16 نقطة سريعة و مُختصرة 🤣 .. عن ال (

16 نقطة سريعة و مُختصرة 🤣 .. عن ال ( ستريمنج = Streaming ) . … 1- يعني إيه ( Streaming ) ؟! إنك تبث مباشر الحاجة اللي إنت بتعملها .. و يتفرج عليها البشر . .. 2- المنصات اللي ممكن تعمل عليها كده إيه ؟! فيسبوك لايف , يوتيوب , تيكتوك , … و غيرهم كتير .. لكن أشهرهم حالياً هما : تويتش .. و ( كيك = Kick ) . … 3- هل بتحتاج تدفع فلوس عشان تعمل ( ستريمنج ) ؟! لا . … 4- هل بتحتاج برامج معينة أو إمكانيات تقنية معينة ؟! لا .. كل منصة من المنصات اللي فوق دول .. و لها برنامج مجاني خاص بها .. و ممكن تعمل كده بأقل الإمكانيات الممكنة .. حتي بدون كاميرا متخصصة أو مايكروفون ذو جودة عالية . تقدر ببساطة ت ( ستريم ) شاشتك بس .. و اللي بتعمله عليها . … 5- أ( ستريم ) حاجات زي إيه ؟! أشهر أنواع الستريمنج هو ال ( لعب = Gaming ) .. أشهر موقع للموضوع ده هو (تويتش ) .. و لكن أى هري تاني في الحياة .. حتي لو بتسكرول وصفات طبخ كيكة مخملية حمراء علي بينتريست مثلاً 🤣 .. حتلاقي ناس بتستريم الموضوع ده . … 6- محتاج نت قد إيه عشان الليلة دي ؟! عشان تستريم بجودة متوسطة علي الأقل .. محتاج نت قوي ( علي الأقل تكون سرعة الأبلود عندك أكتر من 600 كيلو في الثانية ) .. عشان تعرف سرعة الأبلود بتاعتك .. إعمل ( Speed test ) .. و شوف سرعة الأبلود كام . و طبعاً الموضوع بيستهلك من النت . … 7- هل بتاخد فلوس علي الموضوع ده ؟! بإختصار الإجابة ( آه ) . بإطالة الإجابة : علي حسب حتبذل فيه مجهود و وقت قد إيه .. زي أى شيء في الحياة .. مافيش حد حييجي يديلك فلوس بدون مقابل . كل منصة من المنصات اللي فوق حتدفع لك .. لو بيتفرج عليك عدد كبير من البشر بشكل مستمر .. مقابل إن بيطلع إعلانات علي ال ( ستريم ) بتاعك . و لكن .. علي حسب كام واحد بيتفرج عليك .. و مدة قد إيه .. علي حسب حتاخد فلوس قد إيه . … 8- هل إنت ( أنا يعني ) باقبض فلوس دلوقتي من الموضوع ده ؟! إطلاقاً بفضل الله لسة 🤣😅 .. أنا عشان أقبض فلوس .. محتاج إني أوصل لمرحلة ال(Affiliate ) أو ( Partner ) علي تويتش .. و عشان حاجة زي كده تحصل .. محتاج إن علي مدار 40 ساعة ستريمنج يكون معدل عدد الناس اللي بتتفرج أكتر من 3 .. و حتي الآن .. معدل عدد الناس اللي بتفضل متابعاني علي الستريم ماتخطاش ال ( 1 ) 🤣 . … 9- طب أوصل للمرحلة دي إزاي بسرعة ( مرحلة الفلوس ) ؟! . كل شيء في الحياة له علاقة بالفلوس .. عبارة عن معادلة في 3 متغيرات أساسية ( وقت + مجهود + موارد ) . موارد يعني : جودة محتوي الستريم بتاعي ( إني أكون موهبة فتاكة مثلاً , أو كاريزما عالية , أو وسيم فحت و الناس بتحب تشوفني 😁🤣 ) . . مجهود يعني : المجهود اللي أبذله في إني أحضر للستريم بتاعي و أجهز له . . وقت يعني : الوقت و الإستمرارية بتاعتك في عمل الشيء ده . .. أنا إطلاقاً ماعنديش موارد ( مش أعلي موهبة , مش أوسم حد , مش أجمد كاريزما , … ) . أنا كسووووول .. و باكره بذل مجهود في تعلية الجودة . .. فبالتالي .. أنا رهاني هو علي ال ( وقت و الإستمرارية ) .. لو فضلت أعمل نفس الشيء .. بعد فترة من الزمن .. عدد الناس اللي شبهي حيزيدوا .. و دول يكفوني إن شاء الله . … 10- طب إنت بتصرف منين ؟! أنا بفضل الله عندي شغلي و شركتي الناجحين بفضل الله أولاً , و القائمين عليها و علي تفاصيلها ثانياً . و لو ماكنش عندي ( Structure ) يسمح ليا إني ألاقي وقت أعمل موضوع ال ( ستريم ) ده .. ماكنتش عملته إطلاقاً . … 11- مقصدي من النقطة اللي فاتت دي : لو ماعندكش القدرة ال ( مادية , لوجيستية ) إنك تبذل وقت و مجهود في شيء ما .. ماتعملوش . فبالتالي .. ماينفعش تكون طالب لسة بتدرس .. و تقول أنا حاضحي بدراستي عشان أبقي ( ستريمر ) .. ده غلط .. لأنك مش ضامن نجاح ال ( ستريم ) حيحصل إمتي .. و ممكن تموت من الجوع قبل كده 🤣 . . أى مجهود ناوي تبذله في حاجة زي ال ( ستريم ) .. لازم يكون مجهود إضافي حياتك الحالية مش محتاجاه ( يعني دراستك و شغلك و أهلك ) .. … 12- طب إنت ( أنا يعني ) عملت كده ليه ؟! . لأني حسيت إني عاجز و مسجون قدام اللي بيحصل من سنة .. شفت إزاي الناس كانت مستنية من لاعب كورة , أو مذيع كوميدي .. إنهم هما اللي يقودوا الحوار و يشيلوا القضية !! .. و إني مهما كبرت قيمتي السوقية أو المادية ك( شركة ) .. حافضل جوة أسوار عالم الإقتصاد و المال اللي بيحكمه نفس المنظومات من 400 سنة . . فكانت الإجابة اللي ربنا هداني لها هي : إن أرض الله واسعة .. و علمي التقني و لغتي الإنجليزي كافيين إني أحاول أتكلم مع عباد الله .. بلغتهم . … 13- طب ليه إخترت ال ( لعب = جيمينج ) إنه هو يكون الحاجة اللي تعمل لها ( ستريم ) .. مش حاجة تانية مفيدة مثلاً ؟! . . لأني طول عمري بالعب .. و باحب الفيديو جيمز .. دي هي الحاجة اللي مهما كنت (زهقان , تعبان , مخنوق , فرحان , … ) باعملها .. فبالتالي .. مش حاستني حد يدفعلي فلوس عشان ألعب .. مش حاستني أشوف نتايج مثلاً و أيأس لو مالقيتهاش .. .. اللعب .. هو النشاط الوحيد اللي باعمله بدون إنتظار عائد .. طول الوقت . فبالتالي .. هو النشاط الوحيد اللي أضمن إني ( أستمر ) فيه .. و أكون ( Consistent ) .. . و هو أكتر نشاط حالياً ( حر ) .. يعني مافيش جهات أو منظومات ضخمة مسيطرة عليه سيطرة شبه كاملة . .. عالم التقنية .. في حيتان مسيطرين عليه . عالم الفلوس .. في حيتان مسيطرين عليه . عالم الأفكار و الأكاديميا .. الناس بتهرب منه .. و الناس بتكسل أساساً تقرأ بوست طويل . .. معظم العوالم في حياتنا الحالية .. حتلاقي في منظومات و جهات أساسية مسيطرة عليها سيطرة شبه كاملة . .. ما عدا ال ( لعب ) .. مش تصميم الألعاب .. لا .. ال ( لعب ) ذاته .. .. ما زال حر .. و مافيش ( Barriers to entry = حواجز تمنع الدخول ) للعالم ده .. يعني مش حتلاقي الشاب اللي عنده 14 سنة مثلاً مش عارف يفهم محتوي ال( ستريم ) بتاعي لأنه ماعندوش لغة معينة .. أو لأنه مادرسش منهج معين .. أو لأنه ماعندوش وسائل معينة .. لا .. ال ( لعب ) .. حر .. بالكامل . .. فده كان أنسب وسيلة / كبسولة .. أقدر أستخدمها كمحتوي أتواجد فيه و بيه طول الوقت . … 14- ليه باكتب البوست ده دلوقتي بالذات ( بعد سنة تقريباً ) ؟! . .. علي مدار حياتي .. عملت تجارب كتير مختلفة .. و كتبت عن بعضها هنا علي الفيس .. في المعتاد باكتب عن التجارب .. فشلت أو نجحت .. عند النقطة اللي باتأكد فيها من النتيجة ( نجاح أو فشل ) . .. تجربة العمل الحر مثلاً .. و أول مرة أوصل لعشرتلاف دولار من أبوورك .. كتبتها بالكامل أيام 2017 .. و شرحتها .. .. تجربة ال ( ستريم ) كان ممكن أكتبها و أشرح تفاصيلها بعد ما أوصل لعائد مادي كبير منها مثلاً .. .. و لكن .. ربنا رزقني ما هو أكثر و أفضل من ( حُمُر النعم ) .. ربنا رزقني بإنسان من البرازيل !! .. أسلم . .. رمضان اللي فات .. كنت باقرأ قرآن علي ال (ستريم ) .. و دخل شاب من البرازيل يسألني عن اللي باقرأه .. و جاوبته قدر علمي وقتها .. ( باقي التفاصيل في البوست اللي قبل ده ) . … فبالتالي .. الشاب ده لوحده .. لو أنهيت تجربتي في ال (ستريم ) علي كده .. بالنسبة ليا هو قمة النجاح و كل النجاح بفضل الله وحده . .. و ده كان النقطة اللي أقدر أقول بفضل الله . .إني نجحت في التجربة دي . . و إن شاء الله أستمر . … 15 - هل أنصح حد يعمل زيي ؟! .. لو عندك الوقت و القدرة … آه .. … 16 - ليه ؟! .. لأن ده أحد الحاجات الأساسية المطلوبة من الإنسان ( التواجد بحرية ) . .. فوجهة نظري في فرق ضخم لازم يتم توضيحه بين : الغاية .. و الوسيلة .. .. الغاية هي الوجهة .. هي القبلة .. هي الحاجة اللي المفروض بتعمل كل شيء عشان توصل لها .. و أى شيء يبعدك عنها .. يبقي شيء مرفوض . … أى خلط في الفهم بين ال( غاية ) و ال ( وسيلة ) بيؤدي لتوهان كتيييييييير في الحياة .. .. ال ( فلوس ) وسيلة مش غاية . ال ( علم ) وسيلة مش غاية . ال ( عمل ) وسيلة مش غاية . كقاعدة عامة بالنسبة للمسلم … كل ما في الدنيا .. وسيلة .. مش غاية .. .. غاية الدنيا بالنسبة للإنسان المسلم هي ال ( آخرة ) . . غاية الدنيا بالنسبة للإنسان غير المسلم هي ال ( دنيا ) . … … علي مدار التاريخ .. أمم كتير إنشغلوا بال ( وسائل ) .. و نسوا ال ( غاية ) .. و تم ذكر الكثير منهم في القرآن .. لم يشفع لهم ( عملهم , علمهم , ثرواتهم , وسائلهم , … ) . .. علي مدار ال400 سنة اللي فاتوا ( بداية من عصر الإستعمار الأوروبي ) .. تم التضييق علي الإنسان عموماً .. و صناعة صورة عالمنا الحالي العجيب .. .. الصورة دي ( زي كل شيء تاني في الحياة الدنيا ) بعد ما بيوصل لقمته و أوجه .. بيبدأ في معارضة نفسه بنفسه .. و هدم نفسه بنفسه .. فبالتالي .. قدسيات و أصنام ال (كارير , الفلوس , عبادة الشركات , … ) و غيرها من صور الحياة الرأسمالية اللي إتولدنا فيها .. أصبحت بتنهار واحد تلو الآخر .. و مجالات شغل و عمل كاملة كان بيفني البشر فيها نفسهم و وقتهم عشان يمتهنوها و يتقنوها .. أصبحت بتتحول ل ( تراث = obsolete ) بين يوم و ليلة … ال ( ستريمنج ) فوجهة نظري هو أقرب صور عالمنا الحالي إلي ال ( UBI = Universal Basic Income = يعني الدخل العالمي الأساسي ) . و ده مصطلح إتكلمت عنه قبل كده كتير .. معناه : إنك تاخد فلوس و مرتب شهري يكفي إحتياجاتك البشرية الأساسية ( مأكل , ملبس , زواج , مشرب , .. ) مقابل إنك عايش .. فقط .. .. ممكن أتناقش لاحقاً في ليه ال ( UBI ) ده حاجة صح و المفروض تتعمل .. و ليه مش حتسبب فناء المجتمعات بناءاً علي الفهم الخاطئ إنها لو إتطبقت الناس حتأنتخ و مش حتشتغل .. .. و لكن كالمعتاد البوست طول فحت .. يكفي إنك تعرف إن ال ( ubi ) ده مفهوم موجود في أصل الإسلام و المجتمعات الإسلامية .. و المفروض إن الإنسان المسلم في المجتمع المسلم .. أبداً مايقلقش بإحتياجاته الأساسية ( اللي تشمل أكله و سكنه و زواجه ) 🤣 .. حتي لو كان لا يعمل .. مش معني كده برضو إنه ( يأنتخ و يعيش تنبل ) .. و لكن مش المفروض إطلاقاً إن إنسانيته تكون أسيرة لدخله المادي . … … و الله أعلم .