إنسان من أقرب الناس ليا في حياتي .. علي مدار

إنسان من أقرب الناس ليا في حياتي .. علي مدار ال10 سنين اللي فاتوا .. أحد أكبر مشاكله في الحياة هي : بلاعة المطبخ 🤣😅 قسماً بالله .. علي مدار 10 سنين كاملين .. كل ما نتكلّم .. بيكون وشّه شايل الهم و مخنوق و زهقان .. بسبب بلاعة مطبخ بيتهم . من أول أسبوع سكن فيه في الشقة دي .. و هو إكتشف إن تصريف بلاعة المطبخ ضعيف جداً … و التشخيص اللي تم الإيمان بيه بالنسبة للبلاعة إعتناقه من اللحظة الأولي هو : البلاعة دي أثناء تشطيب الشقة .. وقع فيها رواسب أو طوبة .. و سدتها جزئياً . … المشكلة ماكنتش في إستهلاك المطبخ العادي ( يعني حوض المطبخ ) .. لا .. إستهلاك حوض المطبخ ماكنش بيسبب مشاكل في صرف البلاعة .. المشكلة هي إن غسالة الملابس موجودة في المطبخ .. و مع كل دورة صرف لغسالة الملابس .. كانت البلاعة ب( تطفح ) فأرض المطبخ .. و يلاقي المياه بالصابون تدريجياً طالعة من البلاعة بتهاجم سجادة المطبخ و طالعة علي برة 🤣 . . علي مدار 10 سنين كاملين .. حياة الإنسان ده كان جزء أساسي منها هو : إن مع كل تشغيل لغسالة الملابس .. بيلتزم البقاء جنب الغسالة طول مدة تشغيلها ( ساعة تقريباً ) .. و مع كل دورة صرف ( في الغسلة الواحدة ممكن توصل ل 4 دورات مثلاً ) .. كان بيفضل ينشف المياه اللي طالعة من البلاعة ب ( مساحة و شرشوبة 🤣 ) . .. و علي مدار 10 سنين .. كمية المُذيبات الكيميائية .. و الأحماض .. و القلويات .. و منظفات البلاعات .. اللي إتكبّت جوة البلاعة دي .. كفيلة بإنها تسبب تغيرات بيولوجية للكائنات اللي عايشة جواها .. و تحولها ل سلاحف نينجا 🤣🤣 . . البلاعة دي إتفتحت مئات المرّات .. و تم محاولة تسليكها بأدوات حادة .. و أسياخ حديد .. و مواسير بلاستيك .. مئات المرّات .. . و علي مدار 10 سنين .. كل ما أقترح إن ييجي سبّاك .. يكسر سيراميك الأرضية .. و يغير ماسورة الصرف اللي واصلة من البلاّعة دي لبلكونة المطبخ .. و منها لماسورة صرف الشقة .. كان الرد اللي بيتقال : ” ده حيبقي مجهود ضخم .. نقدر نتلافاه طول ما إحنا بنتعامل بالمساحة و الشرشوبة 🥹 ” … من كام يوم .. و فلحظة عنترية مني .. قررت إني ألقي نظرة علي البلاّعة بنفسي .. عشان أشوف إيه من ترسانة أدواتي و عددي المختلفة ممكن يتم إستخدامه في تسليكها شوية . .. شلت غطا البلاعة الأول .. و بعدين شلت غطا البلاعة التاني .. و حاولت أنحني بشكل أكروباتي إستخدمت فيه كل خبراتي في اللياقة البدنية اللي إكتسبتها علي مدار سنين من التمرين 🤣 لأن البلاعة كانت في مكان صعب جداً الوصول له بسهولة . .. و دخّلت إيدي بالكامل أتحسس كل ما في البلاعة .. و بعدين كان معايا ( سوستة كهربائية = سلك بلاستيك قوي طويل بيستخدموه الكهربائية عشان يمدوا أسلاك في الحيطان ) .. و بدأت أحاول أتعامل بالسوستة دي . .. و بعد يأس من المحاولات المستمرة لمدة دقائق .. قررت أصور البلاعة فيديو بإضاءة الفلاش .. عشان أشوف بالظبط إيه المشكلة .. .. و شفت الفيديو .. و بعدين حسّيت ب دش بارد أوي بينهال عليا .. … البلاعة .. من 10 سنين .. من أول يوم كان تم إستلام الشقة فيه … و هي لسة متركب فيها الغطا الداخلي بتاعها 🙂🙂🙂🙂🙂 .. الغطا اللي وظيفته الأساسية و الأهم في الحياة .. هو إن بعد ما البلاعة تركب .. تفضل متغطية لحد ما الشقة تتسلم .. عشان مايدخلش فيها رواسب . .. و لكن .. ( و دي النقطة المهمة جداً هنا ) .. . لأن الغطا ماكنش راكب بالكامل .. و كان فيه جزء صغنن جداً مفتوح .. تصريف حوض المطبخ العادي كان بيعدي منه عادي بدون ما ( يطفح ) .. . لكن .. أى تصريف حقيقي .. أى ضغط من أى نوع .. كان بيؤدي لفشل البلاعة في وظيفتها الطبيعية .. فشل ذريع .. و ضخم .. و مؤلم . … 10 سنين كاملين .. تم المحاولة مع البلاعة دي ب كل الطرق الكيميائية اللي ممكن تتخيلها .. تم المحاولة معاها ” جراحياً 🤣 ” .. بكل الأدوات الحادة .. و لكن الغطا متثبت بشكل معين .. بحيث إنه مايطلعش إلا لو كنت فاهم إنه غطا .. تم إستخدام كل أنواع سلاكات البلاعات ( ال Plungers ) اللي ممكن تتخيلها .. .. و علي مدار 10 سنين والله العظيم .. دي كانت أكبر شكوي .. و أكتر شكوي متكررة في الشقة دي .. و سبب الهم و الألم و المعاناة .. و كراهية لإهمال الصنايعية .. و إتهامهم إنهم هما اللي سدوها برواسب الشغل بتاعهم .. … مهما وصفت لك الفرحة الهستيرية اللي كانت عند الشخص ده لحظة خلع غطا البلاعة … صعب تتخيلها . . بكل سهولة و سلاسة و بساطة .. غطا البلاعة إتخلع .. بدون مقاومة إطلاقاً .. . و فجأة .. أصبحت البلاعة مستعدة إنها تؤدي دورها بأكمل وجه .. و تستقبل صرف 10 غسّالات كمان .. مش غسّالة واحدة . . و فضل الشخص ده يتذكر ال10 سنين اللي فاتوا .. و كل المعاناة اللي حكيت عنها فوق دي .. و يتندر .. و يتعجب .. إزاي إن الحل كان بالبساطة دي .. . حل معتمد فقط علي : الوعي . … بعد وصفي بالعبقرية .. و بعد ما إنهال عليا الشخص ده بكل المديح و الشكر اللي ممكن تتخيله 🤣 .. لأني .. شخّصت البلاعة صح 🤣 ردي عليه كان : أنا عارف الإحساس ده كويس .. جداً .. جداً .. … بل .. يمكن ده أحد اكبر أسباب إني باكتب كتير عن نفس الموضوع .. و هو ال ( ADHD ) . … شرحت له إن : لو كانت البلاعة مسدودة بالكامل من أول لحظة للتواجد في الشقة .. كانت المشكلة حتكون واضحة بما يكفي إن لازم متخصص يتواجد .. و أى سبّاك مبتدئ .. لو كان شافها .. ف لحظة كان حيشيل الغطا .. و كانت البلاعة حتعيش حياتها عادي خالص .. بسهولة خالص .. بدون ما تكون مُتهمة لمدة 10 سنين كاملين بكل الإتهامات دي .. بدون ما تعاني من كل المركبات الكيميائية .. و أدوات التسليك دي .. … لكن .. لأن البلاعة كانت بتصرّف .. الطفل بيركّز لما بيحب .. إنت بتجيب درجات عالية في المواد اللي بتحبها .. إنت لما بتحط دماغك في حاجة بتنجح فيها .. .. طب ليه مش بتعمل ده مع المواد التانية .. ليه مش بتعمل ده مع الحاجات السهلة التانية ؟! ليه مش بتصرّف صرف الغسالة طالما بتصرّف صرف الحوض ؟! .. .. البلاعة أكيد مسدودة .. إنت أكيد مشكلتك ( الإلتزام , الإنضباط , تبطل لعب , تبطل سرحان , … ) . … اللحظة اللي عرفت فيها عن يعني إيه (ADHD ) فعلاً .. مش مجرد الفتي اللي بيفتيه أى حد عارف بعض العناوين و بيحاول برضو يثبت اللي فدماغه .. كان إحساسي هو هو بالظبط نفس إحساس الشخص اللي فجأة عرف إن معاناة ال 10 سنين دول بسبب ( غطا بلاعة ) .. إختفي . .. البلاعة أكيد مش حتتحول فجأة و تكون حاجة تانية تحل مشاكل حياتية أضخم مثلاً .. هي حتفضل بلاعة .. و لكنها حتبطل تكون سبب معاناة .. و ألم .. بل .. غالباً حتتنسي بالكامل .. إنت نفسك آخر مرة وقفت تفكر في بلاعة المطبخ بتاعكم كان إمتي 🤣؟ … … كل شيء في حياتك شغّال .. في الغالب .. و بنسبة ضخمة جداً .. إنت مش شايفه و مش حاسس بيه .. . بتشرب عادي بدون ما تتألم .. بتاكل بدون ما تتألم .. بتتنفس .. بتدخل الحمام .. بتمشي .. بدون ما تتألم . . لكن .. اللحظة اللي لا قدر الله حاجة من الحاجات بتعطل .. ساعتها بتكتشف مدي النعمة اللي إنت كنت فيها . و لحظة ما بتشتغل تاني .. كمية الحمد و الشكر و الفرحة اللي بيكونوا جواك .. بتظن إنك عمرك ما حتنسي ده طول حياتك .. . و بتنسي برضو .. إلا من رحم ربي . … أنا بكل تأكيد لسة ماشلتش غطا بلاعة دماغي بالكامل .. 🤣 كل اللي باعمله في حياتي .. هو إني أوائم حياتي علي قدراتي قدر المستطاع .. و ماحمّلش دماغي شيء أنا غير أهل له .. و لكن .. جزء ضخم جداً من حياتي أصبح طول الوقت هو : البحث عن وعي حقيقي .. و مشاركته .. .. لعل و عسي .. سبّاك يكون بيفهم أحسن مني يشوف و يشاور ليا علي غطا بلاعة أكون مش شايفه 🤣 . … و الله أعلم .