63 نقطة مختلفين عن ليه باحب الشتا أكتر من الصيف

63 نقطة مختلفين عن ليه باحب الشتا أكتر من الصيف … و فرحان بالسيول اللي في الشارع دلوقتي .

1- فاتورة الكهربا و التكييف أقل جداً .. و أجهزتي ( لاباتي و كمبيوتراتي ) كلها آداءها بيبقي أحسن جداً . 2- العيال اللي بيلعبوا في الشارع ليل نهار و عاملين دوشة و إزعاج .. بيختفوا أخيراً . 3- التراب في الجو بيختفي .. ماعنديش مشكلة في الطينة .. لكن باكره التراب . 4- البشر بتقل في الشوراع .. بابقي ماشي براحتي مش باخبط في البشر . 5- إسكندرية بتبقي حلوة 6- إسكندرية بتبقي جميلة 7- إسكندرية بتبقي فاضية 8- إسكندرية بتبقي مش زحمة ** بص .. هو من 9 لحد 30 مثلاً .. إسكندرية بتبقي كل حاجة رائعة في الحياة . 31 - كل المشروبات السخنة .. و خصوصاً القهوة بكل أنواعها .. بيبقي طعمها أحلي .. و إحساسها أعلي . 32 - ( و دي شوية أنانية و غتاتة مني الصراحة ) .. إحساس إن كل الناس عايشين في حفلات الساحل .. و أنا لوحدي اللي في المكتب ده .. بيختفي .. و بنبقي كلنا مفحوتين شغل و سقعانين . 33- الجيم بيبقي فاضي .. و كل المراهقين اللي شنبهم أخضر و بييجو يزحموا الجيم عالفاضي في شهور الأجازة .. بيبقوا مفحوتين في الدروس و الدراسة . 34 - لما بالبس جاكت .. بيبقي عندي جيوب أكتر أحط فيها حاجات أكتر 😅. ** من النقطة 35 لحد النقطة 63 مثلاً … ريحة المطر .. و جمال ريحة المطر .