النهاردة .. البيتكوين بيساوي تقريباً 4 مليون جنيه و شوية

النهاردة .. البيتكوين بيساوي تقريباً 4 مليون جنيه و شوية 🙂 من 10 سنين .. يوم ( 23 فبراير 2015 ) .. ده كان اليوم اللي نزّلت فيه أول فيديو علي يوتيوب باشرح فيه يعني إيه ( بيتكوين ) .. و كان يومها تقريباً البيتكوين الواحد بيساوي بالمصري : 250 جنيه 🙂🙂. و كتبت شوية بوستات طوييييييلة أيامها .. و ناس كتير كسّلت تقرا 🤣😅 .. ماذا لو كان عندك ( آلة زمن ) إذن ؟! .. تسافر للماضي 10 سنين ؟! .. طب و بعدين ؟! .. حنفترض إنك فعلاً إشتريت شوية بيتكوين حلوين .. و سقّعتهم .. و جيت النهاردة و طلعتهم من التلاجة و بقيت مليونير .. لا .. ملياردير .. يا عم بقيت غني بما فيه الكفاية إنك بقيت بتشتري الجاكيت الشتوي من غير ما تقلش علي تكت السعر و تقول إنه رقم تيليفون المحل 🤣 .. أمّا بعد ؟! … الحقيقة إنك عند مرحلة معينة .. و بعد ما تشبع كل غرائزك المباشرة السريعة ( حتتجوز اللي نفسك فيها , حتسكن في القصر اللي نفسك فيه , حتاكل بيتزا تشيكن رانش لحد ما تزهق منها 🤣 ) .. بعد كده .. حتكتشف إن في شوية مشاكل في الحياة حواليك .. مهما إمتلكت من فلوس دلوقتي .. صعب جداً .. تغيرها أو تأثّر فيها .. … خليني أقترح عليك إذن رحلة مختلفة شوية .. أطول حاجة بسيطة .. مش حنرجع في الزمن 10 سنين بس .. حنرجع 575 سنة بالظبط .. لحد سنة : 1450 . و إطلاقاً مش عشان نشتري ( بيتكوين 🤣🤣 ) .. و لكن عشان شيء أهم .. أهم مليارات المرّات من مٌجرد شوية فلوس .. و لو فهمته .. حتبقي كسبت أكتر .. أكتر بكتييييييييير جداً .. … سنة 1450 في ألمانيا .. راجل طيب و إبن حلال إسمه ( يوهانس جوتنبرج ) بيخترع الطابعة .. . آه والله .. بس كده .. الموضوع بسيط خالص .. إنزل جنب أى محكمة أو مدرسة أو مصلحة حكومية الساعة 9 الصبح .. و شوف في كام مكتبة شغّالين و بيسترزقوا من ( الورقة ب نص جنيه يا فندي ) 🤣 … سبوبة حلوة و مضمونة 🤣 . … عشان تفهم شوية إحنا بنتكلم عن إيه .. عايزك تسرح بخيالك معايا و تتخيل العالم قبل ما يتواجد فيه ( مكتبة أبو رحاب لتصوير المستندات ) كان عامل إزاي .. . كان مافيش جرائد ( فبالتالي ماكنش حد بيعرف يلمّع الزجاج إزاي 🤣🤣) .. لا .. بجد والله .. ماكنش في أى كلام مطبوع إطلاقاً .. كل حاجة مكتوبة كانت ( بتتكتب ب خط الإيد ) .. مجهود بشري يدوي .. جبّااااااااااااااار .. . فبالتالي .. كان تمن أى كتاب .. بيساوي تقريباً تمن بيت .. إن لم يكن أغلي .. اللي هو إنت رايح تتجوز علي مراتك .. تقوم العروسة الجديدة مسبلة في عينيك و قايلة لك ( إكتب لي كتاب ميكي اللي عندك في الخزنة بإسمي عشان أضمن حقوقي ) . . و طبعاً الكتاب ماكنش بيبقي ( ميكي ) .. و لكن أقيم ما يٌمكن أن يٌكتب عموماً .. لأن مش حنفضل نضيع وقتنا إحنا و نجيب كٌتّاب خطهم حلو .. و نعينهم و ندّي لهم مرتب لمدة طويلة فحت .. عشان يكتبوا ميكي .. أو أى قصص عموماً .. . فبالتالي .. الكتب الوحيدة اللي كانت موجودة أيامها كانت أغلبها ( دينية فقط ) .. و بعض كتب التاريخ البسيطة جداً . . لكن .. علوم ؟!! مين ده المجنون اللي حيكتب علوم ؟! .. و يكتبها ليه ؟! .. العلوم تٌنقل من الأستاذ للتلميذ مباشرة ( نظام التلمذة المٌلازمة اللي إتكلمت عليه من فترة ) .. و تٌنقل بالممارسة و السماع فقط .. . منطق ؟! فلسفة ؟! أى بتنجان غير دين أو تاريخ ؟! .. كل ده كان بٌقيقي .. بالبوج .. حنكاً ب حنك 🤣 .. . تخيل كمان حاجة زي ( الخرائط ) .. إتخيل إن ( جوجل مابس ) بتاعتك .. مختلفة عن ( جوجل مابس ) بتاعت الشخص اللي باعت لك اللوكيشن علي الواتس 🤣 . إنت معاك خريطة راسمها لك شخص .. مختلفة بالكامل عن خريطة نفس المكان اللي راسمها شخص مختلف . فمتخيل معاناة الناس تحت الدائري كانت حتبقي عاملة إزاي ؟! .. بالظبط زي معاناتهم دلوقتي مش حتختلف إطلاقاً .. و ده لأن تحت الدائري عالم لا تخترقه جوجل مابس 🤣 . الحقيقة هي إنك كل ما تحاول تتخيل عالم ما قبل ال ( طباعة ) .. كل ما حتكتشف إن ال( طباعة ) هي أحد أهم 3 إختراعات في تاريخ البشرية علي الإطلاق .. ( حاسيبك تخمّن الإتنين التانيين ) . … طيب .. هما الناس كانوا أغبيا يعني ؟! .. أنا فاهم إن تشغيل مكنة تصوير المستندات مش ساهل أكيد .. و لكن أبو رحاب ما شاء الله عليه بيشغلها بسهولة لوحده .. و بيصينها كمان .. إيه الصعب إن الناس كانت تخترع مكنة طباعة ؟! … خليني أشرح لك المكنة الأول شغّالة إزاي .. إنت حتجيب شوية مكعبات معدن .. و تحفر علي كل مكعب حرف مختلف من 29 حرف بتوع الأبجدية .. و بعدين ترص الحروف جنب بعض ( علي حسب الكلمة اللي عايز تكتبها .. مثلاً ب ح ب ك ) .. و بعدين تدهن الحروف دي بالحبر اللي علي مزاجك .. مثلاً بمبي فاقع .. و بعدين تحط الورقة فوقهم .. و تضغط بكل قوتك .. و شكراً .. تبص علي الورقة .. تلاقي كلمة ( بلوك ) مطبوعة بكل وضوح . … الموضوع مش صعب .. صح ؟! غلط .. الموضوع كان صعب .. اوي .. . لأنك إفترضت إنك عارف المكعبات المعدن دي بتتعمل إزاي ( علم سباكة معادن ) .. و إفترضت إنك عارف الحبر بيتصنّع إزاي ( علم كيمياء ) .. و إفترضت إنك عارف المكنة اللي حتضغط ب قوة ( تطبع الحبر علي الورق .. من غير ما تقطع الورق ) .. عاملة إزاي .. ( علم هندسة و ميكانيكا ) .. . و الأهم من كل ده .. إفترضت إنك حيبقي معاك فلوس تقعد تجرّب كل الهري ده .. … ده هو سبب إن ( يوهانس جوتنبرج ) كان فعلاً عبقري .. . الراجل قصته بإختصار شديد فحت كالتالي : أبوه كان موظف غني أرستقراطي في مصلحة صك عملات معدنية .. و أمه صاحبة أملاك .. و لكن .. علي أيامهم .. ( زي ما شرحت في بوستات سابقة ) .. كان ورش المهارات اليدوية ب نفس أهمية ال ( VC - شركات الإستثمارات حالياً ) .. . و زي شركات الإستثمار حالياً برضو .. كان أصحاب الورش دي شلل ( Guilds ) في بعضهم .. و بيعملوا لبعض لايكات علي السوشيال ميديا طول الوقت و يمنشنوا بعض في بوستات شكر و تلييف بسبب و بدون سبب 🤣 . . و عند مرحلة معينة .. ال (Guilds ) دول إتخانقوا مع الأرستقراطيين .. و قالوا لهم إنتوا مالكوش قيمة زينا .. إحنا باشمهندسين .. و إنتوا مش مهندسين 🤣 .. أو تقدر تقول ( مهندسين الموقع إتخانقوا مع ال HR ) .. و نفوهم من الشركة . يوهانس ده بقي كان إبن ( HR ) .. و شاف الخناقة دي و إتنفي هو و أهله و فلسوا .. ف طلع عنده عقدة إنه عايز يثبت إنه ( أجدع من أى مهندس / حرفي ) .. . و طلع درس حدادة .. و صناعة دهب .. و هندسة ميكانيكية .. . و عند مرحلة معينة .. قرر إنه عايز يثبت نفسه ب إختراع .. يخلي كل أصحاب ال ( Guilds - شلل ) دول .. مالهومش أهمية .. . و الإختراع ده هو ( الطابعة ) .. و اللي بيها ممكن يتم طباعة الكتب بشكل مستمر و تلقائي و بعدد كبير .. فبالتالي … تنتشر العلوم جداً .. و بالتالي ( كهنوت أصحاب الguilds ) دول .. يندثر .. … و علي مدار 15 سنة .. بيفضل يجرب معادن مختلفة .. و أحبار الكيمياء بتاعتها مختلفة ( عشان الحبر لازم يكون زيتي .. ينفع يلزق عالمعدن .. و يتنقل علي الورق .. و يفضل عايش مايتمسحش زي الأحبار المائية اللي كانت بتٌستخدم في الكتابة يدوياً ) . . و علي مدار ال15 سنة دول .. بيدخّل مستثمر ك شريك معاه .. راجل معاه فلوس .. و شايف إن الموضوع ده ممكن يطلع منه سبوبة و لقمة عيش حلوة .. و لكن .. يوهانس كان لا يٌطاق بالنسبة لأى حد .. كان معقّد .. و خايف إن أى حد يسرق فكرته .. و عنيد .. و بيكره البشر عموماً .. . فالنتيجة إن بعد ما فكرته خلاص كانت نجحت .. و المكنة طلعت قماش .. شريكه المستثمر بيرفع عليه قضية .. و يكسبها .. و يطرد يوهانس من كل حاجة .. و يموت يوهانس مفلس .. و أعمي .. 🥲🥲 . . لكن .. بسبب إختراعه .. يحصل التالي . … خلال 30 سنة بالظبط .. يوصل عدد الكتب اللي تم طباعتها حوالين أوروبا بالكامل .. لأكتر من 30.000 كتاب .. و بعد 30 سنة تانيين .. يوصل العدد ده ل 8 مليون كتاب تقريباً .. متخيل ؟!!!!!!! الكلام ده سنة إيه ؟! .. سنة 1500 … علي مدار 200 مدينة أوروبية بالكامل .. كان في 8 مليون كتاب .. في مٌختلف المجالات بقي .. ( ديني , علمي , ترفيهي , ثقافي , ثقافي +18 🤣🤣 , … ) . . و خلال ال 50 سنة دول ( من 1450 ل 1500 ) .. بيوصل تمن أى كتاب ( زي الإنجيل مثلاً ) .. من إنه كان ب تمن بيت كامل .. لإنه يكون أرخص من تمن ساندوتش شاورما تومية زيادة .. . متخيل ده معناه إيه ؟! . معناه إن كل ( كهنوت ) العلوم .. تم هدمه تماماً .. أى طفل فأى قرية أوروبية .. أصبح عنده القدرة إنه يتعلّم .. و ده هو بالظبط اللي حصل . … بداية من 1500 .. بتبدأ أوروبا رحلة مختلفة بالكااااااااااااااااااااااااامل عن رحلة الشرق الأوسط و العالم الإسلامي في الوقت ده . . لأن .. أثناء ما كان التريند في أوروبا هو إن كل حد يفتح ( ورشة طباعة ) تحت بيتهم .. كان التريند في العالم الإسلامي وقتها هو : ( إنت مش عارف تحفظ كويس ليه ؟! ) . … العالم الإسلامي كان في الحقيقة سابق أوروبا بكتيييييييييييييييييييييييييييير جداً قبل سنة 1500 .. خصوصاً في مجال الكٌتب و العلوم عموماً .. و ده لأن المسلمين كانوا أخدوا أسرار صناعة الورق من الصين بعد معركة طلاس ( في عهد الدولة العباسية ) .. قبل كده .. كان أى حاجة بتتكتب .. كانت بتتكتب علي جلود الحيوانات .. فبالتالي .. كل ما كنت تحب تكتب جواب لحد مثلاً .. تدبح 🤣 .. و ده شيء مرهق جداً اكيد .. . لكن الصينيين كانوا مكتشفين سر صناعة الورق من زماااااان أوي ( قصة الموضوع ده ممكن أشرحها لوحدها في باقي بوستات تاريخ الصين إن شاء الله ) . . المهم … المسلمين في أحد عمليات رجل المستحيل العباسي ( ن ع 1 ) 🤣.. أخدوا سر صناعة الورق .. و عملوا 3 مصانع ورق في ( بغداد في العراق , القاهرة في مصر , فاس في المغرب ) . لو تلاحظ .. حتلاقي إن ال3 أماكن دول .. 3 أماكن إستراتيجيين في الدولة الإسلامية .. بحيث إن أى حد يحب يلاقي ورق .. مايمشيش كتير 🤣 . . و فضل سر تصنيع الورق ده .. سر حربي عسكري من الدرجة الأولي ( أهم من أسرار القنابل النووية حالياً حرفياً ) . . و ماتمش تسريب السر ده لأوروبا ( عن طريق أسبانيا - الأندلس ) غير بعد فترة طويلة أوي .. و خلال الفترة دي .. كانت أحد أهم المهن في الدولة الإسلامية هي : الكتابة و النسخ .. . و علماء مسلمين كتييييييييير جداً .. في سيرتهم إنهم كانوا بيكتبوا و ينسخوا لحد آخر نفس علي فراش الموت .. لإدراكهم أهمية نشر العلم .. . لكن … لكن لما إخترعت أوروبا ( ماكينة تصوير المستندات 😅) .. قررت الإمبراطورية العثمانية في الوقت ده إن : لااااااااااااااااااااااااااااااا ماكينة طباعة لاااااااااااااااااااااااااااااااا .. و شيوخ و مُفتيين كتير أوي .. طلعوا في التيليفزيونات و السوشيال ميديا بيشرحوا إن إتجاه الدولة هو ( الطباعة حراااااااااااااااااام ) .. إتجاه مناسب و صحيح تماماً 😡… و كل اللجان الإلكترونية وقتها شيرت أخبار حقيقية فعلاً عن ( الإنجيل القليل الأدب - wicked bible 🤣😅 ) .. و اللي كان مطبوع فيه بالغلط : ( Thou shalt commit adultery = يعني روح إزني يابني إنت قاعد ليه ؟! 🤣 ) .. بدل ( Thou not* shalt commit adultery ) . . و إزاي إن مٌصيبة زي دي ماينفعش أساساً نغامر فيها و نحاول نطبع القرآن مثلاً .. . و طبعاً الفتاوي دي كانت علي مزاج مزاج الإمبراطورية العثمانية وقتها .. . لأن فنفس ذات الوقت .. كانت أخبار إنشقاق بريطانيا عن الكنيسة الكاثوليكية ( و تحولها للإتجاه البروتستانتي ) كانت وصلت للرئاسة العثمانية .. و إن أحد أكبر أسباب الإنشقاق ده .. هو الوعي الشعبي نتيجة المنشورات بتاعت ( مارتن لوثر ) .. اللي إنتشرت عن طريق الطباعة . … و علي مدار 350 سنة كاملين تقريباً .. من 1450 ل 1800 .. بتفضل أوروبا تطبع .. و تتعلم .. و تكتشف .. و تترجم .. و تغلط .. و تصلح .. و تتعلم .. و تطبع … و إحنا هنا في العالم الإسلامي .. بنكتب بإيدينا .. لحد سنة 1727 تقريباً .. بيتم السماح لأول مسلم إنه يطبع كتاب بالعربي .. و سنة 1874 .. بيتم السماح بطباعة أول نسخة مطبوعة من القرآن الكريم .. .. متخيل و فاهم ده أدّي لإيه ؟! .. . بالظبط .. أدّي للي إنت شايف كل نتائجه دلوقتي بالكاااااااااامل .. .. إن جاليليو .. نيوتن .. باسكال .. بيرنوللي .. كلود شانون .. آلان تيورنج … و باقي الأسامي دي كلها تكون : أوروبية . … ليه بقي كل الرغي اللي فوق ده مهم فوجهة نظري ؟! . لأن .. العصر الظريف اللي إحنا عايشين فيه حالياً .. مشابه بشكل كبير جداً ل عصر ( جوتنبرج ) .. جوتنبرج .. قدر يخلي أى طفل عنده القدرة إنه يتعلم … مجاناً .. و بكل سهولة .. و علي مدار ال 600 سنة اللي فاتوا تقريباً .. إزدادت المجانية و السهولة دي .. لدرجة ما إنت حالياً في جيب بنطلونك ولامؤاخذة موبايل .. تقدر تقرأ بيه أى كتاب فأى وقت فأي مكان .. .. لكن .. القدرة التنفيذية ؟! .. هي دي اللي محدودة جداً .. من 5 سنين بس .. كان عشان تقدر تنفذ فكرة في ذهنك .. كنت محتاج ( Guild - شلة ) من المستثمرين و المهندسين و الحرفيين .. لكن دلوقتي ؟! دلوقتي تقدر تكتب ( برومبط 😅 ) .. .. القدرة التنفيذية كل يوم ( بسبب ال ai ) بتبقي أسهل و أسهل لأى حد .. مهما كان مكانه .. حتي لو طفل فقير في قرية لا يملك إلا موبايل مستعمل بالعافية . … إيه اللي حيحصل نتيجة ل كده بعد 50 سنة ؟!!!! .. الله أعلم . .. و سؤال كمان … بعد 10 سنين من دلوقتي .. يا تري حاشيّر البوست ده إن شاء الله .. و أقول إيه ؟! . .. الله أعلم .