سنة 2008 .. كنت في تانية كلية ( هندسة إتصالات

سنة 2008 .. كنت في تانية كلية ( هندسة إتصالات و إلكترونيات ) , و كان بدأ يكون واضح جداً ليا إني مستقبلي في الحياة إطلاقاً مش حينفع يكون معتمد علي ال( GPA ) و الكفاءة الأكاديمية إطلاقاً ( كنت شايل مواد من أولي , و شلت مواد في تانية , و بعد كده شلت تالتة بالكامل 🤣 ) . في الوقت ده .. بدأت أفكر ( تمام .. بما إن الكلية مش حتكون الشيء اللي أقدر أعتمد عليه .. يبقي أدرس و أشتغل بمزاجي بقي ) . البوست المثبت عندي مشروح ده فيه بشوية تفصيل .. . لكن اللي مش مشروح في البوست المثبت .. هو الرحلة اللي خدتها شوية في عوالم ال( هاردوير ) .. أنا خدت رحلة ( شبه محترمة ) في كل الوسائل و الطرق اللي كان ممكن أشتغل فيها فحاجة لها علاقة بال (هاردوير ) ك فرد عادي ( مش مؤسسة ) يعني .. و كان أيامها لسة طالع الأردوينو ( ده ببساطة كمبيوتر صغنن تقدر تبرمجه و تركب عليه شوية سينسورز = حساسات يعني .. و تعمل أحلي شغل فحاجات كتير . .أبسطها ال ( Smart homes ) .. اللي هو لما تدخل الباب الأوضة تنور لوحدها مثلاً .. و الكلام الحلو ده . . المهم .. الأردوينو ( اللي هو علي أيامها كان لسة طازة و سخن و بسمسم زي ال ذكاء الإصطناعي حالياً ) … كان بدأ ياخد وضعه فمعظم دول العالم .. و لكن إكتشفت سريعاً جداً .. مدي عبث فكرة إني ( ك فرد ) مش مؤسسة .. احاول أجيبه من برة .. أو إني حتي بقي ماعتمدش عليه مثلاً .. و أحاول أعتمد علي الإلكترونيات و الهاردوير أساساً ك كارير ل ( مرة تانية أعيد .. فرد .. مش مؤسسة ) . … المهم .. ده كان أحد أهم أسباب إني إكتفيت بالإلكترونيات و الهاردوير ك هواية أمتلك عددها .. و كإنها حب قديم بارجع أتفرج علي صور ذكرياتي معاه كل كام سنة . . و مع ذلك .. دول كتير في أفريقيا فيها من المصاعب و المشاكل ما يجعل الحياة في مصر رفاهية ضخمة .. و مع ذلك .. في كم ضخم من الحراك ( التكنولوجي و الإجتماعي و فريادة الأعمال ) ..اللي بيخلي معظم اللي عندهم رغبة في المغامرة إستثمارياً .. يوجهوا نظرهم هناك . .. و لكن … ده يتطلب شرح مفصل لإختلاف أساسي في تركيبة المجتمع هناك عن تركيبته هنا .. الإختلاف ده بقالي كام يوم عايز أشرح تفاصيله في بوستات عديدة .. الإختلاف ده عناصره هي : فهم دور الفرد بالنسبة للفرد .. و دور الفرد بالنسبة للمجتمع .. و دور المجتمع بالنسبة للفرد .. و دور المجتمع بالنسبة للمجتمع .. .. اللي بيحب البوستات المختصرة .. يعمل سيرش عن الأربع جمل اللي فوق دول في ضوء ( game theory ) و كام كتاب إقتصاد مجتمعات بسيط .. .. اللي حيستني البوستات الطويلة بقي .. ربنا معاه 🤣