سبع سنين بتتعالج من الإكتئاب مع ( شات جي بي

سبع سنين بتتعالج من الإكتئاب مع ( شات جي بي تي ) ؟! … أنا شُفت مسلسل ( كان يا مكان ) .. و اللي أعتقد إنه حاول يقدّم لك رسالة مٌلخصها : ماتعملش كدة 😁 ..

• ماتتجوزيش صالونات بعد ما قلبك إتعلّق ب حب في الجامعة عشان حاتفضلي تعاني طول عمرك ..

• ماتروحش تاكل مكرونة في مطعم إيطالي الشيف فيه حلوة .. خصوصاً لو إنت متضايق من مراتك 🤣 .. و لو رٌحت مرّة .. ماتكررهاش تاني بقي .. خلاص .. هي مرة و شكراً .. روح جرب مطاعم تانية يا جدع .. ماله الفول و الفلافل ؟!

• ماتدخلش في علاقة "" مالهاش ملامح """ ( مع البنت اللي مبينة كتفها طول الوقت ) .. و إنت غرضك شريف .. إنضف أحسن . و ماتعيشيش حياة "" مالهاش ملامح "" و ترجعي تشتكي إن المٌجتمع حواليكي هو اللي مش فاهمك ..

باقي علاقات المسلسل كلها عبارة عن ( بلاااااااااش .. إفتكر إني قلتلك بلاش ) .. بصوت هينيدي .. ماعدا علاقة عايدة ب زيزو ( السكرتيرة العجوزة في العيادة ) .. دي تقريباً العلاقة الوحيدة اللي كويسة .. و غالباً المؤلف قتل زيزو كمان قبل ما يخون عايدة مع نفس شيف المطعم الإيطالي .. أو البنت المٌنفلتة إياها 🤣 . … و لكن .. و لكن أنا مش عايز أتكلم عن كل ده بتفاصيله .. و عايز أتكلم عن علاقة أكثر أهمية في المسلسل بالكامل . . علاقة ( داليا بالدكتورة النفسية بتاعتها ) . . سبع سنين ؟! .. سبع سنين بتتعالج من إكتئاب ؟! .. و الدكتورة النفسية فضلت مٌصممة إنها تكون فقط ( دكتورة نفسية ) بتاخد تمن الكشف .. و ” تريّح ” العيّان .. و شكراً ؟! . يعني إيه ؟! . من سنتين تلاتة تقريباً .. و بعد ما بدأ ( شات جي بي تي ) في الإنتشار بشكل ضخم و ناس كتير بدأت تلجأ له ك ( Venting Partner = شريك فضفضة ) .. كتبت بوست تحذيري أحذّر فيه من خطورة ده .. . شات جي بي تي .. مٌعتمد في خوارزمياته علي أسلوب الطب النفسي ال (روجري ) .. بتاع كارل روجرز يعني .. و ده مش أسلوب ولا منهج الطب النفسي الوحيد في العالم و التاريخ .. و لكنه أشهر الأساليب العصرية الحالية .. لأنه مٌلائم بشدة لطبيعة عالمنا الرأسمالي المدني .. اللي بيحاكي العالم الأوروبي و الغربي . . الأسلوب ده .. بيركّز بشكل أسااااااااااااسي جداً علي ( الأنا ) .. و إن ( راحة المريض ) هي الأولوية القصوي فوق كل شيء . . و بالتالي .. لو إنت رايح بتشتكي من شيء ما .. مش حيقول لك ( إنت غلطان في كذا ) .. مش حيوضح لك ( أهلك مش بالشيطنة اللي إنت متخيلها ) .. مش حيقول لك ( إنت مش ضحية ).. إطلاقاً . . و لكن .. حيسمع لك .. و يقول لك : عندك حق , فاهمك , ليك حق في مشاعرك بالكامل , سامعك , إنت تستحق . تستحق حب .. تستحق إهتمام .. تستحق تتسمع .. تستحق .. تستحق .. تستحق .. . و ده .. لما بيتم تكراره .. بيتحول فجأة ( شات جي بي تي ) .. أو ال ( طبيب النفسي المٌشابه ل شات جي بي تي ) .. ل مٌخدر .. مش طبيب .. . بيبقي دوره في حياة المريض .. نفس دور المٌخدرات و الخمور و المٌسكرات .. حاجة بتعملها بشكل مستمر عشان : تستريح . و لكنك مش بتعالج أو تغير أى شيء في دماغك .. إطلااااااااااقاً .. . و للأسف .. للأسف جداً جداً جداً .. في ناس كتير بتكون مادرستش طب نفسي حقيقي بشكل أكاديمي .. و غير مٌرخصين .. بل بيكونوا خريجين معهد سباكة تخصص جلد حنفيات أحياناً .. و بيتشهروا ك ( لايف كوتش , مٌعالج عاطشفي , … ) أو أى مٌسمي شبيه .. فقط لأنهم : إكتشفوا إن عندهم القدرة علي تقديم المٌخدر ده … و إكتشفوا إن ناس بتتكلم معاهم .. و ” تستريحححححححححح ” … فبيبدأوا يصدقوا إنهم فعلاً بيقدموا شيء مٌفيد .. و يصدقوا نفسهم .. و يودوا أغلب اللي بيتكلم معاهم .. في داهية . … الطب النفسي .. مش فقط : إحكيلي بقي إيه اللي مضايقك .. مش فقط : سامعك .. فضفضي .. قولي .. مش فقط : هممممممم ( اللي هو تقعد تهمهم أثناء ما اللي قدامك قاعد بيقول أسرار حياته ) .. . الطب النفسي .. رؤية شاملة و كاملة و دقيقة و بتعتمد بشكل ضخم علي قدرة الطبيب إنه يميّز الفرق بين إحتياج الإنسان اللي قٌدّامه .. و رغباته .. يعني إيه ؟! . يعني الناس كلها ( عايزين ) يتسمعوا و يفضفضوا و يتكلموا و يحسوا إنهم ضحايا .. لكن كتير جداً منهم بيكونوا ( محتاجين ) يسمعوا كلام غير ده .. يسمعوا كلام يفكرهم بمسئولياتهم و أدوارهم .. و يقويهم .. مش يخدرهم . … شات جي بي تي .. و أغلب نماذج الذكاء الإصطناعي حالياً .. ممنوع تمااااااااااااماً من إنه يقدم أى نصيحة طب نفسي حقيقي .. ليه ؟! لأن النصيحة دي بيكون معناها إنك ممكن تقاضي الشركة المٌصنعة له و تكسب مليارات .. ف بالتالي .. هو مش بيقدم لك نصائح طبيب نفسي ( يعني مش حيقول لك أفعال مٌعينة تقوم بيها .. مش حيقول : طلّق .. أو ماتطلّقش ) .. لكن .. ماتقدرش تروح المحكمة .. و تقول ( شات جي بي تي ) حسسني إني ضحية . لا .. دي مافيش فيها قانون يحكم لك .. لأنك إنت اللي مٌغفل .. و سمعت كلام آلة .. و بنيت علي الكلام ده ( فعل ) مٌعين من دماغك . … الطبيبة النفسية في مسلسل ( كان يا مكان ) .. واضح إنها عارفة إن داليا مش سعيدة في زواجها .. واضح إنها عارفة إن داليا عندها إكتئاب .. واضح إنها كانت عارفة إن داليا بتفكر تطلب الطلاق .. . عدم قيامها عند أى لحظة خلال ال7 سنين دول بمحاولة طلب مقابلة ( مصطفي ) .. مش طبيعي إطلاااااااااااااقاً .. و نظام ( أوروبي ) بحت .. اللي هو بيٌعلي من قيمة فردية الشخص .. حتي لو حيتدمّر بيه زواجه . و مبدأ إن الدكتورة تقول مثلاً : أنا دكتورة داليا مش أخصائية زواج و علاقات .. ده مٌصيبة كبيرة جداً جداً . لأن النتيجة الحتمية المنطقية الوحيدة لحاجة زي كده .. هي النتيجة بتاعت المٌسلسل و دمار البيت . … في القرآن .. آيات الطلاق ذٌكر معاها مباشرة : و الصلح خير . و عسي أن تكرهوا شيئاً و هو خير لكم .. و إن يريدوا إصلاحاً .. . و غيرها من معاني كتييييييييييييير كلها بتوضّح : ماتعتمدش فقط علي إحساس لحظي مؤقت في قرار زي ده . . بالعكس .. واضح جداً المعني : إنك ممكن تبقي دلوقتي حاسس بكراهية شريك حياتك .. لكن لو صبرت و فهمت شوية حاجات أساسية .. تتغير مشاعرك دي بعد فترة .. و ترجع تقول : الحمد لله إني ماكنتش حمار و خدت قرار بناءاً علي مشاعر مؤقتة . … لو حاقول إن في شخصيات أحملها مسئولية اللي حصل في المسلسل ده .. الترتيب فوجهة نظري كالتالي : أولاً : دكتورة داليا النفسية .. هي سمعت كل تفاصيل حياة داليا .. و مع ذلك ماطلبتش تقابل مصطفي .. أو فرح .. أو أمها .. أو حتي بواب العمارة مثلاً . . ثانياً : أم داليا .. بكل تأكيد أنا باكره الشخصية دي . . ثالثاً : داليا نفسها .. إنسانة عاقلة راشدة حتتحاسب بالكامل .. مش سفيهة أو طفلة أو غير مٌدركة مثلاً . . رابعاً : مصطفي .. بكل تأكيد عليه جزء كبير من المسئولية .. و هو الراجل .. يعني دايماً و أبداً هو اللي لازم يحاسب علي مشاريب الليلة كلها .. . خامساً : الواد سيف .. اللي راح أكل في المطعم الإيطالي .. هو مالوش علاقة بقصة داليا .. بس هو أكتر شخصية كرهت تصرفاتها في المسلسل بكل أمانة .. و يستحق يتجوز أم داليا عقاباً له 🤣🤣 . … و الله أعلم .