بمناسبة التريند اللي شغال بقاله كام يوم بتاع الفلوس و

بمناسبة التريند اللي شغال بقاله كام يوم بتاع الفلوس و الشغل و الكلام ده .. التلات طرق دول شرحتهم كتير فأماكن مختلفة .. و جربتهم قبل كده علي مدار السنين بنفسي .. و بأحجام = Scales مختلفة .. و بما إني إتكلمت عن كام واحدة منهم علي twitch خلال الأيام اللي فاتت أثناء ما بالعب جيمز .. فحاكتبهم هنا سريعاً . … (الطريقة الأولي .. محتاجة صبر و مجهود كتير .. معلومات قليلة .. و مش محتاجة لغة إطلاقاً ). … 1- حتنزل أى سوق جملة ( العتبة , الموسكي , المنشية , … ) تشوف عشر منتجات في مجال تقدر تتكلم فيه أو عنه .. و علي سبيل المثال الملابس و الإكسسوارات الرياضية . ( أحذية , تيشيرتات , شورتات و بنطلونات , أحزمة أوزان و تحميل , … و غيرهم ) . جمع أسعار و أنواع و ماتشتريش . . 2- لف علي 5 ( جيمات = صالات رياضية ) في محيط بيتك .. و إعرض عليه إنك تعلن / تبيع عنده بمقابل نسبة له . . 3- لو عنده شاشة في الجيم ( و ده بنسبة 99% موجود دلوقتي ) .. حتعمل فيديو صغنن ( تقدر تعمله علي موبايلك ) .. فيه المنتجات اللي إنت لفيت عليها و سعرها ( بعد ما تزود ربحك , و ربح صاحب الجيم ) .. و تعرضه علي شاشة الجيم ( بعد الإتفاق بتاع نقطة 2 ) .. و تحط رقم موبايل الناس تتواصل معاه عشان تطلب . . 4- لم طلبات البشر .. و مشيها واحدة واحدة .. اللي عايز حاجة .. يدفع عربون تحت الحساب .. تروح تجيبها له من السوق اللي رحت شفت الحاجة و لفيت فيه .. و هكذا .. يعني : ماتشتريش حاجة مش متباعة .. لا .. بيع الأول .. و بعدين روح إشتري .. لحد ما تكون راس مال صغنن تقدر تشتري بيه الأول . . 5- بعد شوية .. حتعمل جروب عالواتس لطلبات البشر و متابعة الكلام ده .. و بعدين صفحة فيس .. و لما ربنا يكرمك .. إبقي إعمل موقع إن شاء الله . … … (الطريقة التانية … محتاجة صبر و مجهود أقل .. بس معلومات كتيرة شوية .. و لغة نضيفة نسبياً ) . .. 1- بص علي العشر أفلام الأخيرة بتوع ال (Box Office ) .. 2- غالباً علي الأقل فيلمين منهم دايماً متاخدين من كتب و قصص مشهورة .. زي ( Dune ) .. 3- دور علي أى حد بيبيع كتب أونلاين من اللي فاتحين برامج أفيلييت ( بداية من أمازون لحد بارنز أند نوبل .. بالمناسبة بارنز أند نوبل متعاقدين مع CJ .. اللي إشتغل أفيلييت قبل كده عارف مين cj دول ) .. .. 4- إعمل أكاونتات سوشيال ( إنستاجرام , تيكتوك , … ) تستهدف الجمهور اللي حيقرا الكتاب ( يعني vpn , و رقم موبايل من الدولة اللي مستهدفها ) . 5- إعلن عن الكتاب اللي نازل منه الفيلم .. 6- و عيد الموضوع مع كل فيلم جديد .. و لما ماتلاقيش أفلام من كتب .. دور علي كتب بتحكي نفس القصة .. حتلاقي كتير فحت . … … ( الطريقة التالتة .. محتاجة صبر و مجهود أقل أوي .. بس معلومات أكتر أوي .. و لغة نضيفة أوي أوي .. و دماغ مترتبة صح فحت ) . .. 1- سجل علي Upwork أو أى موقع مشابه .. لينكدإن مثلاً .. و غيرهم .. 2- دور علي شغلانات في مجالات تفهم عنها من بعيد لبعيد ( مش لازم تكون متعمق ) .. و ماتقدمش .. لأن التقديم بيكون ب connects / عملة الموقع . 3- إفهم متطلبات عشر شغلانات من التقال مثلاً .. و إعمل سيرش محترم ( و معاك chatgpt حيساعدك فحت في الليلة دي ) .. علي إدارة مشروع ينفذ الشغلانة دي يبقي إزاي . 4- أمثلة علي الشغلانات دي ( بناء مواقع قوية نسبياً = مش مجرد كتالوجات يعني , خطة إنتاج محتوي ميديا لقناة متخصصة ( في أمثلة كتير فحت علي ده .. في مجالات الجيمينج خصوصاً ) … و غيرهم ) . 5- الشغلانات دي بتحتاج فرق علي الأقل من 3 أشخاص عشان ينفذوها في المعتاد . 6- إفتح Upwork تاني أو لينكد إن برضو .. بس من الناحية التانية بقي .. اللي هي ناحية اللي عايز ناس تشتغل له .. 7- دور علي ناس عندها المهارات اللي محتاجها عشان تنفذ الشغلانات اللي إنت عايزها دي .. 8- إعمل علاقات معاهم قائمة علي ( تقدر تنفذ الجزء ده من الشغلانة دي ؟! ) . 9- معظم الفريلانسرز علي المنصات دي .. رائعين فحت كصنايعية .. و لكنهم سيئين جداً كمديرين أعمال .. و بيدوروا علي حد يناقش لهم التفاصيل و يريح دماغهم من أى شيء غير صنعتهم . 10 - حتغلط .. حتبوظ الدنيا فشغلانات كتير .. حتتخانق مع عملاء . .حتتخانق مع فريلانسرز .. فريلانسرز و عملاء حيتخانقوا مع بعض و معاك و حتكره الشغلانة علي اللي إقترحها عليك في يوم من الأيام .. إستحمل معلش شوية . 11- لو قدرت تستحمل و تتعامل مع الموضوع بدماغ محطوطة فتلاجة .. بعد شوية حتطلع قماش .. القاعدة الأساسية في الشغلانة دي هي : إنت النهاردة أحسن من إمبارح … و بكرة حيبقي أحسن من النهاردة إن شاء الله . . 12 - أهم شيء في الشغلانة دي عشان ماتلبسش خازوق بدري يبطلك الشغل بالكامل … ماتصرفش فلوس مش في جيبك .. و لا تقبض مليم ماسلمتش بيه شغل .. يعني : ماتديش فريلانسر فلوس قبل ما العميل يقبضك . و ماتاخدش فلوس من عميل .. قبل ما العميل يستلم شغله و يوافق و يقول آمين . حتقولي و دي تتعمل إزاي ؟ حاقول لك بالزمن و التجربة .. يعني : عشر فريلانسرز حيرفضوا يشتغلوا قبل ما يقبضوا .. و لكن واحد حيوافق لمجرد التجربة و إنه عايز يشتغل .. هو ده اللي تربط معاه و تشرح له إنك مجرد منسق بينه و بين العميل .. و إنك مش ضامن العميل في جيبك . . و نفس الموضوع بالنسبة للعميل .. مهما كان مستعجل إنه يدفع .. إتأكد إنه راضي عن الشغل الأول .. لأن الشغلانة دي. .. السمعة فيها أهم من الفلوس . … … … ملاحظة رقم (1) : مافيش حاجة سهلة .. مافيش شورط كاط .. مافيش مكسب سريع ولا passive income ولا أى بلح من الهري ده … علي قد ما حتتعب و تتفحت .. علي قد ما حتجني .. إما مكسب مادي .. أو خبرة .. .. ملاحظة رقم ( 2) : مافيش حاجة حتنجح من أول مرة .. مافيش مكنة حتطلع قماش من أول مرة .. حتتكسف و حتفشل و حتبوظ الدنيا و حتشوف أيام ما يعلم بيها إلا ربنا .. و لكن دي طبيعة الدنيا سيادتك .. أهم حاجة ماتطلعش همك في السجاير 🤣 .. ملاحظة رقم ( 3) : ماتشتريش أرض زراعية مش حتنزل تفلح فيها و تزرع فيها بنفسك .. ماتدفعش فلوس في شيء إنت مش فاهمه و مش ضامنه .. يعني ماتكونش Dumb money .. .. ملاحظة رقم (4) : أنا باهري كتير عن الكلام اللي زي كده و غيره لما باتسأل .. و أنا بالعب جيمز أونلاين كتير فحت .. و باستريم معظم اللي بالعبه علي (تويتش = twitch ) و أهري عن البيزنس و التكنولوجي و غيره من الحاجات اللي بافهم فيها علي قدي .. عايز تسأل في حاجة منهم .. حتلاقيني هناك باستريم . .إبعتلي هناك 😅 اللينك في أول كومنت