فوووق خالص علي الشمال في الصورة دي .. في كلمة

فوووق خالص علي الشمال في الصورة دي .. في كلمة ( Premium ) . بقالي تقريباً سنتين دلوقتي كدة باستخدم يوتيوب بريميام .. إشتراكه شهري 60 جنيه مصري .. يعني علي مدار سنتين تقريباً دفعت : 60*24 = 1440 جنيه مصري .. .. انا مستخدم شره لليوتيوب .. و تقريباً مابيقفش عندي إطلاقاً لا في البيت ولا المكتب .. و عشان كده .. كنت و ما زلت مستعد أدفع أضعاف الرقم ده .. مقابل إن محتوي إعلاني من اللي كنت باقرف منه علي مدار السنين اللي فاتت مايطلعش قدامي .. ” علي سبيل المثال و ليس الحصر .. حملة إعلانية لشبكة خضرا .. كانت بتستخدم كائن معين في الإعلان بتاعها من فترة طويلة شوية ” . … و من فترة طويلة جداً .. بدأت أحتمي بإني أدفع و أشتري المنتج .. مقابل إني ماشوفش أى إعلانات مفروضة عليا إطلاقاً .. فكرة أساساً إن حد كان يفرض عليا وجوده لمدة 5 ثواني بالكتير قبل ما أضغط (skip ) كان إحساس سيء جداً .. و باحمد ربنا إني عندي القدرة علي الإبتعاد عنه . … تاني أكتر حاجة أنا مغرم بيها في الموضوع ده .. إنه قدر يخليني أستغني عن برامج ميديا كتير تانية علي موبايلاتي .. و أصبح اعتمادي معظم الوقت علي ( youtube downloads ) فإني أسمع موسيقي .. ( ما لم تكون حاجات نادرة جداً .. أو بريميام جداً .. مش موجودة علي يوتيوب أساساً 😅😉) … فعلي سبيل المثال برضو هنا و ليس الحصر .. الموسيقي دي : ( The Great Selection Of Rondò Veneziano ) دي تجميعة مقطوعات لمدة ساعة .. إعمل عليها سيرش .. . و بعدين أوصل ( أو إضغط علطول علي الدقيقة 16:35 ) عشان توصل ل: Fantasia Veneziana (In La Maggiore) تراك مدته دقيقتين و نص تقريباً . و تعالي أحكيلك عن الدقيقتين و نص دول بالنسبة ليا مخصوص 😍😍 . … … زماااااااااااااااااااان .. سنة 2006 بعد ما دخلت كلية و فرضت سيطرتي نسبياً علي جهاز الكمبيوتر بتاعنا ( بروسيسور 1.7 سيليرون , رامات 256 ميجا , هارد 80 جيجا , و كان كارت شاشة built in في الماذربورد 🤣🤣) .. في أحد تجميعات ال ( mp3 ) اللي إتنقلت بين الهاردات لحد ما وصلت ليا .. كان تراك إم بي ثري إسمه : rondov . بس كده .. هو ده كان إسمه … و بالظبط زي ما إنت خمنت كده … هو كان الدقيقتين و نص اللي إنت سمعتهم من شوية دول . … الموسيقي دي .. ضمن العديد و العديد من التراكات في عقلي .. شاركتني سنين و سنين من عمري .. كنت حبيتها جداً و إتعلقت بيها جداً .. و .. و … الهارد جاله باد سيكتور سنة 2009 😭😭… و كل الداتا الأثيرة اللي كانت عليه .. و اللي ده كان قبل مرحلة إني أعمل أرشيف دي في دي للداتا المهمة بتاعتي .. ” بالمناسبة .. أرشيف الدي في دي ده لسة موجود .. 3 شنط كبار .. كل شنطة 160 دي في دي 😆 ” … من سنة 2009 لحد من 4 شهور تقريباً .. و الموسيقي دي فعقلي .. و مانسيتهاش .. و كل فترة كده .. تطلب معايا أروح مدور عليها شوية .. و بعدين أزهق و أنسي .. .. لحد من أربع شهور .. و في أحد الليالي اللي كنت مأجز فيها من كل تاسكاتي .. مسكت جوجل ( سيرش أوديو ) .. و فضلت أصفر للموبايل الموسيقي عشان يطلعها أو يطلع شبيهها .. و أكتب و أدور في كل ما هو ليه علاقة ب ( rondo أو rondov ) خصوصاً إن روندو في الموسيقي ليها معني مرابط جداً للتراك ده المفروض .. و هو إن رتم الموسيقي السريع في الكلاسيك بيطلق عليه “روندو ” في بعض الظروف . … … و بعدين .. علي سبيل خد التراك ده للترضية .. جوجل رمالي التراك الكامل ( الساعة ) اللي فوق ده .. و لأنه شبيه شوية بالتراك اللي كنت بادور عليه .. قلت أهدي بيه نفسي شوية لعلي أنسي تاني .. .. و فجأة .. و عند الدقيقة 16 … الثانية 36 .. سمعتها .. الدخلة اللي معلمة في أعماق خلايا مخي .. الدخلة اللي ليها ذكريات معايا من أيام ما كنت بافكر أدخل هندسة ميكانيكا .. الدخلة اللي بتفكرني بكل مراحل لعبة IGI 🤣 . … … أنا قضيت نص ساعة باتنطط تقريباً بعد كده .. … … أنا كائن بينسي كتير .. جداً .. جداً .. جداًًًً السبب إني إفتكرت تسلسل الأحداث اللي كتبته ده .. هو إني كنت بادور علي أحد الصور اللي خدتها في دبي .. و أثناء ما بابحث في الفولدر بتاع الصور دي .. لقيت كم ضخم من الكروت و الملاحظات و الحاجات اللي كنت رتبتها في دبي .. و إتنفذ منها 20% بس من ساعة ما رجعت تقريباً .. و أحد الفيديوهات دي ضحكني جداً .. لأني كنت واخدها مع تيتة ستينية فرنساوية جميلة جداً .. و إحنا الإتنين بنضحك لأنها بتحاول تقنعني آخد الكارت بتاعها .. و أنا باقنعها إني لما حاخده حاضيعه ( مابيعش في شنطتي كروت ورق إطلاقاً ) ..و إني لما أصور كارتها مستحيل أضيع الصورة أو أنسي . .. و دلوقتي لما شفت الفيديو … إفتكرت إن اللي كانت بتكلمني النهاردة الصبح و بتحاول تفكرني بكل الطرق هي مين .. و أنا قاعد راسي و ألف سيف باقنع فيها إني مش فاكر .. و فعلاً كنت مفكرها بتحاول تبيع ليا أسهم بورصة مثلاً ولا كلام من ده .. .. و الفيديو كان فيه موسيقي في الخلفية شغالة في بهو الفندق اللي كنا فيه .. الموسيقي دي كانت من التراك الساعة اللي فوق ده 😊