مجرد ضوضاء في عقلي أثناء مشاهدة شروق الشمس من كام

مجرد ضوضاء في عقلي أثناء مشاهدة شروق الشمس من كام ساعة .. … كتبت بوست طويل أوي دلوقتي .. باحكي فيه تفصيلياً عن حادثة بعربيتي ربنا نجاني منها من أسبوعين بفضله و كرمه و رحمته .. و كالمعتاد .. لقيت نفسي باحكي عن تجارب أخري في حياتي مشابهة .. زي لما وقعت بين قطر بيتحرك و الرصيف في محطة سيدي جابر في إسكندرية مثلاً 🤣 و قعدت أتفرج علي عجل القطر و أنا باقول الشهادة … لحد ما عدي .. و غيرها من التجارب دي .. .. و بعدين بدأت أفتكر تجارب كتير لناس غيري أعرفهم عن قرب .. و لقيت إن اللي كتبته .. يعتبر لعب عيال مقارنة باللي حصل لهم .. قررت أحترم نفسي .. و أحترم تجاربهم .. و أمسح البوست .. .. و بعدين قعدت أفتكر .. هو أنا أساساً كنت عايز أكتب إيه ؟!! … إيه اللي فكرني بموضوع الحادثة ده ؟! .. إتضح إني كنت عايز أشرح إن عقل و حياة الإنسان .. معقد جداً.. و التشبيه اللي جه فبالي هو العربية .. .. لأن في حادثة عربيتي اللي فاتت دي .. الكلاكس فضل شغال لمدة نص ساعة لحد ما إتحرق .. و ماكنش في مكان أركن فيه حتي .. لأن ده كان يوم السيول في القاهرة ( لما قفلوا طريق السخنة ) .. .. و إزاي إن بعد ما وديت عربيتي التوكيل .. إتضح إن الكلاكس كان باظ بسبب إني ضغطت علي الدركسيون بإيديا جداً .. لدرجة إن ريشة الكلاكس فيه علّقت .. و إن الموضوع ماطلعش له أى علاقة بصندوق الفيوزات و المطر و المياه و الميكروباص اللي خبطني من الشمال و مرجحني .. أو التريللا اللي كانت علي لميني مباشرة و كنت حانزل في دواسة السواق بتاعها 🤣 . … و إزاي و المهندسة في التوكيل بتشرح ليا إن الكلاكس بوظانه مالوش أى علاقة بالحادثة إطلاقاً … إلا لو حنحسب إنه حصل لأني عجنت الدريكسيون بإيدي حرفياً لحظة ما الميكروباص خبط فيا من الشمال . … و فعقلي .. ده مشابه لردود فعل كتير بتحصل و باربطها في لحظتها بلحظات غضب أو إنفعال معينة .. و لكن في الحقيقة هي إنها مش بالضرورة بتكون نتيجة للي بيحصل في اللحظات دي إطلاقاً .. … و لكن .. بدون عملية فحص كاملة زي اللي عملتها في التوكيل .. بنفضل لمدة طويلة مصدقين إن نتائج معينة أو حاجات معينة في حياتنا .. لها علاقة بأسباب معينة أو حاجات معينة تانية . و بنبني فوق ده إعتقادات كتير .. غلط . … … في العرض المسرحي العبقري الرائع ( هاميلتون ) .. و اللي أنا تقريباً حافظه بالكلمة .. في أحد الأغاني الأولانية خالص .. هاميلتون بيقول : ” I Imagined death so much it feels more like a memory ” يعني : أنا إتخيلت الموت كتير أوي .. لدرجة إنه دلوقتي بالنسبة ليا أصبح كإنه ذكري … جملة غاية في العبقرية … و غاية في التعقيد .. و غاية في الخطأ . … ماتقدرش تتخيل شيء ماعندكش معلومات عنه .. لما تتخيل شيء ماعندكش معلومات عنه .. و تصدق خيالك ده .. بتبني إعتقادات خطأ .. كتير .. لما تعيش حياتك بناءاً علي الإعتقادات الخطأ الكتير دي .. قوة إعتقادك نفسها ممكن تخليك رائع في عينين ناس كتير .. علي حسب هما عايزين يصدقوا إيه .. .. لكن إنت الوحيد اللي بتبقي عارف إن القلعة الضخمة اللي الناس منبهرين بيها دي .. مبنية علي خيال .. … …

اليكساندر هاميلتون كان شخصية مثيرة للإهتمام جداً بالمناسبة 😅 خصوصاً لو عايز تفهم أكتر عن عالم الحكومة الفيدرالية الأمريكية في بداياته خاااااااالص . .