Kersh Keepers Official Group ولا Plant Based Diet (Egypt)

Kersh Keepers Official Group ولا Plant Based Diet (Egypt) ذهاب و عودة … ولا ذهاب بس ؟

إتكلمت قبل كده مرة ففيديو طويل عن إدمانى للسكريات و إزاى كنت باغمس الكيكة الشوكولاتة اللى بالنوتيلا بالعسل النحل .. و أحط عليها أيس كريم فراولا .. و أبلعها بعصير أو نسكافيه عليه 6 معالق سكر . … و إزاى إن من تلات سنين .. أخدت قرار فجأة بإنى حامتنع عن السكر الأبيض بكل أنواعه .. و مشتقاته .. فجأة . .. من يومين الصبح كده .. قلت لمراتى .. فجأة برضو .. ” أنا حاجرب أبقى نباتى شوية إن شاء الله - full vegan” .. يعنى حاوقف كمان البيض ( كنت باضرب 6 بيضات عالأقل يومياً ) .. و اللبن ( كنت باضرب تلت كيلو على الشوفان يومياً ) .. و اللحوم و الفراخ و كل الكلام التانى ده . .. مش حاتكلم عن رد الفعل اللى من نوعية ( تعال نراجع عليك دينك يا فتى) من أهلى على مدار اليومين اللى فاتوا .. بس ما علينا … مانكرش إن برنامج (Bassem Youssef ) كان ليه تأثير القشة التى قصمت ظهر البعير .. بس أنا من فترة طويلة و أنا باتشحن فى إتجاه إنى آخد القرار الصراحة .. مثلاً إنى مواظب على التمرين بقالى سنتين و أكتر .. بس لسة فى مستويات لياقة مش قادر أوصلها . أو إنى كل ما أقرا زيادة عن الموضوع أحس إنى محتاج أجربه .. إن ناس من العملاء بتوعى فى الشغل ( عالمهم هو الطبخ و الأكل ) خدوا القرار ده من فترة .. و ملوا دماغى بالكلام ده الصراحة .. .. حاجات كتير .. بس أنا حاتكلم على جانب واحد فقط فى البوست ده .. .. *** جانب الرغبة **** … لأن فنفس الوقت اللى قربت فيه من أخذ القرار .. كان جروب Kersh Keepers Official Group بدأ يبقى تريند .. و كل شوية صديق ينزل عليه بوست .. أو يتفاعل مع بوست فيه صورة .. تكفى إنها تثير مشاعر أى إنسان عنده لسان . .. كنافات.. نوتيلاات .. أسماك .. لحوم .. جبن .. حاجات فعلاً اللهم إنى صائم . .. و إحنا فرمضان .. و بين العزومات و الأطباق اللى طالعة و اللى نازلة و اللى فى البيت .. فعلاً بيبقى قرار إنك تبقى نباتى و مبطل سكر أبيض .. بيفكرك كل شوية بـ ( همت به و هم بها .. لولا أن رأى برهان ربه فاستعصم ) لسيدنا يوسف .. ( التشبيه مع الفارق) . .. عزومة أول إمبارح كان قدامى طبق فيه ( مكرونة وايت صوص , و بوفتيك , و كفتة , و ستيك لحم إيطالى , لحوم باردة ) .. و مع ذلك تركت 90% من ده و ركزت مع السلطة ( كابوتشى و ذرة و رمان و طماطم ) . .. و لكنى كنت بكل جوارحى .. و مع كل حركة للشوكة فإيدى .. باقاوم عوامل جذب اللحوم .. و باكل من السلطة .. .. مادعيتش فأى لحظة ( ولا حتى لنفسى) إن عشقى للسكريات و اللحوم و الفراخ و ما شابه ذهب و لم يعد … و لكنى بدأت أحس بشعور أليف بالنسبة ليا .. و هو شعور المقاومة .. شعور إنى باجبر نفسي على شىء مش ساهل .. إنى باقاوم .. ( رغبتى ) . … .. فكل مراحل حياتى .. كل مرة حسيت بده .. إنى باقاوم رغبتى .. كانت النتيجة بعد فترة باتطور تطور ملحوظ فجانب من جوانب حياتى .. .. و إتعودت إنى اللحظة اللى أحس فيها إن كل شىء حواليا ساهل .. أدور على تحدى جديد .. جبل جديد .. شىء جديد أتدرب عليه و يتطلب منى التضحية .. التضحية بمتعة .. مقابل مكسب أغلى بكتير .. جداً .. … … أنا كنت من أصحاب الكروش لفترة طويلة .. و فاهم مبدأ ( كده ميت و كده ميت .. فأعيش و أنا مستمتع بدل ما أموت بالحيا ) اللى بيتبعه الكثيرون من أصحاب الكروش الضخمة . .. و لكنى حابب أوضح إن : حياتك كنباتى (لو ناوي يعنى ) .. أو كرياضى .. أو كأى شىء يجبرك على التضحية بمتعة مؤقتة .. بيديك متع لا حصر لها .. .. فبالنسبة لى :

• متعة طلوع سلم 6 أدوار جري بدون ما أنهج = متعة طاجن لحمة بالبطاطس متسبك
• متعة تيشريت جديد ضيق من الباي و التراي .. و واسع من الوسط = متعة صينية كنافة بالنوتيلا .
• متعة إنى أجري فى الشارع و أنا مستريح = متعة سوبيا و خروب بسكر كتييييير
• متعة إنى أنجح فشغل معين = متعة إنى أقعد على قهوة و أتابع دوري . … … و أحب أوضح إنى أحياناً بادوق .. من كل شىء .. و أحياناً باقعد أشوف ماتش على قهوة .. و أحياناً باعمل كل اللى نفسى فيه .. (أحياناً … قليلة ) .. لكنى متأكد إن الحرية دى مش موجودة للى عايشين الناحية التانية .. .. أنا جربت متعتك و باجربها منين ما أحب .. بمزاجى .. جربت إنت متعتى ؟! .