تشبيه مالوش لازمة بس خطر علي بالي دلوقتي

تشبيه مالوش لازمة بس خطر علي بالي دلوقتي .. إمبارح الساعة 5,30 الكهرباء قطعت علي غير عادتها .. لأنها في المعتاد بتقطع 6 .. و فضلت قاطعة 3 ساعات علي غير عادتها … لأنها في المعتاد بتقطع ساعة بس .. .. دلوقتي الساعة 5,40 دقيقة .. و كان المفروض ( بناءاً علي كلامهم إمبارح ) إنها برضو تقطع فنفس الميعاد النهاردة .. و لكنها لسة ماقطعتش .. فبالتالي .. من الساعة 4,30 و أنا مبطل كل الشغل و قاعد باشحن أجهزتي و منتظر .. و من أول اليوم أساساً .. و أنا مرتب نفسي عالقرف ده … الحالة اللي أنا فيها دي .. اللي هي ( أنا مش عارف أعمل إيه لأني مش عارف إيه اللي حيحصل إمتي .. فبالتالي مش عارف أبتدي أو أكمل أى شغل أو لعب أو أى شيء .. و حالة من توقع اللامنطقي و اللامعقول طول الوقت ) .. الحالة دي معتادة جداً بالنسبة ليا .. و بالنسبة لأى حد عنده ( ADHD ) .. .. إنت طول الوقت مش متحكم في إن عقلك يركز فأى شيء .. و فأى وقت أى حاجة حتقطع تركيزك و إنتباهك ( ده لو قدرت تركز ) . و لما بتبقي عارف إن حاجة معينة ممكن تحصل تقطع تركيزك اللي مش عارف تتلم عليه أساساً .. يبقي مش حتعمل أى شيء في يومك ده من الأصل . .. يعني لو عندك مشوار مهم الساعة 8 بالليل .. غالباً يومك بيخلص الساعة 12 الضهر و بتفضل مركز مع مشوارك المهم اللي جاي كمان 8 ساعات 😅 .. .. فدلوقتي أنا قاعد فاتح تيكتوك .. و حتي مش عارف أفتح أى فيديو يوتيوب لأنه ممكن يقطع الكهربا في النص و يفصلني .. .. حتي البوست ده .. باكتبه سطر سطر و مش عارف حاكمله ولا …