( حمادة 🤣🤣🤣🤣 )

( حمادة 🤣🤣🤣🤣 ) . … معاك ورقة بيضة فاضية ؟! .. لو ماعكش .. مش مشكلة .. إتخيلها .. و معلش .. إستحملني شوية .. و لو مابتعرفش تتخيل .. هات ورقة بيضة فاضية .. و بعدين هات قلم جاف ( أى لون ) .. و إعمل خط صغنن فأى مكان في الورقة دي .. و بعدين إعرض الورقة دي علي أى حد حواليك .. و إسأله ( شايف إيه ؟! ) . … مهما كان الخط اللي إنت رسمته في الورقة دي صغير .. إلا إنه حيكون هو الحاجة الوحيدة اللي ( تلفت إنتباه ) اللي حيشوف الورقة .. مهما كان بياض الورقة ناصع .. طاغي .. برضو .. الخط اللي إنت رسمته هو اللي حيكون واضح .. و قبل ما تدوّر علي طريقة تمسح بيها الخط ده … مافيش مسح .. الخط اللي بيترسم .. بيفضل مدي الحياة . … تمام .. دلوقتي بقي عايزك تجرب تكتب أى كلمة في أى حتّة تانية في الصفحة .. ( إكتب حمادة مثلاً 🤣🤣🤣🤣 ) .. و إسأل حد تاني … شايف إيه ؟! … مهما كان الصفحة فيها شخبطة .. أو فيها خطوط .. اللي حيلفت إنتباه اللي شايف الصفحة هو ( حمادة 🤣🤣🤣🤣 ) … .. الحياة حواليك عموماً … و الإنترنت خصوصاً .. بالظبط زي الورقة البيضاء دي . صفحة بيضاء كبيييييييرة أوي .. و كلنا عايشين عليها مع بعض .. … الإنسان له طبيعتين أساسيين .. بيتولد بيهم .. و لكنه مايقدرش يعيش ب واحدة منهم طول الوقت .

طبيعة الخير .. و اللي تخلّيه عايز يكون زي الملايكة .. مايغلطش .. مايوسخش الصفحة البيضاء دي .. و فأول آيات سورة البقرة .. الملائكة بتقول بعد ما قال الله جل جلاله إنه حيخلق في الأرض ( بشر ) .. ( قالوا أتجعل فيها من يفسد فيها ويسفك الدماء ونحن نسبح بحمدك ونقدس لك ) . اللي هو ( إحنا عايزين الصفحة تفضل بيضاء ناصعة البياض نضيفة زي ما هي ) .

و طبيعة الشر .. و اللي تخليه عايز يكون زي الشيطان .. اللي هو أنا مش بس اللي باغلط .. لا .. أنا كل المخلوقات حواليا بتغلط .. و حتغلط .. و حاخليهم يغلطوا أكتر .. أنا مش لوحدي اللي وسخت الصفحة البيضاء .. و الدليل إن كل جزء في الصفحة البيضاء دي حيتوسخ .. … الطبيعتين موجودين جوا الإنسان ..

الفطرة .. بتميل للخير … و عايزة نضافة و بياض علي إمتداد العين . سورة الروم - الآية 30 .
فَأَقِمْ وَجْهَكَ لِلدِّينِ حَنِيفًا ۚ فِطْرَتَ اللَّهِ الَّتِي فَطَرَ النَّاسَ عَلَيْهَا ۚ لَا تَبْدِيلَ لِخَلْقِ اللَّهِ ۚ ذَٰلِكَ الدِّينُ الْقَيِّمُ وَلَٰكِنَّ أَكْثَرَ النَّاسِ لَا يَعْلَمُونَ (30) .. النفس .. بتميل للشر .. الطمع , الغضب , الحسد , الكره , الأذية . سورة يوسف - الآية 83 . قَالَ بَلْ سَوَّلَتْ لَكُمْ أَنفُسُكُمْ أَمْرًا ۖ فَصَبْرٌ جَمِيلٌ ۖ عَسَى اللَّهُ أَن يَأْتِيَنِي بِهِمْ جَمِيعًا ۚ إِنَّهُ هُوَ الْعَلِيمُ الْحَكِيمُ (83) سورة المائدة - الآية 30 . فَطَوَّعَتْ لَهُ نَفْسُهُ قَتْلَ أَخِيهِ فَقَتَلَهُ فَأَصْبَحَ مِنَ الْخَاسِرِينَ (30) … و هنا بييجي إختلاف وضع الإنسان بين ال ( طريقين = نجدين ) دول . سورة البلد - الآية 10 . وَهَدَيْنَاهُ النَّجْدَيْنِ (10) … و هي : إنك المخلوق الوحيد اللي عندك القدرة علي الإختيار بين الطريقين دول . و لكن .. الإختيار مش مجرد ( علم ) .. و لكن ( فعل ) . .. يعني إيه ؟! يعني الملائكة واضح جداً إنهم كانوا ( يعلموا ) الفرق بين النجدين .. و ده سبب تساؤلهم . و الشيطان .. واضح جداً إنه ( يعلم ) الفرق بين الخير و الشر .. و ده سبب توعده للإنسان .. و قسمه أمام رب العزّة إنه حيحاول يشد الإنسان ناحية الشر . سورة ( ص ) - الآية 82 . قَالَ فَبِعِزَّتِكَ لَأُغْوِيَنَّهُمْ أَجْمَعِينَ (82) … لكن لا الملائكة تقدر ( تفعل ) أى شيء .. ولا الشيطان يقدر ( يفعل ) . فقط الإنسان من المخلوقات هو اللي ربنا خلق له القدرة علي ال ( فعل ) . … و لكن ( يعني إيه فعل ؟! ) . … فعل يعني : بذل مجهود خلال فترة زمنية معينة ب ( نيّة معينة ) لعمل تغيير معين . .. يعني إيه برضو ؟! يعني نرجع تاني لموضوع الصفحة البيضاء اللي طلبتها منك فأول البوست 🤣 . .. لما تلاقي حد جنبك غلبت عليه ( نفسه ) .. و بدأ يشخبط .. ماسك إقلام من كل شكل و لون .. و عمّال يرسم صور تأبي منها فطرتك ( زي صور إباحية مثلاً ) .. أو يرسم ( جعير و نهيق حمير = أغاني مهرجانات 🤣 ) .. أو أى نوع تاني من أنواع ال ( فعل ) اللي تحس إنه ( ضد الفطرة ) . . الحل ؟! .. مش إنك تطلع تجري وراه بأستيكة 🤣🤣 ولا إنك تحاول تروح تكسر أقلامه و تصادرها منه 🤣 لأن زي ما شرحت .. اللي إترسم مستحيل يتمسح .. ليه ؟! . لأن دورك في الأرض مش ال ( مسح ) .. مش ال ( منع ) .. إنت ماتقدرش تستأصل ( نفس ) الإنسان .. ف تجبره علي الخير و الفطرة . . و لكن دورك هو : إنك ترسم إنت كمان .. تطلع تجري جنبه .. حواليه .. بعيد عنه .. قريب منه .. فكل مكان علي إمتداد عينيك .. أى مكان في الورقة فاضي .. شايف فيه مساحة إنك ( تكتب , ترسم … تثبت فعل ) فيها .. إعمل ده . . إفعل ما ( تميل له فطرتك ) . … يعني إيه برضو ؟! ( ب شكل مباشر و بدون تشبيها و شرح كتير 🤣🤣) . . يعني .. الإنترنت مثلاً ( فيسبوك , تيك توك , إنستاجرام , … ) و غيره .. الحل مش إنك تقاطعه .. مش إنك تمسح التطبيقات دي .. مش إنك تهرب و تغمّض عينيك و تحاول تدور علي حتة بيضا صغننة من صفحة الدنيا تفضل باصص عليها .. و تفكّر ب كده إنك بتحمي نفسك . ده مش دورك اللي إتخلقت عشانه . . الحل هو .. إنك تحاول .. بكل طاقتك و مجهودك و إستطاعتك إنك تنتج محتوي .. . الجيل بتاعنا بالذات .. عليه حُجّة ضخمة جداً جداً جداً .. اللي هو زماااااااااااان … قبل وجود الإنترنت .. كان الناس بتتعلل بإنهم مايقدروش يسافروا ل بلاد بعيدة عشان يحققوا حاجة زي : ” بلّغوا عني و لو آية ” . . و كانوا بيتعللوا إن ماعندهمش موارد .. ولا قدرات .. ولا إمكانيات إنهم يعملوا أى شيء أكتر من مجرد عبادتهم الفردية و خلاص .. كإن كل واحد منهم إنعزل في محرابه يعتزل الناس . . في حين إن ال ” رهبانية ” دي مش في الإسلام . سورة آل عمران - الآية 104 وَلْتَكُن مِّنكُمْ أُمَّةٌ يَدْعُونَ إِلَى الْخَيْرِ وَيَأْمُرُونَ بِالْمَعْرُوفِ وَيَنْهَوْنَ عَنِ الْمُنكَرِ ۚ وَأُولَٰئِكَ هُمُ الْمُفْلِحُونَ (104) … ف يا صديقي المُلتزم .. يا من تعلّم الحلال و الحرام .. يا من ( منّ ) الله عليك ب فطرة قوية سليمة .. . دورك .. مش التأفف بصمت .. إنت تقدر تعمل أكتر بكتير جداً دورك .. مش مجرد التحوقل و الحسبنة في التعليقات .. دورك .. مش مسح التطبيقات دي و الهرب ( إلا لو كان ده لأنك خايف علي نفسك من الفتنة و عارف إنك مش حتقدر تقاومها ) . . و لكن .. كل يوم إنت بتشوف دعوة من التطبيقات دي إنك ( تنشر , تكتب , تنتج , توجد … تفعل ) محتوي .. و بتتجاهل ده .. و ترجع تشتكي إن المحتوي اللي منتشر عليها هو المحتوي المُنافي للفطرة .. يبقي إنت كده بتتجاهل دورك . … إنت مش مُطالب إنك تكون ( إنفلونسر ) فجأة … إنت مش مُطالب إن ال ( بوست , صورة , فيديو , … ) أياً كانت البذرة اللي حتزرعها في أرض السوشيال ميديا دي .. تشوفها بتطرح غابات من الثمار فجأة .. .. إنت ما عليك إلا ال ( نيّة ) ثم ال ( فعل ) … أمّا النتيجة ( لأى فعل في الدنيا ) .. ف دي في علم الغيب .. و علم الغيب عند الله وحده . … الصفحة البيضاء اللي كلمتك عنها فأول البوست .. طالما مش حتقدر أبداً تمسح الخط أو الشخبطة اللي إترسمت فيها دي .. يبقي دورك إنك تبذل كل مجهودك و طاقتك في إن لما حد يشوف الجزء اللي إنت فيه .. الجزء المُحيط بيك من الصفحة البيضاء .. مايشوفش شخبطة .. و لكن يشوف رسمة حلوة .. كلمة مفيدة .. معلومة . . و اللي بيحتل جزء أكبر من الصفحة البيضاء .. هو اللي بيظهر . … و الله أعلم .