( عن الشغف .. بالحلمنتيشي ... الجزء الأولاني )

( عن الشغف .. بالحلمنتيشي … الجزء الأولاني ) … علي مدار حياتي .. فترات بسيطة جداً هي اللي تابعت فيها كورة .. ( يعني شفت كذا ماتش لنفس الفريق ) .. و حفظت أسامي شوية لعيبة .. منهم مثلاً فترة فريق مصر و بطولة أفريقيا 98 كان عندي 10 سنين أيامها 🤣.. أيام ( حسام حسن , إبراهيم حسن , حازم إمام , … و الجوهري ك مدرب ) .. و منهم فترة فريق مصر .. و بطولة أفريقيا 2008 .. كان عندي 20 سنة .. و أبوتريكة .. و عماد متعب .. و زيدان .. و بركات .. و وائل جمعة .. و جدو .. و إبراهيم سعيد .. و عمرو زكي .. … و حسن شحاتة ك مدرب . .. و ما زلت فاكر المُعلّق و هو بيتكلم في لحظات أيقونية في مباريات الفرق دي .. ( إبراهيم بيباصي لحازم .. حازم بيغزّل .. يا واد يا حازم .. بيرجع الكورة لإبراهيم في الفاضي .. إبراهيم بيرفع لحسام .. و حسام بيشوط .. و جون و جون و جون و جون … مزّيكا يابني .. مزيكا ) .😅😅 .. ولّا جيل أبو تريكة .. و الجيل اللي إتقال عنه كتير نيّم أفريقيا من بعد العصر 🤣🤣 .. … لما كل عنصر فعناصر الفريق كان بيعمل الصح بالظبط .. و يزوّد عليه حتة مزاج من عنده .. .. الحقيقة هي إن كلمة المعلّق الأيقونية : مزيكا يابني مزيكا .. مش كلمة إعتباطية أو مش فمكانها إطلاقاً .. بل أعتقد إن ناس كتير بتكررها بدون ما تدرك مدي دقة الكلمة دي هنا . … أنا باحب حفلات الأوبيرا جداً .. و لما بيتوفر ليا وقت .. و بيكون في عرض أوبيرا نضيف في أوبرا إسكندرية … باضرب البدلة الكلاسيك ( و أنا نادر جداً إني ألبس بدلة 🤣) .. و أروح أستمتع .
.. بإيه ؟! . همممم .. خليني أشرح .. .. لو أى حد درس موسيقي .. حيعرف إن في تشابه كبير .. جداً .. بينها و بين الرياضيات .. و الفيزياء .. و الطبيعة البشرية عموماً .. .. إحنا ك بشر مش بنستمتع بأى ( تزييق ) و خلاص .. بالعكس .. أنا مثلاً عندي كمانجتين .. و كنت فأوائل فترة كورونا عملت أكتر من ( لايف ) و أنا باحاول أتعلم أعزف بنفسي .. و النتيجة كانت تزييق و عذاب للي بيسمع . طب إيه الفرق ؟! .. إيه الفرق بين ( تزييقي ) .. و بين عازف محترف يمزجك ؟! .. . الفرق هو ( إن كل حاجة فمكانها بحساب ) .. ال ( notes- نغمات ) اللي بتكوّن السلم الموسيقي .. و سرعة العزف .. و التوقيت .. و حدة الصوت .. و مستوي الصوت .. كل حاجة من الحاجات دي .. لازم تتعمل بحساب دقيق جداً .. و أى إختلاف .. أى إختلاف بسيط .. بيظهر .. . أحد أشهر و أجمد عازفين (الفيولين = كمانجة ) في القرن اللي فات .. إسمه ( ياشا هايفتز ) .. له مقولة .. عبقرية .. بتقول : ” أنا لو بطلّت أتدرب لمدة يوم .. أنا حاعرف الفرق .. و لو بطلّت أتدرب لمدة يومين .. النقاد السمّيعة المحترفين .. حيعرفوا الفرق . و لو بطلّت أتدرب لمدة 3 أيام .. كل الجمهور حيعرف الفرق . … و بعدين الأصعب بكتير من ( مجرد عازف لوحده ) بيحاول يطلّع كل نغمة فمكانها الصح .. و وقتها الصح .. . هو ال( أوركسترا = مجموعة عازفين ) .. و ال( conductor = مايسترو = مدرّب يعني ) .. و اللي أهم وظيفة له في الفرقة هي : إنه يحافظ علي التوقيت .. و ده أغلب اللي بيعمله بإيديه بالمناسبة ( و الناس بتنكت و تسخر منه ) .. لكنه في الحقيقة بيقوم بدور مايعرفش أهميته .. غير اللي فاهمه .. . اللي هو .. كل نغمة إنت بتسمعها .. توقيتها و شدتها و حدتها و مكانها .. هو متحكم فيها . . و لما تنتظم النغمات دي كلها في مكانها الصح .. و توقيتها الصح .. و شدتها و حدتها و سلطاتها و بابا غنوجها .. فقط .. ساعتها حتسمع : مزّيكا يابني مزّيكا . … الحالة بقي بتاعت : ” مزّيكا يابني مزّيكا ” .. . اللي هي كانت موجودة ففرق مصر لما كانت بتنيّم أفريقيا من بعد العصر 🤣 . اللي هي بتبقي موجودة في الأوركسترا اللي كل نغمة فيها بتبقي فمكانها الصح .. . و اللي هي بتحس بيها لما تجيلك الكورة اللي بتحبها .. في الملعب اللي بتحبه .. و تلعبها بالطريقة اللي إنت متأكد إنك مش بس عملت الصح .. لا .. إنت زودت عليه حتة بمزاج .. و تلاقي الكورة طلعت من رجلك مظبوطة بالمللي .. و اللي إستلمها منك .. إستلمها بمزاج هو كمان .. .. الحالة دي إسمها : ( Flow = يعني إندماج بمزاج ولامؤاخذة 🤣) .. .. و الحالة دي هي : اللي بيتمناها أى إنسان نفسه يحس بشغفه و يحققه … إنك مش بس تعمل الحاجة صح و بمزاج .. لا .. و لكن تعملها و إنت متأكد إن اللي إنت عملته .. جامد لدرجة إن غيرك مايقدرش يعمله .. بس إنت جامد تنين و تقدر لما الغزالة تبقي رايقة .. . و إن اللي إنت عملته .. مش حيضيع عالأرض … و حيتقيّم بالظبط زي ما تتمني ( يعني اللي إستلم منك .. أو شاف شغلك .. يستلم بمزاج هو كمان ) .. .. و الأهم .. إنك عارف إزاي تتحكم في الغزالة دي و تروقها .. و تعمل المزّيكا دي مرة كمان . … … كيميائياً ده معناه إيه ؟! .. و الهورمونات المسئولة عنه إيه ؟! و أتدرب عليه إزاي ؟! .. و ألاقيه إزاي ؟! .. و أسئلة تانية كتير .. حاكمل شرحها في أجزاء تالية للموضوع ده .. تحت نفس الإسم : ( الشغف بالحلمنتيشي 🤣 ) . … ليه مش كله فبوست واحد ؟! .. عشان الناس بتهنج من البوستات الطويلة .. و الله أعلم .