دي سكرين شوت من ال ( tiktok ) اللي بيظهر

دي سكرين شوت من ال ( tiktok ) اللي بيظهر ليا .. لو دققت النظر شوية .. حتلاقي إن في فوق 4 إختيارات مش 3 بس .. في المعتاد .. و أول ما تفتح التيكتوك .. بيكون عندك 3 إختيارات فوق .. هما : ( Explore , following , for you ) ..

و غالباً لو إنت إنسان طبيعي و ماعندكش معلومات بخوارزميات أو برمجة البرنامج بتشتغل إزاي .. فإنت أول ما بتنزل البرنامج بيظهر قدامك شوية فيديوهات ( مُختارة بعناية جداً جداً جداً ) .. هدف الفيديوهات دي هو تحديد التالي :

1- هل إنت راجل ولا ست ؟! 2- هل إنت إنسان بيحب الرجّالة … ولا بيحب الستات ( جنسياً أقصد ) ؟! 3- اللغات اللي بتفهمها . 4- مستوي ثقافتك أو علمك عموماً ( إتخيل درجة من 10 مثلاً ) . . و بعدين بيبدأ يعرض عليك فيديوهات من محيطك الجغرافي ( يعني أولاً من مدينتك و أصحابك و أصدقائك - ده لو إنت إديت له سماح إنه يشوف المعلومات دي ) . . و بعدين يبدأ يشوف المدة الزمنية اللي بتقضيها علي كل فيديو .. حتي لو أجزاء من الثانية .. و يشوف الفيديو اللي عملت له سكرول .. و بعدين رجعت له تاني .. و يشوف الفيديو اللي إتفرجت عليه أكتر من مرة . و اللي عملت له تسريع و اللي عملت له تبطيء و زوووم زيادة علي حتت معينة 🤣😉 . كل المعلومات دي .. جزء صغير جداً جداً جداً جداً .. من اللي بيعرفه عنك ال (tiktok ) خلال أول دقائق في الإستخدام . و دي هي قوة التطبيق ده الحقيقية بالمناسبة .. و اللي ساعده علي الإنتشار الضخم أيام ما نزل . … و عشان كده .. كل مرة عملت فيها أكاونت تيكتوك ( خاص بيا أو خاص ب شغل من الحاجات اللي باحتاج فيها تيكتوك ) .. كنت باقضّي أول ساعة في ( تظبيط - Curating ) الحااجات اللي أنا عايز أشوفها في الأكاونت ده . … و أكاونتي الشخصي ( و اللي حتلاقيني حاطط في التعليقات فيديو لمدة دقيقة باسكرول فيه .. من رابع المستحيلات إنه يطلّع ليا فيديو رقص أو خادش للحياء 🤣 من إياهم ) . برغم إنه كل كام يوم .. يعرض عليا واحد أو إتنين في النص كده .. و يفكّر إني مش حاخد بالي . .أو الفضول يشدّني 🤣🤣 . ليه ؟! لأني مدرك كويس جداً إن اللحظة اللي حاقضّي فيها جزء من الثانية علي حاجة من النوعية دي .. حتتكاثر .. و حتحتل كل الأكاونت عندي . … أما عن الإختيار الرابع بقي .. و اللي هو إسمه ( STEM ) .. ف ده إختصار ل : ( Science -Tech - Engineering - Math = يعني علوم و تكنولوجيا و هندسة و رياضة ) .. و ده فلتر خاص بيعرض لك الفيديوهات اللي في الفئات دي بس .. . و دي خاصية تقدر تفعلها بكل سهولة .. كالتالي : 1- روح علي البروفايل بتاعك و إضغط علي قائمة الهامبورجر ( اللي هو الزرار ده ☰ ) . 2- إختار الإعدادات .. و بعدين روح علي ( Content preferences = تفضيلات المحتوي ) . 3- و فعّل ال ( Stem feed ) . … و ده يخلّي التيكتوك بتاعك عبارة عن فيض من الفيديوهات اللي كلها ( علوم و تكنولوجيا و هندسة و رياضة ) . … و لكن .. فين المتعة بقي ؟! يعني … أنا باتفحت في الشغل أو الدراسة طول اليوم … و بافتح التيكتوك أفك عن نفسي و أضحك علي شوية مقالب و شكراً .. مش ناقص أنا إني أفتح ألاقي درس علوم شغال قدامي .. .. صح ؟! .. لا … غلط … و أكبر غلط … و ظلمك اللي فهمّك كده . … خليني أشرح لك . … كل شيء ممتع في الحياة ف هو ( Acquired taste = يعني طعم بتدرب نفسك علي إنك تحبّه و تتذوقه بإستمتاع ) . . و لكن .. في ( طعوم ) ترتقي بيك .. تخليك بني آدم قيمته في سوق البشر أعلي بكتير .. و ليك وزن .. لأنها بتستهدف الشيء الوحيد اللي ربنا كرّمك بيه عن باقي المخلوقات كلها … و هو عقلك . . و في ( طعوم ) تانية .. سهلة جداً .. رخيصة .. تاخدك و تنزل بيك لتحت .. لأنها بتستهدف الشيء المُشترك بينك و بين كل الحيوانات اللي مالهاش عقل .. ( اللي هو جسمك .. أو إنفعالاتك البدائية ) . . المقالب الرخيصة .. دي بتستهدف إنفعالاتك البدائية .. اللي هي بيتولد بيها الطفل و بنضحّكه لما نخبّي وشنا و نظهر فجأة و نقول ( بخخخخخخخخ = بيكابو 🤣 ) . . لكن لما الطفل ده بيكبر .. و عقله يكبر شوية .. لو فضلنا نعمل له نفس الحركة .. حيستبوخنا أوي .. و يحس إننا بنستعبطه .. صح ؟ … إنت صعب جداً جداً تستمتع ب ماتش شطرنج بين ( ماجنس كارلسن و هيكارو ناكامورا = إتنين من أعظم لاعيبة الشطرنج حالياً ) .. لو إنت أساساً ماتعبتش نفسك عشان تتعلم اللعبة الصعبة دي .. و ماعرفتش مين هما الإتنين دول أساساً .. . لكن أوعدك … بمجرد ما بتتعلم اللعبة الصعبة أوي دي .. و تعرف مين هما الإتنين دول .. و عرفت إن في ماتش بينهم مثلاً .. مهما فضلت أحاول أشدّك ناحية حفلة في الساحل بيغنّي فيها عربجي جنبه غازيّة .. إنت مستحيل تختار العربجي ده .. و حتختار تتفرّج عالماتش .. . ليه ؟! لأنه أصبح بيقدّم لك متعة أعلي بكتيييييييييييير جداً .. … إنت تقدر تتحكم في اللي بتستمتع بيه .. تقدر تتحكم في اللي بيضحكك .. تقدر تتحكم في اللي بترفّه بيه عن نفسك .. . و بمجرد ما تفهم ده .. حيائك حيبقي في أمان من الخدش إن شاء الله 😅 … و الله أعلم .

**** فيديو ل دقيقة من التيكتوك بتاعي في أول تعليق . و فيديو تاني لل ( STEM ) بس في التعليق التاني .