بتثق في حد مٌعين ؟! .. صاحبك مثلاً أو أخوك
بتثق في حد مٌعين ؟! .. صاحبك مثلاً أو أخوك أو شريكك ؟! ..
بتثق في حد مٌعين ؟! .. صاحبك مثلاً أو أخوك أو شريكك ؟! ..
تثق فيه بما يكفي إنك لو إشتريت منه حاجة .. تبقي مش خايف إنه يخدعك أو ينصب عليك مثلاً ..
و بتبقي عارف إن لو الحاجة اللي إنت أشتريتها منه طلع فيها أى مشكلة مثلاً .. حتقدر بكل بساطة تقول له ..
…
الفكرة دي في عقلي بقالها سنتين تقريباً ..
و لما فكّرت فيها من سنتين .. فكّرت أبني تطبيق بناءاً عليها ..
تطبيق تواصل إجتماعي قائم علي ال : ثقة .
اللي هي نفس فكرة الإسناد و التواتر في علوم الحديث الشريف .
…
مبدأ الإسناد و التواتر ( العنعنة ) .. يعني :
لما نقرأ إن :
عن فلان .. عن فلان .. عن فلان .. عن فلان .. عن فلان .. عن سيدنا محمد صلي الله عليه و سلّم .
ال ( سلسلة ) دي من الرواة .. كل حلقة فيهم بتكون حلقة موثوق منها .. و معروف إنه أهل للثقة ..
…
نفس المبدأ ده موجود طول الوقت حوالينا .. و لكن بصور متشعبة و مختلفة في المقدار .
.
أنا مثلاً .. في 5 أشخاص علي سبيل المثال .. أثق فيهم بما يكفي إني أثق في أى شيء من خلالهم .
يعني .. لو حد منهم كلمني .. و قال ليا :
إسلام .. في شخص حيكلمك من طرفي .. إتعامل معاه ( في شغل أو فلوس ) كإنك بتتعامل معايا بالظبط ..
.
تلقائي باثق في الشخص اللي ماعرفوش ده .. من خلال ثقتي في اللي ( رشحه ) ليا .
…
من سنتين .. لما الفكرة دي جات في دماغي ..
بنيت لها خوارزمياتها و المعادلات الرياضية اللي تشرح الموضوع ده ..
و قضيت فترة طويلة في دراستها ..
لكن .. بناء التطبيق نفسه ماكنش ساهل .. برمجياً و تقنياً .. كنت حاحتاج أعذّب معايا صديقي الديفيلوبر فترة طويلة .. أو أصرف وقت و مجهود أكبر من اللي كانوا متاحين ليا وقتها .
.
رمضان اللي فات ( من سنة ) .. خدت غٌطس في عالم ال ( Vibe coding ) .. و صرفت شوية فلوس علي النسخ البرو من ( لافابل و بولت و أخواتهم ) .. غير طبعاً ( كلود و شات جي بي تي ) .. و شفت آخر اللي كان في إستطاعة الذكاء الإصطناعي أيامها ..
و بنيت كذا تطبيق تانيين .. لكن التطبيق ده بالذات .. كان دايماً مابيكملش و بتطلع مشاكل أعقد من قدرتي علي حلها بالأدوات المتاحة حينها .
.
إمبارح … قررت بقي أعمل حاجة كنت مأجلها بقالي سنة ..
و رحت فاتح أشوف بنفسي بقي آخر أخبار قدرات ال (vibe coding ) وصلت ل لفين .
🤣🤣🤣🤣🤣 .
و اللي إحتجت إني أبنيه السنة اللي فاتت في شهر بالكامل و ماكملش .. إتبني أحسن منه في نص ساعة إمبارح 🙂 .
( لاحظ هنا إني مش بعيد إطلاقاً عن عوالم البرمجة .. أنا مهندس إتصالات و إلكترونيات .. و إشتغلت في عوالم البرمجيات بإيديا عن قرب سنين كتير .. حتي لو مش باكتب كود بإيديا ) ..
..
خلال نص ساعة ..
كنت بنيت هيكل كامل للتطبيق بصورته الأولية جداً ..
تطبيق كامل ( مش بسيط إطلاقاً ) بسلطاته ببابا غنوجه .. في نص ساعة ..
و مجاناً !!!
بإستخدام آداة واحدة فقط ( Claud ) ..
و من غير ما أطلع برّة بيئة كلود أساساً ..
…
التطبيق حالياً جاهز إن الناس تدخل تفهم الفكرة الأساسية جداً ..
( رابط التسجيل في التعليق الأول ) .
.
الفكرة بتاعته هي :
إنك بتسجل .. و بتشوف حاجتين أساسيين ..
أول حاجة .. سوق للمنتجات المستعملة عادي خالص ( زي نون و أمازون و غيرهم ) ..
و تقدر تضيف بيانات المٌنتج اللي إنت عايز تبيعه .
لكن كل منتج بتضغط عليه .. حتشوف حاجة جديدة هي :
سلسلة الثقة للمنتج ده .
.
يعني مثلاً ..
المنتج ده يبقي بتاع ( حمادة ) .. اللي هو الصديق الصدوق ل ( تيمور ) .. اللي هو يبقي أكثر حد ( فتكات ) بتثق فيه .. اللي هي تبقي أنتيمة ( نحمده ) .. اللي هي تبقي أخت ( عبد الستار أفندي ) .. اللي هو يبقي الشخص اللي إنت بتثق فيه تماماً .. و هو كمان بيثق فيك .
.
فبالتالي .. بتقدر تتواصل مباشرة ( من خلال نظام المحادثة في البرنامج ) مع ( حمادة ) .. و إنتوا الإتنين بتبقوا شايفين إنتوا سلسلة الثقة بينكم هي مين .
.
يعني .. لو حد فيكم حاول يخزوق التاني لأي سبب.. حيبقي عارف إن في ناس حتحاسبه و روابط ثقة تمنعه من ده .
…
و تاني حاجة بتشوفها فوق هي : شبكة الثقة
و دي بتشوف فيها كل فرد في الشبكة .. و مين بيثق فيه .. و هو بيثق في مين .
.
نفس نظام ال ( قرية ) بالظبط .. و اللي فيه بيكون كل الناس عارفين بعضهم و عارفين مين تابع مين .
فبالتالي .. فأى خناقة مثلاً .. بتلاقي كل واحد عارف إن الطرف المٌقابل عبارة عن حلقة من سلسلة علاقات معروفة للجميع .
…
التطبيق لسة أكيد في قيد التطوير ..
و حاحتاج أعدل عليه حاجات كتير .. و حاكمل لعب عليه خلال الأيام القادمة إن شاء الله .
لكن حاحب أعرف آراء الناس و المٌستخدمين له .. و أطور بناءاً علي ده .
…
الهدف المبدأي :
بناء شبكة تواصل إجتماعي مبنية علي روابط مرئية من الثقة .
أو :
العودة للجوانب الإيجابية في حياة القرية .. و محاربة بعض الجوانب السلبية في حياة المدينة .
…
و الله أعلم .