من 14 سنة تقريباً ( 2010 -2011 ) كان بداية

من 14 سنة تقريباً ( 2010 -2011 ) كان بداية سعي أخويا ( أحمد الجويلى ) في نشر محتواه الصيدلي علي الفيسبوك و يوتيوب . أيامها كنت لسة في أوج صراعاتي مع الكلية ( هندسة ) خصوصاً .. و العالم عموماً .. نظرتي لحاجات كتير في الحياة كانت بالظبط زي فن المانجا ( القصص المصورة الياباني ) اللي كنت باتمرن عليه و بادرسه و عايش جواه وقتها .. أبيض و أسود . .. فاكر كويس جداً جداً فأحد نقاشاتي مع أخويا .. التشبيه اللي قلته له و أنا باشرح له إن محاولاته في نشر محتواه الصيدلي علي الفيسبوك و اليوتيوب وقتها مش أفضل شيء .. خصوصاً إن أخويا .. زيي بالظبط .. أياً كان الشيء اللي بيشرحه أو بيتكلم فيه .. بيكون مبني علي معلومات و وجهة نظر دينية و عقائدية بالكامل .. يعني طبيعي جداً إن لو حد فينا بيشرح ميزة تقطيع الفراولة علي الآيسكريم الفانيليا .. إننا نستشهد بآيات قرآنية و أحاديث 🤣🤣🤣 .. و سبب كبير جداً في ده هو تربيتنا و مجهود أبونا و أمنا معانا ربنا يحفظهم و يحميهم . … المهم .. التشبيه اللي قلته له أيامها هو : ” إنت بتحاول تبني جامع جوة خمارة ” . … يعني : أيامها .. كنت متوغل جداً في تقنيات و خوارزميات السوشيال ميديا .. لأنها كانت ال ( Hot new thing in town - الحاجة الجامدة الجديدة ) .. زي ما مثلاً دلوقتي الحاجة الجامدة الجديدة هي ال ( AI ) .. .. فبالتالي .. كنت مدرك تماماً إن المحركات الأساسية لإنتشار أى سوشيال ميديا هي : ( غرائز البشر السهلة + محركاتهم العاطفية السهلة ) . .. يعني .. أسهل ما يكون إنك تبني آداة بتقدم بنات بترقص و تقلع هدومها .. و فنفس الوقت يكون في عليها محتوي علمي و ثقافي مثلاً .. زي ( تيكتوك حالياً ) .. و لما حد يقول لك إنك بتنشر ( فساد , عري , … ) تقول له بكل ثقة : أنا سايب الإختيار للناس .. و مش باقيّد حرية المستخدم . .. الحقيقة هي إنك مش سايب حرية إختيار إطلاقاً .. لا .. إنت بتحط الإنسان قدام أصعب إختيار موجود قدامه في الأرض .. و هو إختيار الإشباع السهل لغرائزه .. ولا منع نفسه من الإشباع السهل ده .. مقابل عائد ( معنوي و مادي و جسدي ) .. لكن بييجي بعد وقت طويل . … فبالتالي .. كانت وجهة نظري أيامها ( قبل تمكن الفيسبوك من حياة البشرية ) .. و أيام ما كان لسة مجرد موقع .. مش عبارة عن الإنترنت كله تقريباً .. إن : كل شخص زيادة حيدخل عشان يشوف محتوي أخويا بالذات .. أثناء ما هو بيبني بروفايله و بيتفرج علي محتوي أخويا ( العلمي و الصيدلاني ) .. حيشوف ما لذ له و طاب من الرقص و العُري و الفضائح .. و كل الحاجات اللي بيدور عليها الفيسبوك عشان ينشرها . … أيامها أحمد أخويا كان عنده بعد نظر أكتر مني ( و نادراً لما باقول له ده بالمناسبة 🤣 ) .. و نظرته فعلاً كانت أعم و أشمل من نظرتي .. .. قال لي : الفيسبوك حينتشر بيا أو من غيري .. و تأثيري في نشره أو زيادة قوته .. حيكون مُهمل مقارنة بتأثيره في نشر علمي و زيادة قوتي أنا . … طبعاً عاندته ( كالمعتاد ) .. و فضلت أقول له إنه كده بيعتنق المبدأ الميكيافيللي ( الغاية تبرر الوسيلة ) .. و إن هو اللي كسر لعبي و أنا صغير 🤣 .. و كل الكلام الجميل ده .. … لكن في الحقيقة هو كان صح 100% .. .. و إحتجت أنا سنين و سنين .. عشان أفهم حقايق كتير .. حقايق كتيييييييير لو فضلت شايف العالم بلونين فقط .. حتفضل أعمي عنها . … إيه هي الحقايق دي ؟! … 1- الشر ( بكل صوره ) مخلوق في الأرض منذ لحظة وجود الإنسان عليها .. و مش حينتهي من عليها إلا بأمر الله في وقت معلوم . . 2- الشر ( بكل صوره ) .. ظلام .. ضعييييييف جداً جداً قدام الخير ( النور ) .. . 3- مافيش أى صورة منطقية أو فيزيائية يقدر بيها الظلام إنه يهزم النور .. عود كبريت صغنن وحيد في صحراء ضخمة عتمة .. بيفوز . . 4- فبالتالي .. لعبة الشر ( الظلام ) الأقوي و الأهم طول الوقت هي : مش إن عود الكبريت ينطفي .. لأن ده مش حيحصل إلا برضو بأمر الله في وقت معلوم . و لكن : تنحية النور .. و إبعاده .. و تحجيمه … و كسب أكبر مساحة ممكنة مكانية و زمنية .. بعيد عن النور . . 5- طيب ده يحصل إزاي ؟! .. أصل متي تواجد الظلام و النور في مكان واحد .. فاز النور . إذن .. إقنع النور إن الظلام معدي .. مخيف .. أقوي .. و إن مكسب النور .. في بعده . . 6- فبالتالي .. أى عود كبريت منور .. يقفل علي نفسه .. و يبني حواليه جدران تحميه من الضلمة !! 🤣 .. متخيل ؟! … علي مدار التاريخ .. و كل الأقوام اللي ذُكرت في القرآن .. حتلاقي إن أحد أدوات الطاغوت الأساسية هي : إبعاد الأنبياء و الرُسل و الصالحين .. .. في حين إن الدور الأساسي بالنسبة لك ك ( إنسان مسلم ) منذ عهد سيدنا آدم عليه السلام .. هو : التواجد .. .. مش الهروب في ( رهبانية إبتدعوها ما فرضناها عليهم ) .. مش التميع .. مش الصراع المستمر بدون أسباب … .. لا .. التواجد .. و كسب القوة بما يكفي إنك تقدر ( تأمر ) بالمعروف و ( تنهي ) عن المنكر .. .. لاحظ إن اللفظ هو ال ( أمر ) .. و الأمر بييجي من فوق لتحت .. يعني لازم تكون أقوي ممن تأمر .. .. و القوة هنا مش معناها قوة تجبر أو ( بلطجة ) .. لأن فنفس القرآن ( لست عليهم بمسيطر ) .. .. و لكن قوة ( شاملة ) .. قوة قادرة علي التأثير .. مش الإجبار .. .. التأثيييييييييير .. … فبالتالي .. التعليقات اللي في البوست اللي في الصورة دي .. هي السبب في إني كتبت البوست ده .. كتير منها بيكرر : إحنا ماكناش نعرف .. و دلوقتي حنروح نسحب الدعم .. أو نعمل ريبورت 🤣 … لكل منهم .. و لأى حد حيقرا كلامي ده دلوقتي .. رجاااااااااااااااااءا : إفهم : .. الصحابة .. الصحاااااااااااااااااااابة .. كانوا مين ؟! .. ماكانوش ملايكة .. الصحابة كانوا هما هما اللي سمعوا و شافوا الرسول صلي الله عليه و سلم .. و ماصدقوش في الأول .. و شكوا .. بل منهم كتير قاتل النبي محمد صلي الله عليه و سلم في أُحد … بل منهم من قتل حمزة عم النبي ذات نفسه !!! .. و بعد ذلك أسلموا .. و حسُن إسلامهم .. … ده كان حيحصل لو كان النبي و أول من آمن معه خدوا بعضهم و مشوا و سابوا الناس و إعتزلوهم ؟!!!!!! … … ال ( كراهية ) .. آداة تستخدمها مش هي اللي تستخدمك .. يعني بتكره الرأسمالية الأمريكية و إستعبادها لمواطني الكونغو اللي بيتم إجبارهم علي العمل في المناجم عشان يطلعوا المعادن الأساسية المُستخدمة في صناعة الآيفون ؟! .. حلو .. ماشي .. فاهمك .. لكن حتقدر تعمل لمواطنين الكونغو دول أى شيء دلوقتي ؟!! .. لا ؟!! .. يبقي تواجد .. إشتري الآيفون .. إستخدمه فإنك تدرس و تتعلم .. إكبر .. كوّن قوتك .. إبدأ أثّر .. .. فهمت ؟! .. .. تواااااااااااااااااااااااااااااااااااااااااااااااجد .. يرحمكم الله . … و الله أعلم .