أحد الفيديوهات اللي شفتها لأكبر يوتيوبر في العالم من فترة

أحد الفيديوهات اللي شفتها لأكبر يوتيوبر في العالم من فترة .. إسم القناة بتاعته ( mr beast ) .. كان فكرته كالتالي : بيروح لشخص عشوائي في مول أو محل كبير .. و يقول له .. حاديلك الكريديت كارد بتاعتي .. إشتري أى شيء إنت عايزه … بس بشرط .. الكريديت كارد دي فيها مبلغ معين .. لو تمن الحاجات اللي إنت أشريتها تخطي المبلغ ده .. مش حندفع مقابلها و نضطر نرجعها تاني . لكن لو تمن الحاجات اللي إنت أشريتها .. أقل من المبلغ الموجود في الكريديت كارد .. يبقي مبروك و حلال عليك .. بتاعتك و حنشتريها لك . .. و لكنك مش حتعرف المبلغ اللي موجود فيها كام .. لازم تخمن . … و اللي الشخص العشوائي ده مابيكتشفهوش غير بعد ما يخمن المبلغ .. و يشتري بناءاً علي المبلغ اللي هو خمنه .. إن الكريديت كارد مافيش له حد معين .. يعني لو كان عايز يشتري بمليون دولار .. كان يقدر 😁 … الفيديو فعلاً رائع جداً في عرض فكرة أساسية في العقلية البشرية .. و هي : ” الحدود اللي إنت حاطتها لعقلك بنفسك .. مش حد حاطتها لك ” . … في الفيديو .. في ناس خمنت أرقام صغيرة … زي 1000 دولار .. أو 2000 دولار .. في ناس قررت إن طالما هي مغامرة و جات من عند ربنا .. يبقي نضرب في العالي ولا نبالي .. و إشترت كل اللي نفسها فيه .. في ناس تانيين عقلها كان بيديها إيرورز .. و مش فاهمين نوع الفرصة اللي قدامهم . … … … في تجارب إجتماعية و فلسفية كتير إتعملت بتناقش نفس الفكرة دي .. فكرة الحدود العقلية اللي إنسان بيعيش أسير لها طول عمره .. في حين إنها مالهاش وجود حقيقي .. .. و قد يبدو إن ده شيء مش منطقي .. يعني إنت صعب تتخيل إن يكون في إنسان عطشان ميت من العطش .. و النهر قدامه علي بعد خطوات منه .. و لكنه مش قادر يروح يشرب لأنه جوة عقله خايف من حاجة معينة .. ممكن جداً تكون الحاجة دي مالهاش وجود . .. و لكن ده بيتكرر قدام عينينا يومياً .. … لو سألت كتير من الفلاسفة و المفكرين اللي كانوا متواجدين قبل عصر إنتشار الإنترنت .. أو الكتب و الطباعة : تتوقع إيه أكبر مشاكل البشر ؟ بشكل كبير كان الإجابة حتشمل : عدم سهولة التعلم , و صعوبة تقدم الإنسان في ظل الجهل المنتشر . ( و السيناريو المُتخيل ده مش هبد أو هري مني .. إطلاقاً .. كتير من كتابات و أفكار فلاسفة و مُفكرين العصور دي .. كانت بتدور حوالين فكرة إنتشار الجهل و صعوبة نشر العلم ) . .. و بعدين لو سألته : طيب .. لو كان العلم في متناول الجميع بأسهل ما يكون ؟ ( و شرحت له يعني إيه إنترنت و موبايلات و باقة نت بتضيع علي فيديوهات تيكتوك الرقص و ما شابه ) .. غالباً كان حيشتم شتايم قبيحة و يعلي صوته عليك 🤣🤣 بمجرد ما تحكي له عن مشاكل عالمنا الحالي .. … … … و لكن في اللي يثير الدهشة أكتر .. و هو تجاهل الإنسان لعظمة الخلق و الخالق .. ناس بتعيش حياتها و تموت .. بدون ما تتأمل و لو للحظة .. في ما لا يُحصي من النعم و المعجزات اللي محيطة بيهم . فبالتالي .. بيبقي صعب بالنسبة له إنه : يسبح ربه بحق .. مش مجرد ترديد كلمات .. يحمد ربه بحق .. مش مجرد ترديد حروف .. .. بيبقي فعلاً معاه وسيلة غير محدودة إنه يطلق عقله و أفكاره حمداً و تسبيحاً لله .. و لكنه بيعيش محدود جداً بحدود ضيقة عقله أوهمه بيها .. … … … الفلوس في عصرنا الحالي .. احد أوضح المعايير اللي البشر بيستخدموها عشان يقيسوا كل حاجة في حياتهم .. و بغض النظر عن هل المعيار ده ( الفلوس أقصد ) صح أو غلط .. إلا إن فيديوهات زي دي بتوضح بشكل كبير .. وجود حدود حقيقية علي قلوب و عقول البشر .. هما اللي بنوها بنفسهم .. .. و للأسف .. ناس كتير من اللي ربنا بيرزقها الفلوس الكتير .. بيفضل يقيس بيها .. و يظن بالخطأ إنه ( كبير و كتير و قوي ) .. في حين إنه بينسي إن المعيار ده ( الفلوس أقصد ) .. معيار مخادع جداً .. و إن إطلاقاً ماينفعش تعتمد عليه عشان تقيس أى شيء .. و لكن كتير مابيكتشفوش الحقيقة دي إلا بعد فوات الأوان . … … … حاسيب لينك الفيديو في أول كومنت علي البوست ده . و يبقي سؤال :

كنت حتعمل إيه لو إنت أحد الناس اللي إتعرض عليهم الكريديت كارد دي ؟