بابا .. باباااا .. يا بابااااااااااااااا ..
= نعم يا حبيبي ..
الميس قطعت الستيكر الرينبو اللي كنت حاطه علي كراستي و زعقتلي و قالتلي كده عيب و ماتعملش كده تاني … و خدت مني باقي ورقة الستيكرات .
= هممممم … ده حصل النهاردة ؟
أيوة .. و في عيال في الفصل ضحكوا عليا و فضلوا يقولوا لي يا رينبو و يتريقوا عليا .
= هممممم .. هما مفكرين إن رينبو شتيمة ؟
أيوة .. و لما سألتهم يعني إيه رينبو .. قالولي يعني عبيط .. أو قليل الأدب .. أو وحش .. أو ريحته وحشة !! .. … كل واحد منهم كان عنده معني مختلف .
= و بعدين ؟ .. إيه اللي حصل بعد كده ؟
ولا حاجة .. طول اليوم قعدوا يتريقوا عليا و يقولوا لي يا رينبو .. و الميس زعقتلنا كلنا في الآخر و قالت لنا مانقولش الكلمة الوحشة دي .
= رينبو كلمة وحشة ؟!! .
أيوة و قالت لنا إن اللي يقول الكلمة دي المفروض يروح يتوضي .
= يتوضي ؟!!!!!!! ( و ضحك بصوت عالي جدااااااااااااااا ) .
= طيب .. تعالي يا حبييي .. تعالي عشان أشرح ليك إيه اللي حصل النهاردة .. و أقولك تعمل إيه .
…
= تعالي الأول نفهم هي إستيكرات الرينبو دي جات منين .. ماشي ؟
ماشي .
=منين ؟
هو إيه اللي منين ؟
= جبت إستيكر الرينبو منين ؟
من الراجل اللي في المكتبة اللي جنب المدرسة .
= هو إداه ليك لوحده ؟ .. ولا إنت إشتريته بفلوس ؟
لا إشتريته بفلوس من المصروف .
= و الراجل اللي في المكتبة اللي جنب المدرسة .. جاب إستيكر الرينبو منين ؟
هممممممم .. من عند حد تاني .
= و هو خده من عنده عادي كده ؟ .. ولا دفع فيه شوية فلوس هو كمان ؟
دفع فيه شوية فلوس أكيد .
= ليه ؟
عشان يبيعه لنا إحنا ..
= و لما يبيعه بفلوس أكتر من اللي إشتراه بيها .. يبقي عمل إيه ؟
يبقي كسب فلوس .. إنت شرحت ليا الموضوع ده قبل كده يا بابا .
= فاكر يا حبيبي .. الله ينور .. طيب .. السؤال هو .. إنت شفت الستيكر ده عند عمو بتاع المكتبة من زمان ؟
آه .. هو دايماً كان حاطط الستيكرات دي علي باب المكتبة .
= و ليه شد إنتباهك و قررت تجيبه النهاردة .. و ماجيبتوش قبل كده ؟!
عشان غيروا الدرع بتاع كابتن أميريكا و حاطوا عليه ألوان الرينبو في المسلسل إمبارح .
= هممممم .. ده اللي شدك للستيكر النهاردة ؟
آه والله .. و كنت عايز أحطه علي كابتن أميريكا النهاردة كمان .. بس الميس خدت باقي الستيكرات مني .
= ماشي ماشي .. مصدقك .. بس عايز أعرف .. هما ليه غيروا الدرع بتاع كابتن أميريكا و حطوا عليه الألوان دي ؟ .
ليه ؟
= لا أنا باسألك .. تتخيل ليه يغيروا ألوان الدرع بتاع كابتن أميريكا .. اللي ألوان الدرع بتاعه هي ألوان علم أميريكا .. و يحطوا ألوان جديدة ؟
تغيير .. تجديد يعني 😄
= ههههههههههههه .. أيون فاهمك .. عشان مايزهقش يعني و هو بيحارب الأعداء 😅
آه بالظبط كده 😅
= ماشي .. بس ما تيجي نشوف إيه اللي حصل لما عملوا التغيير ده ..
إيه ؟
= ببساطة .. إنت شفت اللون المتغير في المسلسل .. رحت بعدها علطول رايح دافع فلوس مقابل إنك تشتري الستيكرات .
آه ؟!!
= يعني .. لو ماكنوش عملوا التغيير .. إنت عمرك ما كنت حتهتم إنك تجيب الستيكر ده .. و تشتريه .. صح ؟
صح ؟
= يعني هما عملوا حركة .. خدوا بيها فلوس ..
هما بتوع المسلسل هما اللي بيبيعوا الستيكرات لعمو بتاع المكتبة ؟
= طبعاً .. أمال عمو بتاع المكتبة بيجيب الستيكرات منين ؟
أنا كنت فاكر إنه بيشوف المسلسل زينا و بيعمل بعد كده الستيكرات عشان يبيعها .
= هههههههههههه .. لا يا حبيبي .. لو عمل كده يقبضوا عليه بتهمة إنه بيسرق أفكارهم .
أنا عايزهم يقبضوا عليه فعلاً .. و بعد كده آخد أنا المكتبة و أبقي غني بقي و أشتري اللعب اللي فيها كلها .
= هههههههههههههههه .. يعني بعد ما تاخد المكتبة منه غصب و إقتدار .. حتدفع فلوس مقابل اللعب اللي جواها ؟ .. هههههههههههه .. ما علينا .. السؤال هو .. فهمت كده إنك دفعت فلوس للناس اللي بيعملوا مسلسل كابتن أميريكا لما إشتريت الستيكر ؟
آه فهمت … بس برضو مش فاهم ليه الميس زعلانة من ده ؟ .. هي بتكره عمو بتاع المكتبة ؟
= ههههههههههههههه .. إحتمال .. بس ماعتقدش إن ده السبب … تعالي نتكلم في النقطة التانية دلوقتي .. و هي ليه الميس زعلانة .
…
= إنت أهلاوي ولا زملكاوي ؟
أهلاوي
= هههههههههههههههه .. ماشي يا عم .. حنتخانق علي ده بعدين .. يعني بتحب الأحمر ولا الأبيض ؟
الأحمر طبعاً ..
= ليه ؟
عشان الأهلي بيلبس أحمر ..
= يعني الأهلي هما اللي إخترعوا اللون الأحمر ؟
لا .. بس هما بيحبوا اللون ده .
= طيب معني كده إن التفاحة اللي هناك دي أهلاوية ؟
هههههههههههههههه .. لا .. هي التفاحة كده .. لونها كده .. ربنا خلقها كده .
= يعني مين اللي جه الأول ؟ .. التفاحة ولا الأهلي ؟
هههههههههههههههه .. التفاحة الأول .. و بعدين الأهلي شاف اللون عجبه .. و إختار يلبسه .
= الله ينور عليك … أنا بقي لما آجي أنزل الشارع .. و يكون في ماتش للأهلي و الزمالك اليوم ده .. ألبس أحمر ولا أبيض ؟
إنت مش فارق معاك يا بابا كده كده .. إنت مابتشجعش فرق كورة أصلاً .
= هههههههههههههههههه .. طب الحمد لله إنك عارف كده .. بس هل الناس اللي في الشارع يعرفوا إني مابشجعش فريق معين في الكورة ؟
لا ..
= طيب .. لما يشوفوني لابس أحمر .. حيفكروا إيه ؟
حيفكروا إنك أهلاوي .
= و لو أبيض ؟
زملكاوي .
= ولو أخضر 😆؟
ههههههههههههههههههههه .. حيقولوا عليك بتشجع hulk
= هههههههههههههه .. إحتمال فعلاً .. بس هل حيفترضوا أنا باشجع مين لما حالبس أخضر ؟
لا .. لأن لا الأهلي و لا الزمالك بيلبسوا أخضر .
= الله ينور عليك … سؤالي بقي .. أنا شرحت لك قبل كده أنا مابشجعش فرق معينة في الكورة ليه صح ؟
آه .. قلت لي إنك بتشجع اللعبة الحلوة .. و إن في الآخر كلهم بيطلعوا كاسبانين فلوس .. و إن المستفيدين الوحيدين من موضوع الفرق ده هما اصحاب الفرق نفسهم و رجال الأعمال اللي حواليهم .
= الله ينور عليك … طب فاكر لما شرحت لك ليه الناس بتحب تشجع الفرق و تتخانق علي موضوع أهلاوي و زملكاوي ده ؟
آه .. لما قلت لي إنهم بيدوروا علي حاجة تخلي كل شوية منهم يتصاحبوا علي بعض و مايحسوش إنهم لوحدهم .
= و عشان كده إنت إخترت إنك تكون أهلاوي ؟
آه .. إصحابي كلهم أهلاوية و عاملين شلة أهلاوية في الفصل .
= بالظبط … أهو موضوع ليه الميس زعلانة من ستيكر الرينبو ده .. هو نفس موضوع الأهلي و الزمالك بالظبط .
إزاي ؟
= في لعبة تانية منتشرة في العالم .. زي لعبة كرة القدم بالظبط .. بس مش بتتذاع في التيليفزيون و اليوتيوب ..
و فيها فرق و ماتشات و جماهير و كل الكلام ده ..
في فريق فيهم بيلبس رينبو ..
و في ناس بتشجعه .. و ناس بتكرهه ..
و الميس بتكرهه ؟
= واضح إنها بتكرههم أيون .. بس يا تري بتكرههم ليه ؟
عشان بتشجع فريق تاني أكيد .
= تمام .. بس هل ده يديها حق إنها تقطع لك ستيكر الرينبو بتاعك ؟
لا ؟ ..
= طبعاً لا .. هي غلطت إنها تعمل كده .. عارف ليه ؟
ليه ؟
= فاكر لما قلنا إن التفاحة حمرا مش عشان هي أهلاوية .. و لكن عشان ربنا خلقها كده ؟
آه ..
= عارف مين اللي سمع الموضوع ده و قرر إنه هو كمان حيلبس أحمر غصب عن الأهلي ؟
لا .. في مانشستر يونايتد كمان .. و بايرن ميونيخ .. و ..
= خلاص كفاية ما شاء الله .. أنا خايف أسألك عن اللاعيبة بتوعهم ألاقيك حافظهم .
هههههههههههه لا لا … محمد صلاح بس اللي أعرفه .. الباقيين مابعرفش أقول أساميهم .
= طيب ممتاز .. السؤال هو .. لما كل دول بيلبسوا الأحمر .. يبقي اللي يمشي في الشارع لابس أحمر .. يكون بيشجع مين فوجهة نظرك ؟
ههههههههههههههههه .. أى حد فيهم ..
= طيب تعرف إن في أكتر من عشرين فريق مشهورين علي مستوي العالم بيلبسوا أحمر … و سبعين فريق تقريباً مش مشهورين .. برضو بيلبسوا أحمر ؟
واو ..
= أيون واو .. السؤال هنا بقي .. إنت ماتعرفش عنهم ليه ؟
عشان مش مشهورين .. مابيجوش علي القنوات اللي بنتفرج عليها أنا و إصحابي .
= بالظبط .. يعني في الفصل عندك إنت و إصحابك .. اللي بيلبس أحمر .. بيقولوا عليه أهلاوي .. مش بنفيكاوي ؟
بنفيكاوي هههههههههههههه ؟
= آه .. في فريق إسمه بنفيكا و بيلبس أحمر ..
لا ماعرفوش ده .
= بالظبط .. إنت و إصحابك اللي حددتوا معني اللون بناءاً علي معلوماتكم .. مش بنفيكا هي اللي قالتلكوا اللون معناه إيه … صح .
هههههههههههههههه بنفيكا … آه صح ..
…
= أهي الميس بقي غلطت هنا ..
غلطت في إنها هاجمت اللون و زعلت منه .. مع إنكوا مش فارق معاكوا خالص مين الفريق اللي بيلبسه أو بيلعب إيه أو بيلعب فين ..
مع إن الصح كان في إنها تشرح ليكوا اللعبة من الأساس …
و تشرح ليكوا مين الفرق اللي بتلعب ..
و بتلعب علي إيه ..
اللعبة بتتلعب إزاي ..
و بعد كده .. تشرح ليكوا .. إن من أقوي الطرق في إنكوا تكسبوا اللعبة دي .. هي إنكوا ماتسيبوش الفريق الخصم يسرق الألوان الحلوة منكوا ..
و إنكوا من حقكوا تلبسوا أى ألوان تعجبكوا ..
لأن إنتوا اللي بتدوا للألوان معني … مش العكس ..
..
= أنا ممكن جداً ألبس أحمر … و أكون باشجع الزمالك ..
ههههههههههههههههههههه .. الناس حتجري وراك في الشارع .
= هههههههههههههههههه .. ممكن فعلاً .. بس سؤالي هو .. فعلاً تتخيل الناس حتجري ورايا في الشارع ؟
ههههههههههههههههههههه في الشارع بتاعنا يعني ؟
= آه
لا .. إنت حتزعق لهم بصوت عالي و تخوفهم ..
= تتوقع حد منهم حيخوفني أو يخليني أغير التيشيرت بتاعي ؟
لا إنت ممكن تضربهم .
= بالظبط … عشان أنا قوي .. أقدر ألبس اللي علي مزاجي .. من غير ما أخاف من حد .
…
أيوا بس أنا مش حاعرف أضرب الميس .
= ههههههههههههههههههههههههه .. و بكل تأكيد مش المفروض تضرب الميس .. ولا العيال اللي في الفصل طالما ماحدش منهم إستحق ينضرب .. القوة أنواع كتير .. مش قوة إنك تضرب بس .
آه .. زي آشعة الليزر بتاعت أيرون مان .. بيغلب بيها hulk مع إن hulk أقوي من أيرون مان .
= بالظبط .. بس في أنواع تانية كتير كمان .. غير آشعة الليزر .
إيه ؟
= فاكر في أول الكلام بتاعنا لما كنا بنقول إنت إشتريت الستيكر منين ؟
آه .. من عمو بتاع المكتبة .
= بالظبط .. مش عمو بتاع المكتبة ده بقي .. هو اللي عنده لعب كتير أوي في المكتبة جوة ؟
آه .. و أنا باحقد عليه .
= هههههههههههههههههه .. ماشي .. السؤال هو .. لو راح عمو بتاع المكتبة و قال .. أنا حادي لعبة لكل ولد في الفصل يلبس أزرق بكرة … تتخيل كام واحد في الفصل حيلبس أزرق بكرة ؟
ههههههههههههههه … كلهم .. الفصل كله حيبقي لونه أزرق .
= بالظبط .. شفت كده عمو عمل إيه ؟ … من غير ما يضرب أو يزعق أو يعمل آشعة ليزر … حيلبس الفصل كله اللون اللي علي مزاجه .
آآآآآه .. يعني أنا دلوقتي عشان ألبس ألوان الرينبو علي مزاجي .. أقول للعيال في الفصل اللي حيلبس رينبو حاديله لعبة هدية ؟
= ههههههههههههههههههه ممكن .. بس إنت مصروفك مش حيكفي .
مانا حاخد فلوس منك .
= هههههههههههههههههههههههه .. إصرف من جيبك يا حبيبي .. ماتتخانقش بقوتي أنا .. إتخانق بقوتك إنت .
أنا لسة صغير و ماعيش فلوس .. إنت كبير و معاك فلوس .
= هههههههههههههههه .. أيون .. طب ما الميس بتاعتك كبيرة و معاها فلوس هي كمان .. ماعملتش الموضوع ده ليه ؟
ليه صح ؟ .. هي كانت تقدر تقول لنا إلبسوا أى لون علي مزاجها و تدينا لعب .
= لأنها فاهمة اللعبة الكبيرة غلط .. بالظبط زي الفرق الضعيفة في الكورة .. اللي بتتغلب كتير دي .
آه عارفهم و مابحبش ألعب بيهم في البلايستيشن .
= بالظبط .. أهي الميس .. بتلعب لعب ضعيف .. لما قطعت ليك الستيكر و زعقت لك .. هي كده ماساعدتش الفريق بتاعها .. إطلاقاً .. بل إنها خلاتك تزعل منها .
آه ..
= هي كان المفروض تشرح لك إنك لما بتشتري الستيكر الرينبو ده .. و إنت مش فاهم مين اللي بايعه ليك .. و مين اللي حياخد الفلوس دي .. فإنت كده بتضعف فريقك .. و بتقوي فريق تاني .
الفريق التاني ده .. اللي هو عامل المسلسل بتاع كابتن أميريكا من الأساس .. و عمل الموضوع ده كله عشان ياخد فلوس مصروفك .
طب أقوي فريقي إزاي ؟
= بإنك تعمل المسلسل بتاعك إنت .. المسلسل اللي يحكي أفكارك إنت .. المسلسل اللي يشرح بطولاتك إنت ..
و تختار أي لون يعجبك للفريق بتاعك … حتي لو كانت ألوان الرينبو ..
و تنزل ستيكرات ليك ..
عشان أى حد يبقي لابس رينبو أو حاطط ألوان رينبو .. الناس تفكره بيشجع فريقك إنت .. مش الفريق التاني.
هو الفريق التاني ده وحش ؟!
…
= هممممممممممم … عارف زميلك اللي في الفصل اللي بتقول إنه بيغتت عليك كل شوية و بيعمل دوشة و يخليك مش فاهم الشرح ؟
آه .. أنا باكرهه ..
= هو بيعمل دوشة ليه ؟
بيقعد يهيج الفصل و يحدف حاجات علي الميس و يشاغب .. و أول ما الميس تنشغل عنه و تحاول تهدي الدوشة ييجي يغتت عليا .
= أيوة .. لكن تفكر هو بيحب يعمل دوشة يعني ؟
بيعمل كده عشان خايب و مش بيذاكر و الميس بتزعق له .
= يعني عشان هو مش شاطر و مش عايز يتعلم .. بيروح عامل دوشة و يحاول يخليك إنت كمان مش عارف تتعلم .. و يحاول يخلي الفصل كله زيه ؟
بالظبط كده .. عيل غتت .
= طب ليه مامشهوش من الفصل ؟
باباه صاحب مدير المدرسة و كل شوية بييجي يجيب له لعب و هدايا جوة الفصل … عشان كده ليه إصحاب كتير .. عشان بيلعبوا معاه باللعب بتاعته .
…
= أهو الفريق التاني ده .. بالظبط زي زميلك الغتت اللي بتقول عليه ده .
بجد ؟
= بالظبط .. هما بيعملوا دوشة كتير أوي .. و بيحبوا دايماً إن الفصل حواليهم يكون هايج و فوضي .. و كل ما يهدي الفصل شوية .. بيروحوا عاملين أى حوار عشان يعملوا دوشة و هيجان تاني .
ليه ؟
= لأن الدوشة و الهيجان بيخلوا باقي الناس حواليهم مش مركزين .. و مابيخدوش بالهم إن في الدوشة و الهيجان اللي بيحصلوا دول .. الفريق التاني دول قاعدين بيجمعوا فلوس أكتر .. و قوة أكتر .
بيجمعوا فلوس و قوة ؟ .. عشان يعملوا بيها إيه ؟
= يعملوا بيها أى حاجة علي مزاجهم … إحنا مش إتفقنا إن اللي معاه القوة الأكتر .. بيلبس الفصل اللون اللي علي مزاجه ؟ .
هههههههههههههههههههههه .. آه إفتكرت .
= بالظبط .. الفكرة هنا بقي هي إن كل ما حد غيرهم يبدأ يكون أقوي شوية .. بيدوروا علي طريقة يعملوا بيها دوشة و هيجان .. بحيث إن ماحدش في الفصل يبقي سامع أى حاجة ولا عارف يركز .
طب دول نعمل معاهم إيه ؟
= نبقي فاهمين .. إن الطريقة اللي نتعامل بيها مع الدوشة دي .. مش إننا نزعق إحنا كمان و نعمل دوشة أكتر ..
و لكن بهدوء ..
و واحدة واحدة ..
نكلم واحد من إصحابنا اللي جنبنا في الفصل ..
و نشرح له ..
نشرح كل الكلام اللي شرحتهولك ..
و نعلمه هو كمان يشرح للي بعده ..
و هكذا ..
و بعد فترة ..
حتلاقي إن لما الولد الغتت ده ييجي يعمل دوشة ..
ماحدش حيركز معاه .. ولا يطاوعه .. ولا يبقي عايز يلعب باللعب بتاعت باباه ..
ببساطة .. إنت و إصحابك في الفصل حتكونوا فهمتوا ..
إن كلامكم مع بعض .. و شرحكوا لبعض .. مش الخناق مع بعضكم .. هو ده بالظبط اللي الفريق التاني مش عايزه ..
لأن في الفصل الهادي ده ..
حتبدأوا تسمعوا بقي الميس بتشرح و تقول إيه ..
و تتعلموا تكتبوا قصصكم بنفسكم .. و تعملوا مسلسلاتكم بنفسكم .. و تصنعوا ستيكراتكم بنفسكم ..
…
و تتعلموا ..
…
…
…
و الله أعلم .