قد يكون التالي قصة تافهة بالنسبة لناس كتير عندها مشاكل

قد يكون التالي قصة تافهة بالنسبة لناس كتير عندها مشاكل و قصص أكثر تعقيداً من دي .. و لكن نفس المبدأ اللي حاشرحه هنا شفته تفصيلياً و حرفياً في كل قصص حياتي بلا إستثناء بفضل الله . بس مش كل القصص ينفع تتكتب ك بوست عام علي الفيسبوك 😅 .. ألا و هو مبدأ : اللهم لك الحمد و الشكر - إنا لله و إنا إليه راجعون - لعله خير . .. من كام يوم نزلت بوست شرحت فيه إن مروحة الGPU للابتوب الأساسي بتاعي إتكسرت تاني يوم العيد و بالتالي .. وقفت جزء كبير من شغلي . الكسر كان مفاجئ و بدون أى سبب !! .. يعني كنت شغال عادي .. و فجأة اللاب بدأ يزن بفظاعة و يهتز بشدة . .. أول ما ده حصل .. و عرفت إن اللي في المروحة ده كسر يتطلب تغييرها .. اللي قلته .. هو اللي باقوله في كل الحالات المشابهة في حياتي .. و ربنا يديم عليا نعمة الإيمان دي و لا أُفتن فيها أبداً بإذنه .. اللي باقوله هو : ( إنا لله و إنا إليه راجعون ) زي ما في القرآن .. (الذين إذا أصابتهم مصيبة قالوا إنا لله وإنا إليه راجعون ) . الدعاء ده مش دعاء بيتقال عند الموت فقط إطلاقاً .. بل في كل شيء تشعر إنه مصيبة . . و ( لعله خير ) .. و ( الحمد لله ) .. و شرحت إني دايخ علي المروحة دي في مصر بالكامل و مش لاقيها . و إنها كمان مش متاحة بالساهل في دبي !! .. .. لازم أوضح هنا إن اللاب اللي باتكلم عنه .. قوي نسبياً .. و نادر وجوده بسهولة .. فبالتالي مشكلة زي دي تعني غتاتة كبيرة أوي بالنسبة ليا … في التعليقات علي البوست ده .. تواصل معايا عدد من الأصدقاء ربنا يبارك لهم جميعاً .. و كذا حد إتحرك في كذا إتجاه .. و إذا بأستاذة إيمان Eman Araby بتقول ليا إنها مقيمة في الصين .. و إن طلب المروحة سهل جداً بالنسبة لها . تواصلت معاها .. و تم الطلب في نفس اليوم تقريباً بفضل الله !! .. .. و عرفتني بارك الله لها إن في خطوط توصيل دائمة بين الصين و مصر عن طريق أصدقاء ( ماكنتش لسة أعرف إنهم أصدقاء 😅 ) . و خلال أقل من 3 أيام !!!! المروحة كانت في مصر !!!!!!!!!! و ركبت و تمام و زي الفل بفضل الله وحده أولاً و أخيراً . .. اللي هو أنا لو كنت طلبتها من مصر أساساً كانت ممكن تتأخر أكتر . .. و مش بس كده .. الأصدقاء ( اللي إكتشفت إنهم أصدقاء بعد ما إتكلمنا ) .. إتضح إن في سبل و طرق تعاون كتيييييييييير بيننا محتاجين فيها بعض .. و إن كذا حاجة من الحاجات اللي كنت شغال فيها و ليها علاقة بالصين كنت مأجلها لأني ماليش تواجد هناك علي الأرض .. الحاجات دي كلها دلوقتي أصبحت أسهل بكتير جداً بفضل الله . … … … علي مدار ال20 سنة اللي فاتوا .. و أنا باقرأ سورة الكهف كل يوم جمعة بفضل الله .. و حافظها عن ظهر قلب . و الجزء اللي بيشرح قصة سيدنا موسي مع سيدنا الخضر .. جزء مؤمن به تمام الإيمان .. و لو في خلاصة لقصة حياتي حتي الآن .. فهي : ” 1- لو فاكر إنها بتمشي بحساباتك و تخطيطك .. تبقي في طريقك لخازوق أسطوري .. 2- إنت ما عليك إلا إخلاص النية أولاً .. ثم السعي ثانياً .. و التأقلم مع كل النتائج اللي تظن إنها سيئة .. و الرضا و إعادة السعي بلا كلل و الإيمان بحكمة الله عز و جل . 3- و لما تشوف الفرج بييجي من حيث لا تحتسب .. تفهم إنه من عند الله وحده .. و إنه في سبيل الله وحده … و مش بشطارتك إطلااااااااقاً .. 4- و ترجع تخلص النية تاني .. و تسعي تاني ..و هكذا . … … … شكراً Eman Araby .. و ربنا يديم عليكي نعمة إنك تكوني سبب في تيسير أمور عباده . شكراً باشمهندس أيمن رمضان .. محترف صيانة اللابات .. و واحد من النادرين اللي أئتمنهم إنهم يتعاملوا مع أجهزتي .. حتي لو كنت موتره و أنا واقف فوق دماغه 🤣😅 . أنا باتعامل معاه من سنين .. و عمره ما خذلني أو خيب ظني فيه ما شاء الله .. و أى حد بيدور علي حد ثقة في أى شيء له علاقة بصيانة أجهزة اللابتوب .. ترشيحي له بيكون دائم . شكراً Mahmoud Kamal .. صديقي و أخويا الصغير 😁 مؤسس GEEKS STORE.. و الراجل اللي لو عايز تشتري أى لابتوب جيمينج تقيل من جوة أو برة مصر .. تقدر تتواصل معاه مباشرة .. .. و بكل تأكيد شكراً لكل شخص حاول يساعد بأى شكل .. كأن الحل جه عن طريقكم و زيادة ..