الشخص اللي إنت شايف ضهره في الصورة ده .. و

الشخص اللي إنت شايف ضهره في الصورة ده .. و وشه في إنعكاس المراية .. يبقي أنا 😁. و إنت … و أى حد تعرفه .. لو هو زيي .. يعني عنده ADHD . … و الصورة دي .. بتوصف التالي : شايف الشخص العبيط الأهطل اللي عالشمال ده 😅 ؟! .. عايزك تتخيل إنك بتلعب معاه .. لعبة تافهة و طفولية و سهلة .. و كل ما تلعب .. تغلب .. بكل سهولة .. بكل تفاهة .. و هو .. بيضحك بعبط و هطل .. و يكمّل لعب .. لا بيتأثّر لما يتغلب .. و لا يتضايق .. ولا حتي يحاول يلعب أحسن .. لكنه دايماً موجود .. و دايماً عايز يلعب . و كل لحظة بتعدي عليك و إنت مركز معاه و بتلعب معاه .. بتصيبك بملل قاتل .. ملل لا يٌطاق .. .. شايف بقي الشخص الأسطوري التنانيني اللي عاللمين ده 😎؟! .. عايزك تتخيل إنك بتلعب معاه .. لعبة مٌعقدة جداً .. زي الشطرنج الثلاثي الأبعاد مثلاً .. و كل ما تلعب معاه .. مش بس بيغلبك .. لا .. ده بيحسسك إنك حمار .. غبي .. مافيش منك أمل ولا فائدة إطلاقاً .. بيمسح بيك بلاط المكان حرفياً .. و يعلّم عليك .. و يستمتع و يستلذ بكل لحظة و هو بيعمل فيك كده .. و علي مدار آلاف المرّات اللي لعبت فيها ضده .. إتهزمت هزيمة ساحقة .. و إتمسح بكرامتك الأسفلت . و هو دايماً موجود .. مابيمشيش أبداً .. و كل لحظة بتعدّي عليك و إنت مركز معاه .. بتصيبك بإحباط .. و هزيمة .. و خذلان .. و ذكريات منيلة بستين نيلة .. … و الشخص اللي في النص ده بقي .. زي ما شرحت لك .. يبقي أنا .. في حالة : شلل تام مستمر طول الوقت .. بنفس الصورة اللي في المراية دي .. و الحياة دي حياتي .. أو للدقّة .. كانت حياتي .. قبل ما أفهم يعني إيه ( ADHD ) .. خليني أشرح : … الشخص ال( ADHD ) .. أحد أكبر مشاكله في الحياة هي : الذاكرة . مش فإنه ( يفتكر ) .. و لكن إنه ( يفتكر إيه ) !! .. من تعريف إسم الموضوع أساساً ( ADHD = Attention and Hyperactivity Disorder ) .. .. يعني مثلاً .. في البوست اللي إنتشر فجأة إمبارح ده ( اللي هو بتاع مسلسل : لا تٌرد ولا تٌستبدل .. و اللي إتكلمت فيه عن جلجاميش .. و إنتهي ب ترام إسكندرية 🤣🤣🤣 ) .

أنا ماسعيتش إني أفتكر الحاجات اللي كتبتها في البوست ده .. إطلاقاً .. و لكن .. عقلي .. بشكل لا إرادي مني تماماً .. إفتكر كل حاجة من الحاجات دي .. و شاف بينها علاقات .. و كوّن الرحلة اللي كتبتها في البوست دي ..

بل إني مسحت من البوست تفاصيل كتير جداً جداً .. عشان يكون أسهل علي القارئ في إنه يفهم 🤣 . .. أنا عقلي بقي في باقي الحياة كلها .. بكل تفاصيلها .. بنفس المنظر .. يعني : أنا مثلاً عندي مشكلة ضخمة طول عمري في الإعتناء بسناني و إني أفتكر أغسل أسناني .. غسيل الهدوم و لمّها من عالمنشر و تطبيقها .. معاناة .. ترتيب أوضتي و مكتبي و الشقة عموماً .. إيميلات بتفاصيل شغل مهمة جداً بأرقام كبيرة .. أفلام عايز أتفرج عليها .. مكالمات عائلية مهمة جداً .. مسلسلات عايز أشوف حلقاتها الجديدة .. و لسة حالاً فاكر إني نزّلت حلقة بلاريباص الأخيرة و كنت سايبها في الداونلود 🤣 .. حاجات كتير لها علاقة بديني و قراءة القرآن .. المفروض أروح الجيم النهاردة .. بس أنا رحت إمبارح .. بس أنا موقف و مريّح بقالي 10 أيام .. بس حاسس إني أقدر أروح النهاردة .. كنت بافكّر أغير الجيم أساساً .. بس أنا بقالي في الجيم اللي أنا فيه 3 سنين دلوقتي و معتاد عليه .. في مكالمة مهمة جداً ل بيزنس في لندن متأجلة بقالها يومين .. رمضان قرّب و إحنا فرجب و عايز أحضّر برنامج ل رمضان .. الرانك بتاعي في TFT عايز أعلّيه .. بقالي سنة و نص تقريباً طافي البلايستيشن بتاعي و بافكّر أبيعه … كم رسائل ضخم بيتراكم و يتزايد كل يوم مع تزايد عدد الفولورز .. و تعليقات كتير أوي عايز أرد عليها .. كتب كتير مركونة لازم أقراها . … اللي فات ده .. جزء بسيط جداً … جداً .. جداً .. من أفكاري و عقلي فأى لحظة . و علي مدار حياتي .. ده لم يختلف .. إطلاقاً .. و المؤلم .. إن مافيش أى وسيلة داخلية فعقلي إطلاقاً إني أرتّب الحاجات دي بناءاً علي الأولويات و الأهمية مثلاً .. مهما كتبت ( Todo lists ) .. مهما إستخدمت برامج .. أنا ماقدرش أتحكم إن عقلي ( يركّز إنتباهي ) علي شيء معين واحد . … لكن .. كل حاجة من الحاجات دي .. بالنسبة ليا .. سهلة جداً .. جداً .. جداً .. أى لحظة حد بيتصّل بيا يسألني علي تفاصيل شغل مثلاً .. إجابتي بتكون واضحة و سريعة و حاضرة .. بل لما بيحتاج إني أنفذ تاسك شغل معقربة واقفة معاهم مثلاً .. بتخلص في دقايق .. فيسألني : طالما الموضوع ساهل كده و يخلص بالبساطة دي .. الموضوع متأخّر بقاله أسابيع ليه ؟!!! ف أجاوب : لأنه .. ساهل جداً .. فبالتالي .. ممل .. جداً . .. ف أهلي كانوا يشوفوني بعاني و بتألم .. و يسألوني : طالما كل حاجة لوحدها لما بتعملها .. بتكون ساهلة جداً و مملة جداً .. طول الوقت متكربس و متلخبط و مافيش حاجة بتتم بالأسابيع ليه ؟! .. و حاجات بتضيع و تقع منك في النص كتير ليه ؟؟! . . فأجاوب : لأن .. كل حاجة موجودة فعقلي فنفس اللحظة .. فوق بعض . … و طول الوقت .. في صوت شغّال جوة عقلي بيفتكر الهزائم فقط .. فاكر لما غلطت في كذا ؟! فاكر لما خسرت كذا ؟! فاكر لما نسيت كذا ؟! فاكر لما قلت كذا غلط ؟! فاكر لما فلان إتضايق منك في رابعة إبتدائي ؟! فاكر لما إتلخبطت في حل المسئلة في تانية إعدادي ؟! فاكر لما كنت حتبوظ الدنيا و تضيع ميعاد طيارة عشان إنت مهمل ؟! فاكر إنت عليك مهمات ماخلصتهاش قد إيه ؟! .. و عمرك ما حتخلصها .. يا متوهم . فاكر إنت حاجات كتير بدأتها و مانهيتهاش إزاي ؟! .. و عمرك ما حتنهيها .. طب بتبتدي حاجات تانية جديدة ليه ؟! .. إنت مفكّر إنك حتتغير ؟! .. إنسي .. … لما بدأت أتعلّم عن ال (ADHD ) من أكتر من 8 سنين تقريباً .. أحد أكتر الحاجات اللي شدّت إنتباهي هي ال : تحفيز . .. لأن زماااااااااااااان .. أيام 2009 .. كنت درست بشكل متعمق جداً عوالم تصميم الألعاب ( نفسياً قبل ما يكون تقنياً ) .. و لأن أيامها كانت مواردي بالكاد تكفي إني أشتري لبان كلورتس فرط .. مش علب كاملة زي ما باعمل حالياً 🤣 .. ف أيامها ماكنتش أقدر أخلي اللعبة اللي كنا بنحاول نبنيها تبان رائعة تقنياً .. ف حاولت بكل الطرق أدرس إزاي أخلي اللاعب ( يدمن ) اللعبة .. و يتحفز و هو بيلعبها . … ف لما بدأت أدرس عن ال ( ADHD ) من 8 سنين .. و لقيت إن الهورمونات المسئولة عن الشعور بالتحفيز .. هي نفس الهورمونات اللي فيها إختلاف ( خلل ) في عقل اللي عنده ADHD . . فهمت أكتر ليه أنا بادمن الألعاب بسهولة جداً .. و بيوصل إدماني لدرجة إني مابعرفش أعمل شيء آخر في الحياة غير اللعبة .. لأن اللعبة .. بتدّي دماغي بشكل خارجي إحساس بالتوازن في : التحكّم .. و المنافسة .. … فأى لعبة بتلعبها في الحياة .. لو إنت عندك تحكّم 100% فكل شيء بيحصل في اللعبة .. إنت بتزهق .. بتمل .. بتسيب اللعبة بالكامل .. لازم يكون في عناصر كتير في اللعبة إنت مش متحكم فيها .. ( زي البط في سوبر ماريو مثلاً , زي الألوان المتغيرة في كاندي كراش , … ) … و العكس .. لو إنت ماعندكش أى تحكّم إطلاقاً في أى شيء في اللعبة .. بتزهق جداً و تمل برضو .. اللي هو مش بتبقي بتلعب كده .. و لكن بتتفرّج . … نفس الشيء بالنسبة لل ( منافسة ) .. لو إنت مش حاسس بأى نوع من أنواع المنافسة .. و طول الوقت بتغلب بكل سهولة .. بتزهق .. و تمل .. اللعبة لازم تقدّم لك تحديات تحسسك بإن الفوز له قيمة .. و إنك بذلت مجهود .. . و العكس .. لو إنت مش حاسس بأى نوع من أنواع المنافسة .. و طول الوقت بتندعك في اللعبة 🤣 بدون أى أمل في الفوز .. بتزهق و تمل .. و تٌحبط .. … حالة ال : شلل اللي وصفتها في الصورة دي .. هي بقي حالة : زهق و ملل + إحباط و إنهزامية .. فنفس الوقت .. . زهق و ملل مستمر لأنك ضد اى تاسك عليك .. بتحس إنها سهلة جداً و تافهة جداً ( لأن عقل الADHD في الأغلب أسرع بكتير جداً من الإنسان العادي ) . . و إحباط و إنهزامية مستمرين .. لأنك طول الوقت شايف و ( مركّز علي و فاكر ) كل التاسكات و الأحلام و التطلعات و الذكريات اللي عليك .. . و العقل البشري بيتعامل مع الحالة دي بطريقة واحدة فقط .. و هي : البحث عن الإتزان الكيميائي في شيء مختلف .. . يعني الهروب .. الهروب ل ( فيديو جيم ) زي ما أنا كنت باعمل .. الهروب ل إتزان كيميائي خارجي ( نيكوتين في سجاير , إفراط في سكّريات زي ما كنت في طفولتي , أو لا قدّر الله .. مٌخدرات ) . . أو الهروب ل إحساس الإنسان بيكون معتاد عليه طول عمره ( Comfort zone ) .. بإنه يفضل يندب حظه و يعيط و يكتئب و يكئب اللي حواليه 🤣 . … لحد ما تفهم .. تفهم عقلك .. و طبيعته .. و تتخيل صورة مشابهة للصورة دي .. و تتخيل إن الطريقة الوحيدة إنك تهزم الشخص اللي عاللمين .. مش إنك تلاعبه .. و لكن بإنك تلاعب الشخص اللي عالشمال .. أثناء ما إنت باصص للي عاللمين . . يعني .. الإيميل الواحد اللي محتاج إني أكتبه و أبعته مثلاً ( بالنسبة ليا تافه جداً ) .. لكنه جزء من هجومي علي الشخص اللي عاللمين .. و أثناء ما باكتبه .. باشوف الشخص اللي عاللمين ده بيقلق .. و لما أبعته .. باشوفه بيتألم .. بيتألم من ضربة موجعة أنا إديتها له . . و أفهم إن أى لحظة أسمع فيها الصوت المتكرر اللي بيفكرني بالهزائم دي كلها .. أفهم إنه ده الشخص اللي عاللمين .. و إن الهدف من كلامه ده .. هو إني ماركزش في اللعب مع الشخص اللي عالشمال . … البوست طوّل أوي .. و كنت ناوي أكتب أكتر .. لأن .. الشخصين دول مش بيظهروا قدامك بالوضوح ده .. إلا لما تتعلم بعض أدوات إدارة المشاريع .. اللي بيساعدك تشوف إن أى ( مشروع , شغل , فكرة ) إنت شغّال عليها .. ماينفعش تعيش في عقلك في الضلمة .. في الغموض .. و إن الخصم اللي عاللمين ده .. أحد أخطر أدواته هي الغموض .. اللي بيها .. بيساعد الخصم اللي عالشمال يكسب . . فبالتالي .. البوست القادم عن نظام ال6 صناديق .. اللي باستخدمه عشان أعمل كده إن شاء الله . … … في المعتاد باشرح كل ما سبق ده في 3 مكالمات أو أكتر في ال ( ASP ) .. اللي كنت بدأته من شهرين .. ( شرح إيه هو ASP ده في البوست المٌثبّت عندي ) . خلال أسبوع تقريباً إن شاء الله .. حاعيد فتح الباب لإستقبال ناس جديدة .. و ححاول بإذن الله أكتب كل شيء شرحته حتي الآن .. اللي ناوي أشرحه قريباً . … و الله أعلم .