بمناسبة ( Claude ) .. و اللي كل ما تضغط

بمناسبة ( Claude ) .. و اللي كل ما تضغط ريفريش تلاقيهم منزلين شوية تحديثات جامدة تنين … و حاسس إنك بتنهج وراهم .. خليني أقول شوية حاجات غالباً مش حتسمعها غير من حد من جيلي ( مواليد التمانينات ) : .. 1- معمل الكمبيوتر في مدرستي الإعدادي كان للمتفوقين فقط .. و الذهاب له كان بيٌعتبر رحلة تتحسد عليها .. و ماكنش حد مننا سنة 2001 يتخيل إن ييجي يوم و يمتلك حتي جهاز كمبيوتر في بيته .. مش يشيل كمبيوتر كامل متكامل في جيبه . … 2- أول جهاز كمبيوتر إشتريناه في حياتي .. أولي ثانوي سنة 2003 .. كان هارد 80 جيجا , رامات 128 ميجا , كارت شاشة مٌدمج في الماذربورد ال ( سولتيك ) اللي بطلت تنزل خلاص … و كان الأصدقاء في الفصل بيتعجبوا من القرار الغلط العجيب إننا جبنا هارد 80 جيجا !!! و بيتسائلوا ليه السفه ده ؟!! .. و إن الراجل اللي باع لنا ضحك علينا .. أصل حتملاه بإيه ؟! … 40 جيجا كفاية جداً .🤣 … 3- سنة 2006 , و أنا في إعدادي هندسة .. فاكر كويس إن فودافون عملت مسابقة ( أحسن صورة بالموبايل ) .. أيام ما كان أجدع موبايل ب كاميرا في السوق هو النوكيا ال 6600 الباندا . و كنت باحلم أنا و أصدقائي ب المستقبل الإبداعي المشرق اللانهائي و الغير محدود اللي حنمتلكه .. لما بعد ما نتخرّج و نشتغل و نقبض فلوس كتير .. و نشتري الموبايل ال 6600 🤣 أبو كاميرا تلاتة من عشرة ميجا بيكسل . كنا متخيلين كلنا إزاي حنطلع الفنان المدفون جوانا .. و نصور أجدع و أجمل و أحلي صورة . … 4- سنة 2008 , لما دخل الإنترنت الدي إس إل بيتنا لأول مرة في الحياة .. كانت أقصي سرعة تحميل هي 32 كيلو في الثانية .. و كان ده بالنسبة لنا قفزة تكنولوجية و حضارية غير مسبوقة تماماً .. إن يبقي عندنا نت 24 ساعة في بيتنا .. مش دايال أب و بالتيليفون .. و إن خلاص مش حنحتاج نروح نأجّر ساعة في السايبر ب جنيه و نص . و كانت كل أحلامي في الحياة وقتها .. إني أدفع ضعف الباقة .. و إن سرعة التحميل لو وصلت ل ( 50 كيلو ) في الثانية .. ده حيساعدني أحمّل أفلام و مسلسلات أنيمي أسرع بكتير . … 5- بدايات سنة 2010 كان معايا نوكيا N95 8G .. الأسمر الجميل الرائع ده .. اللي الكاميرا بتاعته 5 ميجا بيكسل .. اللي يوم ما مسكته لأول مرة في إيدي .. حسيت إني خلااااااااااص .. إمتلكت كل التكنولوجيا اللي ممكن إنسان يحتاجها في الحياة .. و قسماً بالله عشت أيام و ليالي فأعماق الموبايل ده .. و نزّلت عليه ويندوز 95 .. و شغّلته و بقيت باتحكم فيه بال ( gestures = حركات الإيد قدام الكاميرا ) .. و قررت إني حابقي أحسن مبرمج ( سيمبيان = لغة برمجة نظام تشغيل النوكيا ) في العالم . و كل اللي كنت باحلم بيه وقتها .. إني أجيب جهاز إسطوانات دي في دي زيادة .. عشان أقدر أحتفظ بكل الكم الضخم من الحاجات اللي كنت باعمل لها داونلود طول الوقت . .. و مكتبة ديفيديهاتي ( اللي لسة محتفظ بيها لحد النهاردة ) .. كانت أحد أهم ممتلكاتي في الحياة . … 6- و تعدّي السنيييييييييييييييييييييييييييييين .. و يبقي الكمبيوتر ( الموبايل ) في جيب كل إنسان و طفل .. ذاكرة موبايلي اللي في جيبي .. 512 جيجا .. راماته 16 جيجا .. أضعاف أضعاف أضعاف الكمبيوتر بتاع 2003 .. . الكاميرات اللي في موبايلي … بيتعمل بيها أفلام بروفيشنال بتتعرض في سينيمات . . أصبح أسرع بالنسبة ليا إني أحمّل من علي النت فيلم لو خطر في بالي مثلاً .. عن إني أدور عليه في الهاردات بتوعي . . آخر مرة فتحت مكتبة إسطوانات ديفيديهاتي .. كان من أكتر من 10 سنين تقريباً . . و ده كله مش ليا أنا و بس .. لا .. للعااااااااااااالم كله .. … 7- و اللي أقدر أؤكد عليه هو إن : المُبدع سنة 2001 , هو نفس المُبدع سنة 2005 و 2008 و 2010 و 2026 .. . اللي إستخدم الآداة اللي موجودة قدامه عشان يحل مشكلة ما .. أو يبني شيء ما .. سنة 2001 .. إستخدم نفس الأفكار و الدماغ اللي إستخدمها حد حالياً سنة 2026 . . الآدااااااااااااة .. ما هي إلا آداااااااااااااااااة .. مهما إتعقدت أو إتطورت أو نزل لها تحديثات .. الآداة .. مجرد آداة . .. و لكن .. إمتي تقرر تستخدم اللاب توب بتاعك حالياً ك ( شاكوش ) و تدق بيه مسامير … و إمتي تقرر تستخدمه ك لابتوب ؟! . … 8- إجابة السؤال اللي فات ده كانت و دائماً و أبداً ستكون هي : التجربة حتي الثمالة . .. يعني إيه ؟! … 9- يعني لو إنت فضلت مستني إن حد ييجي يشرح لك كل إمكانيات اللابتوب .. من البداية للنهاية .. و تاخد كورسات و تسمع شروحات و تحضر ورشات .. أحب أقول لك إنك حتقعد سنييييييييييييييين كتير .. و يوم ما حتقرر أخيراً تبدأ .. حتكتشف إنك مش عارف تعمل أهم حاجة علي الإطلاق .. و هي : تبدأ منين !! .. تفكر إزاي !! تشوف مشاكل العالم من عين اللي عايز يحلها إزاي .. … لكن .. لو كنت من أول يوم حد حط قدام عينيك لابتوب .. رحت إنت واخده مباشرة و مستخدمه ك حاجة ناشفة عشان تحل مشكلة مسمار كان لازم يندق .. ممكن تكسر اللابتوب بكل تأكيد … في داهية .. ممكن المسمار مايندقش صح بكل تأكيد .. لكن الأكيد هو إنك إتعلمت تحاول تحل مشكلة .. و جربت حل .. و شفت النتيجة . … 10- و دي هي أهم حاجة يهمني إنك تركز عليها حالياً .. ماتركزش عالآداة .. الأدوات بتروح و بتيجي .. و كل يوم زيادة حتستنّاه ظناً منك إن حينزل آداة أجمد .. ده يوم ضايع .. .. اللي بيتعلم عشان “يفهم الأداة” .. مختلف تماماً عن اللي بيتعلم عشان “يحل مشكلة بأي أداة”. الأول .. بيتعلم .. و بيتعلم .. و بيتعلم .. و في الآخر .. بيبقي خبير نظري في أداة .. انتهت صلاحيتها. الثاني .. بيكسر .. و بيغلط .. و بيبقي واقف قدام نتيجة حقيقية .. و بيتعلم إنه يفكر .. مش إنه يحفظ.

الفرق بين الإتنين مش في الذكاء .. مش في الوقت .. مش حتي في الأداة. الفرق الوحيد هو: إيه اللي بيحركك؟ مشكلة حقيقية قدامك .. ولا خوف من إنك “تبدأ من غير ما تكون مستعد”.

و أنا باتكلم عن Claude .. و ChatGPT .. و Gemini .. و اللي جاي بعدهم .. بالظبط زي ما باتكلم عن النوكيا 6600 .. و الـ DSL .. و الـ N95 ..

الآداة مش هي اللي بتخليك مبدع. الآداة بتكشف المبدع اللي جواك .. أو بتكشف إنه مكانش موجود أصلاً.

أنا بستخدم الآداة .. ولا الآداة بتستخدمني؟ خد أكشن .. و ماتشغلش بالك بالزراير الكتير .. لحد ما تجيب آخر اللابتوب ك شاكوش .. و بعد كده جرّب تفتحه و تشغّله ك كشّاف مثلاً 🤣 .. و بعد شوية يبقي راديو .. ركّز عالمشاكل و إسأل تحلها إزاي .. و الآداة حتيجي لوحدها بعد كده . … و الله أعلم .