من شهر تقريباً .. كنت كتبت عدد من البوستات عن

من شهر تقريباً .. كنت كتبت عدد من البوستات عن بعض ملامح تاريخ اليابان .. ضمن سلسلة طويلة بقالي فترة كبيرة باكتب فيها علي فترات متقطعة .. عن تاريخ آسيا عموماً .. و الهدف منها كان التركيز علي تاريخ كوريا و اليابان خصوصاً .. و سبب و كيفية نشأة عالم ال ( K pop ) في كوريا .. و عالم الأنيمي و المانجا في اليابان . و كنت وضحت إن الصين نفسها ( و الثورة الصناعية الصينية ) حيكون أحد أكبر سلاسل البوستات اللي ممكن أكتبها .. لأن مثلاً : لو بدأت الشرح من مرحلة ( قصة شاومي ) .. ف في الكتاب اللي قرأته عنها من 5 سنين .. لقيت إني محتاج أذاكر تاريخ موتورولا بالكامل … و بعد ما عملت ده .. إكتشفت إني محتاج أذاكر تاريخ الصين السياسي .. ثم الديني و الفلسفي .. ثم .. ثم .. ثم .. . ف إلي أن أقرر أى طرف خيط حابدأ أشد منه عشان أفك الكعبلة دي كلها .. الصين حتنتظر 😅 . … المهم .. إن من 3 أسابيع .. لقيت رسالة من أستاذ : Fady H. Mohamed بيوضح لي فيها إنه يبقي إبن الدكتور : هشام محمد عبد الرؤوف … رحمة الله عليه . دكتور الأدب الياباني بجامعة القاهرة و عين شمس و أسوان . حاصل علي ماجستير في الأدب الياباني من جامعة كونان في اليابان . و مؤلف خمس كتب عن الأدب الياباني . . و بيقول إن بعض من الكلام اللي كتبته في البوستات دي .. فكّره ب كلام والده رحمة الله عليه .. و بيهديني نسخ من الكتب دي !!!! . … و ما زال حتي الآن في حياتي .. الكتب .. هي أفضل هدية علي الإطلاق ممكن حد يهاديني بيها .. 😍😍😍 . و الكتب لسة واصلة ليا حالاً .. في الغلاف اللي فعلاً بيعبّر عن الطريقة الوحيدة اللي ممكن تعبّر بشكل وافي عن إمتناني للهدية دي . … و هي : إني أترحّم علي دكتور هشام عبد الرؤوف … رحمة الله عليه . و أطلب من أى حد يشوف البوست ده .. إنه يترحّم عليه و يدعي له .. لأن بإذن الله .. عمله فعلاً لم ينقطع .. الكتب اللي أهداها لي أستاذ فادي .. بعد ما أقرأهم إن شاء الله .. زي باقي كتب مكتبتي .. مش بتفضل أسيرة لرفوف مكتبتي .. و لكن بتكون متاحة لأى حد محتاجها فأى وقت .. و نيّتي إن شاء الله تكون إنها صدقة علم في ميزان حسنات د هشام رحمه الله . . و الكتب ذاتها .. هي علم يٌنتفع به . . و إبنه ما شاء الله .. ولد صالح يدعو له .. و ساعدنا إننا كلنا إن شاء الله ندعي له . … و الله أعلم .