ده كان النهاردة .. في مكتبة إسكندرية 💓💓

ده كان النهاردة .. في مكتبة إسكندرية 💓💓 و الحاجات الرائعة اللي زي ده طلع مش حدث نادر إطلاقاً .. بل طلع بيتكرر كتير بس أنا اللي ماكنتش أعرف تقريباً .. أو ماكنتش متابع . و بيتكرر في دار الأوبر كمان !! .. .. أنا أول مرة سمعت فيها حاجة كاملة ل ” عم باخ 🤣” كان في تورنت نزلته بالصدفة سنة 2009 إسمه: Top.100.Masterpieces.of.Classical.Music.1685-1928 الكلام ده كان أيام مرحلة نهمي إني أعرف كل حاجة عن كل حاجة معيشتي في مصر كانت حرماني منها .. فكنت باقعد بالأيام و الليالي في مواقع التورنتات المختلفة أداونلود كل ما أستطيع من كورسات و كتب و أفلام و مسلسلات .. و بمجرد ما نزلت التورنت ده ( مساحته كانت 2 جيجا و نص بالمناسبة .. و لسة عندي 😁😁 ) . عشت .. عشت مستمتع بحاجات فعلاً كنت مستغرب هي ليه مش منتشرة أو متداولة بشكل فيروسي شبه الأغاني و الموسيقات اللي كانت منتشرة علي الموبايلات النوكيا في الوقت ده ! . .. تقدير العبقرية في الحاجات دي مابيجيش من أول مرة تسمعها .. لأنها .. مش سهلة إطلاقاً … مش رخيصة .. مش بسيطة .. ممكن أول مرة يشدك جملة .. قالب موسيقي معين ودنك تميزه .. ممكن تكون سمعته في فيلم أو مسلسل قبل كده .. بس بعد ما تسمع للمرة التانية .. و بعدين التالتة .. و بعدين العاشرة .. و بعدين الألف … حتكتشف .. حتكتشف إنك في أول مرة كنت مبهور بورقة شجر .. هي دي اللي إنت فهمتها .. هي دي اللي عقلك إستوعب بساطتها فأول مرة .. بس كل مرة بعد كده بتبدأ تشوف صورة أكبر .. و أوسع .. و أشمل .. و بتشوف غابات كاملة من الإبداع .. و بعدين تتساءل و إنت بتسمع .. نوع العبقرية اللي كانت جوا الدماغ اللي شافت الغابات دي و نسجتها من الأول كانت إيه ؟! … … حاجات كتير جداً ذات قيمة في الحياة كده … بل أكاد أجزم .. إن كل حاجة ذات قيمة في الحياة .. مش سهلة .. و بتحتاج مجهود .. عشان تشوف طبقاتها .. أعتقد لأن تكويننا البشري ذاته سبحان الله غاية في التعقيد .. كل ثانية بتعدي علينا .. بتضيف طبقة جديدة لوجداننا .. و بتغير من شكل الطبقات اللي فاتت علينا بالكامل .. و طول الوقت ذاكرتنا بتنسج وعي بين الطبقات دي .. كيان أبعد ما يكون عن الركود .. … … ** توضيح : التذكرة ثابتة ب : 70 جنيه فقط للفرد 😅 هو تذكرة الحشاشين المحشرجين دلوقتي بكام ؟!