تعميم الفيتيش

تعميم الفيتيش .

( فيتيش = fetich ) كلمة أحد معانيها المشهورة هو إن : إستمتاع ” غالباً بيبقي جنسي ” بشيء أو بفعل معين .. عجيب جداً .. أو مختلف جداً .. بشكل مش منطقي معاه إن يحصل الإستمتاع ده . … و قبل ما ذهنك يروح لحاجات قبيحة أوي .. لا .. في فيلم مشهور جداً لفؤاد المهندس كان طالع فيه بيعشق تجميع جزم الستات .. و جمال الست بالنسبة له كان بيتلخص في جزمتها 😅 .. و ده ( فيتيش ) مشهور بالمناسبة .. و هو الهوس بالاحذية الحريمي .. و الملبوس منها خاصة ” مش الجديد ” . … … المهرجانات و الأغاني بتاعت عصابات المخدرات دي بالنسبة ليا .. بالظبط زي الأحذية الحريمي كده .. حاجة ليها تواجد في بيئة معينة جداً ( الخمارات و الغرز ) .. فطبيعي إن شخص فخمارة أو فغرزة .. بعد ما ضرب كم محترم من المخدرات و الحقن و الدخان .. إن صوته يبقي محشرج . . و مطجن ( يعني تحس إنه بيتكلم من قعر مناخيره ) .. و كلامه مش مفهوم .. و كل إحساس آدمي راقي عنده بيكون ميت .. و بيتعامل بحيوانية بحتة .. عشان كده كل كلامه يغلب عليه ( أنا جدع , انا جامد جداً , أنا كل النسوان بتحبني , و الباقي كلهم وحشين , و صحابي بس هما الجدعان , … و ما شابه ) . أو كلام كله حزن و شجن علي حبيبته اللي ضربته بالشبشب و راحت إتجوزت إبن عمها اللي في الخليج .. و كل السيناريوهات الحمضانة دي . … العجيب كل العجب .. هو إني لما أروح خمارة بلدي فأعماق حواري العاصمة مثلاً … ألاقيهم مشغلين باخ .. او موتزارت .. أكيد ساعتها حاحس إن في حاجة مش صح .. حاجة مش متلائمة .. مش منطقية . … و العكس بالنسبة ليا صحيح جداً .. .. إني ألاقي مهرجانات و أغاني خمورجية … شغالة في أى مكان خارج الخمارة .. فده معناه بالنسبة ليا حاجة واحدة .. و هي إن ( الفيتيش ) بيتعمم .. يعني الحاجة الشاذة المختلفة اللي ناتجة عن تصرف شاذ … بقت شيء عام بيستلطفه و يستمتع بيه الناس اللي مش مريضة . … طيب . .إيه المشكلة .. طالما الجمهور مستمتع .. إنت مالك ؟! . … ببساطة لأن ربنا خلق حواسنا متصلة ببعضها .. و بعقلنا .. و بقلبنا .. يعني .. لو أنا إنسان بياكل فسيخ و بصل أخضر بشكل مستمر .. معدتي حتكون مرتع لجميع الأمراض اللي ممكن تنتج عن التسمم من القرف ده .. و لو نجيت مرة .. مش حانجو عشرات المرات التانيين . … نفس الشيء في إستهلاكنا و سماعنا للمهرجانات و التخلف و القرف ده .. لو عقلي قدر يتجاهل كم العفن اللي موجود في الكلام مرة .. بكل تأكيد التكرار حيخليني مش بس معتاد علي سماع القرف ده .. و لكن حالاقي نفسي بادندنه .. باهمس بيه لنفسي علي إستحياء في الأول .. و بعد كده باتكلم بيه في الشارع عادي مع أصحابي .. و بعد كده تبقي دي لغتي الأساسية مع اللي حواليا .. … بالظبط زي أى طفل بيتولد في بلد .. بينشأ يتكلم لغتها بكل بساطة .. عقلنا بيتأقلم علي اللغة اللي بيسمعها طول الوقت .. و يكررها … و بعد فترة .. تتغلغل لفكره ذاته . … أفكارك نفسها .. حتبقي طول الوقت أقرب ما يكون لفكر الخمارة و الغرزة .. مش حتبقي مسطول لا .. و لكن حتبقي : همجي , أرعن , تغلب العصبية القبلية علي إنتماءاتك , … و كل الحاجات اللي بتيجي فبالك لما تفتكر كل الأشكال اللي بتغني الأغاني دي . … … أيون بس الرتم حلو = أيون بس الفسيخ ملوحته مغرية أيون بس الرتم بيرقص حلو = أيون بس الفسيخ بيفكرني بشم النسيم أيون بس فلان الفلاني الملياردير بيسمع الأغاني دي = فلان الفلاني الملياردير عنده مليارات تخليه لما يجيله تسمم من الفسيخ .. يتعالج بسهولة .. او حتي حيخبي مرضه من الناس .. أو إن الفسيخ اللي بيجيبه بيعفنه في بهو الفيلا بتاعته في الكومباوند .. مش فسيخ بيتعفن في بير سلم في حارة . … … بس أنا باسمع مهرجانات و ماحصليش حاجة .. و مهندس و ملو هدومي زي الفل . و إبنك .. أخبار أفكاره إيه ؟! و بنتك .. أخبار أفكارها إيه ؟! حتي لو إنت مش بتسمعهم القرف ده … لأنك بتسمعه .. بينتشر .. بيغتني .. و يبقي عنده القوة يوصل لإبنك أو بنتك جوة فصلهم في المدرسة . … … … إمبارح .. كان في حفلة في الأوبيرا في إسكندرية … معزوفات ل ( bach = باخ ) علي الأوبوا و الفلوت .. قمة في المتعة و الروعة و الإستمتاع .. من أحلي الأمسيات اللي قضيتها سنة 2021 .. عدد الحضور في الأوبيرا كان مايكملوش 60 واحد تقريباً .. في المعتاد باحضر حاجات زي دي كتير و مش باشغل بالي أشرح للي حواليا .. ليه ( موسيقي كلاسيك ) .. أو ليه ( أوبيرا كارمن اللي فمكتبة إسكندرية يوم السبت 27 نوفمبر إن شاء الله 😅 ) .. أو فائدة الحاجات دي إيه ( ده لو مش بتدور علي إستمتاع بيها و بتدور علي فائدة مثلاً ) .. … لكن ممكن أتكلم عن ده لو إفتكرت بعدين .. و عن البلايليست الضخمة الكلاسيكي بتاعتي .. … بس التباين و التضاد بين أمسية إمبارح .. و بين خبر منع المهرجانات دي .. إستفذ فيا إني أكتب الكلمتين دول .