البوستات اللي كاتب 75% منها علي مدار الأسبوع اللي فات

البوستات اللي كاتب 75% منها علي مدار الأسبوع اللي فات .. و بعد ما باكتب 75% منهم .. مابقفّلهمش .. و أقعد أتسائل .. هو الكلام ده مفيد لأى حد ؟! . … 1- بوست عن الفيلم الوثائقي بتاع البنت الأوغندية في دبي .. و موضوع ( فتيات الليل في دبي .. و Dubai porta potty ) .. و إزاي الإنسان عموماً بيشوف المعاناة .. و يتأثر بيها و يأثّر فيها إزاي . .. 2- بوست عن ( روبرت ماكسويل ) .. أبو جيلان ماكسويل .. اللي هي تبقي مرات جيفري إبستين .. اللي هو كان بيدير أحد أكبر منظمات تجارة البشر و الدعارة .. خصوصاً بالأطفال .. و تاريخ روبرت ماكسويل .. و علاقته باللي حصل في ألمانيا .. و الأوشفيتز .. لحد ما إشتري ( ماكميلان 🙂) في 1988 .. شركة ماكميلان دي .. أكبر شركة مسئولة عن الكتب الدراسية في العالم 🙂.. بما فيها مصر ( مدارس اللغات ) . … 3- أكتر من بوست عن ال (AuDHD = Autism and ADHD ) اللي هي الخلطة الظريفة اللي عندي .. و إزاي بتختلف عن الأوتيزم لوحده .. أو ال ADHD لوحده . بوست عن التخطيط , بوست تاني عن التحفيز , بوست تالت عن العلاقات الإجتماعية . … 4- موضوع الشرطة المدرسية اللي منتشر بقاله يومين .. أثار كذا فكرة في دماغي .. و بدأت بوست طويل فحت باشرح فيه وجهة نظري إن ال ( شرطة المدرسية ) دي حاجة أساسية و لابد من وجودها ( للأسف ) .. و إن البوستات اللي بتوجه الضوء عليها إنها حاجة غلط .. بتعبر عن وجهات نظر بتعتنق المثالية ك هدف و إتجاه فكري .. و لكن العالم الواقعي مختلف بالكاااااااامل .. و البوست كان مليان بذكريات كتير من حياة طالب مصري في مدارس حكومية إعدادي و ثانوي 😅 . … 5- في سؤال وصل ليا مؤخراً علي صراحة و عجبني .. بيسأل ( هو ايه الحاجات اللي حافظت انك تكمل فيها غير للحاجات اللي مينفعش نسيبها زي الصلاه وعلاقتنا بأسرتنا وهكذا حاجات يعني زي التزام بعاده معينه غير ملزم بيها ) .. و إحترت أثناء كتابة بوست فيه إجابة عليه .. لأني شفت عن قرب أوي .. مدي هزلية و عبثية عالم ( زيادة الإنتاجية , و البروداكتيفيتي , و الحكمة المُعلّبة , و الصحة النفسية عالسريع , … و غيرها ) .. و إن إزاي رحلة كل إنسان .. هي رحلة فردية بحتة .. و إن ( Your red isn’t necessary my red = يعني .. مش بالضرورة نفس الشيء أو الفكرة .. توصل عقلنا إحنا الإتنين لنفس النتيجة إطلاقاً ) .. … المهم .. البوست ده ما هو إلا عملية كسر لل ( self Criticism loop= حلقة مفرغة من النقد الذاتي ) .. اللي في المعتاد ممكن تستمر في عقلي لأسابيع و شهور . .. و تُكسر بال : نشر . … و الله اعلم .