بوست رقم (2) : عن البيزنس و الفلوس و تريند

بوست رقم (2) : عن البيزنس و الفلوس و تريند اليومين دول .. شوية تفاصيل زيادة عن : ( طاب ما تياللا بينا .. ” بصوت باسم سمرة 🤣” ) . … 1- فكرة إني أعلن و أقول ( يلا يا جماعة .. حانعمل فريق .. و حاقود الفريق و أشرح و أشغل و أشجع و أطبطب و أدلع … و كل الحاجات الحلوة دي ) .. فكرة جميلة جداً .. مغرية جداً .. و لكن : جربتها قبل كده كتير .. و الأهم .. ” رحم الله امرئ عرف قدر نفسه ” .. 2- اللي حصل و بيحصل و حيحصل دائماً و أبداً .. كالتالي :

• حاعمل خطة تنينية مجنحة بتطلع نار و شكلها جامد زوحليقة ..
• حاعمل جوجل فورم .. و الناس تسجل .. و نتفحت و نتردم إنترفيوهات و مقابلات و مكالمات ..
• حانجمع الناس و نشرح و نقول اللي المفروض يتعمل ” من وجهة نظري ” . .. 3- 10% بالكتير و علي أفضل تقدير هما اللي حيشتغلوا صح .. و يبدأوا يتحركوا .. و دول هما ال ( Proactive = يعني اللي بيتحركوا من غير ما حد يحركهم ) .
• ال90% التانيين حيأنتخ منهم كتير .. و كتير حيفضل يتسائل ” لماذا نحن هنا ؟! ” .. و كتير حيفضل يحاول و يفشل في تاسكاته و ييأس و يبدأ يفكر يشفت كاريره اللي لسه مابتداش أساساً . .. 4- أنا شخصياً حاكون في ال90% التانيين دول .. و لما التفاصيل بتزيد .. أنا دايماً عقلي بيبدأ يعمل مارشدير و يجذب إنتباهي لعبة جديدة أو مسلسل جديد و ياخد كل إهتمامي و وقتي . .. 5- بعد قليل من الوقت .. اللي بيحصل إما رضاء بالأمر الواقع .. و 90% من الشغل بيتحمله شخص أو إتنين بالعدد .. و بيبقوا شغالين كل حاجة في كل حاجة .. لحد ما بيكتشفوا الحقيقة المرة .. و هي إنهم يقدروا يعملوا ده لوحدهم.. و يبدأوا يحاولوا يجمعوا فريقهم و يبنوا شركتهم بنفسهم .. .. 6- و البقية بتبدأ تدور علي شغل تاني واضح المعالم بشكل أكتر .. فيه إدارة قادرة علي متابعة الأمور بشكل أكثر دقة .. أو بيبدأوا رحلة البحث من جديد عن التجربة الجديدة . … …
• هل معني كده إنك تيأس قبل ما تجرب ؟! إطلاقاً .. و لكن الإنسان بيكبر و يتعلم .. و أنا جربت الموضوع اللي فوق ده كتير قبل كده زي ما شرحت .. و بقيت واعي أكتر بقدرتي الحقيقية علي الإدارة و المتابعة ( اللي تقترب من الصفر تقريباً ) .. و فاهم مكاني الطبيعي بصورة أكثر وضوح ( إني visionary = يعني بحّار عايش علي سفينته مابيقعدش في حتة أبداً ) . …
• يعني إيه بقي ( visionary ) دي .. بس بتفصيل أكتر ؟! . يعني أنا و اللي زيي ( في مننا كتير جداً علي فكرة ) .. طول الوقت بنجمع معلومات و أفكار .. عندنا جوع لا ينتهي للمعلومات و الأفكار .. ساعات كتير بقي كام فكرة من اللي شفناهم و جمعناهم دول بيركبوا فبعض .. و نقولها فقعدة .. تقوم الناس اللي معاك في القعدة تنبهر بعبقريتك و ذكائك .. في حين إنك شايف إنك بلحة عادية خالص .. و إنك ماقولتش جديد .. و إن اللي بتقوله ده .. أى حد شاف نفس السبعين مسلسل اللي إنت شفتهم و نفس ال90 بودكاست اللي إتفرجت عليهم الشهر اللي فات .. حايقدر يفكر فيهم بسهولة . لكن في الحقيقة هي إن لأن أثناء ما إنت كنت قاعد بتبحر من مسلسل لفيلم لكتاب للعبة لبودكاست .. غيرك كان قاعد بيبني كارير في شغلانة معينة … أو بيحضر دكتوراة في حاجة متخصصة جداً .. .. غيرك قعد علي أرض .. و بني بيت .. و مد جدوووور .. في حين إنك كنت بتبحر بين عشرات الجزر و الأراضي .. مش بتدور علي حاجة .. و لكنك مابتعرفش تقعد في أرض ثابتة . … اللي زيي و زيك ( البحّارين دول ) .. مايشتغلش عمدة قرية أبداً .. مايشتغلش مدير .. أبداً أبداً .. لأن العُمدة = المدير .. محتاج يبقي عارف عن المدينة اللي بيديرها أكتر من أى حد .. و قاعد فيها .. و مستقر .. و عينه مش علي المدينة اللي جنبها .. و الشركة اللي في مجال أبعد ما يكون عن مجاله .. و هكذا . … طيب .. معني كده إيه ؟!.. مانبنيش ؟! .. إطلاقاً .. اللي زيك و زيي رائعين جداً .. فقط لو لقوا اللي يصاحبهم في رحلتهم دي .. و يكون بيعرف يهدي و يستقر و يبني .. حيبحر معاك شوية .. يستناك توصل لجزيرة .. يسيبك هو تكمل إبحار في عوالمك .. و يقعد هو في الجزيرة يبني شوية لحد ما يعمل كيان قوي له جدور قوية .. بعد شوية حتلاقيه هو بيقول لك .. يلا بينا .. أنا جاي معاك تاني في رحلة جديدة .. و هكذا . … الشخص ده .. إسمه في عالم الشركات ( COO= Chief operating officer ) و أحياناً كتير بيكون هو القائم بأعمال ال CEO نفسه .. و أحيان كتير بيتم تعيينه في الآخر ك CEO . .. فكك من المسميات .. و الكلام الإنجليزي .. الشخص ده من الآخر شخص راسي و دماغه مترتبة و بيعرف يهدي كده و يركز في حاجة واحدة شوية حلوين . … … … ربنا رزقني في حياتي بعدد من الأشخاص اللي أقدر أقول عليهم ( هاديين و راسيين ) بفضل الله .. إستحملوا عبطي و دماغي اللي مابترساش علي ميناء دي .. و قعدوا هما علي الجُزر اللي وصلنا لها .. و بنوا بفضل الله … الناس دي مشغولين جداً حالياً .. و كتير رميت علي شواطئهم لاجئين ركبوا معايا في رحلاتي المختلفة .. … … فإلي ما ربنا يرزقني بشخص جديد .. يمتلك القدرة علي البقاء في أرض واحدة .. و يعرف يبني و يدير و يهدي .. مش حاقول ( يلا بينا - بصوت باسم سمرة 🤣) … … و لكن تقدر تعتبر البوست ده له غرضين : 1- شرح يعني إيه (Visionary ) .. و شرح إنهم مش ناس وحشين .. و إنك زي الفل والله .. و لك دور مهم .. لو لعبته صح .. الدنيا حتمشي زي الفل .. لكن لو فضلت تلعب دور مش دورك .. حتعاني و تتعب .. و حتتعب اللي حواليك معاك . … 2- دعوة لأى حد حيشوف البوست ده .. و عارف إنه يقدر يقعد و يهدي و يبني و يدير .. الناس اللي زيك أنا و اللي زيي بندور عليه بملقاط والله العظيم .. و اللي حيقرا البوست ده من الناس اللي أعرفهم و بنوا كيانات و شركات .. عارفين أنا باتكلم عن إيه و مين 😅 .. لو شايف إنك من الناس ال ( Proactive ) دول .. يعني تعرف تقعد و تبني و تدير .. ماتترددش تكلمني بالله عليك .. … … صفات الشخص ال ( عُمدة ) ده بقي .. عشان نبقي شرحنا كل الحتت المهمة اللي في البوست . .. 1- كائن يعيش و يتعايش بالجداول و الجوجل شيتس .. و الإكسل . . 2- ذاكرة بتمشي علي رجلين .. دماغ دفتر .. بيفتكر كل الحاجات المهمة .. و بيطنش كل اللي مش مهم .. بس لو فلحظة إكتشف إن حاجة مش مهمة طلعت مهمة … بيفتكرها بسهولة و بكل تفاصيلها 😅 . . 3- أى شيء في الحياة غير الحاجة اللي هو بيشتغلها .. بتبقي مش مهمة .. فيلم مستنيه من زمان نزل السينيما .. مش مهم .. ماتش كورة كلاسيكو و جاتله دعوة خاصة يحضره و يلعب فيه مثلاً .. مش مهم . مابيلعبش جيمز .. و مابيتفرجش علي مسلسلات .. هو أولوياته و أحلامه و رغباته كلها .. في الحاجة اللي هو بيشتغلها حالياً . . 4- مابيتكسفش يوضح الصح للشخص الغلط .. مافيش عنده حاجة إسمها عشم و معلش .. مش بيطبطب و يدادي .. و فاهم إن الشغل لازم يمشي صح .. و إلا مش حنلاقي ناكل . . 5- مابيزهقش .. خليني أعيدها تاني … مافيش في قاموس أفكاره حاجة إسمها زهق .. . 6- مابيخافش يغلط .. و مابيخافش ياخد قرارات .. و فاهم إن الأخطر من القرار الغلط .. هو عدم إتخاذ قرار من الأساس .. و أى قرار بياخده .. بيتحمل مسئوليته حتي النهاية . . 7- أخيراً و ليس آخراً … أمين و مش فهلوي .. يعني .. فاهم إن اللي حيتاخد النهاردة بالفهلوة مش مكسب .. و إنك لو بتبني حاجة تعيش .. لازم تبنيها صح و علي نضافة .. فبالتالي أمانته مولودة من فهمه إن المستقبل لازم يتبني علي حاضر نضيف .. و إن الوساخة حتي لو حتكسب النهاردة دهب .. حتخسرك كل حاجة قدام . … … … و الله أعلم .