ماعرفش إنت كاتب و محدد بقالك قد إيه على الموضوع

ماعرفش إنت كاتب و محدد بقالك قد إيه على الموضوع ده … بس لو بشكل ما حتشوف كلامى ده .. أحب أقولك إنى خدت نفس القرار بالظبط من عشر سنين تقريباً ..

• قررت إنى بعد 30 يوم بالعدد من 10 سنين .. حانتحر ..
• و خلال ال30 يوم دول حاعمل كل اللى عايز أعمله فى الدنيا بمزاجى .. و مزاجى أنا بس …
• طالما كده كده سايبها و مش فارقة معايا ..
• حاعمل اللى نفسي فيه بقى ..
• برضو بسبب الكلية و الكلية بس ..
• ولا مشاكل عاطفية أو إجتماعية أو أى هرى أفلام عربى … لا .. هى الكلية بس ..
• ماكنتش أعرف حاجات كتيييييييييير عن نفسي فى الوقت ده ..
• ماكنتش أعرف إنى عندى ( ADD - attention deficit disorder) .. و إنى بدون أدوية أو نظم غذائية و حياتية قاسية جداً .. مستحيل أوصل حتى لتقدير مقبول .. أو إنى أتعايش مع الحياة الأكاديمية المصرية بشكل عام .
• ماكنتش أعرف إنى ممكن أنجح فآلاف الحاجات التانية .. و أوصل لأماكن فى الحياة و النجاح ماكنتش أحلم فأى يوم من أيام العذاب فى الكلية إنى حتى يتم ترشيحى لها .
• ماكنتش أعرف كم السعادة و الفرح اللى فحياتى اللى كنت لسة ماعشتهاش فى الوقت ده .. … المهم إن خلال ال30 يوم دول .. كل اللى عملته هو إنى بدأت أعيش حياتى أنا و أنا مستبيع حرفياً .. طنشت أى حاجة ليها علاقة بالكلية .. و نزلت الكتب اللى طول عمرى نفسى أدرسها و بدأت أدرس فيها بمزاجى ( اللى كانت فنفس مجالى تقريباً .. بس ماكنش المفروض أحفظ قوانين عشان أمتحن فيها 🤬) .. .. للأسف ماكنش فى كراش مثلاً أروح أقول لها إنى بكراش عليكى .. بس لو كان فى صدقنى كنت رحت بلا تردد أو تفكير فعواقب حاجة زى كده … .. أهم حاجة .. إنى حسيت إنى فجأة بقيت خفيييييييييييييييييييييف .. حمل تقييييييييييييييييييييييييل أوى فجأة إتشال من على ضهرى … ما طالما حاسيبها … أسيبها و أنا مافيش فنفسى ندم على حاجة ماعملتهاش … … … بالمناسبة : الإنتحار اللى كنت ناوى عليه كان إنتحار مجازى .. لأنى مسلم و متدين .. ماكنتش ناوى أموت نفسى .. بس كنت ناوى أخد أول قطر على أبعد مكان و من بلد لبلد لأى مكان أبعد ما يكون عن حياتى بكل ما فيها .. و أعيش حياة جديدة ماحدش فيها يعرف أنا مين أو فكلية إيه . بالنسبة لكل اللى حواليا .. النتيجة كانت حتبقى واحدة … بغض النظر إن ماكانوش حيعرفوا يلبسوا عليا إيه ( بصوت خالتك أطاطا ) .. يمكن أديداس . … … أنا كتبت كل اللى ناوى إنى أعمله خلال ال30 يوم دول فدوكيومنت على الجهاز و حفظتها ففولدر و رميتها .. .. مافتكرتهاش إلا بعد سنيييييين طويلة .. و أعتقد إنك كمان ممكن تعدى عليك سنين .. و في يوم حتتزنق و تدور على حمام … و مع إحساس الراحة المفاجئ أول ما تدخل .. حتشوف اللى إنت كاتبه ده … و تحمد ربنا .. مليون مرة .. إنه خلقنا عبيد له هو بس .. مش عبيد لـ ( كلية أو شغل أو زوج أو زوجة أو أهل أو مجتمع أو أرض أو نادى كورة أو … ) .. .. و الله أعلم .