنك جسمانياً و نفسياً و عقلياً .. أصبحت مليان بالإصابات و الكدمات و الجروح اللي حصلت لك بسبب قراراتك طول حياتك . … و سبب إن ال ( adhd ) مميزين جداً بالموضوع ده .. و اللي إسمه ( Impulse control = التحكم في الإندفاعات العاطفية ) .. هو إنك ( من إسم الإختلاف نفسه = خلل في التحكم في الإنتباه = attention deficit disorder ) .. يعني ماعندكش القدرة علي التحكم في ( الإنتباه = attention ) .. ف لما حاجة معينة بتدخل مجالك البصري ( أو العاطفي و العقلي ) .. و لأى سبب من الأسباب .. عينيك تعلّق عليها .. فجأة .. كل حاجة تانية في الحياة بتختفي .. .. مش مجازياً … لا .. حرفياً .. حرفياً بتبقي مش شايف غير الحاجة دي .. أو الشخص ده .. أو المجال ده .. .. كل لحظة في حياتك .. بتبقي بتفكر في الحاجة دي .. بتاكل و إنت بتفكر يا تري حاكل إزاي و الحاجة دي معايا .. يا تري .. حاكل إزاي و الشخص ده قدامي .. بياكل معايا نفس الشيء و يستطعمه بنفس الطعم اللي أنا حاسس بيه .. يا تري .. حاكل إزاي و أنا في المجال ده .. بمارسه و متميز فيه و أشطر حد في الكوكب بيشتغل فيه . … كل نشاط في حياتك .. كل نفس .. كل فكرة .. بتبقي متلونة ب لون الحاجة دي . … و إنت طفل صغير .. ده بيكون معناه إيه ؟! .. معناه إنك بتكون جحيم لأهلك .. لأنك مش بس لحوح .. لا .. إنت فعلاً بتكون مش قادر تتنفس لو رفضوا يجيبوا لك الحاجة اللي عينيك علّقت عليها .. .. و لكن .. لأنك طفل .. و عقلك موارده لسة صغيرة جداً .. فبمجرد ما ( يلهوك .. أو تتلهي ) في حاجة تانية .. بسرعة جداً بتنسي كل شيء عن الحاجة الأولانية . … عارف كويس إن كل الأطفال كده … و لكن رجاء إفهم إن أغلب الإختلافات العصبية ( neurodivergences ) بتكون عند كل البشر .. و لكن بدرجات مختلفة .. و في حالة ال ( adhd ) .. إحنا بنتكلم عن الدرجات العالية .. أوي .. ال ( extreme ) . … و التربية هنا بيكون لها أحد أهم الأدوار في حياة الطفل اللي من النوعية دي .. لأنك ك ( أم أو أب ) .. لازم يكون عندك قدرة أسطورية علي تحمل الغتاتة و الرزالة و اللح اللي بيكونوا عند الطفل اللي من النوعية دي .. اللي ( لأن كل حاجة تانية في حياته بتختفي لما يتعلق بحاجة معينة ) .. ف بيرفض ياكل أو يشرب أو ينام أو يسكت أو يعمل أى حاجة تانية .. غير لما يتحقق له رغبته . .. لكن .. لو إتحققت له رغبته كل مرة .. ده بينمي جواه مرض ضخم بيبقي صعب جداً علاجه بعد كده .. و هو ال (إستحقاقية ) .. و إن رغباته لازم و لابد يتم تحقيقها .. و إلا حتبقي سواد عالكل .. اللي هو ال( طفل المتدلع يعني ) .. … و لكن .. لو قدر الأب و الأم يتحملوا ال ( لح ) ده .. و يفرضوا سيطرتهم و شخصيتهم .. الطفل حيفهم إن في حدود ل طاقته .. هو مش حيقدر يتحكم برضو في إنفعالاته و رغباته .. لكن حيعرف إن لما أبوه يبص له بشكل معين .. يبقي لازم يبطل يزعق و يعيط .. أو إن لما أمه تقول له ( كلمة زيادة و التيلفزيون حينطفي لمدة يوم كامل ) .. حيكتشف فجأة إنه لازم يحسب قيمة الحاجة اللي هو بيلح عليها .. مقابل إنه مايخسرش حاجة تانية في حياته . . و ده بيخلي الطفل لما يكبر عامل زي البركان .. القنبلة الموقوتة .. اللي طول حياته كان مقفول عليه بحدود معينة .. أول ما بيتعلم يكسرها .. بينفجر .. فنفسه قبل ما ينفجر في اللي حواليه .. . و لحظة الإنفجار دي ممكن تيجي فأى وقت في حياته .. فطفولته .. لما يبدأ يبعد عن البيت و يقضي وقت طويل في المدرسة و الدروس .. فشبابه .. لما يبدأ يفهم إنه أصبح أقوي جسدياً من أمه و أبوه .. . أو ( و ده الأخطر ) .. لما يكبر و يكون إنسان ناضج و مسئول .. و يكتشف إنه أصبح معاه موارد و فلوس .. و يتحول فجأة ( بشكل مرعب لكل اللي حواليه ) .. من إنسان قمة في الإنضباط و الإلتزام .. لإنسان قمة في الإنحراف و الإنحلال . … طبعاً في الطريقة الأمثل ( فوجهة نظري ) .. و هي لما يكون الأب و الأم فاهمين يعني إيه إختلاف عصبي .. و في الحالة دي مش بيكونوا شايفين طفلهم ك ( عدو ) يقصد إنه يعذبهم في حياتهم .. و لكن ك ( طفل ) بيعاني بدون دخل أو إرادة منه .. .. و بيفهموا إن مسئوليتهم بالكامل .. هي في تدريب الطفل ده علي تكوين و بناء بيئة حوالين نفسه .. تساعده في تنظيم و إدارة و التحكم في إنفعالاته و طاقته دي . … ( القدرة علي التحكم في الإنفعالات = impulse control ) دي شيء موجود عند أغلب الناس بشكل داخلي .. جواهم .. لأنهم عندهم القدرة علي التحكم في إنتباههم .. ( كإنه بالظبط عضو يقدروا يحركوه بإرادتهم ) .. لكن عند الإنسان ال (adhd ) .. هو مايقدرش يحرك العضو ده .. ال ( قدرة علي التحكم في الإنتباه ) .. مشلولة عندهم .. و بيحرك إنتباههم أى شيء خارجي عنهم . .. فبالتالي .. أى محاولة إنهم ( يتحكموا في إنفعالاتهم العقلية و العاطفية ) بشكل داخلي .. غالباً بتبوء بالفشل في معظم الوقت .. … و زي أى عضو تاني مشلول .. عشان تتحكم في العضو ده .. لازم يكون في ( عوامل مساعدة خارجية = augments ) .. زي اللي رجليه مشلولة مثلاً .. بيحتاج كرسي بعجل . … علي حسب إنت بتقرا الكلام ده و إنت فأنهي مرحلة في حياتك .. علي حسب إنت حتحتاج أى تركز علي أنهي نقطة من التلاتة اللي جايين .. … 1- لو إنت أب أو أم ل طفل بيعاني من ده .. لازم تفهم حجم مسئوليتك .. و تفهم إن أكبر خدمة تديها لطفلك .. هي إنك تلجأ لمتخصص ( مش أنا .. و لكن متخصص دارس و معاه ترخيص بمزاولة المهنة خصوصاً للأطفال ) .. عشان يعلمك و يساعدك .. قبل ما يعلم و يساعد طفلك . يعلمكوا إزاي تبنوا بيئة و أدوات الطفل غالباً حيعتمد عليها طول حياته بالكامل .. عشان يعوّض بيها الشيء اللي هو ربنا خلقه مختلف فيه . . لكن بمجرد ما يفهم ده .. حتكتشف إن إبنك أو بنتك ربنا ميزه ب نعمة .. و قوة حقيقية .. جبارة .. فقط .. لو تم فهمها و توظيفها صح . … 2- لو إنت لسة فمرحلة النشاط البركاني المتكرر .. و كل شوية تفور و تدخل بكل طاقتك و مشاعرك و أفكارك في شيء ما .. و بعد فترة قصيرة جداً .. تلبس خازوق .. أو تلاقي نفسك مش قادر تكمل .. أو تتسبب في ألم لنفسك أو اللي حواليك .. … ف يمكن أهم نصيحة أقدر أقولها لك هي : دور علي فرامل خارجية .. دور علي صاحب أو إتنين .. يكونوا صالحين .. متزنين .. لهم مرجعية فكرية و منطقية واضحة ( يعني مايكونوش بيفتوا من دماغهم ) .. و لكن يكون عندهم القدرة علي فرملتك .. و يشرحوا لك أسباب الفرملة دي إيه .. و إلا إنت مش حتقتنع .. و ممكن تلبسّهم معاك 🤣 . . دور علي ( شيخ , مينتور , معلم , ثيرابيست … ) حد يكون وظيفته هي إنه قبل أى قرار مصيري في حياتك .. تروح له الأول .. و تتكلم معاه في كل تفاصيل القرار ده .. بكل وضوح .. . و تكون شارح له إن أحد أهم وظائفه هي .. إنه هو اللي يدور عليك لو إنت ماكلمتوش يومياً .. لأنك حتنسي .. و حتأجل .. و حتكنسل .. و حتلاقي ألف طريقة و طريقة عشان تنفذ الإنفعال بتاعك .. بدون ما يفرملك هو . . الشخص ده لو مالقيتهوش مجاناً ( شريك حياة , أخ , صديق , … ) .. إعمله بفلوس .. يعني حتي لو حتضطر تدفع فلوس و مرتب أو ( retainer ) .. إعمل ده .. و لو كان موجود في حياتك مجاناً … أشكره و قدرّه . . و الشخص ده ماينفعش يكون زيك ( adhd ) يعني .. … 3- لو إنت كنت وصلت لمرحلة البركان الخامل .. البوتاجاز اللي خلاص أصبح خايف من إنه يولّع تاني بسبب كمية الحرايق اللي إتسبب فيها .. الشخص اللي خايف ياخد أى قرار … و أصبح زي قطعة الخشب اللي الموج بيحدفها لمين و شمال بدون أى مقاومة أو إرادة منه .. و مستني اللحظة اللي حيتشرب فيها مياه كفاية و تعفّن .. و تغرق .. و يستريح . .. نصيحتي هي : ساعد حد بيغرق .. إنت لسة ماغرقتش .. إنت آه سايب الموج يشيلك و يحطك .. لكن إنت أنسب حد يمسك فيه غريق .. تنجده لحد ما قارب يشوفه و يساعده .. … كمية الفشل اللي إنت شفتها و جربتها في حياتك .. أضعاف أضعاف كمية الفشل اللي شافها إنسان عادي ( ماعندوش adhd ) .. .. إنت بتفشل بكفاءة و إحتراف من طفولتك .. خبرتك ك ( فاشل مخضرم ) خبرة ضخمة جداً جداً .. .. و لكنك لسة ماغرقتش .. لسة حي بتتنفس .. .. كمية الناس اللي حواليك اللي خلاص بتغرق و بتطلع في الروح و نفسها بيخلص .. كمية كبيرة أوي .. عارف ليه هما بيغرقوا ؟ … لأنهم فشلوا مرة .. أو إتنين .. أو عشرة .. و منهم اللي رايح يغرق في طريق إدمان .. يغرق في طريق تطرف .. يغرق في طريق إنحلال و إنحراف .. يغرق في طريق إنتحار … .. و بنسبة كبيرة .. بيروح يغرق .. و مايرجعش تاني .. .. لكن إنت .. إنت غالباً جربت كل ده .. حتي الإنتحار .. بنسبة كبيرة إنت جربته في عقلك آلاف المرات ( مش مئات أو عشرات ) .. و لكن ليه بتقدر ترجع ؟ .. . لأن عقلك طول الوقت ( بدون إرادة أو تحكم منك ) .. بيشوف حاجة تانية تشد إنتباهك .. .. موجة تانية بتيجي ترفعك . .. و عشان كده .. إنت أنسب حد ينجد الغريق قبل غرقه .. الموج الكتير اللي رفعك آلاف المرات .. موجة واحدة منهم تقدر ترفع الغريق ده . … عند مرحلة معينة .. إنت مش حتنجد غريق واحد .. و لكن حتلاقي سفينة كاملة .. مخرومة .. بتغرق .. و إنت الوحيد اللي تقدر تسد الخرم ده فيها .. .. ساعتها .. النار اللي جواك اللي كتير جداً حرقتك و حرقت اللي حواليك .. حتكون هي نفس النار اللي السفينة دي محتاجاها عشان تتحرك تاني .. .. الطاقة اللي إنت كنت مفكر إنها خملت جوة البركان .. حتكون نفس الطاقة اللي حيلجأ لها كل اللي في السفينة عشان يكملوا رحلتهم . … و لو ربنا قدرّك .. حتلاقي سفن تانية بتتجمع حواليك .. و في خلال الرحلة الطويلة اللي في حياتك .. حتفضل تشوف ناس في الموج حواليك لوحدهم .. بيعوموا و عايشين حياتهم عادي أسراب و أسراب .. مش محتاجين سفن ولا قوارب .. و قادرين يعيشوا و يتعايشوا عادي .. دول مش إنت .. ربنا خلقهم لسبب .. و خلقك لسبب .. .. بس حتكون أكتر حد يقدر يميز لو حد فيهم بدأ يبعد عن السرب .. مش قادر يعوم جواه .. طول الوقت شارد .. … حتشوفه .. و حتبتسم .. و حتفتكر .. … و الله أعلم .