جزء كبير جداً .. جداً .. من طفولتي .. كان

جزء كبير جداً .. جداً .. من طفولتي .. كان المصارعة الحرة . ك طفل بيتنطط عالحيطان حرفياً .. و فاكر إن مثلاً أحد أكبر هواياتي في الحياة طول فترة إبتدائي .. إني كنت أتسلق الدولاب و أنط من فوقه علي السرير 🤣🤣 . ف طبيعي إن المصارعة الحرة ( مصارعة المحترفين ) اللي كانت بتيجي كل جمعة عالتيليفزيون المصري ( أيام القناة الأولي و التانية بس ) .. كانت أحد أكثر البرامج اللي باحبها في الحياة . بابا ربنا يحفظه و يبارك فيه كان بيحبها برضو جداً .. و بالتالي .. دي كانت أحد المتع المشتركة بينا .. هي و أفلام الأكشن . و لما جبنا جهاز فيديو سنة 2002 لأول مرة .. كان أحد أكتر الأنشطة المٌفضلة بالنسبة ليا في الحياة .. هي إني أروح مع أخويا ل عمو بتاع محل شرايط الفيديو .. و نأجر من عنده شرايط فيديو المصارعة .. و دي كانت بتبقي سهرتنا فأغلب ليالي الصيف زمان .. أنا و أخويا و بابا . ماما كانت بتاخد أختي و تسيب لنا الأوضة 🤣🤣 .. لأنها بتكره العنف . … زمااااااااااااااااان .. قبل عصر الإنترنت .. كانت الأساطير جزء ضخم من معلوماتنا عن عالم المصارعة الحرة .. جزء كبير فينا كان مصدق إن اللي بيحصل عالشاشة ده حقيقي .. أصل بأى منطق حد حينط من إرتفاع 8 متر مثلاً .. عشان يضرب مصارع تاني واقع مسطّح علي ترابيزة متهالكة .. و هما الإتنين وشوشهم بتجيب دم من كل أخرامها الطبيعية .. و أخرام غير طبيعية كمان 🤣 … إلا لو كان فعلاً عايز يقتله ؟! . أى منطق يخليني أشك إن ده مش حقيقي ؟! .. و إن فعلاً الإتنين اللي بيضربوا بعض بالكراسي و الشواكيش دول مش بيكرهوا بعض كراهية عمياء تخليهم يعملوا كل ده و أكتر !!! . … لما كبرت و دخلت كلية سنة 2006 .. إهتمامي بالمصارعة إختفي ضمن عشرات الحاجات التانية اللي إختفت جوايا .. و حل محلها إدمان كامل للأنيمي و الفيديو جيمز و الإنترنت . .. لحد من سنة تقريباً .. فاكر إني كنت مستعجل علي تحضير شنطي عشان طيارة .. و كالمعتاد .. أجلت معظم الأولويات 🤣 و دورت علي : أنا عايز أداونلود حاجة أتفرج عليها أثناء الطيارة و الإنتظار في المطار . .. ف ظهر قدامي برنامج وثائقي كان لسة نازل طازة أيامها علي نيتفليكس و هو : mr mcmahon البرنامج اللي بيحكي تاريخ و تفاصيل حياة ( فينس ماكمان ) .. الراجل اللي حرفياً عمل من المصارعة الحرة .. إمبراطورية .. إمبراطورية إمتدت .. لحد محل عمو بتاع شرايط الفيديو اللي كنا بنبدل منه 🤣 … البرنامج ده لما نزل من سنة .. عمل ضجة ضخمة جداً .. لأن فنفس الوقت .. فينس ماكمان ده .. كان في تحقيقات كتير شغالة بقالها فترة في مصايبه .. و تم الحكم فيها .. و بسببها .. تقاعد و ساب منصب الرئاسة في إمبراطورية المصارعة بتاعته .. و حاول يختفي من ضوء الكاميرات بكل الطرق .. .. فينس ماكمان ده .. إنسان قذر .. لا .. قذر دي كلمة هينة جداً .. ده إنسان حقير .. وضيع .. شرير جداً .. مليان بكمية أمراض نفسية خطيرة لا حصر لها .. و مستمتع بكل مرض فيهم جداً .. … إتخيل زي ما خيالك يقدر من مصائب ( أخلاقية و جنسية و إ8تصابات و فضائح شخصية ) .. و حتكتشف إنك برضو لسة ماتخيلتش إلا جزء بسيط جداً .. من اللي كان حياة يومية للكائن ده . .. ك مثال بسيط جداً علي مستوي القذارة .. فينس ماكمان متزوج من زمان و عنده ولد و بنت ( أى حد بيشوف مصارعة عارفهم كويس ) .. لأنهم طلعوا كتير جداً في عروض المصارعة دي . و بنته حالياً هي أحد رؤساء مجلس إدارة الإمبراطورية دي . . ف أحد السيناريوهات اللي تم الشغل عليها فترة ( زي سيناريو إن الأندرتيكر و كين كانوا إخوات مثلاً .. أو سيناريو صداقة و عداوة شون مايكلز و تريبل إتش .. ) .. . كان سيناريو إن : فينس ماكمان مش راضي عن علاقة رومانسية ل بنته مع أحد المصارعين الشباب .. و بسبب عدم رضائه عن العلاقة دي .. إنه بي*تصب بنته .. و إنها بتحمل منه . . ده كان سيناريو بيتم الشغل عليه .. بمرأي و مسمع من كل العالم ده .. … الحقارة و القذارة و المصائب دي .. كانت حياته الطبيعية .. علي مدار سنين و سنين .. من أيام التمانينات .. و لحد السنة اللي فاتت .. ( و ماعتقدش إنها توقفت ) . … لازم هنا أوضح لك شوية نقط مهمة جداً .. جداً .. . 1- زوجة فينس ماكمان .. و اللي كانت عايشة معاه طول عمرها .. و شافت عن قرب كل مصائبه .. بل و إشتركت في سيناريوهات زي اللي لسة شارح أحد أمثلتها فوق .. هي حالياً وزيرة التعليم في أمريكا 🤣🤣🤣 .. آه والله العظيم .. مش باهزر ولا باقول نكتة .. بالمناسبة .. هي ماعندهاش أى مؤهلات للمنصب .. إطلاااااااااااقاً .. و لكن : . 2- فينس ماكمان كان أحد أكتر الشخصيات المُقربة لدونالد ترامب .. جداً .. علي مدار سنين عمرهم هما الإتنين ( الإتنين من نفس السن تقريباً ) . . 3- فينس ماكمان .. و ترامب .. أحد أكتر الأسامي اللي كانت مُرتبطة ب ( جيفري إبستين ) .. اللي كانت وظيفته الأساسية هي إنه يجيب بنات تحت السن القانوني .. و ( ولاد مراهقين ) .. و يصورهم في أفلام جنسية كاملة مع شخصيات مهمة عالمياً ( زي ترامب , و اللي حالياً ملك بريطانيا , و غيرهم كتير جداً ) … و أنا طفل صغير .. كان جزء كبير جداً من الأبطال اللي باتخيلهم و هما بيضربوا ب قوة و شجاعة .. هما :

• الأندرتيكر .

• ستون كولد ستيف أوستن .

• شون مايكلز .

• جولدبيرج .

• ماكنتش باحب تريبل إتش لا 🤣🤣 . .. و غيرهم أسامي تانية كتير .. أى حد شاف مصارعة عارفهم كويس جداً جداً . . لحد النهاردة .. جزء كبير من مشاعري بيتحرك لما باشوف الناس دول .. حتي بعد ما عرفت إن 100% من اللي كان بيحصل عالشاشة .. كله كان تمثيل .. كله كان مُتفق عليه .. كله كان مكتوب له سيناريو مشروح فيه كل ضربة و كل حركة و كل نقطة دم . … و لحد النهاردة .. و علي مدار السنين اللي فاتت كلها .. و فكل اللقاءات اللي إتعملت و بتتعمل مع المصارعين دول .. بيقول فيها أغلبهم :

• أكثر شخص إحنا مدينين بالولاء له في الحياة هو : فينس ماكمان .

• أكثر شخص ممكن نفديه بحياتنا هو : فينس ماكمان .

• أكثر شخص له فضل علينا في الحياة هو : فينس ماكمان . … الناس دي مش بتكدب .. مش بتنافق .. مش بتقول كده عشان منتظرة منه حاجة في المقابل .. . الناس دي فعلاً .. فينس ماكمان بالنسبة لهم .. هو بابا و ماما و أنور وجدي 🤣 . . أغلبهم .. ماعندوش أى شيء له قيمة في حياته غير قوة جسدية .. و كان حيقضي حياته كلها عامل فواعلي بيشيل طوب و زلط .. لحد ما جه حد .. إدالهم شهرة .. و فلوس .. خلي ملايين الأطفال يهتفوا بإسمه . . أغلبهم شاف إزاي فينس ماكمان كان بيقلق عليه لما يتصاب .. بيهتم بيه و بصحته .. بل .. إن كتير منهم كان بيشوف في فينس ماكمان ده .. الأب اللي هو مالاقهوش في طفولته .. أو الأخ الكبير اللي مش موجود . لأن أغلبهم أساساً فعلاً مايعرفش مين أبوه .. لأنه نتيجة علاقات عابرة حصلت في حمام حانة مثلاً . . و مهما حاولت تشرح ل شخص زي ده .. إن فينس ماكمان كان بيهتم بيه و بيديله الحب و الحنان ده كله .. بالظبط بنفس الطريقة اللي إنت بتهتم بيها ب تور أو جاموسة عندك .. لأنه بيؤدي غرض معين لك .. لأنه بالنسبة لك عبارة عن إستثمار فقط . مش حيصدقك .. و حيغضب منك .. و حيضربك .. و ده لأنه ببساطة ماعرفش في حياته أى نوع تاني من أنواع القيمة … إطلاقاً … أنا مش ندمان علي أى لحظة إتفرجت فيها علي مصارعة و أنا طفل .. إطلاقاً . لأن كل ده علمني .. إني أفهم النوعية دي من العقليات .. . ناس .. بالنسبة لملايين هما أبطال .. أبطال أسطوريين كمان .. و لهم قدرة عالية جداً جداً جداً علي التأثير .. و لكنهم بيتبعوا و بيقدسوا و بيمجدوا شخص .. أقرب ما يكون ل شيطان في صورة إنسان . بالرغم من علمهم الكامل بكل مصائبه و قذارته و حقارته .. و لكنهم أصبحوا مرتبطين بيه إرتباط أكبر من مجرد إرتباط مصلحة .. و لكن إرتباط وجودي .. معنوي قبل ما يكون مادي . . و فهمت كمان إني أكون أحمق .. لو فضلت أستثمر عواطفي .. و أشجع أو أغضب و أزعق في شاشة .. بيتعرض عليها سيناريوهات مكتوبة بحرفية و مهارة . . زوجة فينس ماكمان .. ترامب .. و غيرهم من آلاف الأشكال و الشخصيات اللي إنت بتشوفهم علي شاشة تيليفزيون .. ما هم إلا مؤديين .. ممثلين .. محترفين جداً .. بنفس الطريقة اللي كان ” هالك هوجان ” بيمثل بيها بالظبط .. . في ناس ورا الكواليس .. بتكتب .. و تخرج .. و تقبّض الأٌجرية دول في إيديهم . . تشوفهم و تعرفهم إزاي ؟! غير التيليفزيون من علي قناة المصارعة المثيرة جداً دي .. و إفتح قناة الإقتصاد و البيزنس المملة 🤣. … و الله أعلم .