ياااااااااااااااي .. شحر عيونو و نشراتو .. أول ما تلاقينا

ياااااااااااااااي .. شحر عيونو و نشراتو .. أول ما تلاقينا عين بعين .. 🤣 يااااااااااااي .. شو مهضومي كلماته .. دبت بكلمي كيف لو كانوا إتنين .. … دي كانت الطريقة اللي كنت بأسمع بيها أغنية نانسي عجرم الشهيرة اللي نزلت سنة 2003 .. بعد ما حملتها سنة 2006 علي أول موبايل إمتلكته في حياتي : ( سوني إريكسون كي 300 آي 😍 ) … الأغنية في التيليفزيون كانت بتقول ( سحر عيونو و نظراتو ) .. الأغنية علي جهاز الكمبيوتر كانت بتقول ( سحر عيونو و نظراتو ) .. الأغنية علي موبايلي كانت بتقول ( شحر عيونو و نشراتو ) !! .. ليه ؟! … موبايلي ال (Sony Ericson K300i ) كان الذاكرة بتاعته 12 ميجا بس 😅 .. و ماكانش فيه بلوتوث أيامها .. و كان طريقة تحميل أى شيء عليه الوحيدة هي ( وصلة ال IR - Infrared - آشعة تحت الحمراء ) .. و في ليلة وقفة عيد أضحي سنة 2006 .. إشتريت من أحد جيران أصدقائي .. وصلة ( IR ) يو إس بي .. يعني ينفع أوصلها بالكمبيوتر .. و في الحالة دي .. أقدر أنزّل أى شيء من علي الكمبيوتر .. علي موبايلي !!!!!! . و ده كان أحد أعظم مٌقتنياتي في الحياة وقتها .. كإن العالم بالكامل أصبح مٌتاح إني أمتلكه في جيبي . . و بعدين قررت أجرّب أحمل أول أغنية طلعت قٌدّامي .. و كانت هي ( سحر عيونو ) .. الأغنية مساحتها علي الكمبيوتر كانت 6 ميجا تقريباً .. و ده معناه إنه كان حيبقي إستثمار ضخم جداً .. إني أستهلك أكثر من نصف مساحة موبايلي حينها .. و وقت تحميل 40 دقيقة تقريباً .. مثبّت فيه موبايلي .. عشان أحمّل بس أغنية واحدة 🤣 . . فقررت أستخدم أحد البرامج اللي كانت من أعز ما أملك برضو أيامها .. و هو برنامج ضغط الأغاني .. تدّي له الأغنية ال ( mp3 ) .. و هو يضغطها لك .. و ممكن كمان يحول الإمتداد بتاعها ل ( wav ) أو ( amr ) .. أحد أشهر الإمتدادات زماااااااان . . و بعد شوية لعب في الأرقام .. تقدر تحدد مستوي الضغط اللي تضغط بيه الأغنية .. . ف طبعاً .. عشان أنا كنت عايز أستغل ذاكرة موبايلي ال 12 ميجا أفضل إستغلال ممكن .. قررت أضغط الأغنية ال 6 ميجا … ل حجم 200 كيلو تقريباً 🙂 .. إمتداد amr . .. و بعد ما عملت ده فعلاً .. و في خلال دقايق .. حمّلت الأغنية ال 200 كيلو علي موبايلي .. و شغّلتها .. و سمعت : يااااااااااااااي .. شحر عيونو و نشراتو .. أول ما تلاقينا عين ب عين 🤣🤣 … و بعد عدد كبير من التجارب اللي إستمرت علي مدار ليلة الوقفة بالكامل .. و أنا قاعد أنا و أجهزتي و أسلاكي و كابلاتي علي الأرض ( أنا فترة ثانوي و الكٌلية بالكاااااااااااااااااااااااامل قضيتها قاعد و عايش علي الأرض .. لأن ماكنش في مكتب بيكفّي ورقي و كتبي و جهاز الكمبيوتر الضخم بتاعي أيامها ) .. و كنت فاكك السرير بتاعي .. و حاطط المرتبة و بنام علي الأرض كمان 🤣 . … المهم .. توصّلت في الآخر .. إن عشان أسمع الأغنية ك : ياااااااااااااي .. سحر عيونو و نظراتو .. . كنت محتاج إنها علي الأقل خاااااااااالص تبقي 1.8 ميجا تقريباً .. إمتداد MP3 . … و فضلت لمدة سنتين .. عقلي فيه التساؤل :

• ليه ؟!

• إيه بالظبط اللي حصل لما ضغطت الأغنية ؟!

• إشمعني بالذات حروف السين و الظ .. هما اللي باظوا ؟! .. لكن باقي الحروف كانت تمام ؟! ..

• يعني إيه بالظبط ( mp3 , wav, amr , … ) و غيرهم من إمتدادات الأغاني اللي كانت عندي ؟! .. و إيه الفرق بين ده أساساً .. و بين باقي إمتدادات الملفات علي جهازي ؟! .

• و إيه الفرق ؟! .. إيه الفرق بين طريقة توصيل ال (ir ) اللي كانت الوحيدة المتاحة في موبايلي ؟! … و بين طريقة توصيل البلوتوث اللي كانت موجودة في موبايلات النوكيا الغالية بتاعت العيال الأغنيا 🤣 ؟! … لحد سنة 2008 تقريباً .. سنة كاملة قبل ما ندرس ال ( إتصالات الرقمية - Digital Communication ) ب شكل أكاديمي في الكلية .. كنت إستعجلت أنا كالمعتاد .. و حمّلت كذا كتاب عن الموضوع ده .. و بدأت أتعلم كل إجابات الأسئلة دي .. و إجابات أكتر بكتيييييييييييييييييييييير جداً .. عن أسئلة تانية زي :

• مين أول حد فكّر يبقي حاجة ( رقمي - Digital ) أساساً ؟! .. و إزاي ؟! .. و ليه ؟! . .

• ليه اللعب اللي كنت بالعافية باقدر أشغلها علي جهاز الكمبيوتر بتاعي زمان ( زي Devil may cry 3 ) .. يادوب بتفتح قايمة اللعبة لكن مابتشتغلش عشان ( كارت الشاشة عندي مايستحملش )؟! .. لكن الأفلام بتاعت اللعبة كلها بتشتغل عادي ؟! .. و بتخليني حاعيّط لأني نفسي جداً العبها .. و باشوفها بتشتغل علي جهاز صاحبي اللي بيذلني إن جهازه أحسن من جهازي 🤣 . إيه الفرق يعني ؟! .. بين اللعبة ؟! .. و أفلام اللعبة ؟! .. … دي هي كانت الدوافع اللي عندي زمااااااااااان .. من 20 سنة فاتوا .. سنة 2006 .. إطلاقاً ماكنش لسّة إتكوّن جوايا حب المجالات دي نفسها .. لأني أساساً حتي ماكنتش أعرف أسامي المجالات دي و لا تفاصيلها .. . لكن .. كنت باسهر ليالي حرفياً بدون ما أنام .. بادور في كل تفصيلة مٌتاحة لإمكانياتي أيامها .. عشان ألاقي طريقة : أثبت لصاحبي إني علّمت عليه و شغّلت اللعبة اللي قال لي إن مستحيل جهازي العقيم يشغّلها 🤣 . و ألعب اللعبة اللي كان نفسي ألعبها … و ده برضو اللي أحب أتخيل إن : جوتفريد ويلهيلم لايبنيز - Gottfried Wilhelm Leibniz كان عايش فيه أيام ما بدأ الرحلة بالكامل .. من أكتر من 350 سنة فاتوا .. رحلة ( كل ما هو رقمي - Digital ) .. .. ماعتقدش إنه كان بيسعي لتغيير العالم أيامها .. و لكن الموضوع كله إبتدي بإنه عايز : يعلّم علي واحد صاحبه 🤣 … … و إزاي بالظبط ده حصل ؟! .. و كان مين هو ( صاحبه ) اللي لايبنيز كان عايز يعلّم عليه ؟! .. و يا تري يا هل تري .. سلسلة بوستات ( الرقمي بالحلمنتيشي ) دي حتوصل كام بوست ؟! 🤣.. . إجابات كل الأسئلة دي و أكتر في البوستات القادمة إن شاء الله 🤣 . .. و الله أعلم .